Luku 23
23
‑Tɛ ʋ gba la 'lɩ ‑Yusu Pilatɩ ‑mɔ, ‑ɛ mɔ Romakʋɛ a ‑gʋlʋnʋma
(Matie 27.1-2,11-14; Makɩ 15.1-5; Saan 18.28-38)
1Bʋ ‑yrɛ 'kɩ, ‑ɛ ‑bɩ ʋ 'du ye', 'ʋ gba 'lɩ꞊ɩ Romakʋɛ a ‑gʋlʋnʋma ‑mɔ. 'A 'nyrɛ mɔ Pilatɩ. (Romakʋɛ, nʋ‑ kɔɔ ‑Juukʋɛ* win kɩ. ‑Juukʋɛ 'yɩ 'lɩ꞊ɩ 'lɩ ‑wɛ, bʋ 'la nyiblo 'bʋ mɔ, Romakʋɛ 'bʋ 'yɩ ‑wɛn. Ɛ nɔ‑ kɔ ‑tɩ, ‑Juukʋɛ 'ʋ gba 'lɩ ‑Yusu Pilatɩ ‑mɔ,) 2'ʋ ‑tʋa 'a ‑tɩ a yɛɛlɛ, ʋ wɛn: «‑A 'nɛɛ nyiblo ‑bʋ 'yie kɩ bʋ. Ɛ nɔ‑ ‑wɛn ‑a mʋ yɩ, 'kɩ 'nɛ‑ ‑aan 'blʋgba 'kwli, 'ɛ yɩ nyibli ‑lee ‑nɩ, ‑ɛ mɔ, ʋ 'nɩ 'pɛɛ 'lɩ 'blʋwli ‑mʋ', Romakʋɛ a 'kɩɩn gbagbʋ pʋ lɛ, ‑ba 'pɛɛ ‑nɩ. 'Ya 'ʋ 'lu de, ɛ wɛn, ɛ nɔ‑ mɔ Wanyɔ ‑mʋ', Nyɩsʋa pʋ la lɛ, ɛ di la ‑a mʋ yɩ ya, ɛ ꞊hɛn 'nyrɛ, ‑ɛ mɔ, ɛ mɔ bodɩɔ ‑bɩ ꞊nɩɔ ‑wɛ.» 3‑Ɛ ‑bɩ Pilatɩ yɩ꞊ɩ 'nɩ 'bɛti ‑nɩ, ɛ wɛn: «꞊Bɩ ‑mɔ mɔ ‑Juukʋɛ a bodɩɔ?» ‑Ɛ ‑bɩ kɛ‑ ‑Yusu ‑pʋ: «Iin, 'mɔ ꞊nɩɔ.» 4‑Ɛ ‑bɩ Pilatɩ ‑tʋa 'lɩ Nyɩsʋa a ‑cɔhlʋnpinyʋ* gbagbɩ kɔ nyibli ‑hʋɔhʋɩ ‑mʋ' 'hʋɛn‑, 'waa ‑mɔhleelɛ, ɛ wɛn: «Nyiblo ‑bʋ, dɛ ‑hʋan bʋ di nu, 'nɩ 'ye꞊e lɩ꞊ɩ.» 5Kɛɛ, ʋ 'yɩ Pilatɩ kɩ ‑wɛn, 'ʋ ‑tʋa 'lɩ win a 'yaalɛ, ʋ wɛn: «Nyiblo ‑bʋ, 'a tɔɔwin ꞊gbugblo 'blʋgba a pɛpɛ nɩ, kʋɛ 'lɩ Galileblʋgba 'kwli bʋ, ‑bʋ nyre 'nɛ‑ Jrusrɛdɩɔ 'kwli.»
‑Tɛ ʋ gba 'lɩ ‑Yusu 'kɩɩn Helɔdɩ ‑mɔ
6‑Tɛ Pilatɩ 'wɩn 'waa win a 'mʋ, ‑ɛ ‑bɩ ɛ yɩ 'nɩ 'bɛti ‑nɩ, ɛ wɛn: «꞊Bɩ nyiblo ‑bʋ, ɛ mɔ Galilekʋɛyu ꞊nɩɔ?» 7‑Ɛ ‑bɩ ʋ wɛn: «Iin.»
