Genesis 24
24
Iqmoeq 24
Ilcav nail galduq khaqma hal pov bhiq-a nail ganl
1Aqbhaqlaqhaq neq, joiqmaoq maoq lai khi aqkovq jiav lal-aoq nail ngaol. Heeqphaq Miqyail neq, aivq bhai iqsanl phao nee, geeqlaoq bivq gil-a nail ngaol.
2Teevq n neq, aivq nail ildaoq maoqgaiq bhai hel daiq phail nail yaqkav aqivq teevq gaq bhai khul khi ge bhiq-a nail: "Naoq nail aqlavq ngaq nail aq phaq ivqgovq bhai tsaoq bhoel khi khanq yaoq.
3Naol neq, ngaq nail yaqyov nail haqbhoil aivq nail khaqma neq, niai khe Khaqnanq nail yaqmai-aq jaol nail lavqkhoel bhai maq hal pov-ail dai, nqtavq khi miltsaq bhai teivq-a nail Heeqphaq Miqyail bhai juq khi khanq yaoq.
4Ngaq bhai bhao-a nail jaolduq bha kovq-ail khi, ngaq nail jeq-e nail lavqkhoel khe ngaq nail yaqyov Ilcav nail haqbhoil khaqma teevq gaq hal pov ail yaoq" dai, ge bhiq-a nail ngaol.
5Aq-u phao, yaqkav al gaq ge nail: "Yaqmai-aq yaqnoil al gaq aivq nail ilkhaol bhai khaonq ha-ail ceevq khi, ngaq-ai nee mail maq tsao thel lavq lavq haq neq, ngal khal hai ya khi nail-aiq. Naoq nail yaqyov bhai naoq-i mail jaol daiq-a nail jaolduq bhai ya hel-aivq naol laiq" dai, nal daiq bhiq-a nail ngaol.
6Aqbhaqlaqhaq ge nail: "Jaolduq al duq bhai ngaq nail yaqyov hevq khi mail, maq ya hel-aivq-ail.
7Khul khi mail dai ngal-aq, nqtavq kovtavq khe jaol nail Heeqphaq Miqyail neq, ngaq bhai, ngaq nail aqbhu nail ilkhaol nee maqkhaiq, ngaq nail jeq-e nail jaolduq nee maqkhaiq, khul dov lavq khi, jaolduq niil tsaol ngaq-ai nee yavq kha lee thaq nail yaq juq bhai bivq naol dai, saljial jaq gaq lavq-ao nail ngaol. Naol neq, ngaq nail yaqyov nail haqbhoil khaqma hal pov ya kivq dai, Miqyail neq, aivq nail nqtavq gaqkhoel bhai naoq nail iqmoeq nee, phaiq gai-aivq-ao nail ngaol.
8Maq yeivq-ail khi yaqmai-aq al gaq naoq-ai nee mail maq tsao thel lavq movq haq neq, naoq-i mail jaq-ai thaq nail saljial daoq bhi peivq ail nail ngaol. Thail hai ngaol-aoq, khul nail ganl kev lal khi mail ngaol-aoq, ngaq nail yaqyov-ai, al bhai maq ya hel-aivq-ail" dai, ge bhiq-a nail ngaol.
9Al heel ngel-i mail, Aqbhaqlaqhaq nail yaqkav neq, aivq nail aqphaq ivqgovq bhai aqlavq tsaoq bhoel khi mail, khal khoel lavq-a nail khe-ai, nl naol dai, khanq-a nail ngaol.
10Yaqkav al gaq neq, aivq nail ilheel nail laolthao juq nail lavqkhoel khe tsel maol oil-a nail nee ovqtavq, aivq nail ilheel jaol nail nee, aqphoiq kav nail yalkav yaoq phaq yaoq-ao nee deiv bhee khi, Aqlanq Naqhaqlinq nail milkhaoq lavqkhoel bhai jiav nail Naqhaoq-i mail jaol nail meenq bha gailkhaol dov ail-a nail ngaol.
11Jaolduq al duq bhai yaqkav al gaq ail kev-u phao, meenq nail lavqniil phao jiav nail lovduq nail aqjail bhai aqyu juq nail laolthao bhai peevqceevq kovdoiq bhi doiq khi mail, yavq kha lee-a nail ngaol. Aqyanq al yanq neq, kivqhail hail lee-aoq nail nee ovqtavq, meenq khe yaqmai-aq juq dov lee khi, ulcuvq keivq lee nail aqyanq pevq nail ngaol.
