Luk 6
6
Ona Tɔpere wepɛɛre
(Mat 12:1-8; Mak 2:23-28)
1Awola Ona Tɔpere bɛl, Yeesu ne o habɔteŋra kpɔ mea koo bɛl ta, asɛ o habɔteŋra la kuuɡi mea la ane dɛ fɔɡa dɛɛ chwe.#Mma 23:25 2Baa dɛ ɛ ɡɛ la, Farisii tena bane nao dɛ bɔɔ ba ŋɔ, “Ɛrɛɛ hɛɛ ɛ toma dɛɛ koni ya Ona Tɔpere Mmara nɔɔ?”
3Belaa Yeesu ŋɔ, “He ta ɡɛ ya naa Devid aa ɛa saŋ la lɔr aa dɛ kpo o ne nɛra baa ja o nɛɛ la kure kɛɛ? 4O la Korowii Dea dɛ ka di paanoo aa ɛ Korowii kwa, nomɛlbwa fe aa wola ŋwɛnɛ dɔe kɛ ó di, atane kɛ sɔfore ɡbo la. O diu, dɛ tɛ o nɛra ɡe ba di.” 5Anee Yeesu ŋɔ, “Men Nɛn Bie laanee dɔ Ona Tɔpere kpeɡri.”
Baa bɛl o nɔn aa sewa wa
(Mat 12:9-14; Mak 3:1-6)
6Awola Ona Tɔpere bɛl, Yeesu la cheremi dea dɛ ka baɡle wa. Dɛ baa bɛl lɔ bela, asɛ o nɔndiɡ sewɛ. 7Dɛ Tɔnjerema ne Farisii tena lole dɛɛ nyiŋi Yeesu kɛ wɛɛ chah baa laanee Ona Tɔpere la ta, ásɛ ba dɔ o waa dɛ́ bol. 8Dɛ Yeesu te jemɛ waa baa dɛ lii, anee o yerɛ baa la o nɔndiɡ aa sewa la, dɛ ŋɔ ó ir ba che ba sie. Asɛ o ir dɛ ba che ba sie.
9Anee Yeesu ŋɔ ba be ŋɔ, “N dɛ bɔɔ heya. Ɛrɛɛ Korowii Mmara la ɛɛ baɡle yaa ŋɔ yá ɛ Ona Tɔpere ta laɔ? A ɛ aŋwɛnɛ ta kɛ yaa ɛ nɛra wedɛɛɡa kɛɛ yaa ɛ nɛra wechɔɡa ɔ? A ɛ aŋwɛnɛ ta kɛ ya lɛ nɛra mkpa kɛɛ yá chɔɡ baɔ?”
10Yeesu nyiŋi nɛra la bwa, asɛ dɛ ŋɔ baa la be ŋɔ ó tɛr o nɔn. Waa tɛr o nɔn la, dɛ o nɔn la berɔ do kpeɡri. 11Belaa Tɔnjerema la ne Farisii tena la baah di baa bol dɔŋa be ɡɛ aa chɛ kɛ bá ɛ Yeesu.
Gɛ Yeesu aa le o toroma fi dɛ banɛ
(Mat 10:1-4; Mak 3:13-19)
12Yeesu aa le bela la, o la deŋɡare bɛl ta bela nomɛlbwa aa wola toole, dɛ ka do bela dɛɛ soŋe Korowii jwaana la bwa. 13Tɔ aa pera la, o yerɛ o habɔteŋra la, asɛ dɛ kpɔ ba bini fi dɛ banɛ dɛ ŋɔ o toromaa ban. 14O kpɔ Seemɔn waa pao Pita la, ne Pita nime Andriu, dɛ Jems ne Jɔn ne Felep ne Batolomeo, 15dɛ kpɔ Matiu ne Tɔmas ne Alfeɔs bie Jems, dɛ Seemɔn baa dɛ yerɔ Sɛlɔt la, 16dɛ kpɔ Jems bie Judas ne Judas Eskareɔt waa leo tɛ ba kpoo la.
Yeesu chaɡle nɛra waa dɛ chaah ba weela
(Mat 4:23-25)
17Waa le o toroma la tonɛ la, o ne ba le deŋɡare la doa dɛɛ tu harɛ, dɛ ba pu o habɔteŋra la bane, asɛ o ne ba che bobɛl waa chɔ harɛ. Ba warɔ pirim dɛ le Juda harɛ, ne Jerusalam, ne mpo nyoa bwɛjena baa dɛ yera Taaya ne Sidon, 18dɛ ba o be dɛ ba no o wa, asɛ o chaah ba weela. Nɛra kwaa aa dɛ ir ba nɛɛ a ɛɛ ba weela bwa ba bela, asɛ o doŋa ta ba. 19Dɛ nɛra la bwa siwi swɛɛrɔ baa nyin dɛ́ leɡo, dɛkalkɛŋɔ kpeɡri bɛl le o bini dɛɛ chah ba bwa weela.
