यूहन्ना 16
16
1“नमयूजे विश्वास अम्मल्बस्य यदेबे अम्ब पो ङैदे नमयूने य ख्यङ्। 2थमयूदे नमयूने यहूदी सभा-कीम्यूदे योम्बीय। तम्दम्ने येर सेमे रेन ख्यङ्, कन्छ्वाब नमयूने सेब मीदे परमेश्वरजे सेवा चीन्न ख्यङ् यदेबे मन्क्य। 3थमयूदे येर काम चीक्क्य, चेनेयलो थमयूदे पने अन्स्ये, मेस्ये ङैनेये अन्स्ये। 4तर अम्ब पो ङैदे नमयूने स्य्वे ख्यङ्, कन्छ्वाब हम्ब सेमे रीय, हन्छ्वाब नमयूने च येये ख्य हम्ब नमयूदे ह्वेरीय, मीयूङ् खूम्ने ङैदे अम्ब पो नमयूने अन्-य, चेनेयलो ङ नमयूप्रे ख्य।
पवित्र आत्माजे काम
5“जेम्से ङैने कूल्बेब ट्याने ङ प्रेन ख्यङ्, तर ‘न केने प्रेन ख्यङ्?’ यदेबे नमयू सूदेये ङैने अन्ल्वे। 6होरेक्यूल्लीने ङैदे नमयूने अम्ब पो यबदे नमयूजे सेम् सोरो अन्सूग क्यून्न ख्यङ्। 7होर्दे ङ नमयूने तम्दम् पो यीय, नमयूजे फाइदाजे लागि ङ प्रेन ख्यङ्। ङ अम्प्रलो, मोतो पीनब नमयू ट्याने रस्ये त्वो तर ङ प्रलो ङू नमयू ट्याने कूल्बीय। 8होर्दे कन्छ्वाब ङू रीय, ङूदे संसारने पाप, धार्मिकता मेस्ये न्यायजे पोने दोषी ठर्तीय। 9पापजे पोने थमयू दोषी ख्यङ्, चेनेयलो थमयूदे ङैने विश्वास अन्ची, 10धार्मिकताजे पोने थमयू दोषी ख्यङ्, चेनेयलो ङ प ट्याने प्रीय, होर्दे नमयूदे फेरि ङैने तङ्स्ये त्वो। 11मेस्ये न्यायजे बारेने थमयू दोषी ख्यङ्, चेनेयलो अम्ब संसारजे हुकुम चील्लेबने दण्ड पीनब आज्ञा क्यूक्क ख्यङ्।
12“ङैदे नमयूने य पर्देब पो कूम थेप् ख्यङ्, तर चूजो नमयूदे हम्ब पो सैदेने अन्खू। 13कन्छ्वाब ङू, या सत्यजे आत्मा रीय, हन्छ्वाब ङूदे नमयूने तम्दम्जे पो क्वाने लोम्मीय। ङू रङ्सेजे तर्फदे अन्क्यम्। ङूदे च तैय, हम्ब नमयूने यीय, मेस्ये ङ्येदे क्यूरब पोयूये नमयूने चेलाबे येमीय। 14ङूदे ङैजे महिमा चीक्क्य, चेनेयलो कम्ब ङैजे ख्य, हम्ब कूबदेबे नमयूने चेलाबे येमीय। 15पप्रे ख्यब क्वाने ङैजेये ख्यङ्। येरेक्यूत्देबे ङैदे यदे, च ङैजे ख्यङ्, हम्ब ङै ट्यादे कूबदेबे आत्मादे नमयूने चेलाबे येमीय।
16“ते खात्या ङ्येदे नमयूदे ङैने तङ्स्ये त्वो, होर्दे खात्या ङ्येदे फेरि ङैने तङ्क्य।”
स्यूस्स्यायूजे रप् मेस्ये आनन्द
17होर्दे ङूजे कोइ कोइ स्यूस्स्यायूदे त्यादे त्याने यदे, “ङूदे ङीनने यब अम्ब पो च ख्यङ्? ‘ते खात्या ङ्येदे नमयूदे ङैने तङ्स्ये त्वो, होर्दे फेरि ते खात्या ङ्येदे नमयूदे ङैने तङ्क्य’, ‘चेनेयलो ङ प ट्याने प्रेन ख्यङ्’।” 18थमयूदे यदे, “ङूदे ‘खात्या ङ्येदे’ यब च स्व? ङूदे च क्यम्न ख्यङ्, ङीदे अङ्को।”
