ལུ༌ཀ༌ 21
21
ཨ༌ནེ༌མ༌རང༌མོའི༌ བུལ༌ལྡུས༌།
21:1-4
1གཙོ༌བོ༌ ཡེ༌ཤུའི༌ ཆོད༌ཁང༌ངི༌ ནང༌ང༌ ཡོད༌ཏུས༌ མི༌ ཆུག༌པོ༌གུན༌ནི༌ བུལ༌ལྡུས༌སི༌ སྒམ༌མི༌ ནང༌ང༌ ཁོ༌རང༌གུན༌ནི༌ བུལ༌ལྡུས༌ ཕུལ༌ཨིན༌ ཟིགས༌། 2ཁོང༌ངི༌ ཉལ༌བ༌ཅན༌ ཨ༌ནེ༌མ༌རང༌མོ༌ ཞིག༌གི༌ ཟངས༌སི༌ པེ༌ནེ༌ ཉིས༌ ཕུལ༌ཁན༌བོའང༌ ཟིགས༌།
3ཁོང༌ངི༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, ཞན༌ ཚང༌མའེ༌ སང༌ འི༌ ཨ༌ནེ༌མ༌རང༌མོ༌ ཉལ༌བ༌ཅན༌བོའེ༌ མང༌ང༌ ཕུལས༌, 4ཅིའ༌ཟེར༌ན༌ མི༌ཚང༌མའེ༌ ཁོ༌རང༌གུན༌ལ༌ མང༌པོ༌ ཡོད༌ཁན༌ནི༌ ནང༌ནེ༌ ཉུ༌ངུན༌ཞིག༌ ཏངས༌, ཨིན༌ནའང༌ འི༌ ཨ༌ནེ༌མ༌རང༌མོ༌བོའེ༌ ཉལ༌བ༌ཅན༌ ཨིན༌ཏེའང༌ ཁོ༌ སོན༌ཏེའ༌ ལུས༌ཤེས༌སི༌ སྒོས༌དོམ༌ ཡོད༌ཁན༌ ཚང༌མ༌ ཏངས༌།”
ཐའ༌མའེ༌ ཏུས༌སི༌ སྟགས༌གུན༌།
21:5-38
5གཙོ༌བོ༌ ཡེ༌ཤུའི༌ ལོབ༌ཕྲུགས༌ ཁ༌ཅིག༌གི༌ ཆོད༌ཁང༌ ཧ༌ལས༌ཤེས༌ རྩིགས༌ཏེ༌ རིན༌ཅན༌ རྡོའ༌གུན༌ ཡང༌ མི༌གུན༌ནི༌ དཀོན༌མཆོག༌ག༌ ཕུལ༌ཁན༌ནི༌ སྟགས༌གུན༌ ཉམ༌པོ༌ མ༌ ལྡེ༌མོ༌ ཅོས༌ཏེ༌ ཡོད༌ཁན༌བོའེ༌ སྐོར༌ལ༌ སྤེ༌ར༌ ཏང༌ཨིན༌ ཡོད༌ ཟ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, 6“ཁྱོ༌ཞ༌གུན༌ནི༌ འི༌བོ༌ ཐོང༌དུག༌ག༌? ཏེ༌ཏུས༌པོའང༌ ལེབ༌ཨིན༌ ནམ༌ འི༌ རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌, ཚང༌མ༌ ཤིག༌ཨིན༌།”
7ཁོང༌གུན༌ནི༌ ཁོང༌ང༌ ཏྲིས༌, “ལོབ༌བོན༌ལེ༌, ཏེ༌བོ༌ ནམ༌ ཇུང༌ཨིན༌, ཡང༌ ཏེ༌གུན༌ དྲན༌དྲ༌ གྲུབ༌ཅེས༌སི༌ སྟགས༌ ཀ༌ཟུག༌ རིག༌ ཡོང༌ཨིན༌?”
