Yohane 9
9
Yesu tsa nyumu ko nɛ a fɔ lɛ hɛ yuyuilɔ
1Benɛ Yesu nyɛɛ kɛ yaa a, e na nyumu ko nɛ hɛ yu kɛ je be nɛ a fɔ lɛ. 2Kaseli ɔmɛ bi Yesu ke, “Tsɔɔlɔ, mɛnɔ lɛ pee yayami nɛ a fɔ nɔmlɔ nɛ ɔ hɛ yuyuilɔ ɔ? Lɛ nitsɛ, aloo e fɔli?”
3Yesu he nɔ ke, “Nɔmlɔ nɛ hɛ yu nɛ ɔ, pi lɛ nitsɛ nɛ pee yayami, nɛ pi e fɔli hulɔ. Mohu ɔ, e hɛ yu, bɔ nɛ pee nɛ a gu e nɔ kɛ tsɔɔ bɔ nɛ Mawu he wami ɔ tsuɔ ní ha. 4Nɛ je na nɛ ɔ, ja wa tsu nɔ nɛ tsɔ mi ɔ ní tsumi ɔmɛ. Je maa jɔ, nɛ nɔ ko nɔ ko be nyɛe ma tsu ní. 5#Mat 5.14; Yoh 8.12 Be abɔ nɛ i ngɛ je ɔ mi nɛ ɔ, imi ji je ɔ la a nɛ.”
6Benɛ Yesu de enɛ ɔ, e la lada pue zugba, nɛ e kɛ lada a pɔtɔ zu. E ngɔ zu ɔ kɛ ha hɛ yuyuilɔ ɔ hɛngmɛ ɔmɛ a nɔ. 7Yesu de lɛ ke, “Yaa Siloam pa a mi nɛ o ya fɔ o he.” (Siloam sisi ji a tsɔ lɛ.) Kɛkɛ nɛ nyumu ɔ pue nɔ kɛ ho, nɛ e ya fɔ e he; nɛ benɛ e kpale kɛ ma a, e bɔni nɔ́ hyɛmi.
8E kpɔ mi bi, kɛ nihi tsuo nɛ sa a, a naa lɛ nɛ e hii nɔ bae ɔ bi ke, “Anɛ pi nɔmlɔ nɛ ɔ nɛ hiɔ si, nɛ e hii nɔ bae be ko ɔ?”
9Ni komɛ de ke, “Nyumu ɔ ji nɛ ɔ nɛ!” Se ni komɛ hu de ke, “Dɛbi, pi lɛ; e je lɛ kɛkɛ.”
Kɛkɛ nɛ nyumu ɔ nitsɛ de mɛ ke, “Imi ji lɛ.”
10A bi lɛ ke, “Kɛ pee kɛɛ loko jehanɛ ɔ lɛɛ o ngɛ nɔ hyɛe ɔ?”
11E de mɛ ke, “Nyumu ɔ nɛ a tsɛɛ lɛ Yesu ɔ nɛ pɔtɔ zu, nɛ e ngɔ ha ye hɛngmɛ ɔmɛ a nɔ. Lɔ ɔ se ɔ, e de mi ke ma ya fɔ ye he ngɛ Siloam pa a mi. Benɛ i ya fɔ ye he pɛ nɛ i bɔni nɔ hyɛmi.”
12A bi lɛ ke, “Jije e ngɛ.”
E he nɔ ke, “I li.”
Farisi bi ɔmɛ bi nɔ tsami ɔ he munyu
13Jehanɛ ɔ, a ngɔ nyumu ɔ nɛ sa a e hɛ yu ɔ kɛ ba Farisi bi ɔmɛ a ngɔ. 14Akɛnɛ Hejɔɔmi ligbi nɛ Yesu pɔtɔ zu ɔ nɛ e kɛ tsa nyumu hɛ yuyuilɔ ɔ, 15Farisi bi ɔmɛ kpale bi nyumu ɔ ekohu bɔ nɛ pee nɛ e na tsami ɔ. E de mɛ ke, “E pɔtɔ zu kɛ ha ye hɛngmɛ ɔmɛ a nɔ, nɛ i ya fɔ ye he, kɛkɛ nɛ i bɔni nɔ hyɛmi.”