19थमयूदे अम्ब पो ल्वेब सेम् चीन्न ख्यङ् यब पो येशूने था क्यूत्दे, मेस्ये ङूदे यदे, “खात्या-ला ङ्येदे नमयूदे ङैने तङ्स्ये त्वो, होर्दे खात्या-ला ङ्येदे ङैने तङ्क्य’ यब पोजे अर्थ च ख्यङ् यब पोजे बारेने नमयू रङ्से रङ्सेने स्वाल् जवाफ चीन्न औ? 20तम्दम्ने, ङ नमयूने यीय, नमयू ङूय मेस्ये रप् चीक्क्य, तर संसारजे मीयू सूग्क्य। नमयू रप् चेब क्यूक्क्य, तर नमयूजे रप् आनन्दने फेर्दीप्रीय। 21पीच प्रेब बीलने मने सकस् क्यूक्क्य चेनेयलो ङूजे बील रेकब क्यूक्क्य, तर कन्छ्वाब ङूदे पीच प्रेक्कीय, होर्दे हम्ब सकस् ङूदे येल्गीय चनेयलो संसारने पीच त्या प्रेक्कदे यब पोने ङू सोरो सूग्क्य। 22येरप्रने चूजो नमयूने रप् क्यूक्क्य, तर फेरि ङैदे नमयूने तूय, मेस्ये नमयूजे सेम् आनन्द क्यूक्क्य। होर्दे नमयूदे प्रेब आनन्द सूदेये लेन्कीस्ये त्वो। 23हम्ब बीलने नमयूदे ङैने चैये लोस्स्ये त्वो। तम्दम्ने ङ नमयूने यीय, नमयूदे ङैजे मीन्ने पप्रे च स्येय ङूदे हम्ब नमयूने पीन्क्य। 24चूजो सेमे नमयूदे ङैजे मीन्ने चैये अन्स्य। स्य, मेस्ये नमयूदे प्रेक्क्य। येरप्रने नमयूजे आनन्द पूरा क्यूक्क्य।
25“अम्ब पो ङैदे नमयूने उखान पूत्देबे य ख्यङ्। तर बील रेन ख्यङ्, कन्छ्वाब ङ नमयूप्रे उखान पूत्देबे फेरि अन्क्यम्, तर पजे बारेने नमयूने चेला कोलाबे स्योम्मीय। 26हम्ब दिनने नमयू रङ्सेदेने ङैजे मीन्ने स्येय। नमयूने ङैदे पप्रे स्येमे अम्पर्दी, 27प रङ्सेदेने नमयूने माया चे ख्यङ्, चेनेयलो नमयूदे ङैने माया चे ख्यङ्, मेस्ये ङ परमेश्वरदे कूल्बे ख्यङ् यदेबे नमयूदे विश्वास चे ख्यङ्। 28ङ प ट्यादे रदेबे संसारने र ख्यङ्, होर्दे फेरि संसार पङ्गीदेबे ङ प ट्याने ल्वाबीन ख्यङ्।”
29ङूजे स्यूस्स्यायूदे यदे, “जेम्से नदे पो चेलाबे कोला क्यम्न ख्यङ्, उखान पूत्देबे दी। 30जेम्से ङीदे कोदे, नदे साप्ता पोने स्ये ख्यङ्, नने होर्दे सूदेये ल्वे अम्पर्दीस्ये टूङ् यदेबे ङीने था क्यूत्दे। येरेक्यूत्देबे ङी विश्वास चीक्क्य, न परमेश्वरतेलेदे रब ख्यङ्।”
31येशूदे थमयूने जवाफ पीन्दे, “नमयू जेम्से विश्वास चीक्क्या? 32ले, बील रेन ख्यङ्, तम्दम्ने यलो रेक जेन ख्यङ्, कन्छ्वाब नमयू स्वा-स्वा क्यूत्देबे रङ्सेजे नेने प्रीय होर्दे ङ त्याने पोङ्गीय। येरेक्यूल्लीने ङ तीत्यात्या अन्क्यूर्, चेनेयलो प ङैप्रे क्यूक्क्य। 33नमयू ङै प्रे क्यूप्प शान्ति क्यूस्स्य यदेबे नमयूने अम्ब पो येरेक्यूत्देबे य ख्यङ्। संसारने टूङ्ब नमयूने सकस् क्यूक्क्य, तर बोङ् ची, ङैदे संसार ट्याक ख्यङ्।”
S'ha seleccionat:
यूहन्ना 16: सर् कबुल
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Ghale New Testament © Nepal Bible Society, 2011.