8ཡེ༌ཤུའི༌ ལན༌སལས༌, “སུ༌ཞིག༌གིའང༌ ཁྱོ༌ཞའ༌ གོབ༌སྐོར༌ ཏང༌མི༌ཅུག༌ཅེས༌ལ༌ ཤང༌ ཅོས༌, ཅིའ༌ཟེར༌ན༌ ངའེ༌ མིང༌ ཁུར༌ཏེ༌ ‘ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ ཡང༌ ཏུས༌པོ༌ ཉེ༌མོ༌ དུག༌’ ཟེར༌ཁན༌ མང༌པོ༌ ཡོང༌ཅེན༌། ཁོང༌གུན༌ནི༌ སྟིང༌རང༌ནེ༌ མ༌ཆ༌། 9མག༌ དང༌ ཝང༌སྲུལ༌པ༌ ངོ༌ལོག༌ ཅོ༌ཅེས༌གུན༌ ཚོར༌ར༌ཅིག༌ ཇིགས༌ མ༌ཇིགས༌། གོ༌མ༌ ཏེ༌གུན༌ ཇུང༌གོས༌ ཨིན༌ནའང༌ ཐའ༌མའེ༌ ཏུས༌ ཏ༌རུང༌ མི༌ལེབ༌།” 10ཏེ༌ནེ༌ ཁོང༌ངི༌ ཁོང༌གུན༌ལ༌ མོལས༌, “གྱལ༌ཁམས༌ ཅིག༌ དང༌ ཅིག༌གི༌ ཡང༌ གྱལ༌སྲིད༌ ཅིག༌ དང༌ ཅིག༌གི༌ གྱབ༌གལ༌ལ༌ མག༌ ཏང༌ཨིན༌། 11ནས༌ས༌ མང༌པོའེ༌ ནང༌ང༌ མུ༌གེ༌, སང༌གུལ༌ དང༌ ཇར༌ནད༌ གུན༌ ཡོང༌ཨིན༌, ཡང༌ ནམ༌ཁའེ༌ ནང༌ང༌ ཇིགས༌ནང༌ཅན༌ནི༌ ལྟས༌གུན༌ དང༌ ཀྲག༌པོ༌ སྟགས༌གུན༌ ཇུང༌ཨིན༌།”
12“ཨིན༌ནའང༌ ཏེ༌གུན༌ ཇུང༌ངི༌ སང༌ སྔུན༌ལ༌ ངའེ༌ཀ༌ ཏད༌པ༌ ཅོ༌ཅེས༌པོའེ༌ ཁོང༌གུན༌ནི༌ ཁྱོ༌ཞའ༌ ཟུམས༌ཏེ༌ ནགས༌ སྟན༌ཨིན༌, དུ༌ཁང༌གུན༌ནི༌ ནང༌ང༌ ཁྱེར༌ཏེ༌ ཙོན༌ཁང༌ང༌ ཀག༌ཨིན༌ ཡང༌ ཁྲིམས༌ཅད༌ད༌ལ༌ ཀའ༌ལོན༌ དང༌ གྱལ༌པོ༌ གུན༌ནི༌ཀ༌ ཁྱེར༌ཨིན༌། 13ཏེ༌ཏུས༌ ཁྱོ༌ཞའ༌, ངའ༌ སུ༌ ཨིན༌ཁན༌བོའེ༌ སྤང༌པོ༌ ཁོང༌གུན༌ལ༌ ཏང༌ཅེས༌སི༌ སྐབས༌ ཐོབ༌ཨིན༌། 14ཨིན༌ནའང༌ ཁོང༌གུན༌ནི༌ དུན༌ལ༌ ཁྱོ༌ཞའ༌ ནོངས༌མེད༌ ཀ༌ཟུག༌གི༌ སྟན༌ཨིན༌ སམས༌ཏེ༌ སྔུན༌ལ༌ ཚེར༌ མ༌ཚེར༌། 15ཅིའ༌ཟེར༌ན༌ ངའེ༌ ཁྱོ༌ཞ༌གུན༌ལ༌ ཏེ༌ཟུག༌ སྤེ༌ར༌ དང༌ ཤེས༌རབས༌ ཏང༌ཨིན༌, ཁྱོ༌ཞའེ༌ གྲ༌འོ༌ སུ༌ཞིག༌གའང༌ ཏེ༌བོའ༌ གྱབ༌གལ༌ ཡ༌ ལན༌ ཏང༌ མི༌ཉན༌། 16ཕ༌མ༌, ཨ༌ཅོ༌ནོ༌, ཉེན༌ དང༌ ཛ༌འོ༌ གུན༌ནིའང༌ ཁྱོ༌ཞའ༌ ངོ༌ལོག༌ ཅོས༌ཏེ༌ ཁྱོ༌ཞ༌ ཁ༌ཅིག༌ སད༌ཅུག༌ཨིན༌། 17ཁྱོ༌ཞའ༌ ངའེ༌ཀ༌ ཏད༌པ༌ ཅོ༌ཅེས༌པོའེ༌ མི༌ཚང༌མའེ༌ ཁྱོ༌ཞའ༌ ནཕ༌རད༌ ཅོ༌ཨིན༌། 18ཇིག༌ མ༌ཇིག༌ཤིག༌ ཁྱོ༌ཞ༌གུན༌ནི༌ གོའི༌ སྲ༌ཉག༌ ཅིག༌གའང༌ མེད༌ཁན༌ ཆ༌ཅུག༌ག༌ མི༌ཛད༌། 19ངའེ༌ ནང༌ང༌ སྟན༌པོ༌ དུག༌ན༌ ཁྱོ༌ཞའ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།”
