John 8
8
Iskweu kaa pisikwaatisiit
1Anite maak Olives kaa ishinihkaatech wachii ekute kaa ituhtet wiya Jesus. 2Wiipach miin wiyaapaniyich anite chisheayimiheukamikuhch miin chii ituhteu. Misiwe maak aniyuuh iinuuh chii pechi nituwaapamikuu. Kaa waweyapit ekw kaa chiskutamuwaat. 3Anichii maak wiishuwewiniyuu kaa chiskutamaachetwaau ekw maak anichii Phariseech chii peshuweuch iskweu e chii wiich pisikwaatisiimaayich naapeuh. Ekut anit e mihchetinaanuyich kaa peshuwaatwaau aniyuu iskweu. 4Ekw kaa itaatwaau aniyuu Jesus, “Chischinuhamaachesuu, chii cheskuwaakanuu uu iskweu mekwaach e wiich pisikwaatisiimaat naapeu. 5Itashteu anite Moses uwiishuwewinihch chechii nipahaakanuut e paahpimusinaatihwaakanuut iskweu e cheskuwaakanuut kutak naapeu nitawiin e ishi wiichewaat. Taan maak e iteyihtaman chiya.” 6Eukw uyuu kaa itaatwaau e chii wii naanituu kakwechihaatwaau che piikunamiikwen uyuu wiishuwewiniyuu, ekw maak piikunamiikwen chipaa ihtakuniyuu che ishi mimisimaatwaau.
Mikw maak anite aschiihch chii ishi nawewiyuu Jesus, kaa masinahiichet anit yekaahch utihchii e aapachihtaat. 7Mekwaach maak anit e niipuutwaau e aayihkamihaatwaau chechii nishkweushihiikutwaau taan kaa ishi kakwechimaatwaau, chii tashukaapuu Jesus ekw kaa itaat, “Taan an awen anit e tashiyekw ekaa wiiskaat uhchi machituutahk wiya niishtam chika pimushinaatahweu aniyuu iskweu.” 8Miin kaa nawekaapuut ekw miin kaa masinahiichet anite yekaahch. 9Iskutak kaa pehtawaatwaau uyuu e itweyich, paahpeyakw chii ati chistuhteuch, niishtam anichii kaa chisheinuutwaau. Chek mikw wiya Jesus chii ihtaau anit ekw maak aniyuuh iskweu. 10Kaa tashukaapuut Jesus ekw kaa itaat aniyuu iskweu, “Iskweu, taanite e ihtaatwaau anichii kaa mimisimiskwaau. Namui aa ihtaau awen e chii nishuuwanaachimisk.”
11Ekw an iskweu kaa nishkweushihaat Jesus e itaat, “Namui, Utipeyihchikeu.” Jesus maak chii iteu, “Namui kaye niya chinishuuwanaachimitin. Maachiih, ekaawii miin machituut.”
Jesus miiweu waashtewiniyuu utah aschiihch
12Iskutak Jesus miin e ayimihaat aniyuu iinuu chii iteu, “Niya eukw kaa miikwaau iinuuch waashtewiniyuu utah aschiihch. An awen kaa nuushuushkuut chika ayaau pimaatisiiwiniyuu waashtewinihch uhchi kaye namui chika uhchi pimuhteu wanitipiskisiiwinihch.”
13Ekw anichii Phariseech kaa itaatwaau, “Mikw chii chitayimistamaasun, namui taapwehtaakun an kaa itweyin.”
