Mbombo tsa Vapositili 20
20
ɄPaulo ilʉta ikange kʉ Makedoniya na kʉ Vʉyunaani
1Ɨholo jɨlya jya kʉ Efeso, wʉ jɨsilile, ʉPaulo akavalʉndamania avakongi vaapo, akavakangatsa inumbula, akɨtavʉla kʉ veene, akahega akalʉta kʉ Makedoniya. 2Wʉ ilʉtɨngʼania mu kɨlʉnga ɨkyo, akava ikʉvavʉʉla avɨɨdɨki amamenyu mongosu ga kʉvanywilitsa inumbula. Kʉmbele, akasika mu kɨlʉnga kya Vayunaani.#20:2 Kɨlʉnga kya Vayunaani Ɨlɨ litaawa ɨlɨnge lya kɨlʉnga kya Akaya. Ɨkɨlʉnga ɨkɨ ɨkya Akaya kyale ʉlʉvasu lwa Kʉsika lwa kɨlʉnga kya Makedoniya. 3Akataama ʉkʉ ɨmyetsi gɨdatu. Wʉ ikɨsaavʉʉla ʉkʉkilivuka kʉ Siliya, kʉ nzɨla jya meeli, akalʉmanya ʉkʉta aVayahudi vaasaagaga ʉkʉmbomba sivi wʉ alɨ mu lʉgendo, pwʉ akalamula ʉkʉkilivuka, akagendela ɨnzɨla jya kʉ Makedoniya. 4Kʉ nsɨkɨ ʉgwa, ʉPaulo aalongotsiinie na vaanu ava: ʉSopatilo ʉmwana va Pilo ʉva kʉ Beloya, ʉAlisitaliko nʉ Sekundo va kʉ Tesalonike, ʉTimoti, ʉGayo va kʉ Delibe, nʉ Tikiko paninie nʉ Tilofimo va kʉ Asiya. 5Avo vooni vakalongola, vakalʉta kukʉtʉpʉlɨkɨla kʉ vʉtsenge wa Tuloa. 6Napeene ʉwe, ʉnsɨkɨ gwa kyaka kya Mikate Ɨgɨtsila Kɨlʉve wʉ gʉsilile, tʉkahega palya pa Filipi nɨ meeli, tʉkagenda isigono sihaano, tʉkatsisika kʉ Tuloa. Apo pwʉ twagiine na vajiitu ʉwʉ vaalongwe kwawe, tʉkataama ʉkʉ isigono lekelakʉpamato (7).
ɄPaulo ikʉntsʉʉsa ʉEutiko
7Pakyakʉvɨlʉka kʉmihe, tʉkalʉndamana kʉ vʉsumbe wa kʉva nʉ lwʉpɨlɨlo lwa Siinu iSivalatse. ɄPaulo akatengʉla ʉkʉtsova nʉ kwandɨngʼana na vaanu. Ɨlyo lɨkagendelela ʉkʉsika mu kɨlogati, ʉlwakʉva ʉPaulo aanogilwe ʉkʉhega ɨkɨgono ɨkyakongile. 8Mu kɨjumba ʉmwʉ twalʉndamiine, mukava na masuke siitso ʉlwakʉva mwale ni nyaale nyongosu itsyaviikaga. Ɨkɨjumba ɨkyo kyale kʉ golofa jya daatu mu nyumba ɨjyo. 9Pa lidiliisa lya kɨjumba ʉmwʉ twale, aataamile ʉnʼdɨɨmi mpamato, ʉvɨ ɨlitaawa lya mwene aatambʉlwagwa Eutiko. Wʉ ʉPaulo igendelela ʉkʉtsova nʉ kwandɨngʼana navo, ʉEutiko akatengʉla ʉkʉkʉtɨɨla padebe padebe, kʉmbele akagoneelela. Wʉ alɨ mu tʉlʉ, akagwa ʉkʉhʉma pa lidiliisa lya mu nyumba jya golofa jya daatu. Avaanu vakasika kukʉndola, vakavona amalile ʉkʉswa. 10ɄPaulo akiika paasi, akɨgonia pakyanya pa nʼdɨɨmi ʉjwa, akankumbata, akavavʉʉla avaanu akata, “Muleke ʉkʉdwada, ʉjʉ mwʉmi.” 11ɄPaulo akatoga ikange kʉ kɨjumba ɨkyo, akamenyula ʉkate, akalya. Kʉmbele, akagendelela ʉkʉmanyiisa kʉ nsɨkɨ ntale ʉkʉsika wʉ kwikya, pwʉ akahega. 12Avaanu avo vakantoola ʉnʼdɨɨmi ʉjwa, vakammɨlɨka kʉ myave inʼgʉge. Vaahowiike siitso.
