Luka 24
24
Yesu te si
(Mateo 28.1-10; Marko 16.1-8; Yohane 20.1-10)
1Otsi ɔ we kekleekle ligbi mɔtu mla a, yi ɔmɛ hɛɛ tsopa kɛ e he via nɛ a dla ngɔ to ɔ kɛ ba yɔkɔ ɔ he. 2A na kaa a kpɛne tɛ ɔ kɛ je yɔkɔ ɔ nya. 3Lɔ ɔ he ɔ, a sɛ mi; se a nɛ Nyɔmtsɛ Yesu gbogboe ɔ. 4Nɔ́ nɛ ɔ ha nɛ a pee yaa kɛ daa si. Tlukaa a, nyumuhi enyɔ nɛ wo tade nɛ ngɛ kpɛe klãiklãi ba da si ngɛ a kasa nya. 5Yi ɔmɛ ye gbeye wawɛɛ nitsɛ, nɛ a ngɔ a hɛ mi kɛ bu si. Kɛkɛ nɛ nyumu ɔmɛ bi mɛ ke, “Mɛni he je nyɛ ngɛ hɛ kalɔ ɔ hlae ngɛ ni gbogboehi a kpɛti? [ 6#Mat 16.21; 17.22-23; 20.18-19; Mar 8.31; 9.31; 10.33-34; Luk 9.22; 18.31-33 E be hiɛ ɔ; a tle lɛ si.] Nyɛ kai nɔ́ nɛ e de nyɛ benɛ e ngɛ Galilea a ke 7‘Ja a ngɔ Nɔmlɔ Bi ɔ ngɔ wo yayami peeli a dɛ mi, nɛ a sɛu lɛ; se ligbi etɛ se ɔ, e maa te si kɛ ba wami mi ekohu’ ɔ.”
8Kɛkɛ nɛ yi ɔmɛ kai munyuhi nɛ e tu ɔ. 9A kpale a se kɛ je yɔkɔ ɔ he, nɛ a ya sɛɛ ní nɛ ɔmɛ tsuo ha bɔfo nyɔngma kɛ kake ɔmɛ, kɛ nihi nɛ piɛ ɔ tsuo. 10Maria Magdalena, kɛ Yohana, kɛ Yakobo nyɛ Maria, kɛ yi kpa komɛ nɛ piɛ a he ɔ ji nihi nɛ ba sɛɛ ní nɛ ɔmɛ ngɔ ha bɔfo ɔmɛ ɔ nɛ. 11Bɔfo ɔmɛ ngɔ nɔ́ nɛ yi ɔmɛ ba de mɛ ɔ kaa nyazia, nɛ a he we yi. [ 12Se Petro te si, nɛ e sa fo kɛ ya yɔkɔ ɔ he. E kɔkɔ e yi si, nɛ e na kploba amɛ nɛ pueɔ si. Nɔ́ nɛ ba a pee lɛ nyakpɛ saminya; kɛkɛ nɛ e kpale kɛ ho we mi ya.]
Nyɔmtsɛ ɔ je e he kpo ngɔ tsɔɔ e se nyɛɛli enyɔ komɛ
(Marko 16.12-13)
13Jamɛ a ligbi ɔ nɔuu ɔ, Yesu se nyɛɛli ɔmɛ a ti ni enyɔ pue nɔ kɛ yaa kɔpe ko nɛ a tsɛɛ Emao ɔ. Kɔpe nɛ ɔ kɛ Yerusalem kɛmi maa pee si tomi kpaago. 14Benɛ a yaa a, a ngɛ níhi nɛ ba a tsuo a he ní sɛɛe. 15Benɛ a ngɛ ní ɔ sɛɛe nɛ a ngɛ a he sanehi bie ɔ, Yesu nitsɛ ba na mɛ, nɛ e kɛ mɛ nyɛɛ. 16A na lɛ, se a yo we lɛ. 17Yesu bi mɛ ke, “Mɛni nyɛ ngɛ sɛɛe ngɛ blɔ ɔ nɔ ɔ?”
A da si kɛ a hɛ mi mɔbɔmɔbɔ. 18Kɛkɛ nɛ a ti nɔ kake nɛ a tsɛɛ lɛ Kleopa a de lɛ ke, “I heɔ yeɔ kaa mo pɛ ji nubwɔ ngɛ Yerusalem nɛ li sanehi nɛ ba lejɛ ɔ lingmi nɛ ɔ!”