14Jesus kaa itaat, “Aat mikw niya e tipaachimisuyaan taapwemakan taan e itweyaan. Wesh nichischeyihten taanite wehchiyaan kaye taanite che ituhteyaan. Chiyawaau maak namui chichischeyiminaawaau taanite wehchiyaan kaye taanite che ituhteyaan. 15Mikw taan e ishinuwekw awen eukun aniyuu e ishi wiyaaskunekw, niya maak namui niwiyaaskunaau awen. 16Wiyaaskunicheyaane maak chika taapwemakan an taan che ishi wiyaaskunicheyaan. Wesh namui nipeyakushin e wiyaaskunicheyaan, Nuuhtaawii an kaa pechi itishahuut eukun an waachihiit. 17Itashteu anite chiwiishuwewiniwaahch niishu awenich peyakunihch e itihtaakusitwaau e wiihtahkwaau taan kaa ishi waapahtahkwaau e ispayiyich chekwaayuu, taapwemakaniyuu aniyuu taan e itwetwaau. 18Nitaapwen taan e itaachimisuyaan kaye Uhtaawiimaau an kaa pechi itishahuut wiihtam e taapweuch.”
19Ekw kaa itaatwaau, “Taanite e ihtaat kuuhtaawii.” Jesus kaa ishi nishkweushihaat, “Namui taapwe chichischeyiminaawaau kaye Nuuhtaawii namui chichischeyimaawaau. Wesh chischeyimiyekw Nuuhtaawii kaye chipaa chischeyimaawaau.”
20Eukw uyuu kaa itwet Jesus anite chisheayimiheukamikuhch kaa chiskutamaachet anite kaa chii kanuweyihtaakanuyikwaauh pachishtinichewinh. Namui maak aweyuu uhchi maakunikuu wesh namui eshkw uhchi utihchipayuu anit chipaa maakunaakanuu.
Namui chika chii ituhtenaawaau taanite che ituhteyaan
21Ekw miin kaa itaat Jesus aniyuuh, “Nika chistuhten, chika pechi naanituwaapaminaawaau mikw maak ekun che ishi nipiyekw e chichishkamekw chimachaatisiiwinawaauh. Namui maak chika chii ituhtenaawaau taanite che ituhteyaan.”
22Ekw anichii Jewa iinuuh kaa niikaanishkuwaatwaau kaa itwetwaau, “Aniyuu maa kaa itwet, namui chika chii ituhtenaawaau taanite che ituhteyaan. Chika nipahiisuu kaakaye aniyuu wehchi itwet.”
23Jesus maak chii iteu, “Niihtaahch kuuhchiinaawaau chiyawaau niya maak anite ishpimihch nuuhchiin. Utah aschiihch kuuhchiinaawaau chiyawaau, niya maak wii namui utah aschiihch nuuhchiin. 24Chichii wiihtamaatinaawaau che nipiyekw e chichishkamekw chimachaatisiiwinawaauh. Ekun maak taapwe che ishi nipiyekw e chichishkamekw chimachaatisiiwinawaauh, ekaa taapwehtamekwe eukun an niya taapwe e aawiyaan.”
25Ekw kaa kakwechimaatwaau Jesus e itaatwaau, “Awen maak chiya.” Jesus kaa ishi nishkweushihaat, “Anit uskach kaa chihchipayihtaayaan e Chiskutamaacheyaan ekut shaash kaa wiihtamaatakuch awen e aawiyaan. 26Mihchen chekwaayuu chechii wiihtamaan chechii uhchi wiyaaskunikuyekw. Mikw maak nika wiihtamuwaauch iinuuch utah aschiihch aniyuu taan kaa ishi pehtuuk e aayimuutahk an kaa pechi itishahuut, wesh muush taapweucheyihtaakusuu wiya.”
27Anichii maak iinuuch anit kaa ihtaatwaau namui uhchi nisituhtaweuch Jesus Uhtaawiimaau aniyuuh kaa aayimuumaayich. 28Ekw Jesus kaa itaat, “Iskutak chiistaaskuhwekwe Iinuu Ukusisa ekw che chischeyimiyekw eukw niya e aawiyaan. Chika chischeyihtenaawaau kaye ekaa ihtuutamaan chekwaan paatish kaa itashumit Nuuhtaawii chechii ihtuutamaan. Mikw aniyuu taan e itashumit uhtaawiimaau chechii wiihtamuch eukw aniyuu che wiihtamuch. 29An maak kaa pechi itishahuut, niwiicheukw, namui nuuhchi nikatikw mikw chechii peyakushuuch wesh muush nitutamuwaan wiya taan e ishi naheyihtamihiikut.”
