Xhun 2
2
Uvaʼs tex quBʼaal Jesuus tiʼ val u tzʼaloʼm tu tenam Kanaa
1Kabʼitalichetz vet iyolon Jesuus tuchʼ Natanaeel tuulbʼal Galileea, tul utxh val u tzʼaloʼm tu tenam Kanaa tuulbʼal Galileea. Tul antich vitxutx Jesuus tiʼ u tzʼaloʼm. 2Atz ant Jesuus tuchʼ inqʼa nikich itxhus tibʼ s-kʼatza bʼekʼich tiʼ u tzʼaloʼm. 3Poro motxetz u taʼl uuva,{*}#2.3 ¿Kam talax u yol ‹vino› uvaʼ nik tal tu kastiiya? U yol vino, ‹taʼl uuva,› chich oʼ s-tiʼ, tan at u taʼl uuva uvaʼ niim qʼij nik iqʼuʼuxeʼ tul sibʼ vet iyakʼil nik ibʼaneʼ. Atz at uvaʼ yaʼnaq kuxh ipotxhʼox el taʼlil, tul yek nik tukʼaleʼ. Xaʼtetze jit tetxhal laʼ qala uvaʼ ‹qʼuʼich taʼl uuva› chaq koq oʼ. Pet ‹taʼl uuva,› chich kuxh oʼ s-tiʼ. tul ech tal vet vitxutx Jesuus s-te s-eche: —Motxy vitaʼl uuva inqʼa aj tzʼaloʼm, —xeʼt vitxutx Jesuus s-te.
4Yaʼne ech tal Jesuus te vitxutx s-eche: —Kametz s-tiʼil nik aal s-ve s-eche, ixoq. Atz yeʼx opoonoq viqʼiil vinkʼutxht inqʼa kaebʼal aanima, —xeʼt Jesuus.
5Yaʼne ech tal vitxutx Jesuus te inqʼa nikich ikʼuulan tiʼ inqʼa kam s-eche: —Bʼanvaq kam uvaʼ toq tal Jesuus sete, —xeʼte.#Jeenesis 41.55
6Atichetz vajqil mamaʼ txhaq txeʼn, tatibʼ aʼ, uvaʼ sivanichaqxhtuʼ, uvaʼ nikich ibʼanbʼe inqʼa tij imam Israeel tiʼ inimal inqʼa txʼajo ibʼ vatz quBʼaal Tiuxh. Tul kamal oʼvoʼq txhʼoj txeʼn aʼ, atz maq vajqoq txeʼn aʼ nikich ibʼen tuul junun inqʼa mamaʼ txhaq txeʼn.
7Yaʼne ech tal Jesuus te inqʼa nikich qʼexsan inqʼa kam s-eche: —Nojsavaq inqʼa mamaʼ txhaq txeʼn tuchʼ txhoʼl aʼ, —xeʼt Jesuus. Tul tira inojsaaq veteʼ.{*}#2.7 Inqʼa vajqil txeʼn uvaʼ nik tal tzitza, tan kamal viinqilich galoon tuul. Atz ataq inqʼa vinaq laval galoon tuul.
8Yaʼne ech tal vet Jesuus te inqʼa nikich qʼexsan inqʼa kam s-eche: —Iqʼovaqetz inbʼeeq u aʼ, tul bʼenoq etaqʼ vatz u iqatzin tetz tilix u tzʼaloʼm, —xeʼt Jesuus. Tul ex aqʼloq veteʼ.
9Yaʼne inatxh vet u iqatzin tetz tilix u tzʼaloʼm inbʼiil u txhoʼl aʼ uvaʼ maʼtich ibʼen vet s-taʼl uuva. Poro yeʼlich s-kʼuul kam bʼanax vet tiʼ itxhej u taʼl uuva. Pet taʼn kuxh inqʼa nikich qʼexsan inqʼa kam ootzaqinich tetz uvaʼ yiqxh txhoʼl aʼ uvaʼ motx ipul tzaan, atz taqʼaq kuʼ t-inqʼa mamaʼ txhaq txeʼn.