12Aq-u phao, aivq niail hai geeqlaoq hal-a nail ngaol: "Heeqphaq Miqyail-ol, ngaq nail ilheel Aqbhaqlaqhaq nail Miqyail-ol, ngaq nail ilheel Aqbhaqlaqhaq bhai gaoq haq gaiq-a nail lavqkhoel nee, ngaq-i mail ya lee-a nail ganl nee mail tavq lai khi bhi gaq lai lavq dei-eiq.
13Niil aq-il ngal neq, ulcuvq lovduq nail aqjail bhai, thul phaol-nvq thaq khi, meenq lavqkhoel khe yaqmai-aq yaqnoil juq iqsanl, ulcuvq keivq lee nail dai khi, lee thail thaiq nail ngaol.
14Aqyu juq nail lavqkhoel khe teevq gaq bhai 'Naoq nail ulcuvq eelpheeq khe ulcuvq bhi daol lavq-o' dai, ngal hal bhiq naol. Aq-u phao, yaqmai-aq yaqnoil al gaq 'Daol yaoq. Naoq nail laolthao juq nail haqbhoil gail, ulcuvq keivq bhiq nail ngaol' dai, ge lal nail yaqmai-aq yaqnoil al gaq neq, naoq nail yaqkav Ilcav nail haqbhoil, naoq-i mail tsel dov-ai thaq nail gaq bhi pevq yaoq. Ngaq-i mail ge nail khe-ai, pevq lal haq neq, ngaq nail ilheel gaq bhai naol gaoq haq gaiq-a bhiq-a nail ngaol dai, ngal heeq kivq nail ngaol" dai, geeqlaoq hal-a nail ngaol.
15Aivq-i mail geeqlaoq hal nail maq gaq lai dan dai, Leiqbhailkavq dai khul nail yaqmai-aq yaqnoil teevq gaq neq, ulcuvq eelpheeq aivq nail bavqpuv bhai tsiq dav-aivq laivq khi kev lee-a nail ngaol. Aivq neq, Aqbhaqlaqhaq nail jaqbheq Naqhaoq nail khaqma Millaqkhaq nail yaqyov Bheiqthuqlav nail yaqmiq ngaol.
16Aivq neq, al jaiq-ail hel daiq meeq nail yaqmai-aq yaqnoil teevq gaq pevq khi, yaqyov-aq nee maq jaol tavq daiq haq-al. Aivq ulcuvq lovduq bha yavq kha lee khi, aivq nail eelpheeq bhai ulcuvq keivq bhee gaq-al nee ngal-aq, gaoq dav lal-a nail ngaol.
17Yaqkav al gaq yaqmai-aq yaqnoil jaol nail bha lavqtsail mail tsaol-aivq khi ge bhiq-a nail: "Naoq nail eelpheeq khe ulcuvq micil bhi daol lavq-o" dai, hal bhiq-a nail ngaol.
18Yaqmai-aq yaqnoil al gaq neq: "Aqbhal-ol, daol yaoq" dai, ge khi aivq nail bavqpuv khe eelpheeq lavqtsail mail tsiq kha nail nee ovqtavq, aivq bhai bhi daol-a nail ngaol.
19Aivq bhai ulcuvq bhi daol gaq-u phao, yaqmai-aq yaqnoil al gaq ge nail: "Naoq nail laolthao juq iqsanl ulcuvq teevq bov ya daol nia dai, ngal ulcuvq keivq bhiq nail ngaol" dai, ge bhiq-a nail ngaol.
20Yaqmai-aq yaqnoil al gaq aivq nail ulcuvq eelpheeq khe aol nail ulcuvq bhai, ulcuvq bhi daol nail laoqkhaiq bhai laoq bhoel ail ceevq khi, laolthao juq ulcuvq maq khal daol bov-u kev dai, ulcuvq lovduq khe ulcuvq keivq khi tsiq kheel bhiq-a nail ngaol.
21Yaqkav al gaq gail, Heeqphaq Miqyail neq, aivq-i mail lee-a nail ganl bhai bhi pevq lai lavq nail meeq, maq bhi pevq lai lavq nail meeq dai, aqtsiq tsu dai, daonq khi hel daiq-a nail ngaol.