30Mihchetu maak anichii awenich kaa pehtawaatwaau Jesus uyuu e itweyich chii taapweyimeuch.
Jesus kaa aayimuutahk taanite chechii uhchi aapihkunaakanuyich aweyuuh machihtwaawinihch uhchi
31Jesus maak chii iteu aniyuuh Jewa kaa taapweyimikut, “Muush nanihiihtamekwe nichiskutamaachewinh, chiyawaau eukw taapwe nichischinuhamuwaakanich. 32Chika chischeyihtenaawaau taapwewin kaye chika aapihkunikunaawaau an taapwewin.”
33Ekw kaa itaatwaau, “Aniyaa Abraham e ihtaat nichii uhchi aanische pimaatisiinaan, namui wiiskaat nuuhchi aapachihaakanitutaakunaan awen. Chekwaan maak wehchi itweyin chika aapihkunikunaawaau.”
34Jesus kaa ishi nishkweushihaat e itaat, “Kuiskw chiwiihtamaatinaawaau, misiwe awen kaa machituutahk tipeyimikuu aniyuu taan e ishi machituutahk. 35E utaapachihaakanitutaawaakanuut awen namui muush wiichuu anite uchimaam e ihtaayich mikw an ukusisimaau eukw an chihchiwe waachit anit. 36Aapihkunitaakwe maak Ukusisimaau machihtwaawinihch uhchi taapwe chika aapihkunikunaawaau. 37Chichischeyimitinaawaau Abraham e ihtaat e chii uhchi aanische pimaatisiyekw, mikw maak yaapach chiwii nipahiinaawaau ekaa wii nituhtamekw taan e ishi Chiskutamaacheyaan. 38Nitaayimuuten taan kaa ishi waapahtiit nuuhtaawii. Chiyawaau maak kaye aniyuu taan e itashumitaakw Kuuhtaawaau eukw aniyuu e ihtuutamuwekw.”
39Ekw anichii Jewa iinuuch kaa nishkweushihaatwaau e itaatwaau, “Abraham nuuhtaawiinaan.” Ekw Jesus kaa itaat, “Taapwe Abraham e ihtaat kaa uhchi aanische pimaatisiiwekwe aniyuu taan kaa ihtit Abraham ekun chipaa ihtinaawaau. 40Chichii wiihtamaatinaawaau an taapwewin taan kaa ishi pehtamaan anite Chishemanituu e ihtaat uhchi, mikw maak yaapach chiwii pechi nipahiinaawaau. Aniyaa Abraham namui wiiskaat chipaa uhchi ihtuutam wiya uyuu. 41Ekun e ihtiyekw taan e ihtit Kuuhtaawaau.” Ekw miin kaa nishkweushihaatwaau e itaatwaau, “Chishemanituu eukw mikw e peyakushit e uhtaawiyaahch. Namui nitawiin nuuhchiinaan.”
42Ekw Jesus kaa itaat, “Taapwe Chishemanituu wehtaawiiwekwe, chipaa saachihiinaawaau wesh Chishemanituu e ihtaat nuuhchiin ekw maak utah piyechi ihtaayaan. Namui niya nuuhchi pechi itishahusun, wiya Chishemanituu nichii pechi itishahuukw. 43Chekwaan wehchi ekaa chii nisituhtamekw taan e itweyaan. Namui chiwii nanihiihtenaawaau taan e ishi chischinuhamaacheyaan ekun wehchi ekaa nisituhtamekw. 44Machimanituu eukw wehtaawiyekw, aniyuu e ishi nituweyimitaakw chechii ishi machituutamuwekw eukun mikw waa ihtuutamekw. Muush chii nipahiiweu kaa ishpish ihtakuniyich uyuu aschiiyuu. Namui wiiskaat uhchi nituweyihtam kuiskw chechii ishi wiihtaakuniyich chekwaayuu wesh namui mitun ihtakuniyuu taapwewiniyuu anit e ihtaat. Muush nanatayuu wesh ekun chihchiwe e itaatisiit, eukw maak an taapwe weuhtaawiitutawaat aniyuuh kaa nanatayich. 45Niya maak muush kuiskw nititwen eukw maak an wehchi ekaa taapwehtuuyekw. 46Namui waawaach peyakw anit e tashiyekw chika chii wiihtenaawaau kaa machituutamuwaane. Kuiskw maak muush e itweyaan chekwaan. Chekwaan maak wehchi ekaa chii taapwehtuuyekw. 47An awen Chishemanituu e ihtaayich kaa uhchiit nituhtam Chishemanituu utayimuwiniyuu. Chiyawaau maak namui Chishemanituu e ihtaat kuuhchiinaawaau ekun wehchi ekaa nituhtamekw.” Eukw uyuu kaa itwet Jesus.
