Luk 20
20
Hetetamen keil onen Siu keil avit availea isei maen Iesu voumon umen onen
1En avong tai, navong Iesu mul visein meatin keil usil more longlongien onen Ahi en teahu ten Eim Votut, asuv keil onen pris keil, tiser keil ten mengkatien keil onen Mosis, ka elda keil onen Siu keil emun umai veni.#Mat 21:23-27; Mak 11:27-33 2Ka avisi avit, “?Hiteni min komai, isei maenuk kovalikat rasilin meatin keil ran teahu ten Eim Votut enek? ?Ka isei maenuk komul komumon umen keil ekek?”
3Ka Iesu vit kesi min keil vit, “Helamu, mahis kami en tounah tai. Ka munak mihit kesi minau, inau suk nihit kes asa koa mivis inau eni. ?Mihehiteni minau, 4isei maen Sion vahi baptaes en meatin keil, Ahi vuo meatin enges?”#Mat 3:6,11; Mak 1:4,5,8; Luk 3:3,16; Sion 1:25-26; Umen 1:22; 10:37; 13:24; 18:25; 19:3,4
5Ka keil asel min keil eris avit, “?Rehehiten sa varei? Munak rehehit, ‘Ahi maeni,’ kei hehiteni min ir hehit, ‘?Ka vensa mirkurtei anatin en hihiseien onen Sion?’#Mat 21:32 6Ka munak rehehiteni rehehit, ‘Meatin enges maeni,’ vangi meatin keil ekek iov ir, veni keil akur anatin keke Sion vi provet tai onen Ahi.”
7Sakini, keil avit kesi min Iesu avit, “Komai mereingeingen isei maen Sion voumon umen onen.”
8Sakini, Iesu viteni min keil vit, “Hemukonek, inau mun nirvitentei isei maen nau moumon umen keil ekek.”
Iesu viten tatavolien tai usil mahien koa hemai en meatin keil koa apurun koakeil Ahi sila keil#Mat 21:33-46; Mak 12:1-12
9Navong hetetamen keil onen Siu keil amul veah alonge, Iesu viten tatavolien koanik min meatin vasi keil vit, “En avong tai, horetan tai luh neiai tai ten grep en atan osen. Navong luhi evus, kei lingi en hen meatin sav keil keke avalosil kati en rendemien koa keil isa ris tei en heiai keil enek mini. Evus, kei va en out tai koa soutin, ka ro ekonek sua vahis.#Aes 5:1 10Navong horetan enek kilea keke avong mal avalah hei grep koa men, kei sila tai en slev keil onen va keke vahis koakeil talosilkatien keke isan tei en heiai keil koa vi onen kati mini.#2Kron 36:15-16
“Ka navong slev onen va ven keil, amu puruni. Evus, alikati va, ka arsan etai tounah mini. 11Sakini, horetan enek sila slev tai teisav tamun onen va ven keil. Ka navong koakeil talosilkatien alesi, amuas kei mun ka apuruni mulin koa mulamu. Ka kei mun alikati va, ka arsan etai tounah mini. 12Evus, horetan enek sila slev onen koa etel eni va ven keil, ka amuasi va vio … vesesal vamat ka alisi va hae ran neiai enek.
13“Sakini horetan ten nei grep enek rendemi vit, ‘?Numon sa varei? !Ah, nakilea! Nisila natkuli kati heha. Vahesa keil ihouhou suk mini.’
14“Ka navong koakeil talosilkatien enek ales natnali mul mai, keil aselus min keil eris avit, ‘?Milesi? Koanek vi natnali kati koa neiai enek heha en hen. !Rehou vini hemat! !Hemukonek, nei grep ekek hehi oser esuk!’ 15Sakini, keil avuli kati ka alisi va ran nei grep enek. Evus, amu vini mat.”
Navong Iesu viten tatavolien enek evus, les meatin keil ka vis keil vit, “?Mukave? ?Horetan ten nei grep enek houmon sa min meatin talosilkatien keil? 16Kei houmoni hemukok: hemai hou vini keil vasi imat. Hevus, hemaen nei grep osen min meatin sav keil ilosil kat revi.”
Ka navong meatin keil alonge mukok, keil aviteni mini avit, “!Ei, Ahi sakras vamaen koanek vakur out!”#20:16 Siu keil along kilea keke Iesu viteni vit Ahi hesan mahien min avat onen Siu keil, ka heha helekat vangi meatin sav tai keke avalosil kat meatin keil onen.
17Ka Iesu lele mal en keil ka vis keil vit, “Munak hermukteinek, vensa varei Tus Votut viteni vit,
‘Pos koa meatin keil toumien alei seseini,
kei varei mai vi more vatiseng kati ten eim mulin pos sav keil.’ (Sam 118:22)
18 ‘!Koakeil amusavoi eni imot ka asi keil one hemavulvul!
Ka munak vatiseng koanek hemot hemal en meatin tai, meatin enek hemat varei.’” (Aes 8:14-15)
19Navong asuv keil onen pris keil ral min tiser keil ten mengkatien keil onen Mosis alonge mukok, along kilea keke, en tatavolien koa Iesu viteni, avi koakeil alosil kat nei grep, ka Iesu mul selus vakat keil. Sakini, e vati avahuli kati, ka ametaun meatin keil koa amul rahiti lisenges.#Mat 21:46; Mak 12:12; 14:1-2; Luk 19:47-48; 22:2; Sion 5:18; 7:30
Iesu selus en usite ten takis#Mat 22:15-22; Mak 12:13-17
20Veni asuv keil onen pris keil ral min tiser keil ten mengkatien keil onen Mosis ametaun meatin keil, alekat sise keke avakaluvat Iesu en selusien onen. Sakini, asila tei en meatin keil taluvosien keke uva avales Iesu. Koakeil enek uva keke avaluvos visi avi more meatin keil. Veni amundemi keke munak akilea avasakin Iesu vasavoi en selusien onen, akilea avalingi en hen kavmen ten out Rom.#Luk 11:54 21Sakini, meatin keil taluvosien enek umai ven Iesu ka aviteni mini avit, “Tiser, mekilea keke asa keik koviteni ka asa kovisein meatin keil eni mal imok. Mekilea mun keke koles meatin vasi keil vatte tas, koakeil avi hetetamen ral min meatin kuren keil emun. Ka kovisein meatin vasi keil usil sise ten anatinien koa Ahi en vat meatin keil avousili.#Sion 3:2 22Sakini, komai emai vati mevailea koanek ?En usite ten takis keil koa memul mevuli va min Sisa ten out Rom, mengkatien keil onen Ahi mul maen komai mevahuli, vuo romaentei?”#Rom 13:6-7
23Ka Iesu lei kilea luvosien one.#20:23 Munak Iesu hehiteni keke Siu keil anahultei takis keil min kavmen ten out Rom, meatin tavaeen one isoni heha en eim takeih. Ka munak hehiteni keke Siu keil ihul takis keil enek, Siu keil ivuroh kati veni e rovattei kavmen ten out Rom. Sakini, viteni min keil vit, 24“Alsan etai mani koa avul takis eni minau. Alles visi. ?Veinan sei ka isen sei mul ien?”
Ka keil avit, “Onen Sisa.”
25Sakini Iesu viteni min keil vit, “Hemukonek, mihesan asa koa onen Sisa heha ris mini. !Ka asa koa onen Ahi, mihesan risi heha min Ahi!”
26Ka Farasi keil amutimanin varei en meteisauen ten selusien keil onen, sakini aro raeng enges. Ka alesi keke asakras avakaluvat Iesu en selusien keil onen en meten meatin keil.