16Farisi bi ɔmɛ a ti ni komɛ de ke, “Nɔmlɔ nɛ pee nɔ́ nɛ ɔ, pi Mawu ngɔ nɛ e je; ejakaa e bui Hejɔɔmi ligbi ɔ.”
Se a ti ni komɛ lɛɛ a de ke, “Kɛ nɔmlɔ nɛ peeɔ yayami ma plɛ kɛ to okadihi kaa kikɛ nɛ ɔ kɛɛ?” Kɛkɛ nɛ ni ɔmɛ a mi gba.
17Jehanɛ ɔ, Farisi bi ɔmɛ kpale bi nyumu ɔ ekohu ke, “Tse o de wɔ ke e bli o hɛngmɛ! Saminya, kɛ moo o deɔ ngɛ e he kɛɛ?”
Nyumu ɔ he nɔ ke, “Gbalɔ ji lɛ.”
18Se loloolo ɔ, Yuda ma nimeli ɔmɛ he we yi kaa be ko nɛ be ɔ nyumu ɔ hyɛ we nɔ́. Lɔ ɔ he ɔ, a tsɛ e fɔli ɔmɛ, 19nɛ a bi mɛ ke, “Tse nyɛ bi ji nɛ ɔ? Nyɛ ke a fɔ lɛ hɛ yuyuilɔ? Kɛ peeɔ kɛɛ nɛ amlɔ nɛ ɔ e ngɛ nɔ hyɛe ɔ?”
20E fɔli ɔmɛ he nɔ ke, “Ee, wa le kaa wa bi ji nɛ ɔ nɛ, nɛ wa le hulɔ kaa a fɔ lɛ hɛ yuyuilɔ. 21Se bɔ nɛ ba nɛ e ngɛ nɔ hyɛe amlɔ nɛ ɔ, lɔ ɔ lɛɛ wa li; nɛ nɔmlɔ nɛ ha nɛ e bɔni nɔ́ hyɛmi ɔ hu wa li lɛ. Nyɛ bi lɛ; e wa nɛ lɛ nitsɛ e ma nyɛ je munyu nya.” 22Nyumu ɔ fɔli ɔmɛ de enɛ ɔ, ejakaa a ngɛ Yuda ma nimeli ɔmɛ gbeye yee. Blɔɔ Yuda bi ɔmɛ so ngɔ to kaa ke nɔ ko ma gba mi paa ma de ke Yesu ji Kristo ɔ, a maa fie jamɛatsɛ ɔ kɛ je kpe he ɔ. 23Enɛ ɔ he nɛ e fɔli ɔmɛ de ke, “E wa, nyɛ bi lɛ nitsɛ” ɔ nɛ.
24Yuda bi ɔmɛ kpale tsɛ nyumu ɔ nɛ a fɔ lɛ hɛ yuyuilɔ ɔ ekohu, nɛ a bi lɛ ke, “Ka wɔ kita ngɛ Mawu hɛ mi ngɛ hiɛmɛ nɛ ɔ kaa o maa tu wɔ anɔkuale!#9.24 Aloo wó Mawu hɛ mi nyami! Wɔɔ lɛɛ wa le kaa nɔmlɔ nɛ tsa mo ɔ yayami peelɔ ji lɛ.”
25Se nyumu ɔ he nɔ ke, “Yayami peelɔ ji lɛ oo, pi yayami peelɔ ji lɛ oo; imi lɛɛ i li! Nɔ́ kake pɛ i le; be ko nɛ be ɔ, hɛ yuyuilɔ ji mi; se amlɔ nɛ ɔ, i ngɛ nɔ hyɛe.”