Som nae ne tebinichɔɡ wa
(Mat 5:1-12)
20Yeesu nyiŋi o habɔteŋra la, dɛ ŋɔ,
“He banɔ la haa ɛ nyaara la, he na som,
dɛkalkɛ heyaa dɛɛ ba Korowii Kora koobii ɛɛ.
21He banɔ la lɔr aa dɛ kpo heyaa
taraken la na som,
dɛkalkɛ hɛɛ ba vaɡɔɔ.
He banɔ la haa dɛ wi taraken la na som,
dɛkalkɛ hɛɛ ba mamɔɔ.
22Dɛ nɛra koh Men Nɛn Bie nɔ waa dɛ hah heya,
dɛ vɛh heya, dɛ chɛɡre heya,
dɛ yerɛ he sɔnchɔɡe aa, he na som.#1Pi 4:14
23Dɛ a ba ɡɛ naa, hé ɡel he sie lɛ kohona ásɛ he hɛɡre, dɛkalkɛ he kembɔr warɔ taeh Korowii be. Gɛ tentenee ba naanar ɛ Korowii keamere ba fa aa lole la.
24He banɔ nɔ haa ɛ kondɔɔhna taraken la,
hé bwɛɛlɛ!
He silɛɛ bwaa hɛɛ na la.
25He banɔ nɔ haa vaɡra taraken nɔ,
hé bwɛɛlɛ!
Lɔr ɛɛ ba kpo heyaa taeh.
He banɔ nɔ haa dɛ mamɛ taraken nɔ,
hé bwɛɛlɛ! Hɛɛ ba wiu.
26He banɔ la nɛra aa dɛ bol he
bwara wedɛɛɡe nɔ, hé bwɛɛlɛ!
Gɛ tentenee ba naawa kpɛɛ
keame nyosonteŋna baa wola
Korowii nyoa waa bolɛ la.”
Dɔma nyina
(Mat 5:38-48; 7:12)
27Yeesu berɔ ŋɔ, “He banɔ la haa dɛ no n waa nɔ, n dɛ ŋɔ he be ŋɔ hɛ́ɛ nyin he dɔma wa, dɛɛ ɛɛ ba wedɛɛɡa. 28Hé swee andɛɛɡa dɛɛ tɛ banɔ la baa dɛ taah heya, dɛ́ soŋe Korowii dɛɛ tɛ banɔ la baa dɛ ɛ heyaa wechɔɡa la ɡe. 29Dɛ nomɛl kpaa he lwɛɛma aa, berɛ baŋ bɛl ɡe tɛo ó kpaa ja. Dɛ nomɛl lɛ he yal he be naa, kpɔ he batakaare ɡe jao. 30Dɛ nomɛl soŋe komɛl aa, tɛo. Dɛ nomɛl kpɔ he komɛl aa, bɛ o be lɛ kpa. 31Gɛ haa dɛ nyin kɛ nɛra ɛ dɛɛ tɛ heyaa la, hé ɡe ɛ ɡɛ tenten dɛɛ tɛɛ ba.
32Dɛ he dɛ nyin nɛra baa dɛ nyin he waa ɡbo aa, dɛ he wedɛɛɡa haa dɛ ɛ a ɡwaa la, anee ameo? Wechɔɡ-ɛɛra ɡba dɛ nyin nɛra baa dɛ nyin ba wa. 33Dɛ he ɛ wedɛɛɡa dɛɛ tɛ nɛra baa dɛ ɛ heyaa wedɛɛɡa ɡbo aa, dɛ he chɛ jam aa? Wechɔɡ-ɛɛra ɡba aa ɡɛ ɛa? 34Dɛ nɛra baa dɔ dɛ́ bɔ heyaa ɡboo hɛɛ kemɛ kwa aa, bɔkwa kembɔree hɛɛ ba dɔe yɔ? Wechɔɡ-ɛɛra ɡba dɛ kemɛ ba bala wechɔɡ-ɛɛra kwa, ásɛ ba baa dɔ aa, ba bɔ ba. 35Hɛ́ɛ nyin he dɔma wa, dɛ́ ɛ wedɛɛɡa dɛɛ tɛɛ ba. He dɛ kemɛ nɛra kwa aa, he bɛ a lɛɛ waa dɛɛ lii. Dɛ he dɛ ɛ ɡɛ naa, anee hɛɛ ba kembɔr dɔe kohona dɛ́ ɛ he Mɛɛ Nemenɛ Korowii la bii. O te dɛ nyiŋi wechɔɡ-ɛɛra ne boniayɛ tena bwa. 36Hɛ́ɛ sune nɛra nɛ, ɡɛ he Mɛɛ la aa dɛ sune nɛra nɛɛ la.
