Johan 3
3
Isu hai Nikodimae
1Pharisai na thung-a Nikodimae näsaite Judae khimi mätawngky lawngtä awng. 2Äni la düngtä-a Isu tea ly kha “Särae ä, nang lä Säthaw ma mätaw saite särae lawngtä vi näte kai ce lä mäny dy. Säthaw lä khimi lawngtä hai mangtä awng y dylä, nang kätyng-a ämi la cangxei saite sa haw y lyng” näkha näpa.
3Isu ma “Tängai ba, äbaeni aepeng haile y saite khimi lä Säthaw ma Sanphrang sa saite nung haw y lyng” näpa.
4Nikodimae ma “Säning leng saite lä ätemakä sa kha aepeng haile haw ai mei. Änä-awi jo thung-a kung haile ea äbaeni aepeng haw y dy” näkha näpa.
5Tukha Isu ma “Tängai khü ba. Khimi lawngtä lä tui hai Muilaw Käcai hai-a aepeng y dylä, Säthaw üng pre thung-a qa haw y lyng. 6Khimi üng änä-awi pä-ai hai-a khimi ätabung dang. Säthaw üng Muilaw Käcai hai-a muilaw hing saite dang. 7Äbaeni aepeng haile hethang kae näkha kai thui te tea lä cangxei y hang. 8Aeli lä äma ngai saite mang-a tho te vi. Aeli tho te tüng thai ngaila mani mityng üng tho te mei näte thui haw y. Muilaw Käcai hai-a hing saite dang te na lä hini kätyng kae vi” näpa.
9Nikodima ma “Hini lä ätemakä sa kha awng haw ai mei” näkha düng pa.
10Tukha Isu ma “Nang lä Isrelae khimi na üng särae lawngtä be. Hini phüng thaikaw y rae vi mei. 11Tängai khü ba. Mä-ai lä mä-ai ma mäny khe saite phüng thui vävawi te vi. Nung saite phüng thui te kae. Tungaila kai ce üng thui saite nang ce lä tängai he ngai ö y vi. 12Hini älawng üng phüng kai thui ea nang ce lä yng ö y. Känipre üng phüng kai ma thui dylä nang ce lä yng ö y lyng. 13Ämi lawngtä lä Känipre-a paw vai te y. Känipre üng cäqa saite Khimi üng Cäpaw lawngtä ni Känipre-a paw vai te kae.
14“Mosi ma daithung kärang-a süng hai sa saite thing qawng-a bärui mäkhing kha bädaw pa. Hini kätyng Khimi üng Cäpaw bung lä bädaw by ai. 15Tukätephüng-a Khimi üng Cäpaw tea yng saite khimi angxynlyng la dungtäsa hing te dang vi. 16Säthaw lä älawng khimi ce tea bälung aevaw te phüng-a Äcäpaw lawngtä xyng bung py vi. Äcäpaw tea yng saite khimi angxynlyng na lä muilaw dü y käla dungtäsa hing te dang vi. 17Säthaw lä khimi ce tea dengpy hethang Äcäpaw bung älawng qawng-a mätaw te y. Älawng üng khimi na bung Äcäpaw hai aeqang hethang tähang-a mätaw te kae vi.
18“Säthaw üng Cäpaw tea yng saite khimi na tea lä Säthaw ma dengpy te awng y. Äcäpaw tea yng y saite khimi na tea lä vaihi ma Säthaw lä dengpy te vi dy. Ätephüng-a mei nädylä Säthaw üng Cäpaw lawngtä xyng tea yng pa y te phüng-a vi. 19Säthaw üng dengpy te lä hini dy. Kaevang lä älawngpre-a tyng ngaila khimi ce lä hunghö sa te phüng-a kaevang qawng käving tea bälung aevaw ö ky te vi. 20Hunghö sa saite khimi angxynlyng na lä kaevang tea esäre ö te vi. Äma ce üng hawi y sa te na aetüng y hethang äni ce lä kaevang teng-a ly he ngai y. 21Tungaila mitang khü-a sa saite khimi na lä äma ce üng sa saite na Säthaw hai aesui kha mätü hethang kaevang teng-a ly ö dy.”
Isu ni Johan
22Tupyng-a Isu lä äkähui na hai mangtä Judae khö mang-a ly ö dy. Honi mityng-a äkähui na hai mangtä awng kha khimi ce tea baptismae py dy. 23Baptismae Johan lä Salim märü teng-a tui awng mang saite Aenon mityng-a baptismae py pa dy. Khimi ce lä awng mang-a ly ö jawjaw kha baptismae la ö dy. 24(Honi kätü-a Baptismae Johan lä thawng thung-a awng y rawng.)
25Johan üng äkähui phütä na lä reitae kätyng caiping saite phüng Judae khimi lawngtä hai ae-e ö dy. 26Baptismae Johan üng äkähui na lä äni tea ly kha “Särae ä, Jordan tävaw rei-a nang hai mangtä awng saite khimi ma nang ma thui saite lawngtä tea äni lä vaihi baptismae py dy. Äni tea khimi angxynlyng na lä ly dy” näkha thui pa.
27Baptismae Johan ma “Säthaw ma sa te y dylä, khimi ce tea äte la aecyng y lyng. 28Kai lä Mesia y vi. Äni üng maw-a mätaw saite lawngtä kae. Kai ma thui te nang ce thai kha thui haw te kae. 29Nawngmädi anglaw bung dang saite lä nawngpaw vi dy. Nawngpaw üng rawijae lä äni äteng-a awng kha äni üng ätüng tängai ea anghawtho te vi. Hini kätyng kai üng kawng te lä kawi dy. 30Äni lä aely lengky kha kai lä leithung mang-a aenaw vi ai.
Känipre üng cäqa saite Isu
31“Känipre mang üng cäqa saite Kung lä khimi angxynlyng qawng-a lengky. Älawng qawng-a aepeng saite lä älawng üng khimi kha älawng üng phüng thui te vi. Tungaila Känipre üng cäqa saite Khimi lä äte angxynlyng qawng-a aesangky. 32Äni lä äma nung te hai thai saite phüng thui ngaila äni üng angthang tea ämi la yng pa ö y. 33Tungaila äni üng angthang yng saite khimi na ma lä ‘Säthaw lä mitang khü vi’ näkha thui te vi. 34Säthaw ma mätaw saite lawngtä lä Säthaw üng älo angthang thui vi. Säthaw ma äni tea Muilaw Käcai käkawi-a py pa te vi. 35Pä-ai lä Äcäpaw tea bälung aevaw kha äte angxynlyng na äni kö thung-a py pa dy. 36Äcäpaw tea yng te na la dungtäsa hing te dang ö dy. Äcäpaw tea yng y saite na lä dungtä hing te dang ö y lyng. Äni ce tea Säthaw ma dengpy jawjaw ö vi ai.”
S'ha seleccionat:
Johan 3: cekNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2017, Bible Society of Myanmar and Wycliffe Bible Translators, Inc