22Yaqmai-aq yaqnoil al gaq, laolthao al juq bhai ulcuvq bhi daol gaq thaq-al nee ngal-aq, yaqkav al gaq neq, ngaq muq bhee nail nalbhaoq bhai deivq nail heel nail naqdev dai khi, sivq bavq bhee nail heel nail lavqceiv teevq gu, aivq bhai bhi goe-a nail ngaol.
23"Naol neq, khaq sil gaq nail yaqmiq pevq nail-aiq. Ngaq bhai ge lavq yaoq. Naoq nail aqbhu nail ilkhaol bhai nv juq nail galduq gaq naq naq nail aqduq ya kivq naol laiq" dai, nal daiq bhiq-a nail ngaol.
24Yaqmai-aq al gaq ge nail: "Ngal neq, Naqhaoq dai khi Millaqkhaq nail aqjievq, Bheiqthuqlav nail yaqmiq ngaol.
25Nv juq nail ilkhaol bhai jaiqyaq nail galduq govheeq jialmuv dai khi, jaq nail phaq mao dai jiav nail ngaol. Nul juq iq thaiq nail haqbhoil jaolduq gail jiav nail ngaol" dai, ge kovq bhiq-a nail ngaol.
26Aq-u phao, yaqkav al gaq neq, uqhuq thaoq kovq khi Heeqphaq Miqyail bhai tsiq eeq-a nail ngaol.
27Aivq ge nail: "Ngaq nail ilheel Aqbhaqlaqhaq nail Heeqphaq Miqyail bhai tsiq eeq nail ngaol. Heeqphaq Miqyail neq, ngaq ilheel bhai gaoq haq gaiq-a nail lavqkhoel nee, saljial ivq khi, ngaq bhai aivq nail jeq-e jaol nail bha daol coev dai, hevq ha lavq-ao nail ngaol" dai, ge nail ngaol.
28Yaqmai-aq yaqnoil al gaq gail, aivq nail aqma nail ilkhaol bha tsaoq kol laiq khi khal pevq lal-a nail ganl iqsanl mail, ge bhiq lai-a nail ngaol.
29Leiqbhailkavq bhai Laqbhanq dai, khul nail algao teevq gaq jaol nail ngaol. Laqbhanq neq, yaqkav al gaq jaol nail ulcuvq lovduq bha lavqtsail mail tsaol-aivq-a nail ngaol.
30Laqbhanq neq, aivq nail jaqbheq khe deivq-nvq thaq nail nalbhaoq khe naqdev dai khi, lavqceiv bhai ya moel-a nail nee ovqtavq, yaqkav al gaq-i mail aivq nail jaqbheq bhai khal ge bhiq thaq nail iqsanl mail, ya gaiq gil-a nail ngaol. Al heel ngel-i mail, aivq neq, ulcuvq lovduq nail jail-nq khe laolthao nail aqjail bhai jaol nail Aqbhaqlaqhaq nail yaqkav bha, lavqtsail mail tsaol-aivq-a nail ngaol.
31Aivq ge nail: "Heeqphaq Miqyail khe geeqlaoq ya-a nail gaq-ol, ngaq nail ilkhaol bha lal yaoq. Khul khi mail niil niai thul phaol khi mail jaol nail-aiq. Ngaq nail ilkhaol bha bhi yavq lal nail galduq, jaolduq lav sav gaq gil-aoq nail ngaol. Naoq nail laolthao juq jaol nail jaolduq gail jiav nail ngaol" dai, ge khi hav bhiq-a nail ngaol.
32Al heel ngel-i mail, Aqbhaqlaqhaq nail yaqkav al gaq neq, Laqbhanq nail ilkhaol bha lal-a nail ngaol. Laqbhanq neq, laolthao khe yalkav juq he kha khi, aqjal bhi jaq-a nail nee ovqtavq, govheeq jialmuv kheq bhiq-a nail ngaol. Al ovqtavq, yaqkav dai khi aivq nail aqtsaoq juq aqkhil tsiq nail haqbhoil ulcuvq gail, tsil leevq bhiq-a nail ngaol.
