ಲೂಕ 24
24
ಯೇಸು ಚಾವ್‍ಯಿಂಜ ಜೀವವಾಯಿತ್ ಎದ್ದದ್
(ಮತ್ತಾಯ 28.1–10; ಮಾರ್ಕ 16.1–8; ಯೋಹಾನ 20.1–10)
1ವಾರತ್‍ರ ಆದ್ಯ ದಿವಸ ನಾರಾಚೆ ಪೊಲಾಕ ನೇರತೆ ಸೂರ್ಯ ಉದಿಪಕ್ ಮಿಂಞಲೇ ಆ ಪೊಣ್ಣಾಳ್‍ಂಗ ತಯಾರ್ ಮಾಡ್‍ನ ಸುಗಂದ ವಾಸನೆರ ಮದ್ದ್‌ನ ಎಡ್‍ತಂಡ್ ಗೋರಿಕ್ ಪೋಚಿ. 2ಗೋರಿನ ಮುಚ್ಚಿತ್‌ಂಜ ಬಲ್ಯ ಪಾರೆಕಲ್ಲ್‌ನ ಉರಿಟಿತ್, ತೊರ್‌ಂದ್ ಬಚ್ಚಿತ್ಂಜಾನ ಕಂಡಿತ್, 3ಅಯಿಂಗ ಒಳ್‍ಕ್ ಪೋಚಿ. ಆಚೇಂಗಿ, ಒಡೆಯ ಯೇಸುರ ತಡೀನ ಅಯಿಂಗ ಅಲ್ಲಿ ಕಂಡಿತಿಲ್ಲೆ. 4ಅಯಿಂಗ ಆಶ್ಚರ್ಯತ್‍ಲ್ ನಿಂದಿತಿಪ್ಪಕ, ಅಕ್ಕಣೆ ದಂಡ್ ಮನುಷ್ಯಂಗ ಪಳಪಳಾಂದ್ ಮಿನ್ನುವ ಬಟ್ಟೇನ ಇಟ್ಟಂಡ್ ಅಯಿಂಗಕ್ ಪ್ರತ್ಯಕ್ಷ ಆಚಿ.
5ಪೋಡಿಲ್ ಆ ಪೊಣ್ಣಾಳ್‍ವ ನೆಲಕ್ ಮಂಡೆ ಬಗ್ಗಿತ್ ನಿಂದಂಡಿಪ್ಪಕ, ಆ ದಂಡಾಳು ಅಯಿಂಗಳ ನೋಟಿತ್: ಜೀವವಾಯಿತ್ ಬದ್‍ಕಿಯಂಡುಳ್ಳಂವೊನ ಎನ್ನಂಗ್ ಚತ್ತಯಿಂಗಡ ಜಾಗತ್‍ಲ್ ತ್‍ೕ‌ಡಿಯೇಂಡುಳ್ಳಿರ? 6ಯೇಸು ಇಲ್ಲಿ ಇಲ್ಲೆ. ಅಂವೊ ಚಾವ್‍ಯಿಂಜ ಜೀವವಾಯಿತ್ ಎದ್ದತ್. 7ಮನುಷ್ಯಕುಮಾರನ ಶಿಲುಬೇಲ್ ಇಡ್‌ವಕಾಯಿತ್ ಪಾಪಿಯಂಗಡ ಕೈಯಿಕ್ ಒಪ್ಪ್‌ಚಿಡುವ. ಮೂಂದನೆ ದಿವಸ ಅಂವೊ ಚಾವ್‍ಯಿಂಜ ಜೀವವಾಯಿತ್ ಏವಾಂದ್ ಯೇಸು ಗಲಿಲಾಯತ್‍ಲ್ ಇಪ್ಪಕ ಎಣ್ಣ್‌ನದ್ ನಿಂಗಕ್ ಗೇನ ಉಂಡಾಂದ್ ಕ್‍ೕಟತ್.
