Luuk 17
17
Kulubi be asheŋ
(Matiu 18:6-7, 21-22; Maak 9:42)
1Nɛ Yesu kaŋɛ mbe bebɛsopo: “Asɔ nɛ a bee shin nɛ basa bee wora alubi baŋ fuli nna, ama asheŋ maaŋ nyalɛ n sa esa nɛ a beeŋ bɔla mo so m ba na kikɛ. 2Ekama nɛ e shin nɛ mbibi ere be eko wora kulubi, kusɔ nɛ k beeŋ nya amodoŋwura na beeŋ lubi a chɔ b ka ta kuboo n shiga mbe kubɔ to nseŋ ta mo n lɛ n wɔtɔ teku to nɛ e ji nchu. 3Men be ekama e baa de mbe kumu so nɛ mo kurgepo, Yesu be ebɛsopo wora kulubi, e fiɛ mo so nɛ e lar kumo to nɛ e ta m paŋ mo. 4Nɛ e wora n da mo so ale ashunu kachɛ koŋwule nseŋ kilgi ale ashunu na kikɛ to ŋ kaŋɛ mo le: ‘N wora n jija’, a daga e ka ta m paŋ mo.”
Yirda be asheŋ
5Kachako Enyɛnpe Yesu be beshuŋipo na kaŋɛ mo le: “Ti anyi so yirda.” 6Nɛ Enyɛnpe na kaŋɛ bumo le: “Nɛ men be yirda baa du fimbi fanɛ kakilia be kebi gba, menyeeŋ tiŋ ŋ kaŋɛ sikamɔɔ be kedibigboŋ ere le: ‘Fo gbagba e tia n ta fo kumu n ya yuu teku to’, nɛ k nu n sa menyi.”
Kayɛrbi be kushuŋ be asheŋ
7Nɛ Yesu bishi bumo le: “Menyi be emo e naaŋ baa kɔ kayɛrbi nɛ e yɔ ndɔ to ŋko e yɔ kupuŋ to n ya keni asɔbɔya so m bɛta m ba epe nɛ fo kaŋɛ mo le: ‘Ba choŋ ejikpa n chena nfe a ji’? 8Mannɛ ale nɛ feeŋ kaŋɛ mo a: ‘Keni, wora ajibi n sa ma nseŋ kre to ŋ keni to nɛ n ji nseŋ nuu n loge pɔɛŋ nɛ fo alɛ e ji nseŋ nuu’? 9Nɛ fanɛ kayɛrbi na wora asɔ nɛ enyɛnpe na kaŋɛ na kikɛ n loge, enyɛnpe na beeŋ chɔrɔ mo a? 10To, menyi alɛ gba loŋ nna fanɛ, nɛ menyi baŋ wora kusɔ kama nyam nɛ b yɛ men wora n loge, men kaŋɛ le: ‘Anya fuloŋ e baa la anyi, anyi alɛ be kushuŋ nɛ k daga anyi nɛ an shuŋ na.’ ”
Yesu ka chɛ bebotipo kudu be asheŋ
11Yesu ka bee yɔ Jerusalɛm nɛ e bɔla Samɛria nɛ Galili be nsawule be egbaŋ to. 12E ka ba kaa luri kadebi ko to nɛ bebotipo kudu ko yili kufɔ 13nseŋ malga eleŋso ŋ kaŋɛ le: “Yesu, Enyɛnpe, wu anyi kuwɔr.” 14E ka wu bumo nɛ e kaŋɛ bumo le: “Men ta men be amu n ya ŋini bɔrɛmatapoana na.” B ka bee yɔ nɛ b nyalɛ so. 15Bumo be eko ka wu fanɛ e nya alenfia nɛ e kilgi m boŋ to n di Ebɔrɛ epaŋ 16nseŋ gbir Yesu be anishito n chɔrɔ mo. Samɛria be esa e daa la mo. 17Nɛ Yesu bishi le: “Mannɛ bebotipo kudu e nya alenfia na a? Nɛ bekpanu nɛ b ka na wɔ nnɛ? 18Ama bumo be ekama maŋ tiŋ m bɛta m ba di Ebɔrɛ epaŋ she efɔ ere nawule a?” 19Nɛ Yesu kaŋɛ emo nɛ e bɛta m ba na le: “Niŋi to ŋ koso m pɛ fo ekpa a yɔ. Fo yirda e chɛ fo.”
