Mateo 4
4
Xixronꞌanxrée tjaun xa tsakaon xa ndo Jesús
(Mr. 1:12-13; Lc. 4:1-13)
1 #
He. 2:18; 4:15. *Tjumeꞌe Espíritue ndo Dio bikao ndo Jesús ngataꞌa ijna̱ nchese ko ntiꞌa Xixronꞌanxrée tjaun xa tsakaon xa ndo Jesús. 2Bakeꞌe ndo ijna̱, ko yuukan nchakon ko tiie juinchekatse ñao ndo jinta, méxin kuenꞌen ndo jinta. 3Ko Xixronꞌanxrée konchjiñeꞌe xa ti jii ndo Jesús ixi tjaun xa tsakaon xa ndo, méxin ndachro xa:
―Siá nduaxin jaꞌa Chjenꞌen ndo Dio, ndache ixro meꞌe xrokjan xro nutja.
4Ko jeꞌe ndo juatingíexin ndo:
―Jitaxin xroon chijnie ndo Dio: “Jeꞌa jeꞌo nutja tsechónxin chujni. Kaxon kain chijnie ndo Dio, meꞌe tsechónxin chujni.”
5Tjumeꞌe Xixronꞌanxrée bikao xa ndo Jesús tjajna tsango tjúá, tjajna Jerusalén, ko juinchengajinꞌin xa ndo ti ícha nui ngataꞌa niꞌngo, 6ko ndachro xa:
―Siá nduaxin jaꞌa Chjenꞌen ndo Dio, chrinka ti nunte ixi jitaxin xroon chijnie ndo Dio:
Jeꞌe ndo tsetuenꞌen ndo sen ángel tikinixinꞌen ndo
ixi xrotsengia sen
ixi tsontengíxinꞌa tutáa ixro.
7Ko jeꞌe ndo Jesús juatingíexin ndo:
―Kaxon ndachro chijnie ndo Dio: “Tsakéꞌa naa ngeꞌe ixi tsikuan á chao sincheꞌe ndo Dio.”
8Ko íjngo nchakon bikao xa ndo Jesús ngataꞌa ijna̱ ícha noi ko juakoꞌe xa ndo kain tjajna jii ngataꞌa nunte xasintajni#4:8 xasintajni mundo ko kain ngeꞌe ti tjintee chónda na̱. 9Ko ndachro Xixronꞌanxrée:
―Kain jiꞌi xrotjáꞌa siá jaꞌa tsakeꞌexian ntatuchiꞌian ko xrochjána̱na juasiaa.
10Tjumeꞌe jeꞌe ndo Jesús ndachro ndo:
―Satjia jaꞌa Xixronꞌanxrée, ixi ndachro xroon chijnie ndo Dio: “Jeꞌo Ncháa ndo Dio xrokonda xrochjeꞌé ndo juasaya ko jeꞌo ngajin jeꞌe ndo tsitikaoan.”
11Ko Xixronꞌanxrée ngaxiton xa ko tjumeꞌe kui̱i̱ kaxin sen ángel ngajin ndo Jesús ko kuayakonꞌen sen ndo.
Ndo Jesús juangíxin ndo xrée ndo nunte Galilea
(Mr. 1:14-15; Lc. 4:14-15)
12 #
Mt. 14:3; Mr. 6:17; Lc. 3:19, 20. *Nchakon ndo Jesús kuinꞌen ndo ixi ndo Juan xraxinꞌin na̱ ndo ndoꞌachjiso, jeꞌe ndo ikjan ndo nunte Galilea. 13#Jn. 2:12.*Ko kuitueꞌa ndo tjajna Nazaret; sakjui ndo tjajna Capernaum, tjajna meꞌe jii ngandeꞌe ndachaon tjenka nunte Zabulón ko Neftalí. 14Jaꞌin konꞌen xranchi ti tsikjin ndo Isaías chijnie ndo Dio. Jaꞌin tsindachro ndo:
15Nunte Zabulón ko nunte Neftalí ti jii chaꞌo
ngandeꞌe ndachaon tuenxin ndajitinga ndatinꞌin Jordán,
nunte Galilea ti ste ni chúxinꞌa ndo Dio.