8ಅಕ್ಕ ಆ ಪೊಣ್ಣಾಳುವಕ್ ಯೇಸು ಪರ್ಂದ ತಕ್ಕ ಗೇನ ಬಾತ್. 9ಅಯಿಂಗ ಗೋರಿಯಿಂಜ ಬಂದಿತ್ ಅಯಿಂಗ ಕಂಡಾನ ಪನ್ನಂದ್ ಶಿಷ್ಯಂಗಕ್ ಪಿಂಞ ಬೋರೆ ಜನಕ್ ಎಣ್ಣ್‌ಚಿ. 10ಇದ್‍ನ ಅಪೊಸ್ತಲಂಗಕ್ ಎಣ್ಣ್‌ನಯಿಂಗ ಮಗ್ದಲದ ಮರಿಯ, ಯೋಹಾನಳ, ಯಾಕೋಬಂಡ ಅವ್ವನಾನ ಮರಿಯ ಪಿಂಞ ಇಂಞು ಚೆನ್ನ ಪೊಣ್ಣಾಳುವಯಿಂಗಳೇ. 11ಆಚೇಂಗಿ, ಅಯಿಂಗ ಎಣ್ಣ್‌ನ ತಕ್ಕ್ ಬೋರೆಯಿಂಗಕ್ ಪುಚ್ಚಿ ತಕ್ಕ್‌ರನೆಕೆ ಇಂಜತ್. ಆನಗುಂಡ್ ಈ ಪೊಣ್ಣಾಳುವ ಎಣ್ಣ್‌ವಾನ ಅಯಿಂಗ ದಾರೂ ನಂಬಿತ್‌ಲ್ಲೆ. 12ಆಚೇಂಗಿ ಪೇತ್ರ ಚಾಡಿ ಏವಂಜಿ ಗೋರಿಕ್ ಓಡಿ ಪೋಚಿ. ಅಂವೊ ಗೋರಿರ ಒಳ್‍ಕ್ ಬಗ್ಗಿ ನೋಟ್‍ವಕ, ಯೇಸುರ ತಡಿಕ್ ಸುತ್ತ್‌ನ ಬಟ್ಟೆನೆ ಮಾತ್ರ ಕಂಡತ್. ಪಿಂಞ ನಡ್ಂದ ಘಟನೆನ ಗೇನ ಮಾಡಿಯಂಡ್ ಆಶ್ಚರ್ಯತ್‍ಲ್ ಮನೆಕ್ ಪೋಚಿ.
ಯೇಸು ಎಮ್ಮಾಹು ಊರ್‌ರ ಬಟ್ಟೇಲ್ ಪ್ರತ್ಯಕ್ಷ ಆನದ್
(ಮಾರ್ಕ 16.12,13)
13ಅದೇ ದಿವಸ ಯೇಸುರ ದಂಡ್ ಶಿಷ್ಯಂಗ ಯೆರೂಸಲೇಮ್ಂಜ ಸುಮಾರ್ ಏಳ್ ಮೈಲ್ ದೂರತ್‍ಲುಳ್ಳ ಎಮ್ಮಾಹು ಎಣ್ಣುವ ಊರ್‌ಕ್ ಪೋಯಂಡಿಂಜತ್. 14ಅಕ್ಕ, ನಡ್ಂದ ಎಲ್ಲಾ ಘಟನೆರ ವಿಷಯತ್‍ನ ತಕ್ಕ್ ಪರ್ಂದಂಡ್ ಪೋಯಂಡಿಂಜತ್. 15ಅಯಿಂಗ ತಕ್ಕ್ ಪರ್‌ದಂಡ್ ಪೋಯಂಡಿಪ್ಪಕ, ಯೇಸುವೇ ಅಯಿಂಗಡ ಪಕ್ಕತ್‍ಲ್ ಬಂತ್ ಅಯಿಂಗಡ ಕೂಡೆ ನಡ್ಂದಂಡಿಂಜತ್. 16ದಂಡಾಳು ಯೇಸುನ ನೋಟ್‌ಚಿ, ಆಚೇಂಗಿ ಅಯಿಂಗ ಅಂವೊನ ಗೊತ್ತ್‌ಪುಡಿಕತನೆಕೆ ದೇವ ಅಯಿಂಗಡ ಕಣ್ಣ್‌ನ ಮುಚ್ಚಿತ್ಂಜತ್. 17ಯೇಸು ಅಯಿಂಗಕ್, ನಿಂಗ ನಡ್‍ಪಕ ಎಂತೋ ಆಳವಾಯಿತ್ ಚರ್ಚೆ ಮಾಡಿಯಂಡಿಂಜಿರಲ್ಲ, ಅದ್ ಎಂತ್‍ೕಂದ್ ಕ್‍ೕಟತ್.