Ebɔrɛ be kuwura na be keba be asheŋ
(Matiu 24:23-28, 37-41)
20Kachako Efarisiana ko bishi Yesu saŋɛ nɛ Ebɔrɛ be kuwura na beeŋ ba nɛ e kaŋɛ bumo le: “Ebɔrɛ be kuwura na be keba maŋ la kusɔ nɛ k beeŋ bar asɔ ko nna nɛ men wu amo geeŋ pɔɛŋ nɛ k ba. 21Kumo alɛ maŋ naa la kusɔ nɛ basa beeŋ kaŋɛ le nna: ‘Men keni, Ebɔrɛ be kuwura na nde nfe ŋko kumo e wɔ ndoŋ ere na!’ Ŋkpal manɛ so, Ebɔrɛ be kuwura na tea wɔ menyi to.”
22Ndoŋ nna nɛ e kaŋɛ mbe bebɛsopo na le: “Kachako menyeeŋ yɛlga ma, Nyiŋgbasa Pibinyɛn be nchɛ be kukoŋwule, ama menyi alɛ maaŋ nya kumo n wu. 23Amo be jemanɛ na so basa beeŋ kaŋɛ menyi le: ‘Men keni, mo e wɔ ndoŋ ere na ŋko mo e wɔ nfe ere na!’ 24Men sa maŋ kaŋ yɔ ŋko m bɛ bumo so. Ŋkpal manɛ so, kananɛ bɔrɛ bee kaa yili awɔlpa be kaba ko so n nyɛkpɛ n ya chute kaba ko so na nɛ ma, Nyiŋgbasa Pibinyɛn beeŋ ba du kachɛ nɛ meeŋ ba na. 25Ama pɔɛŋ nɛ asheŋ ere kikɛ e wora, ma, Nyiŋgbasa Pibinyɛn beeŋ ji awurfoŋ damta nɛ kanaŋ ere to ebi e kini ma. 26Ma, Nyiŋgbasa Pibinyɛn be jemanɛ beeŋ ba kaa du fanɛ Nowa be jemanɛ na gbagba nna le chap. 27Basa daa wɔtɔ nna a ji a nuu nɛ benyɛn bee ta beche nɛ beche malɛ bee yɔ kakil to hale loŋ nɛ kachako nɛ Nowa ya luri ekuloŋgboŋ na to nɛ nchugboŋ na ba mur bumo kikɛ nyam. 28Lɔt gba be jemanɛ basa daa wɔtɔ nna a ji a nuu nsaa ji yawu nsaa duu asɔ nsaa pɔr ebuana. 29Ama kachɛ nɛ Lɔt lar Sodɔm be kade na to nɛ edɛ nɛ abɔrɛjembubi tushiso shi ebɔrɛso n tɔr m mur bumo kikɛ nyam. 30To, loŋ gbagba be kebaawɔtɔ nɛ basa beeŋ baa kɔ kachɛ nɛ ma, Nyiŋgbasa Pibinyɛn beeŋ lara ma kumu ŋ ŋini durnya ere na. 31Kumo be kachɛ na, nɛ fanɛ esa wɔ mbe kuchoŋi so nɛ mbe asɔ wɔ ebu to, e sa maŋ naŋ gbelge m ba ta amo. Nɛ ekama malɛ nɛ e wɔ ndɔ to kumo be kamɔnchɛ na, e sa maŋ bɛta n ya ta mbe asɔ. 32Men baa nyiŋi kusɔ nɛ k daŋ nya Lɔt be eche na. 33Ekama nɛ e bee sha mbe ŋkpa ga, beeŋ paŋ kumo, ama ekama nɛ e paŋ mbe ŋkpa, beeŋ nya kumo. 34Kumo be kamɔnchɛ be kanyɛso benyɛn anyɔ beeŋ baa dese gedo koŋwule so nɛ b ta ekoŋwule nseŋ ka enyɔsopo na. 35Beche anyɔ beeŋ baa wɔ kaboŋ koŋwule a kɔr asɔ nɛ b ta ekoŋwule nseŋ ka enyɔsopo na. 36Kumo be kamɔnchɛ na benyɛn anyɔ beeŋ baa wɔ ndɔ to nɛ b ta ekoŋwule nseŋ ka enyɔsopo na.” 37Nɛ b bishi mo: “Enyɛnpe, nnɛ nɛ le be asheŋ ere kikɛ beeŋ wora?” Nɛ e kaŋɛ bumo: “Kakpa nɛ kusɔ wuso dese, ndoŋ nɛ ejita bee chala a mel.”
S'ha seleccionat:
Luuk 17: GJNb
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2015 GILLBT Ghana Institute of Linguistics, Literacy and Bible Translation