Dɔŋa pwaeh
(Mat 7:1-5)
37He bɛ dɔŋa dɛɛ pwah, ásɛ Korowii ɡe bɛ heyaa pwah. He bɛ dɔŋa bolchɔɡe dɛɛ pa, ásɛ Korowii ɡe bɛ heyaa bolchɔɡe pa. Hé kpɔ he dɔŋa wechɔɡa dɛɛ kɛ ba, ásɛ Korowii ɡe kpɔ he wechɔɡa dɛɛ kɛ heya. 38Hɛ́ɛ tɛ dɔŋa kwa, ásɛ Korowii ɡee tɛ heya a do kan kohona. Korowii dɛ ba he tɛɛ yaa, wɛɛ maɡaa, dɛ́ jwiira, dɛ́ ɛɡra a jo kɛrɛdɛ, dɛ́ su porrr ken dɛɛ ta. Kon haa kpɔa maɡɛ kwaa tɛ he dɔŋ la tentenee baa ba kpɔe maɡɛ tɛ he ɡe.”
39Yeesu berɔ sɛɡ ba ŋɔ, “Nyoŋe ɛɛ wonoo lawɛ o dɔŋ nyoŋe daa a maɡre aa? Ba bwa aa bɔɔ taa ka le dɛ́ choɡli aa? 40Nɛn waa dɛ hweli toma la ta o dɔɔ ɡwaalɛ, kɛ dɛ o dɔɔ hweli toma dɛ jemɛ tonɛ kwaraa naa, o ne o dɔɔ ɛ kɛrɛdɛ.
41Ɛrɛɛ hɛɛ bol he dɔŋ wechɔɡa tama waa haa wola he te wechɔɡdamanta waa dawɛ nɔɔ? 42A do kɛŋɔ dabor aa lɔ he siwi ta haa wola on kpɔe, dɛ ŋɔ he dɔŋ be ŋɔ, ‘N dam, ɡel n laa dapuɡri kpɔ he siwi ta.’ Nɛn haa nyiŋi nɛra sie mɔɔ dɛɛ ɛ wa! Tɔ sie laa dabor la kpɔ he siwi ta mɔɔ, dɛ́ won na kɛrɛdɛ, dɛ́ laa dapuɡri waa lɔ he dɔŋ siwi ta la kpɔ.”
Daa ne o nɔna
(Mat 7:16-20; 12:33-35)
43Yeesu berɔ ŋɔ, “Dadɛɛɡe aa won nɔnɛ nɔnchɔɡa, ɡɛɛ dachɔɡe ɡe aa wola won nɔnɛ nɔndɛɛɡa. 44Daa bɛlbwa nɔna waa nɔna la taa ba che dɛɛ jemɔ. Sɔɔh da aa ɡbal nɔna nɔnɛ, ɡɛɛ kontromoo ɡe aa wola lomporo nɔnɛ. 45Nɛndɛɛɡe wedɛɛɡa ɛɛ taa a che baa jemɛ wedɛɛɡa aa lɔ o bambile bini. Gɛɛ ba che nɛnchɔɡe ɡe wechɔɡa ɛɛ ta dɛɛ jemɛ wechɔɡa damanta aa lɔ o bambile bini, dɛkalkɛ waa aa lɔ nɛn bambile ta laanee o nyoa ɛɛ bol.
Demamaala banɛ bane wa
(Mat 7:24-27)
46Ɛrɛ waa hɛɛ yer mɛ he dɔɔ, haa wola waa maa dɛ bol he be ɛ nɔɔ?#Mat 7:21 47Nomɛlbwa waa dɛ ba n be dɛ baa no n waa nɔ dɛɛ ɛa la, mɛɛ chaɡle heyaa ɡɛ waa doa. 48Naate do kɛŋɔ nɛn waa dɛ ba o dea doe, dɛ kwi o mun pae bɔɔ ka jaɡɛ bwetal ta mɔɔ dɛ ma dea la. Nee aa pala ba jo dea la mun la, o ta chole, dɛkalkɛ o doo kɛrɛdɛ. 49Nomɛlbwa ɡe waa no n waa nɔ, waa wola ɡɛ aa baɡla la ɛ la, o do kɛŋɔ nɛn waa do o dea, o ta o mun pae bɔɔ kwii ka jaɡɛ bwetal ta mɔɔ dɛ den doo la. Nee aa pala ba jo dea la mun ta la, o cholo dɛ chɔɡ kwaraa.”
S'ha seleccionat:
Luk 6: mzw
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.