Tul saʼvit vet tzaan u vinaq, uvaʼ tzʼaloni, taʼn u iqatzin tetz tilix u tzʼaloʼm. 10Tul ech tal te u vinaq s-eche: —Jankʼalxh inqʼa vinaq uvaʼ nik itzʼaloneʼ, tan aʼ nik taqʼ eluʼl s-bʼaxa u bʼaʼnla taʼl uuva. Maʼtetz vet ipal iviʼ tukʼat inqʼa xaol u taʼl uuva, yaʼne nik taqʼax vet eluʼl u taʼl uuva s-te uvaʼ bʼiitxh nik taleʼ. Petetz koq axh, tan aʼ bʼak eesamal ka aaʼn u bʼaʼnla taʼl uuva. Tul yaʼn aaqʼl vet qukʼa s-txheel, —xeʼt u iqatzin tetz tilix u tzʼaloʼm.
11Aʼetz ibʼanvat Jesuus u bʼaxa kaebʼal aanima tu tenam Kanaa uvaʼ at tuulbʼal Galileea. Tul tzitzi ikʼutxhvat Jesuus uvaʼ mam yol u tatineʼ. Echetz iqejt vete inqʼa nikich itxhus tibʼ kʼatz Jesuus uvaʼ, aʼich Jesuuse u Kriisto.
12Yaʼetz kuxh vet u nimla qʼij tiʼ u tzʼaloʼm, tul bʼen vet Jesuus tu tenam Kapernauum tuchʼ itxutx tuchʼ inqʼa titzʼin, atz tuchʼ inqʼa nikich itxhus tibʼ s-kʼatza. Tul motx atinaq vet tzitzi tuulbʼal tanul qʼij.#Tio 4.13
Uvaʼs imaqt quBʼaal Jesuus ikʼayin inqʼa yakol kʼaʼy tu nimla atibʼal tetz u tostiuxh tu tenam Jerusaleen
Tio 21.12-13; Kuxh 11.15-18; Luk 19.45-46
13Toqnaʼqichetz opoonoq vet viqʼiil inimat inqʼa tij imam Israeel u nimla qʼij Ipal Aanxel, echetz ibʼen vet jaʼ Jesuuse tu tenam Jerusaleen.#Eeksodo 12.1-27
14Aqʼbʼetz vet Jesuus tu nimla atibʼal tuulbʼal u tostiuxh, tul til vet Jesuus uvaʼ mam kʼaʼy nikich tutxh vet s-tuul. At inqʼa nikich kʼayin vaʼk. Atz at inqʼa nikich kʼayin karneʼl. Atz at inqʼa nikich kʼayin paraamuxh. Atz tilat Jesuus inqʼa kʼuqlichaq tiʼ ijalax ipuaq inqʼa xaol.{*}#2.14 ¿Kam s-tiʼil nikich ijalax ipuaq inqʼa xaol? Pet, tiʼ uvaʼ, yeʼ nikich ikʼulux vipuaq inqʼa aj Rooma tu nimla atibʼal tuulbʼal u tostiuxh tetz inqʼa tij imam Israeel. Tan nikich tixva inqʼa tij imam Israeel vibʼekʼoʼm inqʼa aj Rooma. Tul yeʼaq nikich motx ikʼul vipuaq inqʼa aj Rooma; aʼe u denaario tuchʼ u draakma. Tul atichaq ipuaq inqʼa tij imam Israeel s-naʼya uvaʼ ‹siiklo› ibʼij. Tul taʼnetzxh u puaq siiklo nikich ikʼulaqe. Echetz tetxhal bʼaxa laʼ nalich ijal inqʼa xaol u puaq tetz Rooma uvaʼ iqʼomal taʼn, tul aʼ vet u puaq siiklo laʼ aqʼax s-te. Tul taʼnetz kuxh vet u puaq siiklo laʼ ibʼanbʼe vet tiʼ kam iloqʼoʼm laʼ ibʼana tu nimla tuulbʼal u tostiuxh. Tul sibʼ nikich itxʼak inqʼa jalol puaq tiʼ ijalax u puaq tetz Rooma. Aʼetz u subʼuʼme uvaʼ til Jesuus uvaʼ nikich tutxh tu nimla atibʼal tuulbʼal u tostiuxh. Echetz s-tiʼile lakp iviʼ quBʼaal Jesuus tiʼ itukilaq el inqʼa jalol puaq, atz ivampu el quBʼaal Jesuus vimeexha. Tio 21.13
15Yaʼne ibʼan vet Jesuus tutxh val u iqvil sitzʼuʼm. Tul xeʼt Jesuus tiʼ itukil eluʼl inqʼa xaol tuchʼ inqʼa ivaʼk, atz tuchʼ inqʼa ikarneʼl tu nimla tuulbʼal u tostiuxh. Tul imakʼeʼl Jesuus ipuaq inqʼa jalolaq puaq. Tul ivampu el Jesuus inqʼa imeexha. 16Tul ech tal vet Jesuus te inqʼa nikich kʼayin paraamuxh s-eche: —¡Eesavaq el inqʼa ekʼaʼy tzitza! Tul ¡yeʼ etaqʼ bʼen u totzotz vinBʼaal s-kʼayibʼal! —xeʼt Jesuus.