'A ‑tɩ 'kɩ o, 'kɩɩn ‑bʋ, ‑ɛ mɔ Helɔdɩ, nɔ‑ kɔɔ Galileblʋgba win kɩ. ‑Tɛ Pilatɩ 'wɩn 'kɩ, ‑ɛ mɔ 'kɩ ‑Yusu ‑hɔn 'lɩ Galileblʋgba a 'mʋ 'kwli, ‑ɛ ‑bɩ ɛ lee nɛ 'a nyibli nɩ, 'kɩ bʋ gba 'lɩ꞊ɩ Helɔdɩ ‑mɔ. Ti a 'mʋ 'yri, 'kɩ 'kɩɩn Helɔdɩ a 'mʋ, ɛ nɩ 'lɩ Jrusrɛdɩɔ 'kwli. 8‑Tɛ Helɔdɩ 'ye ‑Yusu, ‑ɛ ‑bɩ ɛ kɔ plɔ a bleelɛ, ‑ɛ nu꞊o, ɛ yɩ 'wɩn 'a 'nyrɛ lɛ, see la, 'ɛ ꞊mʋɛ la 'a 'yiye lɛ, ‑ɛ di꞊e nu, ɛ 'mʋ ꞊wlɩlɛkɛɛ‑tɛblɩ, ‑Yusu di nu 'ye. 9‑Yusu bʋ nɩ 'ʋ꞊ʋ ye', ‑ɛ ‑bɩ ɛ ‑tʋa 'a ‑tɛblɩ ‑hʋɔhʋɩ a lɛ'bɛtilɛ, kɛɛ, ‑Yusu 'yɩ꞊ɩ 'a ꞊dedede klɛ ‑hɩhɩa ‑nɩ. 10'Kɩ Nyɩsʋa a ‑cɔhlʋnpinyʋ* gbagbɩ kɔ tetetɔɔnyʋ 'hʋɛn‑, ʋ nɩ 'ʋ. Ʋ nʋ‑ yɩ ‑Yusu ‑tɩ ‑yɛɛ ‑nɩ, 'kɩ 'lɩ win 'yaklɩ 'kwli, 11Helɔdɩ kɔ 'a nyibli 'hʋɛn‑, 'ʋ 'cɛɛ ‑Yusu, kɔ, 'ʋ yɩ 'a ‑tɩ lɛ ‑hɛɛ ‑nɩ, 'ʋ pʋ꞊ʋ bodɩɔwlawlʋ, 'ʋ gba 'lɩ꞊ɩ Pilatɩ yɩ de. 12Helɔdɩ kɔ Pilatɩ 'hʋɛn‑, ʋ nyinyre la lɛ, kɛɛ, ‑nyrɔwɔ a 'mʋ 'kwli, ʋ ‑hɛ nɩnatumupʋ.
