Ghjuanni 3
3
Ghjesù è Nicodema
1À buleghju à i Farusei, ci era unu chì si chjamava Nicodema, un capu di i Ghjudei. 2Andeti à truvà à Ghjesù di notti è li dissi: «Rabbì, a sapemu chì tù sè un maestru mandatu da Diu, chì nimu pò fà issi segni chì tù faci s'eddu ùn hà à Diu cun eddu.» 3Ghjesù risposi è li dissi: «da veru, a ti dicu à chì ùn hè turratu à nascia ùn pò veda u Regnu di Diu.» 4È Nicodema li dissi: «comu hà da fà, un omu, à nascia quand'eddu hè vechju? Soca pò vulta una antra volta in corpu à a mamma è nascia?» 5Ghjesù risposi: «da veru a ti dicu, à chì ùn nasci d'acqua è di spiritu, ùn pò entra in lu Regnu di Diu. 6Ciò chì hè natu da a carri hè carri, è ciò chì hè natu da u Spiritu hè spiritu. 7Ùn ti maraviddà di ch'e' ti abbii dittu: “ci voli chì vo' torghiti à nascia.” 8U ventu#3,8 Ventu: si ghjoca cù a parola greca chì pò vulè dì ventu o Spiritu. soffia duv'edda li pari, è senti a so boci, ma ùn sai da induva eddu veni è induva eddu và; cusì hè par ogni omu natu da u Spiritu.» 9Nicodema risposi è li dissi: è comu pudaria essa? 10Ghjesù risposi è li dissi: tù sè maestru in Israela è ùn la sai? 11A ti dicu da veru, dimu ciò chì no' sapemu è tistimuniemu di ciò chì no' emu vistu, ma voi, a nostra tistimunianza ùn l'accitteti. 12Vi aghju parlatu di i cosi di a tarra è ùn criditi, comu eti da creda s'e' vi parlu di i cosi di u celi? 13È in celi, nimu ci hè cuddatu, for di quiddu chì falò da u celi, u Fiddolu di l'Omu#3,13 Paragunà cù Prv 30,4; Rm 10,6. 14È com'eddu innalzò Musè u sarpenti di bronzu in lu disertu#3,14 Si vega Nm 21,9., cusì ci voli ch'eddu sia innalzatu u Fiddolu di l'Omu, 15Da chì ogni omu chì credi abbii in eddu a vita eterna.
16«Da tantu chì Diu hà tinutu caru u mondu, hà datu u so Fiddolu solu, da fà chì ogni omu chì credi in eddu ùn sia distruttu ma abbii a vita eterna. 17Chì Diu, u Fiddolu, ùn l'hà micca mandatu in u mondu à ghjudicà u mondu, ma par ch'eddu sia salvu u mondu par via d'eddu. 18À chì credi in eddu ùn hè ghjudicatu; à chì ùn credi hè aghjà ghjudicatu, parch'eddu ùn hà cridutu in lu nomu di u Fiddolu solu di Diu. 19Eccu un ghjudiziu: a luci hè vinuta in u mondu è l'omini ani tinutu caru u bughju inveci di a luci; chì i so opari erani gattivi. 20À chì faci u mali ùn pò pata a luci è ùn s'avvicina da a luci di paura ch'eddi venghini palesi i so opari. 21Ma à chì faci u veru s'avvicina da a luci, da ch'eddu venghi palesu chì i so opari sò stati fatti in Diu.»
Ghjesù è Ghjuvanni u Battistu
22Dopu, Ghjesù ghjunsi cù i discipuli in Ghjudeia, è quandì dà stava cun eddi è battizaia#3,22 Veda 4,1-2.. 23È Ghjuvanni dinò battizaia in Ainoni vicinu à Salema#3,23 Ainoni, Salema: paesi di a vaddi di u Ghjurdanu, ùn si sà micca bè induva. chì quandì dà, ci era monda acqua, è a ghjenti vinia è si facia battizà; 24chì tandu Ghjuvanni ùn era ancu statu imprighjunatu#3,24 Veda Mt 14,3; Mc 6,17; Lc 3,19-20.. 25Nascì un cuntrastu trà i discipuli di Ghjuvanni è un Ghjudeiu trattendu si di a purificazioni. 26È ghjunsini à truvà à Ghjuvanni è li dissini: «Rabbì, sai quiddu chì era cù tecu da Ghjurdanu in dà, è chì tù l'ai fattu u tistimoniu, avà battiza, è vani tutti à truvà lu.» 27Ghjuvanni risposi è dissi: «un omu ùn pò piddà cà ciò chì li hè statu datu da u celi. 28Voi stessi seti tistimonii ch'e' aghju dittu: “eiu ùn socu micca u Missia ma li socu statu mandatu da nanzi#3,28 Veda 1,20. Paragunà cù Ml 3,1..” 29Quiddu chì hà a sposa, hè u sposu ma l'amicu intimu di u sposu hè quì, u senti è si ralecra à senta a boci di u sposu; è cusì veni cumpiita a me gioia. 30Eddu ci voli ch'eddu creschi, ed eiu, ch'e' sminuischi.»
Quiddu chì veni da u celi
31«Quiddu chì veni da l'altu hè sopra à tutti; à chì veni da a tarra, di a tarra hè è da a tarra parla; [Quiddu chì veni da u celi hè sopra à tutti.] 32Ciò ch'eddu hà vistu è intesu, ni tistimunieghja, è a so tistimunianza nimu a ricevi. 33À chì accetta a so tistimunianza, sugella chì Diu hè veru. 34Chì quiddu chì Diu hà mandatu dici i paroli di Diu: Diu u Spiritu u li dà senza misura. 35U Babbu teni caru u Fiddolu è li hà datu tuttu in manu. 36À chì credi in lu Fiddolu, hà a vita eterna; à chì ùn si fida à u Fiddolu, ùn vidarà a vita, ma li hè à dossu a collara di Diu.»
S'ha seleccionat:
Ghjuanni 3: 4EvCors
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Société biblique française, 1994