33Aqyu juq nail galduq jaq jaq daol daol lav sav gaq-al nee ngal-aq, yaqkav al gaq ge nail: "Ngal ge heeq phaq-ail jiav nail juq iqsanl mail ge gil khi mail pultavq, jaq daol nail ngaol" dai, ge bhiq-a nail ngaol. Laqbhanq gail, "Ge yaoq" dai, ge bhiq-a nail ngaol.
34Yaqkav al gaq ge nail: "Ngal neq, Aqbhaqlaqhaq nail yaqkav pevq nail ngaol.
35Heeqphaq Miqyail neq, ngaq nail ilheel bhai geeqlaoq mao dai bivq nail bhaq da nee, aivq neq, hulmeeq meeq lal-aoq nail ngaol. Heeqphaq Miqyail neq, aivq bhai yaol nail munl, civqmeiv nail munl, niaoqnel nail munl, phul, heel, yaqkav yaqyov-aq, yaqkav yaqmai-aq, laolthao dai khi, moeqphaq laljieiv juq mao dai, bivq-a nail ngaol.
36Ngaq nail ilheel nail khaqma Saqlal neq, aqkovq jiav lal khi mail pultavq yaqyov teevq gaq bhao-a nail ngaol. Ngaq nail ilheel neq, yaqyov al gaq bhai aivq-i mail khal jiav nail iqsanl mail bivq-ai thaq nail ngaol.
37Ngaq nail ilheel neq, ngaq bhai, 'Naol ngaq nail yaqyov nail haqbhoil khaqma neq, ngaq-i mail jaol nail Khaqnanq nail milkhaoq khe yaqmai-aq juq nail lavqkhoel khe, maq ya hal pov-ail.
38Ngaq nail aqbhu nail ilkhaol pevq nail jeq-e juq jaol nail bha ail khi ngaq nail yaqyov nail haqbhoil khaqma ya hal pov-ail nail ngaol' dai, saljial bhi jaq lavq-a nail ngaol.
39Aq-u phao ngal neq, 'Maq yeivq-ail khi, yaqmai-aq al gaq ngaq-ai nee mail maq lal lavq haq neq, khal hai ya khi nail-aiq' dai, ilheel bhai nal daiq-u phao,
40ngaq nail ilheel gaq ge nail: 'Khaq mao iqsanl ngaq-i mail tsao the jaol nail Heeqphaq Miqyail neq, aivq nail nqtavq gaqkhoel bhai naoq-ai nee mail teevq gaq khe-ai, bhi lee khi naoq bhai gaq lai nail phaq bivq lavq nail ngaol. Naol neq, ngaq nail aqbhu nail ilkhaol pevq nail ngaq nail jeq-e nail lavqkhoel khe ngaq nail yaqyov nail haqbhoil khaqma ya hal pov-ail lavq nail ngaol.
41Naoq-i mail saljial jaq-ai thaq nail peivq-ail nail teevq phaq jiav-ail teevq ngaol. Al neq, ngaq nail jeq-e jaol nail bha naol ail-u phao, aqyu juq naoq bhai ngaq nail yaqyov nail haqbhoil khaqma maq bivq lavq haq neq, naoq nail saljial peivq ail nail ngaol'" dai, ge lavq-a nail ngaol.
42Yaqkav al gaq gaoq ge nail: "Ngal yaq n n-gaol ulcuvq lovduq bhai kev lee-u phao, geeqlaoq niail hai hal-a nail ngaol: 'Ngaq nail ilheel gaq nail Heeqphaq Miqyail-ol, ngaq-i mail ya nl nail ganl bhai bhi gaq lai lavq yaoq.
43Niil aq-il, ulcuvq lovduq bhai kev lee-aoq nail ngaol. Yaqmai-aq yaqnoil teevq gaq ulcuvq keivq lee nail lee-u phao, ngal aivq bhai 'Ulcuvq micil bhi daol lavq yaoq' dai, hal bhiq nail ngaol.
44Maq yeivq-ail khi aivq neq, 'Daol yaoq. Naoq nail laolthao juq nail galduq iqsanl gaoq keivq bhiq nail ngaol' dai, ge lal nail gaq neq, ngaq nail ilheel nail yaqyov nail galduq, naoq-i mail tsel dov-ai thaq nail khaqma bhi pevq lavq dei-eiq' dai, hal-a nail ngaol.