20“ཁྱོ༌ཞའེ༌, ཡེ༌རུ༌ཤ༌ལེམ༌མི༌ གྱལ༌ས༌ མག༌མི༌གུན༌ནི༌ སྐོར༌ཏེ༌ ཐོང༌ང༌ཅིག༌, ཏེ༌བོ༌ མེད༌ཁན༌ ཆ༌ཅེས༌སི༌ ཏུས༌ ཉེ༌མོ༌ ལེབས༌ཏེ༌ ཨིན༌ཁན༌བོ༌ ཤེས༌གོས༌། 21ཏེ༌ནེ༌ ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ དུག༌ཁན༌གུན༌ རི༌གུན༌ལ༌ ཤོར༌གོས༌, ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌གུན༌ ཕི༌ལོག༌ག༌ བིང༌གོས༌, ཡང༌ ཕི༌ལོག༌ག༌ ཡོད༌ཁན༌གུན༌ གྱལ༌སའེ༌ ནང༌ང༌ ལོགས༌ཏེ༌ ཆ༌ མ༌གོས༌ 22འི༌ཏུས༌པོ༌ ནི༌ དཀོན༌མཆོག༌གི༌ ཆད༌པའེ༌ ཏུས༌ ཨིན༌, ཏེ༌བོའེ༌ ཏམ༌པའེ༌ སུང༌རབས༌སི༌ ནང༌ང༌ བྲིས༌ཁན༌ ཚང༌མ༌ གྲུབ༌ཨིན༌། 23ཏེ༌ཏུས༌ལ༌ སྐྱེ༌ཅེས༌མ༌ དང༌ ཕྲུ༌གུའ༌ པི༌བི༌ ཏང༌ཁན༌ནི༌ ཨ༌མ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌, འི༌ ནས༌སའེ༌ ནང༌ང༌ རྡུག༌ངལ༌ ཀྲག༌པོ༌ ཇུང༌ཨིན༌, ཡང༌ འི༌ མི༌གུན༌ནི༌ཀ༌ ཐུགས༌སྲོ༌ ཀྲག༌པོ༌ བབས༌ཨིན༌། 24གྲ༌འོའེ༌ མག༌མི༌གུན༌ནི༌ ཁོང༌གུན༌ སད༌ཨིན༌ ཡང༌ ཞན༌ གྱལ༌ཁམས༌ ཚང༌མའེ༌ ནང༌ང༌ ཙོན༌པ༌ ཅོས༌ཏེ༌ ཁྱེར༌ཨིན༌, ཡང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཡེ༌རུ༌ཤ༌ལེམ༌པ༌གུན༌ ཝང༌ངི༌ ཡོག༌ག༌ ནན༌ཏེ༌ བོར༌ཨིན༌ ནམ༌ ཚག༌པ༌ ཁོང༌གུན༌ནི༌ ཏུས༌པོ༌ ཚང༌ མི༌ཚང༌།”
25“ཉི༌མ༌, ཟླ༌ཝ༌ དང༌ སྐར༌མ༌ གུན༌ནི༌ ནང༌ང༌ སྟགས༌གུན༌ ཐོང༌ཨིན༌། གྱ༌ཚོའེ༌ སྐད༌ ཀྲག༌པོ༌ དང༌ ཆུལ༌བག༌ ཆེན༌མོ༌ ལང༌ཅེས༌པོའེ༌ ཇིག༌རྟེན༌ནི༌ཀ༌ གྱལ༌ཁམས༌ ཚང༌མའེ༌ མི༌གུན༌ ཇིགས༌ཏེ༌ ཅིག༌ ནང༌ ཅིག༌ག༌ ཅི༌ ཇུངས༌ཏེ༌ ཨིན༌ནོག༌ ཟེར༌ཏེ༌ ཏྲི༌ཨིན༌། 26དཀོན༌མཆོག༌གི༌ ནམ༌ཁའེ༌ ཝང༌གུན༌ སྲུག༌ག༌ ཛད༌ཁན༌བོ༌ ཐོང༌ང༌ཅིག༌ ཇིག༌རྟེན༌ནི༌ཀ༌ ཅི༌ ཇུང༌ཨིན༌ སམས༌ཏེ༌ ཇིགས༌ནང༌ངི༌ ནང༌ང༌ མི༌གུན༌ མུན༌ཨིན༌། 27ཏེ༌ནེ༌ ཁོང༌གུན༌ནི༌ མི༌རིགས༌སི༌བུ༌ ཝང༌ དང༌ ཟིར༌རྗིད༌ ཀྲག༌པོ༌ ཉམ༌པོ༌, སྲིན༌ནི༌ཀ༌ ཞོན༌ཏེ༌ ཡོང༌ང༌ ཐོང༌ཨིན༌། 28ཏེ༌གུན༌ ཇུང༌ང༌ ཐོང༌ང༌ཅིག༌, ལངས༌ཏེ༌ གོ༌ སྟོགས༌ཏེ༌ ཀེན༌ལ༌ ལྟོས༌ ཅིའ༌ཟེར༌ན༌ ཁྱོ༌ཞའེ༌ ཐར༌པ༌ ཉེ༌མོ༌ ལེབས༌ཏེ༌ ཨིན༌ནོག༌།”