‑Yusu a ‑bati a 'lu‑yrɛɛlɛ', Pilatɩ wɛn 'nɩ, ɛ kɔ bʋ 'kʋ
(Matie 27.15-26; Makɩ 15.6-15; Saan 18.39–19.16)
13‑Tɛ dɛ a 'mʋ, ɛ ‑hi, ‑ɛ ‑bɩ Pilatɩ da Nyɩsʋa a ‑cɔhlʋnpinyʋ* gbagbɩ, kɔ ‑Juukʋɛ* a naanyʋ kɔ nyibli ‑bɩ 'hʋɛn‑. 14Kɛ‑ ɛ pɩ ꞊nʋ yɩ: «A wɛn 'nɩ, nyiblo ‑bʋ, ɛ nɔ‑ ‑wɛn 'a mʋ yɩ, 'kɩ 'nɛ‑ 'blʋgba ‑bʋ 'kwli. Ɛ nɔ‑ kɔ ‑tɩ, 'a ya 'mɔ꞊ɔ yɩ. Ba pʋ 'mʋ nʋa yɩ bʋ ‑tɛɛ: 'Na ꞊gbɛtʋ, 'n 'bɛti꞊e nɩ, kɩ mɔ 'a mʋ ye'. Yɩnyre‑tɛblɩ a pɛpɛ ‑bʋ, a 'ma꞊a 'lu bʋ, ɛ 'yɩ 'a nunu‑tɛblɩ 'pa‑. 15Mɔ, Helɔdɩ 'ye꞊e nɩ ‑wɛ, ‑ɛ mɔ, ‑tɛblɩ a 'mʋ, ɛ 'yɩ 'a nunu‑tɛblɩ 'pa‑. Ɛ nɔ‑ kɔ ‑tɩ, 'ɛ ‑mɩa ꞊nɛ kle. 'A ‑tɩ o, nyiblo ‑bʋ, ɛ 'yɩ yɩnyredɛ ꞊dʋ ‑nu, ‑bʋ blɛɛ 'kʋkʋʋ yɩ. 16'A ‑tɩ, 'na 'sɛyo bʋ nu lɔkɔ, bʋ bi꞊e, 'tɩ‑ 'mʋ꞊ʋ bʋ tɛ.» [ 17'Bɩ ‑Juukʋɛ a lɛ'mimle ‑mʋ', ‑ɛ mɔ Pakɩ, 'bʋ nyre 'ʋ, Pilatɩ kɔ bʋ ‑ha nyiblo nɩ ‑do ꞊jɩ', 'kɩ 'ʋ ‑Juukʋɛ a plɔ a bleelɛ a ‑ta'.]
18Kɛɛ, 'waa pɛpɛ a 'mʋ, ʋ ‑tʋa Pilatɩ a 'yilɛ꞊mʋmalɛ, ʋ wɛn: «Nu꞊o, nyiblo ‑bʋ bʋ 'kʋ, ‑bʋ ‑ha Balabasɩ ꞊jɩ'!» 19'Tɩ‑, Balabasɩ a 'mʋ, ɛ kɔ nyibli ‑bɩ 'hʋɛn‑, ʋ nʋ‑ ‑wɛn la Romakʋɛ a naanyʋ yɩ, 'kɩ 'lɩ Jrusrɛdɩɔ 'kwli, 'tɩ‑ 'kɩ 'lɩ yɩ‑wʋnwɔnlɛ a 'mʋ 'kwli, ʋ 'laa la 'lɩ nyiblo. Ɛ nɔ‑ kɔ ‑tɩ, 'ʋ pʋ la ꞊nʋ ‑jɩ'. 20Pilatɩ ‑hʋɛ꞊ɛ nɩ, bʋ tɛ ‑Yusu bʋ. Ɛ nɔ‑ kɔ ‑tɩ, 'ɛ ‑tʋa 'lɩ nyibli a 'mʋ, 'waa ‑mɔhleelɛ de. 21Kɛɛ, ‑tɛ ʋ 'wɩn 'a win, ‑ɛ ‑bɩ 'waa pɛpɛ a 'mʋ, ʋ ‑tʋa Pilatɩ a 'yilɛ꞊mʋmalɛ, ʋ wɛn: «Kɔɔ 'ʋ꞊ʋ tugbɛ 'yie, ɛ 'mʋ 'kʋ! Kɔɔ 'ʋ꞊ʋ tugbɛ 'yie, ɛ 'mʋ 'kʋ!»