ɄPaulo ikɨlaga kʉ vandyakoni va kʉ Efeso
13ɄPaulo akalʉta lwa silʉnde kʉ vʉtsenge wa Asosi, ndʉwʉ aalamwe. Ʉwe tʉkatoga mu meeli, tʉkabɨha ʉkʉ pakʉta tʉgendele tʉntoole ndʉwʉ aatʉlagye. 14Wʉ atʉweene kʉ Asosi ʉkʉ, tʉkampakɨla mu meeli, tʉkalʉta paninie kʉ vʉtsenge wa Mitilene. 15Ʉkʉhʉma ʉkwa tʉkagendelela ʉkʉgenda nɨ meeli, nɨ kɨgono ɨkyakongile, tʉkalʉtɨngʼania pawiipi nɨ kɨlʉnga kya Kiyo ɨkyale pagati pa nyanza. Ɨkɨgono ɨkya daatu, tʉkatsisika kʉ kɨlʉnga kya Samo ɨkyʉ nakyene kyale pagati pa nyanza. Ɨkɨgono ɨkya nni tʉkatsisika kʉ vʉtsenge wa Mileto. 16ɄPaulo aalamwe ʉkʉgendelela nʉ lʉgendo lwa mwene mu meeli kɨtsila kʉgendela kʉ Efeso, pakʉta aleke ʉkʉsuvalɨla kʉ Asiya. Aale wɨmawɨɨma pakʉta aangʉpe ʉkʉsika kʉ Yelusalemu, ɨkɨgono kya Pentekositi wʉ kɨkaanale ʉkʉsika, jɨngɨɨdɨngʼane.
17ɄPaulo wʉ alɨ pa Mileto, akavasuungʼa avaanu vakavɨɨlange avandyakoni va mpelela gwa kʉ Efeso. 18Wʉ vasiike, akavavʉʉla akata, “Ʉnyie mulʉmanyile ʉlʉgendo lwango isigono syoni ʉnsɨkɨ ʉgwʉ ndyataamile nʉʉnyie, ʉkʉhʉma ɨkɨgono ɨkyʉ ndyasiike mu Asiya ʉmʉ. 19Mulʉmanyile ʉmwʉ ndyambombelaga ʉNtwa ʉYɨɨsʉ kʉ vʉdeke wooni, kʉ lwihotsi na kʉ vʉkʉvɨlwa ʉwʉ wambwene ʉne ʉkʉkongana na masaago amaviivi ga Vayahudi. 20Mulʉmanyile ʉkʉta ndyɨhʉmiitse ʉkʉvalʉmbɨlɨla ɨkɨveetsaga ɨkyʉ kikʉvatanga ʉnyie, ndɨlɨkʉvamanyiisa mu ndʉndamano na mu nyumba tsiinyo. 21Ndyavavʉʉlaga aVayahudi na vatava Vayahudi ʉkʉta vapele imbiivi tsa veene, vankilivukile ʉNgʉlʉve, nʉ kʉmwɨdɨka ʉNtwa viitu ʉYɨɨsʉ Kɨlɨsiti.
22“Lɨno pʉlɨhɨtsi, ʉMepo ʉMbalatse ikʉndongotsa ʉne ndɨlʉte kʉ Yelusalemu, nʉpwʉ jɨngave nandɨtsimanyili itsikambonage ʉkʉ. 23Ndɨlʉmanyile kwene ʉkʉta mu vʉtsenge ʉvʉveetsaga ʉwʉ ndigendela, ʉMepo ʉMbalatse ikʉmbonia ʉkʉta isikʉngwa nʉ vʉkʉvɨlwa sikʉmmʉlɨkɨla. 24Napeene, nʉpwʉ jɨngave poonu ndiiswa, nandivɨɨkɨla ntɨma ʉwʉʉmi wango. Ɨkɨvaha siitso kwane ndɨmale ɨmbombo ɨjyʉ ʉNtwa ʉYɨɨsʉ amye ndɨvombe, kwʉ kʉta ndɨvalʉmbɨlɨle avaanu ɨLivangɨli lya lʉhʉngʉ lwa Ngʉlʉve.