29ཏེ༌ནེ༌ ཡེ༌ཤུའི༌ ཁོང༌གུན༌ལ༌ འི༌ རུངས༌པོ༌ ཤད༌ད༌ ཛདས༌, “ཕིག༌ ཁ༌ཟས༌སི༌ ལྕང༌མ༌ དང༌ ལྕང༌མ༌ ཚང༌མ༌ ལྟོས༌། 30ཏེ༌གུན༌ལ༌ ལོ༌མ༌ བིང༌ང༌ཅིག༌, ཁྱོ༌ཞའ༌ ཡར༌ ཉེ༌མོ༌ ལེབ༌ཁན༌བོ༌ ཤེས༌ས༌ནོག༌། 31ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཏེ༌ སྟགས༌གུན༌ ཐོང༌ང༌ཅིག༌, ཁྱོ༌ཞའེ༌ དཀོན༌མཆོག༌གི༌ གྱལ༌སྲིད༌ ཉེ༌མོའ༌ ལེབས༌ཏེ༌ ཡོད༌ཁན༌བོ༌ ཤེས༌ཨིན༌། 32ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ མི༌རབས༌པོ༌ མེད༌ཁན༌ ཆེ༌ སང༌ སྔུན༌ལ༌ ཏེ༌ ཚང༌མ༌ ཇུང༌ཨིན༌། 33ནམ༌ཁའ༌ དང༌ ཇིག༌རྟེན༌ ཉིས༌ཀོ༌ མེད༌ཁན༌ ཆེན༌, ཨིན༌ནའང༌ ངའེ༌ ཟེར༌ཁན༌གུན༌ མེད༌ཁན༌ མ༌ནེ༌ མི༌ཆ༌།”
34“གྲོན༌ ཏང༌ཅེས༌ དང༌ ར༌རོས༌ཤེས༌ དང༌ འི༌ མི༌ཚེའེ༌ ཚེར༌ཁ༌གུན༌ནི༌ ཁྱོ༌ཞ༌གུན༌ནི༌ སེམས༌ དཀོན༌མཆོག༌ནེ༌ ཐག༌རིང༌ང༌ མི༌ཁྱེར༌ཅེས༌ལ༌ ཤང༌ ཅོས༌། ཏེ༌ཟུག༌ མ༌ཅོ༌ན༌, ཏེ༌ ཞག༌པོ༌ ལེབས༌ཏེ༌ ཧུན༌མེད༌ལ༌ ཁྱོ༌ཞ༌གུན༌ ཁད༌ཨིན༌, 35ཏེ༌ ཞག༌པོ༌ ཇིག༌རྟེན༌ནི༌ཀ༌ མི༌ཚེ༌ ཕུད༌ཁན༌ ཚང༌མའེ༌ཀ༌ བབས༌ཨིན༌། 36ཏུས༌གྱུན༌ ཤང༌ ཅོས༌ཏེ༌ དུག༌ ཡང༌ འི༌ ཇུང༌ཅེས༌ཅན༌ནི༌ ནས༌ལུག༌ ཚང༌མ༌ནེ༌ ཐར༌ཅེས༌ དང༌ མི༌རིགས༌སི༌བུའི༌ དུན༌ལ༌ ཇིགས༌ མ༌ཇིགས༌ས༌ ལངས༌ཏེ༌ དུག༌ ཐུབ༌ཅེས༌ལ༌ མོས༌ལམ༌ ཞུས༌།”
37ཡེ༌ཤུའི༌ ཞག༌ཏང༌ ཆོད༌ཁང༌ང༌ ལབ༌ཞ༌ སལ༌ལ༌ ཛདས༌ ཡང༌ ཕི༌ཏོག༌ བིང༌ཏེ༌ ཨོ༌ལིཝ༌ཝི༌ རི༌ ཟེརས༌སའེ༌ ནས༌ས༌ སྐྱོད༌ཏེ༌ ཚན༌ལ༌ ཞུགས༌ས༌ ཛད༌དད༌པིན༌། 38ཡང༌ མི༌ཚོགས༌ ཞག༌ཏང༌ མ༌ ང༌མོ༌ནེ༌ ཁོང༌ངི༌ ལབ༌ཞ༌ ཉན༌ན༌ལ༌ ཆོད༌ཁང༌ང༌ ཡོང༌ངད༌པིན༌།
S'ha seleccionat:
ལུ༌ཀ༌ 21: lbj
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.