22‑Ɛ ‑bɩ kɛ‑ Pilatɩ pɩ ꞊nʋ yɩ de, 'wɩ nɩ ta a dɛ: «Dɛ ‑hʋan a 'dɩ ‑bɩ ɛ ‑nu 'lɩ? 'N 'yɩ 'lɩ꞊ɩ dɛ ‑hʋan ꞊dʋ 'lɩ 'yee ‑nɩ, ‑bʋ blɛɛ 'kʋkʋʋ yɩ. 'A ‑tɩ o, 'n di lee 'na 'sɛyo, bʋ bii ꞊nɛ lɔkɔ. 'Bʋ ‑wɛ 'a bibie ‑mɔ, ‑ɛ ‑bɩ 'n tɛ꞊ɛ bʋ.» 23Kɛɛ, ʋ 'tɩɛ ꞊mʋmʋɛ꞊ɛ 'yi lɛ, ʋ wɛn: «Kɔɔ 'ʋ꞊ʋ tugbɛ 'yie, ɛ 'mʋ 'kʋ!» 'Waa win nɩ 'ʋ Pilatɩ a win 'lu yɩ dɩakɩ. 24Bʋ 'yɛ nɩ wɛn ‑tɩ a 'mʋ, Pilatɩ hlɛ kɩ, ɛ nɔ‑ mɔ Pilatɩ bʋ ‑yra꞊a, 'kɩ bʋ wɛn dɛ ‑mʋ', 'waa ꞊wlɩ ‑hʋɛ kɩ, 25'ɛ tɛ nyiblo ‑mʋ', ‑Juukʋɛ ‑hʋɛ bʋ, ‑ɛ mɔ Balabasɩ, ʋ pʋ la ꞊jɩ', 'kɩ 'ʋ 'blʋgba a ꞊gbugblolɛ a ‑ta', ɛ kɔ, ‑tɛ ɛ ‑nu, 'ɛ 'la la nyiblo a ‑tɩ. ‑Yusu ‑mɔ ‑bɩ, ɛ nɔ‑ ɛ ‑nyi 'a 'sɛyo, 'kɩ bʋ gba꞊a, bʋ 'la꞊a, ꞊wɩ yɩ, ‑tɛ ‑Juukʋɛ ni 'a ‑hʋhʋa.
‑Tɛ ʋ kɔɔ la 'ʋ ‑Yusu tugbɛ 'yie
(Matie 27.32-44; Makɩ 15.21-32; Saan 19.17-27)
26‑Tɛ dɛ a 'mʋ, ‑ɛ ‑hi, ‑ɛ ‑bɩ Pilatɩ a 'sɛyo gbɛ ‑Yusu nɩ, 'ʋ ꞊tɩʋɛ ꞊nɛ 'dɩɔ, ʋ 'mʋ꞊ʋ 'la. Bʋ yɩ 'kɩ nɩ mi, ‑ɛ ‑bɩ ʋ kɔ nyɩbɛhɩan ‑bɩ 'hʋɛn‑, ʋ ꞊ŋmee nɩ. Nyɩbɛhɩan a 'mʋ, 'a 'nyrɛ mɔ Simɔ. 'Kɩ ɛ kɔɔ 'lɩ Silɛnɩdɩɔ 'kwli. Nɔ‑ ‑hʋɛn ‑titi. Simɔ a 'mʋ, ɛ nɔ‑ 'sɛyo ‑klɔ, 'ʋ hlɛ꞊ɛ ‑Yusu a tugbɛ, 'tɩ‑ 'ʋ lee ꞊nɛ, bʋ kʋɛ ꞊nʋ ꞊wien. 27Nyibli ‑hʋɔhʋɩ, nʋ‑ yɩ ‑Yusu ꞊wien kʋɛ. Nʋgbɩ ‑hʋɔhʋɩ, nʋ‑ 'wlɛ꞊ɛ ke' bʋ, 'ʋ yɩ 'ʋ 'a ‑ta' ‑wee ‑nɩ. 28Bʋ yɩ 'kɩ꞊ɩ ‑mɔ nɩ ‑wee ‑nɩ, ‑ɛ ‑bɩ ‑Yusu ꞊hɩan ‑mɔ, 'ɛ ‑tʋa 'waa leelɛ, ɛ wɛn: «'A mʋ Jrusrɛ a nʋgbɩ, a 'nɩ 'wee 'lɩ, 'kɩ 'ʋ 'na ‑ta', kɛɛ, ba we, 'kɩ 'ʋ 'aan dɩɔnʋ, kɔ 'kɩ 'ʋ 'aan 'yonʋ a ‑ta', 29‑ɛ nu꞊o, ꞊hɩʋɛn'yeti di 'ʋ 'nɩ nyre. Ti a mʋ 'yri, kɛ‑ ʋ di pʋ: Plɔ a bleelɛ 'kɩ 'ʋ nʋgbɩ ‑mʋ' ‑mɔ, ‑ʋ 'yɩ 'yukɔdɛ, ɛ kɔ 'waa dɛ ‑mʋ', ‑ʋ 'yɩ ‑hʋan 'yu nɩ kʋɛ, kɔ ‑ʋ ‑bɩ ‑mʋ', ‑ʋ 'yɩ ‑hʋan 'yu nɩ 'nyɛ. 30Ti a 'mʋ 'yri, ‑ɛ ‑bɩ kɛ‑ ‑tonyibli di pʋ, dʋgbɩ bʋ bi 'ʋ ꞊nʋ 'lu, ʋ 'mʋ lɛ 'kʋkʋ ‑nɩ. 31'Mɔ ‑bʋ, ‑ɛ kɔ 'klɔ ꞊sii 'ʋ yɩ, ‑ɛ 'wɩ‑ tugbɛ yrayrʋ yɩ, ʋ ni lɛ, ʋ ꞊tui ꞊hɩʋɛn, 'tɩ‑ 'a mʋ ‑bʋ, ‑ʋ kɔ 'klɔ 'yɩ 'ʋ yɩ 'sii ‑nɩ, ‑ʋ 'wɩ‑ ti jɛjɩ yɩ, ‑bɩ' 'aan dɛ di ‑hʋan 'mʋ ꞊ti 'lɩ?»
32'Sɛyo a 'mʋ, ʋ gbɛ 'crɛkɔnyibli nɩ 'hʋɛn, ʋ 'mʋ ꞊nʋ 'la, ʋ kɔ ‑Yusu 'hʋɛn‑. 33'Kɩ ʋ nyre 'kɩ 'ʋ ‑tuo ‑mʋ' kɩ, ‑ɛ kɔ 'nyrɛ ‑mɔ 'Lukla. ‑Tɛ ʋ nyre 'ʋ, ‑ɛ ‑bɩ 'sɛyo kɔɔ 'ʋ ‑Yusu tugbɛ 'yie. 'Kɩ 'ʋ ‑tuo nɩ ‑do a 'mʋ kɩ, 'kɩ ʋ kɔɔ 'ʋ 'crɛkɔnyibli nɩ 'hʋɛn a 'mʋ 'waa ‑nɛ ti 'yie, nyiblo nɩ ‑do, 'kɩ 'lɩ ‑Yusu a diidɛkɩbɩa kɩ, ‑do ‑bɩ, 'kɩ 'lɩ 'a kamlakɩbɩa kɩ. 34‑Yusu 'mʋ 'ʋ tugbɛ 'yie nɩ, ‑ɛ ‑bɩ kɛ‑ ɛ pɩ: «Na 'Baɩ o, dɛ 'kuku ‑bʋ, ʋ ni, ‑hru 'a ‑tɩ ‑mɔ, ‑kɔtɩ ‑tɛblɩ ‑bʋ, ʋ ni, ʋ 'yɩ꞊ɩ ‑yi.» 'Sɛyo ‑mɔ ‑bɩ, ʋ pʋ 'wla, ‑Yusu a 'hʋɩlɛpʋ‑tɛblɩ a ‑tɩ, ʋ 'mʋ꞊ʋ yi, ‑tɛ ʋ di 'a ꞊gɩgla nu.
35Hɩapʋnyibli ‑bɩ, ‑ʋ nɩ 'ʋ ‑tuo a 'mʋ kɩ, 'kɩ ʋ pʋ 'ʋ 'yie bʋ, 'ʋ yɩ ‑tɛblɩ a pɛpɛ a 'mʋ, ‑ɛ mi 'lu ‑mɔ 'ye. ‑Ɛ ‑bɩ ‑Juukʋɛ* a 'blʋ a nyibli 'cɛɛ ꞊nɛ nɩ, ʋ wɛn: «Ɛ wa nyibli ‑bɩ. 'A ‑tɩ 'kɩ o, 'bʋ mɔ Wanyɔ ‑mʋ', Nyɩsʋa pʋ la lɛ, ɛ di la ‑a mʋ yɩ ya, bʋ wa 'a dɩɔnʋ!» 36'Sɛyo ‑mɔ bɩ, ʋ ‑hɛ꞊ɛ 'yri lɛ ‑wɛ, 'ʋ 'yɩya 'ʋ꞊ʋ 'hʋɩ bʋ, 'ʋ yɩ꞊ɩ 'linɩnɔ ‑nyi. 37‑Ɛ ‑bɩ kɛ‑ ʋ pɩ꞊ɩ yɩ: «'Bʋ mɔ, ꞊nɩ mɔ ‑Juukʋɛ a bodɩɔ, ‑ɛ ‑bɩ wa ‑dɩɔnʋ!» 38'Kɩ 'ʋ 'a tugbɛ a 'mʋ 'yie, ʋ 'crɩɩ 'ʋ 'plaɩnkɩbɩa kɩ, ‑ɛ mɔ: «Nyiblo ‑bʋ, ɛ nɔ‑ mɔ ‑Juukʋɛ a bodɩɔ.»