45Neema lavqkhoel bha thail hai geeqlaoq hal nail maq gaq lai-u nee, Leiqbhailkavq neq, bavqpuv bhai ulcuvq eelpheeq bavq dav-ai laivq khi, ulcuvq lovduq bha lee-a nail ngaol. Aq-u phao, ngal neq, aivq bhai, 'Ulcuvq micil bhi daol lavq-o' dai, hal bhiq-a nail ngaol.
46Aivq neq, ulcuvq eelpheeq bavqpuv nee mail lavqtsail mail bavq kha khi, 'Daol yaoq. Naoq nail laolthao juq bhai gail bhi daol naol' dai, ge lavq-a nail ngaol. Al heel ngel-i mail, ngal ulcuvq ya daol-a nail ngaol. Aivq neq, laolthao juq bhai gail ulcuvq bhi daol-a nail ngaol.
47Aq-u phao, ngal neq, 'Naol khaq sil gaq nail yaqmiq pevq nail-aiq' dai, nal daiq bhiq-a nail ngaol. Aivq ge nail: 'Ngal neq, Naqhaoq dai khi Millaqkhaq nail aqjievq Bheiqthuqlav nail yaqmiq pevq nail ngaol' dai, ge lavq-a nail ngaol. Aq-u phao, ngal neq, aivq nail nalbhaoq bhai deivq nail naqdev maqkhaiq, aivq nail aqlavq khe goe nail lavqceiv bhai maqkhaiq, bhi goe-a nail ngaol.
48A bhai nee ngal-aq, ngal neq, Heeqphaq Miqyail bhai uqhuq thaoq kovq khi geeqlaoq hal nail lavqkhoel, ngaq nail ilheel nail yaqyov nail haqbhoil khaqma ya dai, aivq nail jeq-e juq jaol nail bha daol coev dai hevq kev lavq-a nail, ngaq nail ilheel Aqbhaqlaqhaq nail Heeqphaq Miqyail bhai tsiq eeq-a nail ngaol.
49Al heel ngel-i mail, niil aq-il ngaq nail ilheel gaq bhai gaoq haq gaiq-a khi saljial ivq-ai nial dai, bhi dov lal lavq yaoq. Al ovqtavq, neema tsaq maq tsaq dai iqsanl, ge lavq yaoq. Thail hai ge lavq khi mail pultavq khal hai gaoq ya nl dal laivq nail dai, heeq lal nail ngaol" dai, ge bhiq-a nail ngaol.
50Aq-u phao, Laqbhanq dai khi Bheiqthuqlav ge nail: "Ganl niil ganl neq, Heeqphaq Miqyail-i mail nl-a nail phaq pevq nail ngel-i mail, nv juq noeq ceiv khi ge nail, maq loq-ail.
51Leiqbhailkavq niil aq-il niai jaol nail ngaol. Aivq bhai khul laivq yaoq. Heeqphaq Miqyail-i mail ge lavq-a nail khe-ai, aivq bhai naoq nail ilheel nail yaqyov nail khaqma teevq gaq khe-ai khul laivq yaoq" dai, ge kovq bhiq-a nail ngaol.
52Aqbhaqlaqhaq nail yaqkav neq, daoq al daoq ya gaiq-u phao, Heeqphaq Miqyail bhai uqhuq miltsaq bha tuv dai thaoq kovq khi tsiq eeq-a nail ngaol.
53A bhai nee ngal-aq, phul, heel, aqgaq aqdoi juq he dov khi, Leiqbhailkavq bhai bivq-a nail ngaol. Aivq nail algao dai khi aqma bhai iqsanl, aqphoiq kav nail kovpavq bivq-a nail ngaol.
54Aqbhaqlaqhaq nail yaqkav dai khi, aivq nail aqtsaoq juq neq, jaq bov daol bov gaq-a nee ngal-aq, aq-u nqkiv a bhai iq thaiq-a nail ngaol. A bhai nee ngal-aq, nqhao phao thul lee khi, Aqbhaqlaqhaq nail yaqkav neq, "Ngaq nail ilheel gaq jaol nail bha ya kovq lai nail niil" dai, ge bhiq-a nail ngaol.
55Aq-u phao, Leiqbhailkavq nail algao dai khi aqma neq, "Leiqbhailkavq bhai nv juq nee mail tsel n bhee dai, gaoq bhi jaol khi pultavq, bhi hel laivq movq-ail nial" dai, ge bhiq-a nail ngaol.