ಅಯಿಂಗಡ ಮೂಡ್ ಬಾಡಿಚಿಟ್ಟಿತ್ ಅನ್ನನೆ ನಿಂದತ್. 18ಅಯಿಂಗಡಲ್ಲಿ ಕ್ಲೆಯೊಫ ಎಣ್ಣ್‌ವಂವೊ ಯೇಸುಕ್: ಈ ದಿವಸತ್‍ಲ್ ಯೆರೂಸಲೇಮ್‍ಲ್ ನಡ್ಂದ ಸಂಗತಿನ ಗೊತ್ತಿಲ್ಲತ ಬೋರೆ ಜಾಗತ್‍ರಂವೊ ನೀನ್ ಒಬ್ಬನೇ ಆಯಿತಿಕ್ಕೂಂದ್ ಎಣ್ಣ್‌ಚಿ.
19ಅಕ್ಕ ಅಂವೊ: ಎಂತ ಸಂಗತಿ ನಡ್ಂದತ್ ಎಣ್ಣಿಯಂಡ್ ಕ್‍ೕಟತ್.
ಅದ್ಂಗ್ ಅಯಿಂಗ: ನಜರೇತ್‍ರ ಯೇಸುರ ವಿಷಯಾಂದ್ ಎಣ್ಣ್‌ಚಿ. ಅಂವೊ ದೇವಡ ಪಿಂಞ ಮನುಷ್ಯಂಗಡ ಮಿಂಞತ್‍ಲ್ ಅಂವೊಂಡ ಕ್ರಿಯೇಲು ತಕ್ಕ್‌ಲು ಶಕ್ತಿಯುಳ್ಳ ಪ್ರವಾದೀಂದ್ ಕಾಟಿತ್ಂಜತ್. 20ನಂಗಡ ಮುಕ್ಯ ಯಾಜಕಂಗ ಪಿಂಞ ಅದಿಕಾರಿಯಂಗ ಅಂವೊನ ಕೊಲ್ಲ್‌ವಕ್ ತೀರ್ಪ್ ಮಾಡ್‌ವಕಾಯಿತ್ ಒಪ್ಪ್‌ಚಿಟ್ಟತ್, ಪಿಂಞ ಅಯಿಂಗ ಶಿಲುಬೇಕ್ ಇಟ್ಟತ್. 21ಆಚೇಂಗಿ, ನಂಗ ಇಂವೊ ಇಸ್ರಾಯೇಲ್ ಜನಳ ಬುಡ್‍ಗಡೆ ಮಾಡ್‌ವಾಂದ್ ನಂಬಿತ್ಂಜತ್. ಆಚೇಂಗಿ ಇದೆಲ್ಲ ಆಯಿತ್ ಇಂದ್‍ಕ್ ಮೂಂದನೆ ದಿವಸ ಆಚೀಂದ್ ಎಣ್ಣ್‌ಚಿ.
22ನಂಗಡ ಕೂಟ್‍ಕ್ ಕೂಡ್‍ನ ಚೆನ್ನ ಪೊಣ್ಣಾಳುವ ಇಂದ್ ಪೊಲಾಕ ನೇರತೆ ಅಂವೊಂಡ ಗೋರಿಡ ಪಕ್ಕ ಪೋಯಿತ್ ನೋಟ್‍ವಕ, ಅಲ್ಲಿ ಅಂವೊಂಡ ತಡೀನ ಕಂಡಿತ್‌ಲ್ಲೇಂದ್ ಎಣ್ಣಿತ್ ನಂಗಕ್ ಆಶ್ಚರ್ಯವಾನ ಸುದ್ದಿನ ಕೊಡ್‍ತತ್. 23ಅಲ್ಲಿ ಅಯಿಂಗ ದೇವದೂತಂಗಳ ಕಂಡಿತ್, ಆ ದೇವದೂತಂಗ ಯೇಸು ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬದ್‍ಕಿಯಂಡುಂಡ್‍ೕಂದ್ ಎಣ್ಣ್‌ಚೀಂದ್ ನಂಗಕ್ ಬಂತ್ ಎಣ್ಣ್‌ಚಿ. 24ನಂಗಡ ಕೂಟ್‍ಕ್ ಕೂಡ್‍ನ ಚೆನ್ನ ಜನ ಪೋಯಿತ್ ಗೋರಿನ ನೋಟುವಕ ಅಯಿಂಗ ಸಹ ಪೊಣ್ಣಾಳ್‍ವ ಎಣ್ಣ್‌ನನೆಕೆ ಯೇಸುನ ಕಂಡಿತ್‌ಲ್ಲೆ.
