Tio 1
1
TIO
Aʼ u yole uvaʼa tiʼ inqʼa kʼuy imam quBʼaal Jesuus
Luk 3.23-38
1Aʼ u uʼe uvaʼa, uvaʼ tzʼibʼamal ka ibʼij inqʼa kʼuy imam JesuKriisto s-tuul, u tij imam Daviid, antxh u tij imam Avraʼaam.{*}#1.1 Eche u yol ‹Jesuus,› tan bʼije tu yolbʼal grieego xoʼl inqʼa tij imam Israeel s-naʼya. Eela talax u yol ‹Jesuus› tuchʼ u yol ‹Josuee,› tan bʼee tu yolbʼal evreeo. Tul: ‹Aʼ Tiuxh nik ichitoneʼ,› chich telaʼpun. Pet u yol ‹Kriisto,› tan iqleʼm. Tul ‹chʼexoʼm,› chich telaʼpun. Tan quBʼaal Tiuxh chʼexon quBʼaal Jesuus tiʼ ibʼen s-Kriisto.
2Aʼ Avraʼaam kʼaolan Isaak. Aʼetz vet Isaak kʼaolan Jakoov. Aʼetz Jakoov kʼaolan Judaa, atz kʼaolan inqʼa tatzik, atz inqʼa titzʼin Judaa. 3Aʼetz Judaa tuchʼ Tamaar nitxaʼin Faares, atz nitxaʼin Saara. Aʼetz vet Faares kʼaolan Esroom. Aʼetz Esroom kʼaolan Araam. 4Aʼetz Araam kʼaolan Aminadaav. Aʼetz Aminadaav kʼaolan Nasoon. Aʼetz Nasoon kʼaolan Salmoon. 5Aʼetz Salmoon tuchʼ Raʼaav nitxaʼin Voos. Aʼetz vet Voos tuchʼ Ruut nitxaʼin Oveed. Aʼetz Oveed kʼaolan Isaii. 6Aʼetz Isaii kʼaolan Daviid, uvaʼ ok s-mam iqʼesal.
Aʼetz vet Daviid, u mam iqʼesal, tuchʼ ixoq, u tixqelich Uriias, nitxaʼin Salomoon. 7Aʼetz Salomoon kʼaolan Rovoaam. Aʼetz Rovoaam kʼaolan Aviias. Aʼetz Aviias kʼaolan Aasa. 8Aʼetz Aasa kʼaolan Josafaat. Aʼetz Josafaat kʼaolan Joraam. Aʼetz Joraam kʼaolan Usiias. 9Aʼetz Usiias kʼaolan Jotaam. Aʼetz Jotaam kʼaolan Akaas. Aʼetz Akaas kʼaolan Esekiias. 10Aʼetz Esekiias kʼaolan Manasees. Aʼetz Manasees kʼaolan Amoon. Aʼetz Amoon kʼaolan Josiias. 11Aʼetz Josiias kʼuy imam Jekoniias, atz kʼuy imam inqʼa titzʼin, atz inqʼa tatzik Jekoniias tuulbʼal uvaʼs itxeyexaq bʼen inqʼa tij imam Israeel tuulbʼal Vaviloonia.#2 Reeyes 24.14-17; 2 Kroonikas 36.10; Jeremiias 27.20
12Paletz vet paʼl inqʼa qʼij tiʼ vitxeyp bʼen inqʼa tij imam Israeel tuulbʼal Vaviloonia, tul ikʼaola Jekoniias Salatieel. Aʼetz Salatieel kʼaolan Sorovaveel. 13Aʼetz Sorovaveel kʼaolan Aviuud. Aʼetz Aviuud kʼaolan Eliakiim. Aʼetz Eliakiim kʼaolan Asoor. 14Aʼetz Asoor kʼaolan Sadook. Aʼetz Sadook kʼaolan Akiim. Aʼetz Akiim kʼaolan Eliuud. 15Aʼetz Eliuud kʼaolan Eleasaar. Aʼetz Eleasaar kʼaolan Mataan. Aʼetz Mataan kʼaolan Jakoov. 16Aʼetz Jakoov kʼaolan Xhuʼl, vitzumel Mal, Mal, uvaʼ alan Jesuus, uvaʼ Kriisto u tiqleʼm.
