JUAN 8
8
1Per Jesúz za me to dahñ ni le Oliv. 2No ni byre guiaal, rsily, za me idoró gyzac, no bydohp meññ leeme, no gürie me, guzlo galuu me meññ. 3Muextr yahc naꞌ ni ruuḻ xleiy Moiséz no zrieñ meññ-nac yahc fariseu, bidno yâme to ngünaa ni bygano sto mpyquie ni nehx tziahl me lee, no bzu yâme leeme glaꞌy ru dxie Jesúz lahd meññ, 4no ra yâme Jesúz:
―Muextr, ngüna-rieꞌ bygano me sto mpyquie ni nehx tziahl me lee. 5No lo xleiy Moiséz neu, zâ ngüna-wé, hor-igaꞌ yâme, gaty yâme no guie. Lii naꞌ, ¿bia neꞌy?
6Leeyâme naꞌ, gayo yâme bia lguia gyruu yâme contr Jesúz. Per Jesúz naꞌ, byruꞌñ me no guzlo gazaa me lo yu no ihqy ña me. 7Gumm gatzunñaad yâme ganabdiidz yâme leeme la, were gürieli me no ra me meññ-wé yahc:
―Dxu laꞌd nehx rahp guîlquie, nier lee cshadguie leeme.
8No gyzac byruꞌñ me, no gazaa me lo yu sto. 9Ru bieññ yâme günii Jesúz ze, no nann yâme nehx nyar xguîlriehñ yâme, guzlo byruu to por to yâme, nier gahc ni ma mînguhl glo byre yâme byruu; no biaꞌn ngüna-caḻ ni bzu yâme lee glaꞌy ru dxie Jesúz. 10Gyzac gürieli Jesúz, no ndruhty di nwieꞌ me mazyg nunzy ngüna-caḻ, were ra Jesúz leeme:
―¿Óz meññ ni garuu contr lii naꞌ? ¿Ndruhty ba nehx günii rahp de ni gatyiꞌ la?
11Ra me Jesúz:
―Ndruhty günii ze, Señor.
Were ra Jesúz leeme:
―Naa zegahc nehx zapyaꞌ rahpiꞌ de ni gatyiꞌ. Gübiꞌ naꞌ, no ba di ctzooriꞌ guîlquie.
Jesúz, zidguiahc me beeiy byniꞌ lo guiedzylie
12Gyzac günino Jesúz meññ, ra me:
―Naa zidguiahcaꞌ beeiy byniꞌ par meññ-nu lo guiedzylie; dxu gac dmeññaꞌ, lee nehx ziuꞌ beeiy lo guibcawy, mazyg zahp me beeiy byniꞌ ni rdee guîlmbahñ ni nehx zluhx.
13Were ra meññ-nac yahc fariseu leeme:
―Lii gadeedyiꞌ diidz de lii gahc, leewe nehx rsahc ni rniiy.
14Ra Jesúz leeyâme:
―Nîcze gadedyaꞌ diidz de naa gahc, per ni ganin rsahcu, porni nannaꞌ bá byruun no nannaꞌ bá tzan; no laꞌd nehx nann laꞌd. 15Rnii laꞌd ni nac meññ mod-rtzoo meññ-nu lo guiedzylie. Naa nehx rnin ni nac ndruhty. 16Per bâḻ rnin ni nac meññ, ni rnin rsahcu, porni dac‑e ni ne dguîlriehñaꞌ rnin, mazyg dTadaꞌ ni pshahl naa we ra naa bia gynin de ni nac meññ. 17Lo xleiy laꞌd neu, bâḻ chohp meññ gdee diidz tohzy mód, were rsahc ni gynii yâme. 18Naa gahc‑e gadedyaꞌ diidz de naa, no dTadaꞌ ni pshahl naa we, rdee diidz de naa zegahc.
19Ra yâme leeme:
―¿Bá glo nu xTadiꞌ?
Ra Jesúz leeyâme:
―Nehx rzaclo laꞌd naa, per ni dTadaꞌ; bâḻ nzaclo laꞌd naa, zegahc‑e nzaclo laꞌd dTadaꞌ.
20Nirieꞌ yahc günii Jesúz ru galuu me meññ leññ idoró ru rguꞌ yâme gun. No ndruhty nehx günahzy leeme, porni dgueññ gydzihñ dze-ba nac diidz.