25ಪಿಂಞ ಯೇಸು ಆ ದಂಡ್ ಶಿಷ್ಯಂಗಳ ನೋಟಿತ್: ನಿಂಗ ಎನ್ನಂಗ್ ನಂಬುಲೆ? ಪ್ರವಾದಿಯಂಗ ಎಣ್ಣ್‌ನಾನೆಲ್ಲ ನಂಬುವಕ್ ಎನ್ನಂಗ್ ಇಚ್ಚಕ್ ಮಂದ ಆಯಿತುಳ್ಳಿರ? 26ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಮಹಿಮೆಪಡ್‍ವಕ್ ಮಿಂಞ ಇನ್ನನೆಲ್ಲ ಕಷ್ಟ ಅನುಬವಿಚಿಡಡೂಂದ್ ನಿಂಗಕ್ ಗೊತ್ತ್‌ಲ್ಲೆಯಾಂದ್ ಪ್ರಶ್ನೆ ಇಟ್ಟತ್. 27ಪಿಂಞ ಯೇಸು ಅಂವೊಂಡ ವಿಷಯತ್‍ನ ಮೋಶೇರ ನ್ಯಾಯಪ್ರಮಾಣತ್ಂಜ ಪ್ರವಾದಿಯಂಗ ಒಳ್‍ದ್‍ನ ಪುಸ್ತಕಕತ್ತನೆ ದೇವಡ ವಾಕ್ಯತ್‍ಲ್ ಎಂತದೆಲ್ಲ ಒಳ್‍ದಿತುಂಡೋ ಅದ್‍ನೆಲ್ಲ ಅಯಿಂಗಕ್ ವಿವರಿಚಿಟ್ಟತ್.
28ಅಕ್ಕ ಅಯಿಂಗ ಪೋಯಂಡುಳ್ಳ ಊರ್ ಪಕ್ಕ ಬಪ್ಪಕ ಯೇಸು ಅಯಿಂಗಕಿಂಜ ಇಂಞು ಮಿಂಞಕ್ ಪೋಪನೆಕೆ ನಡ್ಂದತ್. 29ಅಯಿಂಗ ಯೇಸುಕ್, ಬಯಿಟ್ ಆಯಂಡ್ ಬಂದ್‌ರ್‌ತ್, ಸೂರ್ಯ ಮುಳಿವ ನೇರ ಆಚಿ, ನೀನ್ ನಂಗಡ ಕೂಡೆ ಒಳಿಂಜಿತ್ ಪೋಂದ್ ಬೋಡ್‍ಚಿ. ಯೇಸು ಅಯಿಂಗಡ ಕೂಡೆ ಇಪ್ಪಕ್ ಒಳ್‍ಕ್ ಪೋಚಿ. 30ಯೇಸು ಅಯಿಂಗಡ ಕೂಡೆ ಉಂಬಕ್ ಅಳ್‌ಪಕ, ಒಟ್ಟಿನ ಎಡ್‌ಪಂಜಿ ದೇವಕ್ ವಂದನೆ ಎಣ್ಣಿತ್ ಒಟ್ಟಿನ ಪೊಳಿಪಂಜಿ ಅಯಿಂಗಕ್ ಕೊಡ್‍ತತ್. 31ಅಕ್ಕ ಅಯಿಂಗಡ ಕಣ್ಣ್ ತೊರ್ಂದತ್, ಅಂವೊ ಯೇಸೂಂದ್ ಗೊತ್ತಾಚಿ. ಆಚೇಂಗಿ ಅಂವೊ ಅಲ್ಲಿಂಜ ಕಾಂಗತ ಆಯಿಪೋಚಿ.