19E bi ke, “Mɛni sanehi?”
A he nɔ ke, “Sanehi nɛ ba Yesu nɛ je Nazaret ɔ nɔ ɔ! Nyumu nɛ ɔ, gbalɔ ji lɛ. E pee nyakpɛ níhi, nɛ e tu munyu nguahi nɛ sa Mawu, kɛ ma a tsuo a hɛ mi. 20Wa osɔfo nikɔtɔma amɛ, kɛ ma nimeli ɔmɛ ngɔ lɛ ha nɛ a bu lɛ gbenɔ fɔ, nɛ a sɛu lɛ. 21Jinɛ wɔɔ lɛɛ wa hyɛ blɔ kaa lɛ nɛ e ma ba kpɔ Israel! Se enɛ ɔ tsuo se ɔ, mwɔnɛ ɔ ji ligbi etɛne nɛ ní nɛ ɔmɛ ba mi. 22Jehanɛ ɔ hu, yihi nɛ ngɛ wa kpɛti ɔ, a ti ni komɛ ha nɛ wa nya kpɛ wa he. Makɛ nɛ ɔ nɛ a ya yɔkɔ ɔ he ɔ, 23a nɛ gbogboe ɔ. Lɔ ɔ he ɔ, a kpale kɛ ba, nɛ a ba de wɔ ke Mawu bɔfo komɛ je a he kpo tsɔɔ mɛ, nɛ bɔfo ɔmɛ de mɛ ke Yesu hɛ ngɛ. 24Nihi nɛ waa kɛ mɛ ngɛ ɔ, a ti ni komɛ hu ya yɔkɔ ɔ he, nɛ a ya na yɔkɔ ɔ kaa bɔ nɛ yi ɔmɛ ba de ɔ pɛpɛɛpɛ. Se Yesu ɔ lɛɛ a nɛ lɛ.”
25Kɛkɛ nɛ Yesu de mɛ ke, “Kuasiahi nɛ nyɛ sume kaa nyɛ ma he níhi tsuo nɛ gbali ɔmɛ de ɔ maa ye! 26E hia kaa Kristo ɔ nɛ na amanehlu nɛ ɔmɛ, konɛ e sɛ e nyami ɔ mi.” 27Jehanɛ ɔ, Yesu tsɔɔ mɛ níhi tsuo nɛ ngmami ɔmɛ de ngɛ lɛ nitsɛ e he ɔ a sisi; e je sisi kɛ je Mose womi ɔmɛ, kɛ gbali ɔmɛ tsuo a ni ɔmɛ a nɔ.
28Benɛ a miɔ nɛ a maa su kɔpe mi he nɛ a yaa a, Yesu pee kaa nɔ́ nɛ e yaa e hɛ mi. 29Se a nyɛ e nɔ, nɛ a de lɛ ke, “Ba to wɔ; ejakaa je ngɛ jɔe, nɛ e piɛ bɔɔ nɛ du ma bu.” Nɛ e kɛ mɛ ho, nɛ e ya to mɛ. 30Benɛ e kɛ mɛ hii si nɛ a ngɛ ní yee ɔ, e kɛ̃ abolo, nɛ e na Mawu si, nɛ e ku mi, nɛ e ngɔ ha mɛ. 31A yo lɛ si kake too; kɛkɛ nɛ e laa mɛ, nɛ a nɛ lɛ hu. 32A de a he ke, “Benɛ wa ngɛ blɔ ɔ nɔ kɛ ma nɛ e ngɛ wɔ ngmami ɔmɛ a sisi tsɔɔe ɔ, hyɛ bɔ nɛ wa nɔ gbagba te ha!”
33A te si pam, nɛ a kpale a se kɛ ho Yerusalem ya nɔuu. A ya na kaseli nyɔngma kɛ kake ɔmɛ, kɛ ni kpa amɛ ngɛ lejɛ ɔ. 34Mɛ tsuo a de ni enyɔ ɔmɛ ke, “Nyɔmtsɛ ɔ te si niinɛ! E je e he kpo tsɔɔ Simon!”