39'Kɩ 'lɩ 'crɛkɔnyibli nɩ 'hʋɛn ‑mʋ', ʋ kɔɔ 'ʋ 'waa ti 'yie lɛ, nyiblo nɩ ‑do nɩ 'lɩ, 'ɛ ‑hɛ ‑Yusu 'yri lɛ, ɛ wɛn: «꞊Yɩ lɛ ‑pʋ, ‑ɛ mɔ, ‑mɔ mɔ Wanyɔ ‑mʋ', Nyɩsʋa pʋ la lɛ, ɛ di la ‑a mʋ yɩ ya. Wa 'kɩ ‑dɩɔnʋ, ꞊mʋ ‑a mʋ wa ‑wɛ mɔ.» 40Kɛɛ, 'a 'bɩhɩan ‑bɩ ‑mʋ', ‑ɛ nɩ 'ʋ, ɛ nɔ‑ ‑tʋa 'a 'bɩ a 'mʋ, 'a ‑mɔ'pʋplɛ, ɛ wɛn: «‑Mɔ ‑bʋ, ꞊yɩ Nyɩsʋa a hʋannʋ ‑kɔ mɔ. ꞊Hɩʋɛn nɩ ‑do ‑bʋ, ‑yɩ 'ye, ɛ nɔ‑ nyɩbɛhɩan ‑bʋ, ɛ yɩ 'ye ‑wɛ. 41‑A mʋ ‑mɔ ‑bɩ, ‑aan ꞊hɩʋɛn ‑bʋ, ‑a yɩ 'ye, ɛ kɔ 'ʋ nɩ, ‑ɛ nu꞊o, yɩnyre‑tɛblɩ ‑mʋ', ‑a nu, ɛ nʋ‑ kɔ ‑bati klɔ ‑a mʋ. Kɛɛ, ɛ nɔ‑ ‑mɔ ‑bɩ, ɛ 'yɩ dɛ ‑hʋan ꞊dʋ ‑nu.» 42‑Tɛ ɛ ‑wɛ 'kɩ ‑tɩ a 'mʋ, 'a hɩhla ‑mɔ, ‑ɛ ‑bɩ kɛ‑ ɛ pɩ ‑Yusu yɩ, ɛ wɛn: «‑Yusu o, 'na ‑tɩ 'nɩ 'hruo 'lɩ ‑mʋ ‑mɔ, ti ‑mʋ' ‑kɔ 'yri ‑di di de, 'kɩ 'lɩ ‑na 'klɩ a kɩnɩnɩɩ 'kwli, ꞊mʋ ‑tonyibli win kɩ ‑kɔɔ ‑nɩ pɛpɛ.» 43‑Ɛ ‑bɩ kɛ‑ ‑Yusu pɩ 'kɩ꞊ɩ yɩ, ɛ wɛn: «'N yɩ ‑mʋ 'nɩ ‑lee ‑nɩ, ‑ɛ mɔ, kɩkɛ ‑bʋ, ‑kɔ 'mʋ 'hʋɛn‑, 'kɩ ‑a di kɛ 'lɩ 'na 'Baɩ Nyɩsʋa a ꞊haan'dɩɔ* 'kwli nɩ.»