32ಅಕ್ಕ ಅಯಿಂಗ ದಂಡಾಳು: ನಂಗಡ ಕೂಡೆ ಯೇಸು ಬಟ್ಟೇಲ್ ತಕ್ಕ್ ಪರಿವಕ, ದೇವಡ ವಾಕ್ಯತ್‍ನ ವಿವರಿಚಿಡುವಕ ನಂಗಡ ಹೃದಯ ತಿತ್ತ್ ಕತ್ತಿಯಂಡಿಂಜನೆಕೆ ಇಂಜತಲ್ಲಾಂದ್ ಎಣ್ಣ್‌ಚಿ. 33ಅಲ್ಲಿಂಜ ಅಯಿಂಗ ಅಕ್ಕಲೆ ಯೆರೂಸಲೇಮ್‌ಕ್ ಪೋಚಿ. ಅಯಿಂಗ ಅಲ್ಲಿ ಪನ್ನಂದ್ ಶಿಷ್ಯಂಗ ಪಿಂಞ ಅಯಿಂಗಡ ಕೂಡೆ ಇಂಜಯಿಂಗ ಕೂಡಿತ್ ಇಪ್ಪಾನ ಕಂಡತ್. 34ಯೇಸು ನೇರಾಯಿತು ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಸೀಮೋನಂಗ್ ಪ್ರತ್ಯಕ್ಷ ಆಚೀಂದ್ ಪನ್ನಂದ್ ಶಿಷ್ಯಂಗಳು ತಕ್ಕ್ ಪರ್ಂದಂಡಿಂಜಾನ ಕಂಡತ್. 35ಪಿಂಞ ಈ ದಂಡಾಳು, ಬಟ್ಟೇಲ್ ನಡ್‌ದಂಡ್ ಪೋಪಕ ನಡ್ಂದ ಸಂಗತಿನ ಪಿಂಞ ಅಂವೊ ಒಟ್ಟಿ ಪೊಳಿಪಕ ಅಯಿಂಗ ಎನ್ನನೆ ಒಡೆಯನ ಗೊತ್ತ್ ಮಾಡ್‍ಚೀಂದ್ ಎಲ್ಲಾ ಸಂಗತಿನ ಅಯಿಂಗಕ್ ವಿವರಿಚಿಟ್ಟತ್.
ಯೇಸು ಶಿಷ್ಯಂಗಕ್ ಪ್ರತ್ಯಕ್ಷ ಆನದ್
(ಮತ್ತಾಯ 28.16–20; ಮಾರ್ಕ 16.14–18; ಯೋಹಾನ 20.19–23; ಅಪೊಸ್ತಲ 1.6–8)
36ಈ ದಂಡಾಳು ಇದ್‍ನೆಲ್ಲ ಎಣ್ಣಿಯಂಡಿಪಕಲೆ, ಯೇಸು ಅಲ್ಲಿಕ್ ಬಪ್ಪಂಜಿ ಅಯಿಂಗಡ ಮದ್ಯತ್‍ಲ್ ನಿಂದಂಡ್: ನಿಂಗಕ್ ಸಮಾದಾನಾಂದ್ ಎಣ್ಣ್‌ಚಿ. 37ಅಯಿಂಗಕ್ ಒರ್ ಬೂತತ್‍ನ ಕಂಡನೆಕೆ ಪೋಡಿ ಆಚಿ.
38ನಿಂಗಕ್ ಎನ್ನಂಗ್ ಅಚ್ಚಕ್ ಪೋಡಿ? ನಿಂಗಡ ಮನಸ್ಸ್‌ಲ್ ಅನುಮಾನ ಎನ್ನಂಗ್? 39ಇದ್ ನಾನೇಂದ್ ನಾಡ ಕೈಕಾಲ್‌ನ ನೋಟಿ. ನನ್ನ ಮುಟ್ಟಿತ್ ನೋಟಿ. ಬೂತಕ್ ಮೂಳೆ, ಯರ್ಚಿ ಇಪ್ಪುಲೆ, ಆಚೇಂಗಿ ನಿಂಗ ನೋಟ್‍ವನೆಕೆ ನಾಕ್ ಅದೆಲ್ಲ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.
40ಇದ್‍ನ ಎಣ್ಣ್‌ನ ಪಿಂಞ ಯೇಸು ಅಯಿಂಗಕ್ ಅಂವೊಂಡ ಕೈಕಾಲ್‌ನ ಕಾಟ್‍ಚಿ. 41ಅಯಿಂಗಕ್ ಇಂಞು ನಂಬುವಕ್ ಕಯಿಂಜಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗಕ್ ಕುಶಿಯು ಆಶ್ಚರ್ಯವು ಆಚಿ. ಆನಗುಂಡ್ ಯೇಸು ಅಯಿಂಗಕ್, ನಿಂಗಡ ಪಕ್ಕ ಉಂಬಕ್ ಎಂತಾಚೇಂಗಿ ಉಂಡಾಂದ್ ಕ್‍ೕಟತ್. 42ಅಯಿಂಗ ಬೆಂಜ ಮೀನ್ ತುಂಡ್‍ನ ಅಂವೊಂಗ್ ಕೊಡ್‍ತತ್. 43ಯೇಸು ಅಯಿಂಗಡ ಮಿಂಞತ್‍ಲೇ ಅದ್‍ನ ತಿಂದತ್.