26A bi lɛ ekohu ke, “Kɛ e pee mo kɛɛ? Kɛ e pee kɛɛ nɛ e bli o hɛngmɛ ɔmɛ ɔ?”
27E he nɔ ke, “Tse i de nyɛ enɛ ɔ momo nɛ nyɛ bui mi tue. Mɛni nyɛ ngɛ hlae nɛ nyɛɛ nu ekohu. Nyɛ hu nyɛ suɔ kaa nyɛ maa pee e kaseli lo?”
28Se mɛɛ lɛɛ a gbiɛ nyumu ɔ, nɛ a de lɛ ke, “Mo ji jamɛatsɛ ɔ kaselɔ; wɔɔ lɛɛ Mose kaseli ji wɔ. 29Wa le kaa Mawu kɛ Mose tu munyu, se kikɛmɛ a nɔmlɔ nɛ ɔ lɛɛ, he nɛ e je po wa li.”
30Nyumu ɔ de mɛ ke, “Mɛni nyakpɛ sane ji nɛ ɔ! Nɔmlɔ nɛ bli ye hɛngmɛ ɔ, nyɛɛ lɛɛ nyɛ ke nyɛ li he nɛ e je! 31Wa le kaa Mawu bui yayami peeli tue, se nɔ nɛ yeɔ lɛ gbeye, nɛ e peeɔ Mawu suɔmi nya ní ɔ, Mawu buɔ lɛ tue. 32Kɛ je benɛ a bɔ je ɔ, nɔ ko nɔ ko nui hyɛ kaa a bli nɔ ko nɛ a fɔ lɛ hɛ yuyuilɔ hɛngmɛ? 33Nɔmlɔ nɛ ɔ, ke pi Mawu ngɔ nɛ e je ɔ, jinɛ e ko nyɛ we nɔ́ ko peemi.”
34A he nɔ ke, “Mo nɛ a fɔ mo, nɛ a tsɔse mo ngɛ yayami mi ɔ, o ngɛ hlae nɛ o tsɔɔ wɔ ní?” Kɛkɛ nɛ a fie lɛ kɛ je a jami ɔ mi.
Mumi mi hɛ yuyui
35Yesu nu kaa a fie lɛ kɛ je jami ɔ mi, lɔ ɔ he ɔ, pee se benɛ e na nyumu ɔ, e bi lɛ ke, “O heɔ Nɔmlɔ Bi ɔ yeɔ lo?”
36Nyumu ɔ he nɔ ke, “I kpa mo pɛɛ, mɛnɔ ji lɛ, konɛ ma he lɛ ma ye?”
37Yesu de lɛ ke, “O na lɛ momo. Lɛ ji nɔmlɔ nɛ kɛ mo ngɛ munyu tue ɔ nɛ.”
38Nyumu ɔ he nɔ ke, “Nyɔmtsɛ, i heɔ yeɔ.” Kɛkɛ nɛ e kpla si ngɛ Yesu hɛ mi.
39Yesu de ke, “I ba je nɛ ɔ mi nɛ ma ba kojo, konɛ hɛ yuyuili nɛ hyɛ nɔ; nɛ nihi nɛ susuɔ kaa a ngɛ nɔ hyɛe ɔ, a hɛ nɛ yu.”
40Benɛ Farisi bi komɛ nɛ ngɛ lejɛ ɔ nu nɛ e de nɔ́ nɛ ɔ, a bi ke, “Anɛ o ngɛ tsɔɔe kaa wɔ hu wa hɛ yu lo?”
41Yesu de mɛ ke, “Kaa nyɛ hɛ yu mohu ɔ, jinɛ yayami be nyɛ he; se jehanɛ ɔ, nyɛ deɔ ke, ‘Wa ngɛ nɔ hyɛe,’ lɔ ɔ he ɔ, nyɛ he yayami ɔ ngɛ nyɛ he kɛ mwɔɔ.”
S'ha seleccionat:
Yohane 9: Dangme
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Dangme © Bible Society of Ghana, 2018.