‑Tɛ ‑Yusu nu la 'kʋkʋʋ
(Matie 27.45-56; Makɩ 15.33-41; Saan 19.28-30)
44-45Muu 'ʋ 'yrʋ bʋ nyra bʋ a ti 'yie, ‑ɛ ‑bɩ halɔ ka ‑tʋtʋ a pɛpɛ kɩ. Halɔ a 'mʋ, ɛ nɩ 'ʋ ‑nɩnɩ, 'ɛ yɛ 'yrʋ‑hiilɛ a ti kɩ. Ti nɩ ‑do a 'mʋ 'yri, 'kɩ 'lɩ Nyɩsʋa a 'kagbaʋ ‑mʋ' bʋ, ‑ɛ nɩ 'lɩ Jrusrɛdɩɔ 'kwli, danʋ gbagbʋ ‑mʋ', ‑ɛ 'bɛ 'kayu a 'mʋ ꞊tɩɔ, 'ɛ ‑ki wlɔn pɛpɛ. 46‑Ɛ ‑bɩ ‑Yusu 'gbo nɩ, ɛ wɛn: «'Na 'Baɩ, ‑mɔ 'n pʋ 'lɩ 'na ‑hihiu ‑jɩ'.» ‑Tɛ ɛ ‑yrɛ 'kɩ, ‑ɛ ‑bɩ ɛ mla ‑hʋnhlʋn.
47Romakʋɛ a 'sɛyo a nyiblo gbagbʋ ‑mʋ', ‑ɛ nɩ 'ʋ, ‑tɛ ɛ 'ye ‑tɛblɩ a pɛpɛ a 'mʋ, ‑ɛ mu 'lu ‑mɔ, ‑ɛ ‑bɩ ɛ ‑tʋa Nyɩsʋa a 'nyrɛlɛpʋpʋʋ, 'tɩ‑ 'ɛ pɩ win, ɛ wɛn: «Ɛ mɔ ꞊han‑tɩ ꞊nɩɔ, nyiblo ‑bʋ, ɛ 'yɩ dɛ ‑hʋan ꞊dʋ ‑nu.» 48Nyibli a pɛpɛ ‑mʋ', ‑ʋ di ‑ta 'ye mɔ, ʋ 'ye ‑tɛblɩ a 'mʋ nɩ, ‑ɛ mu 'lu ‑mɔ. 'Waa plɔ yɩ 'lɩ bʋ nɩ 'nɛɛ ‑nɩ, 'ʋ ‑mɛ kle.
49‑Yusu a nɩnatumupʋ a pɛpɛ ‑mʋ', kɔ nʋgbɩ ‑bɩ, ‑ʋ yɩ la꞊a ꞊wien lɛ kʋɛ, ‑ʋ ‑hɔn 'lɩ Galileblʋgba 'kwli, ʋ hlɔɔ 'ʋ ‑tɛ a 'mʋ ‑mɔ lɛ dɛ gbe, 'ʋ 'ye ‑tɛblɩ a pɛpɛ a 'mʋ, ‑ɛ mu 'lu ‑mɔ.