44ನಾನ್ ನಿಂಗಡ ಕೂಡೆ ಇಪ್ಪಕಲೆ, ಮೋಶೇರ ನ್ಯಾಯಪ್ರಮಾಣತ್‍ಲ್, ಪ್ರವಾದಿಯಂಗಡ ಪುಸ್ತಕತ್‍ಲ್ ಪಿಂಞ ದೇವಡ ಪಾಟ್‍ಲ್ ಒಳ್‍ದಿತುಳ್ಳ ನಾಡ ವಿಷಯವೆಲ್ಲ ಆಂಡೂಂದ್ ಎಣ್ಣಿಯೆ. 45ಪಿಂಞ ದೇವಡ ವಾಕ್ಯ ಅಯಿಂಗಕ್ ಅರ್ಥ ಆಪನೆಕೆ ಅಂವೊ ಅಯಿಂಗಡ ಮನಸ್ಸ್‌ನ ತೊರ್ಂದತ್.
46ಯೇಸು ಅಯಿಂಗಕ್: ದೇವ ಗೊತ್ತ್ ಮಾಡಿತ್ ಅಯಿಚ ರಾಜನಾನ ಕ್ರಿಸ್ತ ಕಷ್ಟಪಡಂಡು, ಚತ್ತಿತ್ ಮೂಂದ್ ದಿವಸ ಆನ ಪಿಂಞ ಏವಂಡೂಂದ್ ದೇವಡ ವಾಕ್ಯತ್‍ಲ್ ಉಂಡ್.
47ಇಂಞು: ಯೆರೂಸಲೇಮ್ಂಜ ಎಲ್ಲಾ ದೇಶತ್‍ರ ಜನಕ್ ಪಾಪಕ್ಷಮೆ ಕ್‍ಟ್ಟ್‌ವಕ್ ದೇವಡ ಪಕ್ಕ ತಿರಿಗಿತ್ ಬರಂಡೂಂದ್ ನಾಡ ಅದಿಕಾರತ್‍ಲ್ ಪ್ರಚಾರ ಮಾಡೀಂದ್ ಎಣ್ಣಿ ಕೊಡ್‍ತತ್. 48ನಿಂಗಳೇ ಇದಂಗೆಲ್ಲ ಸಾಕ್ಷಿ. 49ನಾಡ ಅಪ್ಪ ವಾಗ್ದಾನ ಮಾಡ್‍ನ ಪವಿತ್ರ ಆತ್ಮತ್‌ನ ನಾನ್ ನಿಂಗಡ ಮೇಲೆ ಅಯಿಪಿ. ಆಚೇಂಗಿ ನಿಂಗಕ್ ಪರಲೋಕತ್ಂಜ ಶಕ್ತಿ ಕ್‌ಟ್ಟ್‌ವಕತ್ತನೆ ಯೆರೂಸಲೇಮ್ ಪಟ್ಟಣತ್‍ಲ್ ಪಾರಕಾತಂಡ್ ಇರಿ.
ಯೇಸುನ ಪರಲೋಕಕ್ ಎಡ್‍ತಂಡದ್
(ಮಾರ್ಕ 16.19,20; ಅಪೊಸ್ತಲ 1.9–11)
50ಪಿಂಞ ಯೇಸು ಅಯಿಂಗಳೆಲ್ಲ ಬೇಥಾನ್ಯಕತ್ತನೆ ಕಾಕಿಯಂಡ್ ಪೋಯಿತ್ ತಾಂಡ ಕೈಯಿನ ಕೊಡಿಕ್ ಎಡ್‍ತಿತ್ ಅಯಿಂಗಳ ಆಶೀರ್ವಾದ ಮಾಡ್‍ಚಿ. 51ಅನ್ನನೆ ಆಶೀರ್ವಾದ ಮಾಡಿಯಂಡ್ ಇಪ್ಪಕ, ಅಂವೊ ಅಯಿಂಗಳ ಬುಟ್ಟಿತ್ ಪೋಚಿ, ಅಂವೊನ ಪರಲೋಕಕ್ ಎಡ್‍ತಂಡ್ ಪೋಚಿ. 52ಅಯಿಂಗ ಯೇಸುನ ಆರಾದನೆ ಮಾಡಿತ್, ದುಂಬ್‍ನ ಕುಶೀಲ್ ಎಲ್ಲಾರು ಯೆರೂಸಲೇಮ್‌ಕ್ ಪೋಚಿ. 53ದೇವಾಲಯತ್‍ಲ್ ದೇವನ ತುದಿಚಂಡ್ ಎಕ್ಕಾಲು ಕೊಂಡಾಡಿಯಂಡಿಂಜತ್.
S'ha seleccionat:
ಲೂಕ 24: ಕೊಡವ
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2017, New Life Literature (NLL)