17Kajlavalen tatxhul inqʼa kʼuy mam uvaʼ, aʼ Avraʼaam nik xeʼtisan tzaan tetxhal tul kʼatz Daviid. Atz kajlavat tatxhul inqʼa kʼuy mam uvaʼ, aʼ Daviid nik xeʼtisan tzaan, tetxhal tul t-inqʼa qʼij uvaʼs nikich itxeyex bʼen inqʼa tij imam Israeel s-pereexhoil tu mam tenam Vaviloonia. Tul kajlavat tatxhul inqʼa kʼuy mam uvaʼ, aʼ nik xeʼtik tzaan uvaʼs nikich itxeyex bʼen inqʼa tij imam Israeel s-pereexhoil tu mam tenam Vaviloonia, tul aʼ nik ex yaʼk vet uvaʼs talal u Kriisto, uvaʼ alelich ka u tulebʼal taʼn quBʼaal Tiuxh.
Uvaʼs talal quBʼaal Jesuus
Luk 2.1-7
18Ech u yol tiʼ u alabʼ tetz JesuKriisto s-eche: Jaqelich vet Mal taʼn Xhuʼl, Mal vitxutx Jesuus. Poro yeʼxnaqichetz ikʼuleʼt tibʼ Mal tuchʼ Xhuʼl, tul oybʼaltich vet Mal tiʼ Jesuus taʼn vibʼaʼnil viTiuxhil Tiuxh. 19Yaʼne titzʼa vet Xhuʼl, vitzumel Mal, uvaʼ jutx kuxh saʼich taqʼax vet ka Mal taʼn Xhuʼl. Tan yeʼ nikich isaʼ Xhuʼl uvaʼ laʼich ichʼixvisa Xhuʼl Mal vatz inqʼa xaol. Tan tira nikich inima Xhuʼl vibʼekʼbʼal quBʼaal Tiuxh.#Deuteronoomio 22.23-24{*}#1.19 Deuteronoomio 22.23-24. Ech nik tal u bʼekʼbʼal uvaʼ itzʼibʼa ka Moisees s-eche: —Oq uvaʼ at vet iyol invaʼq u vinaq tuchʼ invaʼq u ixoq tiʼ itzʼaloneʼ, poro oq xamtel laʼ iyansa vet tibʼ u ixoq tuchʼ invaʼtoʼq vinaq, tul laʼ utxhi laʼ taqʼ ka u vinaq u ixoq uvaʼe, uvaʼ at vet iyol tiʼ itzʼalon s-tuchʼ, —chiche.
20Nikichetz kuxh titzʼa Xhuʼl kam laʼich yaʼk Xhuʼl tuchʼ u yol uvaʼe, tul yeʼ taqla ikʼutxh vet tibʼ val viaanxel quBʼaal Tiuxh te Xhuʼl t-vatzikʼ. Tul ech tal s-eche: —Xhuʼl, axh u tij imam Daviid, yeʼ kuxh xoʼv axh tiʼ tiqʼol Mal s-eexqel. Tan tetz viTiuxhil Tiuxhe, u neʼ uvaʼ at kʼatz Mal. 21Xaaketz u neʼ uvaʼ toq tala Mal, tul laʼ ooksa ibʼij s-Jesuus. Tan aʼ u neʼ laʼ chiton vitenam t-inqʼa paʼv, —xeʼt u aanxel.#Saalmo 130.7-8
22Tul echxh ibʼane tiʼ telaʼpun jankʼal inqʼa yol uvaʼ tal quBʼaal Tiuxh te val u qʼexsanich tetz viyol, uvaʼ ech tal s-eche:
23—«Il val u qʼopo ixvaak
toq yanoq ikʼuul.
Tul toq tala vaʼl neʼ xaak.
Tul laʼ oksal ibʼij
s-Emanueel,»
chich quBʼaal Tiuxh,
—xeʼt u qʼexsanich tetz viyol quBʼaal Tiuxh.#Isaiias 7.14
‹At quBʼaal Tiuxh s-quxoʼl,› chich telaʼp u yol Emanueel.
24Uletz vet ivatz Xhuʼl uvaʼs tilt Xhuʼl u vatzikʼ, tul ibʼan vet Xhuʼl kam uvaʼ tal viaanxel quBʼaal Tiuxh s-te. Tan ikʼul vet Xhuʼl Mal s-tixqel. 25Kʼuxhetz tiqʼoxh vet tibʼ Xhuʼl tuchʼ Mal, poro yeʼl Xhuʼl nikich ivatoʼk kʼatz Mal. Pet tala nalich Mal u bʼaxa tal, uvaʼ ok ibʼij s-Jesuus.
S'ha seleccionat:
Tio 1: ixlC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.