16Chujni tjajna ste naxixeꞌe bikon na̱ ijié xroꞌi,
ko ni ste ti jii tsaꞌon neꞌe xichononte,#4:16 xichononte muerte
xroꞌi bingasáñeꞌe na̱.
17 #
Mt. 3:2. *Ko nchakon meꞌe kuaxi juako ndo Jesús ko kuandachro ndo:
―Tintuꞌenta ti ndakoꞌa kuancheꞌenta ixi juachaxien ndo Dio jii ngajní ó tjenkanta jii.
Ndo Jesús kuiyeꞌe ndo noó sen kuatse kuchee̱ ti jii ndachaon
(Mr. 1:16-20; Lc. 5:1-11)
18Ndo Jesús jitatsinga ndo ngandeꞌe ndachaon ndatinꞌin Galilea, ntiꞌa bikon ndo yuu sen, sen meꞌe kichuu sen, naa ndo ndatinꞌin Simón ko kuanchekinꞌin na̱ ndo Pedro, ko ndo kichuu ndo ndatinꞌin ndo Andrés. Jeꞌe sen stetánka sen nochaꞌa ngangi inda, ko kuansengi sen kuchee̱ ixi jeꞌe sen ixra̱ meꞌe kuancheꞌe sen. 19Ko ndo Jesús ndache ndo sen:
―Xrokuiinta ruaꞌnaninta ko janꞌan sintakuanꞌannta xronichjeꞌenta chujni meꞌe tsitikaon na̱ najanꞌan, ko xrokjui xranchi xrotsénta kuchee̱.
20Ko tuinxin kuintuꞌe sen nochaꞌa ko ruéꞌe sen ndo.
21Ko kuiji ndo Jesús ícha ndáꞌa bikon ndo íjngo yuu sen, ko sen meꞌe kaxon kichuu sen, naa ndo ndatinꞌin Jacob ko inaa ndo ndatinꞌin Juan, yui sen chjenꞌen ndo Zebedeo ko yui sen stekao sen ndotée sen ngaxinꞌin nta̱barco ixi stetjaun sen nochaꞌa tséxin sen kuchee̱. Tjumeꞌe ndo Jesús kuiyeꞌe ndo sen. 22Ko jeꞌe sen tuinxin kuintuꞌe sen nta̱barco ko kuintuꞌe sen ndotée sen ko ruéꞌe sen ndo Jesús.
Ndo Jesús nchekuenꞌen ndo kueya chujni
(Lc. 6:17-19)
23 #
Mt. 9:35; Mr. 1:39. *Ndo Jesús kuaji ndo nchijíi nunte Galilea ko banchekuenꞌen ndo chujni ngaxinꞌin ningue ni israelita ngujngu tjajna ti bakiji ndo ko kuanchekuenꞌen ndo na̱ chijni natjúá ti tetuanꞌan ndo Dio ko kuanchexruenꞌen ndo kain ichin ko kain ti tiín na̱. 24Ko kain ti ixra̱ jian kuancheꞌe ndo, meꞌe konoꞌe ni ste nunte Siria ko bikaꞌo na̱ kain ni kuachónda ngixeꞌi ichin ko ni chónda espíritue Xixronꞌanxrée, ni bakendáa, ko ni juaꞌi itji, ko ndo Jesús juinchexruenꞌen ndo na̱. 25Ko kueya chujni kuarueꞌe na̱ ndo Jesús, ni nunte Galilea ko ni tjajna Decápolis ko ni tjajna Jerusalén ko nunte Judea ko ni kui̱xi̱n tuenxin ndajitinga ndatinꞌin Jordán.
S'ha seleccionat:
Mateo 4: ppsNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.