Satusi keil avis Iesu usil avong koa meatin keil imoul eris ran matien#Mat 22:23-33,41-46; Mak 12:18-27,35-37
27Evus, tei en vangi Siu keil koa avise keil en ‘Satusi’ umai ven Iesu keke avakaluvati en selusien. Keil amundemi keke meatin sakras vamoul eris ran matien. Sakini aviteni min Iesu avit,#Umen 23:8 28“Tiser, Mosis mutis mengkatien koanik orer: ‘Munak meatin tai mat ka lokovein ahin onen ka titaealu tovuol, tamun en tunali keil hetetalihe hetal min vatina onen. Hesakini, kei hesan titiali tai mini keke hekur isen tunali koa mat tuai.’ (Dut 25:5)#Sen 38:8 29Ka en avong tai, time oulu (7) amul en vatiamal tai. Koa moeite en keil kur ahin tai. Luro vituai sua vahis, ka lurkurtei titiali keil. Evus, moeite enek mat. 30Sakini, tunali koa katau eni retalihe ral min vatina onen. Ka kei mun mat, ka titiali onealu tovuol. 31Sakini suk, tunali koa etel en keil retalihe ral mini. Ka kei mun mat, ka titiali onealu tovuol. Sakien koanek kur out en time oulu (7) vasi keil. Keil vasi umat ka titae tovuol. 32Ka katau suk, ahin enek emun mat. 33?Sakini, en avong koa Ahi houmon meatin keil imoul eris ran matien, ahin enek hehi ahin onen sei, veni time oulu (7) vasi enek aretalihe ral mini?”
34Ka Iesu vit kesi min keil vit, “En out netan ekek, meahos keil ka ahin keil akilea avatetalihe. 35Ka en avong keil koa hemai, koakeil Ahi vit amal en meten keke avato vatal mini en out nesa navong imoul eris ran matien, keil irtetalihetei mun. 36Keil imai isuval angelo keil koa asakras avamat. Ka navong meatin keil imoul eris ran matien, hetie lati keke avi titan Ahi.#Kal 4:5-7 37Ka Mosis emun vit kilea keke koakeil umat, keil amul amoul eris ran matien. En tunien usil holeai koa ahang mul ien ka rokan lintei, Mosis mutisi keke Ahi Asuv viteni vit, ‘Inau navi Ahi onen Ebraham, Ahi onen Aesak, ka Ahi onen Siekob.’ (Eks 3:6) 38?Milonge? Avaseini telmat tuai, telmul telmoul eris en meten Ahi en out nesa. Ahi mul moul, ka kei vi Ahi onen koakeil amoul, rovitei Ahi onen koakeil umat. Veni, en meten, meatin vasi keil onen amul amoul.”#Rom 14:8-9
39Navong tei en tiser keil ten mengkatien keil onen Mosis along hitkileaen onen Iesu aviteni mini avit, “Tiser, selusien koa kosani min keil mal varei.” 40Sakini, katau en koanek, hetetamen keil onen Siu keil ametau avahisi en etai mun tounah.
41Evus, Iesu vis hetetamen keil onen Siu keil vit, “?Mukave? ?Mesaea hekistal heka en vatiamal onen asuv houlu Deved hemukave? 42Veni Deved varei viteni en sam tai onen vit,
‘Iahova viteni min Asuv onak vit,
“Kitondan en usite matu onak,
43 hetokol avong koa niling vativieh keil onom en hem.”’ (Sam 110:1)
44?Milonge? Asuv houlu Deved varei vise Mesaea en ‘Asuv onen.’ ?Ka veni tata tai sakras vahise natnali en ‘asuv,’ Mesaea heka en vatiamal onen Deved hemukave?” #20:44 Anatin keke Mesaea heka en vatiamal onen asuv houlu Deved. Ka veni kei vise Mesaea en asuv, rie lati keke Mesaea vi houlu eni, ka vahesa mul telamu eni.
Iesu selus keih va kat tiser keil ten mengkatien keil onen Mosis#Mat 23:1-2,5-7; Mak 12:38-40
45Navong meatin keil amul semau along selusien onen, Iesu sel kat meatin keil onen vit, 46“Mihelei kat revi kami ven sakien keil onen tiser keil ten mengkatien keil onen Mosis. Veni keil e vati avasin en more eisin keil tetaveah vasuval hetetamen keil. Keil amusin en keil mukok ka amul amual en out tahulhulien keke mesav keil akilea avales keil ka avahise keil vatal min houhouen. Ka navong uva en eim keil tahihiseien ka mari ale keil, keil alekat out keil tetahos avatondan ien vatie lat hetetamenien one. 47Amul amumon hisien keil koa tetaveah keke meatin keil aval avandemi keke keil amal revi. Ka keil avi metenan, ka akur tounah houlu ran vatina keil. !Hesakini, mahien koa hemai min keil hemariso mok helin mahien koa hemai en meatin teisav keil!”
S'ha seleccionat:
Luk 20: pma
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.