Jesus kaa wiihtahk shaash e chii ihtaat eshkw ekaa uhchi pimaatisiyich Abraham
48Anichii maak Jewa iinuuch chii iteuch aniyuu Jesus, “Nichii taapwenaan kaa itweyaahch Samaria e uhchiyin kaye e piihchishkaask machiahchaahkw.”
49Jesus maak chii iteu, “Namui nipiihchishkaakw machiahchaahkw. Nichisteyimaau Nuuhtaawii mikw maak chiyawaau namui chichisteyiminaawaau niya. 50Namui ninaanitaweyihten taanite chechii uhchi chisteyimikuyaan. Mikw maak ihtaau awen e nituweyihtahk chechii chisteyimikuch, wiya maak eukw weyaaskunaat aniyuu aweyuu ekaa kaa chisteyimiyich. 51Kuiskw chiwiihtamaatinaawaau, an awen che nanihiihtamukwe taan e iteuch namui wiiskaat kata uhchi nipuu.”
52Ekw aniyuuh Jewa iinuuh kaa itikut, “Ekw maak chiyeshtinaahuyaahch, taapwe e piihchishkaask machiahchaahkw. Abraham chii nipuu kaye maak anichii uchischiwehiichesuuch chii nipuuch. Chiya maak e itweyin an awen che nanihiihtamukwe taan e iteuch namui wiiskaat chika uhchi nipuu. 53Chititeyihten aa chiya maauch e chisteyihtaakusiyin ishpish Abraham. Abraham chii nipuu kaye anichii uchischiwehiichesuuch chii nipuuch, awen maak chiya e iteyimisuyin.”
54Jesus kaa nishkweushihaat e itaat, “Niya chisteyihtaakuhiisuyaane namui mitun chekwaan chika uhchi ishinaakun an e chisteyihtaakuhiisuyaan. Nuuhtaawii eukw chesteyihtaakuhiit, an kaa itweyekw e Uchishemanituumiyekw. 55Namui wiiskaat kuuhchi chischeyimaawaau mikw maak niya nichischeyimaau. Itweyaane maak ekaa chischeyimak, nika nanatayin mwehch chiyawaau e ishi nanatayiyekw. Mikw maak nichischeyimaau kaye nanihiihtamuwaan utayimuwin. 56Aniyaa kuuhtaawiinuu Abraham chii muuchicheyihtam e chii chischeyihtahk che waapahtahk nichiishikaamiyuu. Chii waapahtam, chii miyeyihtam maak.”
57Ekw anichii Jewa iinuuch kaa itaatwaau, “Namui waawaach chiniyaayinumitanuu puneshin, taapwe aa chichii waapamaau Abraham.”
58Jesus kaa itaat, “Kuiskw chiwiihtamaatinaawaau, eshkw ekaa uhchi pimaatisiit Abraham, shaash nichii ihtaan.”
59Ekw kaa maamuushtinaatwaau asiniih che paahpimusinaatahwaatwaau. Mikw maak Jesus chii kaasuustuweu ekw kaa wiiwiit anite chisheayimiheukamikuhch.
S'ha seleccionat:
John 8: crjrNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.