Jesúz dac‑e de lo guiedzylie-rieꞌ leeme
21Gyzac ra Jesúz leeyâme:
―Naa tzan, no gyo laꞌd naa, per zehty laꞌd lo xguîlquie laꞌd. Ru tzan, nehx beeiy ziuꞌ laꞌdu.
22Were ne meññ-Isṟael ni rtzoo mdad:
―¿Dac‑e la, ganii me igaꞌdy me leegahcme, no leewe ne me di zaḻ tzo nó ru tza me?
23Ra Jesúz leeyâme:
―Laꞌd de neꞌ lo yu we laꞌd, per naa de gybaa we naa; de lo guiedzylie-rieꞌ we laꞌd, per naa dac‑e de lo guiedzylie-rieꞌ naa. 24No leewe ren laꞌd zehty laꞌd lo xguîlquie yahc laꞌd; porni bâḻ nehx rlíladzy laꞌd naa we ni ba gahc nu, lo gahc xguîlquie laꞌd‑e zehty laꞌd.
25Were ra yâme leeme:
―¿Dxuz‑e lii?
Ra Jesúz leeyâme:
―¿Dâs ba gahc ren laꞌd la? 26Rapaꞌ xtahl ni ñapyaꞌ no ni nnin de ni nac laꞌd. Per ni pshahl naa rnii ni uli; no ni bieññaꞌ de leeme, wé we ren meññ-nu lo guiedzylie.
27Per di ñieññ yâme bâḻ de dTad nó Dioz gaya Jesúz leeyâme. 28No leewe, ra Jesúz leeyâme:
―Naa we Mpyquie-Pshahl Dioz Lee, no dze-ba gülesy laꞌd naa lo cruzy, were zann laꞌd naa we ni ba gahc nu, no nehx rtzon mbehty ni ne dguîlriehñaꞌ, mazyg ni rluu dTadaꞌ naa, wé we rtzon. 29Leeme pshahl naa no nuno me naa; dTadaꞌ nehx rsaꞌn me naa tohgaꞌ, porni rtzon ni riuꞌladzy me.
30Hor-günii Jesúz ze, xtahl yâme bylíladzy leeme.
Xmeññ Dioz no meññ ni rtzoo guîlquie mdad lee
31Ra Jesúz meññ-Isṟael yahc ni ba bylíladzy leeme:
―Bâḻ nehx ssaꞌn laꞌd de ni gzoob laꞌd dtiidzaꞌ, zahc laꞌd ni ulihbu dmeññaꞌ. 32No ssaclo laꞌd ni nac ni uli, no leeu zislaa laꞌd.
33Ra yâme leeme:
―De lo xfamily Braṉ‑e noꞌ, no nito dgueññ gac noꞌ mós ni byzee lehdy ñahc noꞌ beeiy ni nliiby. ¿Bia nacu neꞌy gylaa noꞌ?
34Ra Jesúz leeyâme:
―Gapyaꞌ laꞌd ni uli, dxu rtzoo guîlquie, guîlquie gahc‑e rtzoo mdad leeyâme. 35To mós ni byzee nehx riaꞌn me no xfamily xpatróṉ me xtâ gaty me; mazyg xiiñ patróṉ, wé we rian-no xfamily. 36Leewe bâḻ Xiiñ Dioz guislaa me laꞌd de lo ña guîlquie, wer yaax‑e gylaa laꞌd. 37Nannaꞌ uliu de lo xfamily Braṉ‑e laꞌd; per riñlo laꞌd igaꞌdy laꞌd naa, porni nehx riuꞌladzy laꞌd ni rnin. 38Naa rnin ni bwien dze-nun no dTadaꞌ, per laꞌd rtzohd ni ne xtad laꞌd.
39Ra yâme Jesúz:
―¡Braṉ‑e dtad noꞌ!
Ra Jesúz leeyâme:
―Bâḻ ñahc uliu xtad laꞌd Braṉ, ntzoo laꞌd mod-ptzoo me. 40No nîcze gayapyaꞌ laꞌd ni nac ni uli ni bluu Dioz naa, per riñlo laꞌd igaꞌdy laꞌd naa. ¡Braṉ nehx güyuꞌ dzé ptzoo me ze! 41Ni rtzoo xtad laꞌd, leegahcu rtzoo laꞌd.