25“Ndɨlɨkʉgendela mu kʉlʉmbɨlɨla kwanyie ikulongwi tsa Lʉdeeva lwa Ngʉlʉve. Lɨno, ndɨlʉmanyile ʉkʉta ʉnyie nyɨ vooni namulambone ʉne ikange lʉsiku. 26Lɨno, ndikɨbeelela lwoni kʉ nyɨ vooni mu kɨgono ɨkyɨleelo ʉkʉta, ɨngave kʉlaava muunu mwanyie ʉvɨ alajaga, nakʉli ʉvɨ alandɨlɨla sivi ʉne. 27Ndyɨhʉmyaga ʉkʉvalʉmbɨlɨla gooni ʉgwʉ ʉNgʉlʉve aasumbilwe kʉ vʉnogwe wa mwene. 28ɄMepo ʉMbalatse avavɨɨkile ʉnyie muve valoleeli va mpelela gwa Ngʉlʉve. Nʉ jyʉnge ɨloleelage jyʉmwene, nʉ kʉloleela ɨkɨpʉga kya vɨɨdɨki va Ngʉlʉve. Mudɨɨmage ʉmpelela gwa Ngʉlʉve ʉgwʉ agʉgombwe nʉ nkisa gwa Mwana va mwene jyʉmwene.#20:28 Nkisa gwa Mwana va mwene jyʉmwene Ʉvʉlʉvʉlʉ ʉvʉnge wa mamenyu aga vuweesa ʉkʉva ʉnkisa gwa mwene. 29Ndɨlʉmanyile ʉkʉta wʉ ndɨhegile nʉ kʉvaleka, avamanyisi va vʉnuasi vikwitsaga kwanyie, jʉviveetsaga vakali ʉta ngʼekeeva pagati pa ngʼolo, navakakɨkolelage ɨkɨsa ɨkɨpʉga kya vɨɨdɨki. 30Ikange ʉkʉhʉma mwanyie jyʉnyie, jʉvihʉmɨlaga avaanu ʉwʉ jʉvitsovaga ikulongwi tsa vʉnuasi kʉ vakongi va Yɨɨsʉ, pakʉta vavakonge aveene. 31Lɨno muveetsage miiho! Mukʉmbʉkage ʉkʉta kʉ myaka gɨdatu, ʉnsɨkɨ gwoni nandɨkagatalage ʉkʉmbʉnga mpamato mpamato ikulongwi tsa lʉgendo lwa mwene kʉnʉ ndilɨla.
32“Lɨno ndikʉvasumbatɨtsa mu vʉloleeli wa Ngʉlʉve na mu mamenyu ga lʉhʉngʉ lwa mwene ʉgwʉ ganya maka ga kʉvadʉlʉsa mu lwɨdɨko, nʉ kʉvapa ʉvʉhaale ʉwʉ avavɨɨkye ʉnyie paninie na vavalatse avange vooni. 33Ʉne nagwanoganogage indalama tsa muunu ʉvaveetsaga, evo ɨmisabwa gya mwene. 34Ʉnyie jyʉnyie mulʉmanyile ʉkʉta ndɨlɨkʉvomba ɨmbombo ni sivoko syango, pa kʉkava isiinu isyʉ ndyalondaga ʉne paninie ni syʉ vaalondaga avajyango. 35Mu gooni ʉgwʉ ndyavombaga, ndyavavoniaga ʉkʉta, kʉ nzɨla jya kʉvomba ɨmbombo kʉ lʉgimbo, tuweesa ʉkʉvatanga avagatsu. Ʉnsɨkɨ tuvomba ewo, tʉkʉmbʉkage ikulongwi tsa Ntwa ʉYɨɨsʉ itsiita, ‘Ʉkʉhʉmya nʉ kwʉpɨlɨla, kʉgatalʉsu ʉkʉhʉmya.’ ”
36ɄPaulo wʉ amalile ʉkʉtsova amamenyu ago, akasugama paninie navo vooni, akɨsaja kwa Ngʉlʉve. 37Pwʉ vooni vakalɨla, vakankumbata pa kɨpambaga wʉ vikʉndaga. 38Ɨlyavapelye vave nʉ lʉsʉsʉvalo siitso, lyʉ limenyu ɨlyʉ aatsovile ʉkʉta, navalambone ikange lʉsiku. Pwʉ vakanʼdomeeletsa, vakatsikʉnsikitsa kʉ meeli.
S'ha seleccionat:
Mbombo tsa Vapositili 20: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.