‑Tɛ ʋ pʋ la 'lɩ ‑Yusu 'dabio 'kwli
(Matie 27.57-61; Makɩ 15.42-47; Saan 19.38-42)
50-51Ɛ kɔ la nyɩbɛhɩan ꞊dʋ, 'ɛ kɔ la 'lɩ ‑Juukʋɛ a 'dɩɔ ‑bɩ 'kwli. 'A 'nyrɛ mɔ Sosɛfʋ. 'A 'dɩɔ a 'mʋ, 'a 'nyrɛ mɔ Alimate. Nyɩbɛhɩan a 'mʋ, 'a ꞊wlʋ nɔ yɩ dɩakɩ, kɔ, 'a 'klɔ 'sii 'ʋ yɩ. Ti ‑mʋ', ‑ɛ kɔ 'yri Nyɩsʋa di 'ʋ nyibli win kɩ ‑kɔɔ ‑nɩ, ɛ nɔ‑ ɛ yɩ ‑ple. Ɛ mɔ ‑Juukʋɛ* a ‑gbolugbo gbagbʋ a nyiblo ‑bɩ ꞊nɩɔ. Kɛɛ, ‑tɛblɩ ‑mʋ', 'a 'bio ‑hla, kɔ, ʋ nu ‑Yusu 'yi ꞊hlɔn lɛ, ɛ 'yɩ꞊ɩ kɩ ‑wɛn. 52Sosɛfʋ a 'mʋ, ɛ nɔ‑ mu 'lɩ Pilatɩ ‑mɔ, 'ɛ lee ꞊nɛ, 'kɩ bʋ wɛn, bʋ ‑ha 'ʋ ‑Yusu a ‑plahʋɩ tugbɛ 'yie, ɛ 'mʋ 'ʋ꞊ʋ 'ʋ ‑ha, Pilatɩ a 'mʋ, 'ɛ ‑wɛn. 53Sosɛfʋ a 'mʋ, ɛ nɔ‑ mu, 'ɛ ‑ha 'ʋ ‑Yusu a ‑plahʋɩ tugbɛ 'yie, 'ɛ 'hɩnhɩʋan꞊a ‑jisɛ lɛ, 'tɩ‑ 'ʋ gba 'lɩ꞊ɩ ‑tɩtɛ ‑mʋ', ʋ di 'ʋ꞊ʋ ꞊tuu ‑nɩ. 'Kɩ 'ʋ ‑tɛ a 'mʋ, 'hɩɔ gbagbʋ nɩ 'ʋ, 'ɛ hlɔ yra, 'ɛ 'wɩ‑ dʋgba yɩ. Ti ꞊dʋ a ti 'yri la, 'kɩ 'lɩ 'hɩɔ gbagbʋ a 'mʋ 'kwli, 'kɩ ʋ 'bluu la 'lɩ 'dabio, (‑ɛ 'wɩ‑ ‑wlukayu yɩ). 'Dabio a 'mʋ 'kwli, ʋ 'yɩ ‑hʋan 'lɩ 'kʋkʋku nɩ pɩ. Ɛ nɔ‑ kɔ 'kwli, ʋ ꞊tu 'lɩ ‑Yusu a ‑plahʋɩ. 54Ɛ mɔ la 'wee a ‑nyrɔwɩ nɩ ꞊hun a 'yrʋ‑hiilɛ a ti 'yri ꞊nɩɔ, ‑Juukʋɛ a ‑wuwle‑nyrɔwɔ*, ‑ɛ mɔ 'sɛɛdɩ, 'ɛ mi la 'ʋ nyre mɔ, 'yrʋ bʋ pa a ti 'yri.
55Nʋgbɩ ‑mʋ', ‑ʋ yɩ la ‑Yusu ꞊wien lɛ kʋɛ, ‑ʋ ‑hɔn la 'lɩ Galileblʋgba 'kwli, ʋ nʋ‑ kɔ Sosɛfʋ 'hʋɛn‑, ‑ʋ mu 'lɩ 'dabio yɩ, nʋgbɩ a 'mʋ, 'ʋ ta 'lɩ 'dabio a 'mʋ 'kwli lɛ, 'ʋ 'ye꞊e, ‑tɛ ‑mʋ', ʋ nu 'lɩ ‑Yusu a 'dabio a 'kwlibʋpʋpʋʋ. 56‑Tɛ ʋ ‑gbɛɛ ‑tɛblɩ a pɛpɛ a 'mʋ, ‑ɛ ‑bɩ ʋ ‑mɛ kle, 'ʋ 'ya 'dɩɔ, 'ʋ ‑wɛ hɩnhrʋnpʋ‑tɛblɩ ‑mɔ, kɔ ‑dawinninyra 'hʋɛn‑, ʋ 'mʋ꞊ʋ ‑Yusu a 'hʋɩ lɛ plʋ. ‑Tɛ ‑wuwle‑nyrɔwɔ nyre 'ʋ, ‑ɛ ‑bɩ ʋ ‑wle nɩ, ꞊wɩ yɩ, ‑tɛ Nyɩsʋa a tete ni 'a hɩhla.
S'ha seleccionat:
Luku 23: ktj
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2003, Wycliffe Bible Translators, Inc. All rights reserved.