17Yaʼne nal kuxh tul s-kʼuul inqʼa nikich itxhus tibʼ kʼatz Jesuus uvaʼ ech val u yol tzʼibʼamalich ka t-viyolbʼal quBʼaal Tiuxh s-eche: —Tira nik tiqʼo vaanima uvaʼ taʼn kuxh natxhkʼuulaʼm laʼ utxh t-vavotzotz, —chich u yol.#Saalmo 69.9
18Yaʼne ech tal vet inqʼa iqʼesal tuqʼeʼybʼal inqʼa tij imam Israeel s-eche: —¿Kametz invaʼq kaebʼal aanima bʼa toq akʼutxh s-quvatz tiʼ qootzaqitaʼ uvaʼ at aviqleʼm taʼn quBʼaal Tiuxh? Tan niketz kuxh apalsa el inqʼa kam tetz inqʼa xaol, —xeʼtaqe.
19Tul ech tal Jesuus s-eche: —Tilpuvaq u tostiuxh uvaʼa, tul oxvaʼl kuxh qʼij toq oleʼvik in tiʼ ilakax inpaqte, —xeʼt Jesuus.#Tio 26.61; 27.40; Kuxh 14.58; 15.29
20Yaʼne ech tal inqʼa iqʼesal tuqʼeʼybʼal inqʼa tij imam Israeel s-eche: —Vajqilen toxkʼal yaʼbʼe (46) nuqpik u nimla atibʼal tuulbʼal u tostiuxh. Tul ¿oxvaʼl txhan qʼij laʼ oleʼvik vet axh tiʼ taqʼax jaʼ nik aaleʼ? —xeʼtaq te Jesuus.#Tio 27.61
21Poro jitetz aʼ tal Jesuus u nimla atibʼal tuulbʼal u tostiuxh, pet aʼ tal Jesuus tiʼ vitxhiʼoʼl. 22Maʼtichetz titzʼeʼv vet Jesuus inpaqte, tul ul vet u yol s-kʼuul inqʼa nikich itxhus tibʼ kʼatz Jesuus, u yol uvaʼ maʼtich talt Jesuus. Echetz motx iqejt vete inqʼa nikich itxhus Jesuus, inqʼa yol uvaʼ tzʼibʼamal ka t-viyolbʼal quBʼaal Tiuxh, atz inqʼa yol uvaʼ tal Jesuus tiʼ u titzʼeʼv inpaqte.
23Atichetz vet Jesuus tu tenam Jerusaleen tiʼ inimal u nimla qʼij Ipal Aanxel, tul mamala kaebʼal aanima ibʼan Jesuus xoʼl inqʼa xaol. Echetz iqejex vet Jesuuse taʼn mamala xaol uvaʼ, aʼ Jesuus ul sivatzil quBʼaal Tiuxh. 24Poro jit aʼ toksa Jesuus s-tuul kam uvaʼ nikich tal inqʼa xaol. Tan tootzaqich Jesuus kam vitxumbʼal inqʼa xaol s-kaqaayil. 25Echetz jit aʼ nikich itxʼebʼ Jesuus taqʼax itxumbʼal taʼn inqʼa xaol, tan tootzaqlich Jesuus kam uvaʼ atich tu taanima junun inqʼa xaol.
S'ha seleccionat:
Xhun 2: ixlC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.