56Thail hai ngaol-aoq, yaqkav al gaq ge nail: "Ngaq bhai thaq gaoq lav tsoiq. Heeqphaq Miqyail neq, ngaq-i mail ya lee-a nail bhai bhi gaq lai lavq-a nail ngel-i mail, ilheel jaol nail bha bhi kovq lai nail niil" dai, ge kovq bhiq-a nail ngaol.
57Aq-u phao aqyu juq gaoq ge nail: "Leiqbhailkavq bhai khul khi aivq-i mail noeq nail bhai nal daiq bhiq daiq bhel" dai, ge nail ngaol.
58Aq-u phao, aqyu juq Leiqbhailkavq bhai khul khi, "Naol tsaol-aq niil gaq nee mail teevq gaq khe-ai, tsao thel laivq movq naol laiq" dai, nal daiq bhiq-a nail ngaol. Aq-u phao, "Tsao thel laivq naol" dai, ge kovq bhiq-a nail ngaol.
59A bhai nee ngal-aq, Leiqbhailkavq dai khi, aivq bhai hel daiq phail nail yaqmai-aq teevq gaq bhai, Aqbhaqlaqhaq nail yaqkav dai khi aivq nail aqtsaoq juq nee mail teevq gaq khe-ai, bhi lai-a nail ngaol.
60Aivq nail ilkhaol khe juq ge nail: "Nv juq nail jaqbheq-ol, naol neq, tsaol-aq aq saiv-n aqlanv gaq nail aqma pevq lal dei-eiq. Naoq-ai nee mail yavq kha lee thaq nail yaq juq iqsanl, neejiav jiav nail juq nail meenq juq bhai genl dev gaq nia dei-eiq" dai, ge khi Leiqbhailkavq bhai geeqlaoq bivq-a nail ngaol.
61A bhai nee ngal-aq, Leiqbhailkavq dai khi, aivq nail yaqkav yaqmai-aq juq neq, laolthao nail kovtavq bhai jeeq lai khi, Aqbhaqlaqhaq nail yaqkav nee mail teevq gaq khe-ai, tsao thel laivq-a nail ngaol.
62Aq-u phao, Ilcav neq, 'Bheiq Laqhil Lol-il#24.62 Bheiq Laqhil Lol-il Bheiq Laqhil lol-il dai, ge nail daoqceevq neq, ngaq bhai moel nia nail Miqyail nail ulcuvq lovduq dai, ge movq nail ngaol dai khul nail ulcuvq lovduq nee kovq lal khi, Nilgeiq miltsaq bhai jaol thail thaiq nail ngaol.
63Teevq n neq, kivqhail lail ma gailkhaol tsao tsao-ail, daiyal bha ail khi, meenia pha saol-nvq thail thaiq-u phao, laolthao juq lal nail bhai ya moel-a nail ngaol.
64Leiqbhailkavq neq, Ilcav bhai moel-u phao, laolthao nee lavqtsail mail yavq kha lee khi,
65"Daiyal khe ngadao juq jaol nail bha lee nail gaq neq, khaq sil gaq" dai, Aqbhaqlaqhaq nail yaqkav bhai nal daiq bhiq-a nail ngaol. Yaqkav al gaq ge nail: "Ngaq nail ilheel Ilcav pevq nail ngaol" dai, ge bhiq-u phao, Leiqbhailkavq neq, lavqsiv-i mail aivq nail maivphaoq he pheeq-a nail ngaol.
66Yaqkav al gaq gail aivq-i mail khal nl-a nail iqsanl mail, Ilcav bhai ge bhiq gil-a nail ngaol.
67A bhai nee ngal-aq, Ilcav neq, Leiqbhailkavq bhai aivq nail aqma-i mail jaol-ail ceevq-a nail haqphal saiqgov bhai hevq bhoel laiq khi aivq nail khaqma bhi pevq lal-a nail ngaol. Ilcav neq, Leiqbhailkavq bhai gaiq-a dee dee nail ngaol. Al heel ngel-i mail, aivq nail aqma sil khi jaoq gaoq mil nail nee mail neesal ya lal bhiq-a nail ngaol.
S'ha seleccionat:
Genesis 24: aeu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.