Ra yâme leeme:
―Dac‑e zrieñ dxu xiiñ noꞌ; Dioz, tohzy leeme we dtad noꞌ.
42Ra Jesúz leeyâme:
―Bâḻ ñahc uliu Dioz xtad laꞌd, nîntzi laꞌd naa, porni naa ru nu Dioz‑e byruun ziaḻaꞌ neꞌ. Nehx ziaḻaꞌ ctzon ni ne dguîlriehñaꞌ, mazyg Dioz‑e pshahl naa. 43¿Bia nacu di raḻ guieññ laꞌd ni runon lad? Nehx rieññ laꞌd porni nehx riuꞌladzy laꞌd ni rnin. 44Bêndzab, leeme we xtad laꞌd, no racladzy laꞌd ctzohd ni riuꞌladzy me. Pur guîlrgaꞌdy rtzoo me glo ba xtze diaa, no nehx rnii me ni uli. Ru risquiee me, leegahcme rdee diidz mbuxter‑e leeme, no nier leeme bisquiee. 45Leewe, nîcze rnin ni nac ni uli, nehx rlíladzy laꞌd naa. 46¿Dxu de laꞌd beeiy nluu bia guîlquie rapaꞌ? Bâḻ rnin ni uli, ¿bia nacu nehx rlíladzy laꞌd naa? 47Dxu nu no Dioz, wé we rieññ xtiidz Dioz; gumm nehx nu laꞌd no Dioz la, leewe di ne laꞌd guieññ.
Ma nier Jesúz nu que Braṉ
48Were ra meññ-Isṟael yahc leeme:
―Ni uli we rnii noꞌ, lii nehx naquiꞌ dmeññ noꞌ, meññ-samaritan lii, no nu mbenahcsy lii.
49Ra Jesúz leeyâme:
―Nehx nu mbenahcsy naa. Ni rtzon la, rzacbeeiyaꞌ dTadaꞌ; no laꞌd naꞌ, rnii laꞌd ni nahcsy contr naa. 50Naa nehx gayobyaꞌ cuguia meññ naa, per Dioz ne gacu ze, no rnii me de ni nac meññ. 51Gapyaꞌ laꞌd ni uli, dxu rzoob dtiidzaꞌ nehx znihty.
52Ra meññ-Isṟael leeme:
―Hôrrieꞌ were ba bzaclo noꞌ nu mbenahcsy lii. Braṉ no zrieñ profet guhty yâme; no naꞌ lii neꞌy: “Dxu gzoob xtiidziꞌ nehx znihty.” 53¿Ma rsahquiꞌ que dtadgul noꞌ Braṉ ni güyuꞌ ba xtze la? Leeme guhty me, no zegahcu zrieñ profet yahc. ¿Dxu we neꞌy naquiꞌ?
54Ra Jesúz leeyâme:
―Bâḻ naa rguguian naa gahc la, were nehx rsahcu. Per dTadaꞌ we rguguia naa, ni ne laꞌd xDioz laꞌd lee. 55Per luxu nehx rzaclo laꞌd leeme. No naa rzacloꞌn leeme; no bâḻ nnin nehx rzacloꞌn leeme la, ñahcaꞌ mbuxter beeiy gahc laꞌd. Per we naꞌ, ni uli we rzacloꞌn leeme, no rzobdiidzaꞌ leeme. 56Xtadgul laꞌd Braṉ ni güyuꞌ ba xtze, byxihly me güieꞌ me dzé ni guiaḻaꞌ. No dze-bwieꞌ meu, modni byxihly me.
57Were ra yâme Jesúz:
―Per ni cincuent ihz nehx rahpiꞌ, ¿bia mód neꞌy bwieꞌy Braṉ?
58Ra Jesúz leeyâme:
―Gapyaꞌ laꞌd ni uli, naa we ni ba gahc nu antzy ni bidtzu Braṉ.
59Were günahzy yâme guie par nshaꞌd yâmeu Jesúz; per Jesúz bynitylo me no güdedy me lahd yâme, byruu me idoró.
S'ha seleccionat:
JUAN 8: zpg
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.