35Ni enyɔ ɔmɛ hu bɔ mɛ nɔ́ nɛ ba ngɛ blɔ ɔ nɔ, kɛ bɔ nɛ pee nɛ a yo lɛ benɛ e ku abolo ɔ mi ɔ.
Yesu je e he kpo tsɔɔ e kaseli ɔmɛ
(Mateo 28.16-20; Marko 16.14-18; Yohane 20.19-23; Ni Tsumi 1.6-8)
36Benɛ ni enyɔ ɔmɛ ngɛ mɛ amaniɛ nɛ ɔ bɔe ɔ, tlukaa a, Nyɔmtsɛ ɔ nitsɛ ba da a kpɛti, [nɛ e de mɛ ke, “Nyɛ he manye.”]
37A tsui po, ejakaa a susu kaa a na kpade. 38Se e de mɛ ke, “Nyɛ ko ye gbeye, nɛ nyɛ ko je nɔ́ hulɔ! 39Nyɛɛ hyɛ ye nine kɛ ye nane, nɛ nyɛ maa na kaa imi nitsɛ. Nyɛɛ ta ye he, nɛ nyɛ maa na; ejakaa kpade be he lo kɛ wu kaa bɔ nɛ nyɛ ngɛ mi hyɛe ɔ.”
[ 40Benɛ e de enɛ ɔ, e je e nine, kɛ e nane ɔ ngɔ tsɔɔ mɛ.] 41Bua jɔmi babauu nɛ a na, kɛ bɔ nɛ nɔ́ ɔ pee mɛ nyakpɛ he je ɔ, a he we yi kɛ mwɔɔ. Kɛkɛ nɛ Yesu bi mɛ ke, “Nyɛ ngɛ nɔ́ ko nɛ a yeɔ ngɛ hiɛ ɔ lo?” 42A ha lɛ lo kpɔ kake nɛ a hoo, 43nɛ e he nɛ e ye ngɛ a hɛ mi paa.
44Enɛ ɔ se ɔ, e de mɛ ke, “Benɛ i kɛ nyɛ ngɛ ɔ, níhi nɛ i deɔ nyɛ ji nɛ ɔmɛ nɛ: níhi tsuo nɛ a ngma ngɛ ye he ngɛ Mose mlaa a, kɛ gbali ɔmɛ, kɛ La womi ɔ a mi ɔ, ja lɛ tsuo ba mi.”
45Jehanɛ ɔ, e bli a juɛmi nya, konɛ a nu ngmami ɔmɛ a sisi. 46E de mɛ ke, “Bɔ nɛ a ngma ji kaa ja a gbe Kristo ɔ, nɛ e te si kɛ je gbeje ligbi etɛ se. 47A ngma hu ke, a maa fiɛ ha je ma amɛ tsuo ngɛ e biɛ mi kaa a tsake a tsui, konɛ a ngɔ a he yayami ɔmɛ ngɔ pa mɛ. A maa je sisi kɛ je Yerusalem. 48Nyɛ ji kikɛmɛ a ní nɛ ɔmɛ a he odase yeli, 49#Nits 1.4 nɛ ma ha Mumi Klɔuklɔu ɔ maa ba nyɛ nɔ kaa bɔ nɛ Tsaatsɛ wo si ɔ. Se nyɛɛ hi Yerusalem ma a mi kɛ yaa si he wami nɛ je hiɔwe ɔ maa ba nyɛ nɔ.”
A ngɔ Yesu kɛ ho hiɔwe ya
(Marko 16.19-20; Ni Tsumi 1.9-11)
50 #
Nits 1.9-11
Enɛ ɔ se ɔ, Yesu ngɔ mɛ kɛ je ma a mi kɛ ho Betania ya; nɛ e wo e ninehi a nɔ, nɛ e gbaa mɛ. 51Benɛ e ngɛ mɛ gbae ɔ, e je a he, [nɛ a ngɔ lɛ kɛ ho hiɔwe ya. 52Kɛkɛ nɛ a ja lɛ,] nɛ a kpale a se kɛ ho Yerusalem ya kɛ bua jɔmi babauu. 53Daa nɛ ɔ, o maa na mɛ ngɛ sɔlemi we ɔ nɛ a ngɛ Mawu yi jee.
S'ha seleccionat:
Luka 24: Dangme
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Dangme © Bible Society of Ghana, 2018.