Yohana 15
15
ɄYɨɨsʉ vɨ mʼbɨkɨ gwa zabibu gwa jɨlweli
1ɄYɨɨsʉ akagendelela ʉkʉvamanyiisa akata, “Ʉne neene mʼbɨkɨ gwa zabibu gwa jɨlweli, ʉDaada vɨ ndɨmi. 2Ʉlʉsamba ʉlʉveetsaga ʉlʉlɨ mwane, ʉlwʉ naluhʉʉpa iseke, ʉDaada ikʉlʉhetsa. Apeene ʉlʉsamba ʉlʉveetsaga ʉluhʉʉpa iseke, ʉDaada ikʉlʉnotsa vʉnonu pakʉta lʉhʉʉpage siitso. 3Ʉnyie mumalile ʉkʉnotsiwa, kwʉ kʉta muvalatsiiwe, ʉlwakʉva mwɨdiike imanyiiso tsyango. 4Mugendelelage ʉkʉtaama mwane, pwʉ najyʉne ndigendelelaga ʉkʉtaama mu nʼgati mwanyie. Ndʉwʉ ʉlʉsamba nalʉkaweese ʉkʉhʉʉpa iseke lwene kɨtsila kʉtaama mu lizabibu, vʉvʉle vʉle najyʉnyie namukaweese ʉkʉvomba ʉvʉnogwe wa Ngʉlʉve kɨtsila kʉtaama mu nʼgati mwane.
5“Ʉne neene mʼbɨkɨ gwa zabibu, ʉnyie mulɨ samba. Ʉmuunu ʉlya ʉvɨ itaama mu nʼgati mwane, nʉʉne nditaama mu mwene, ʉjwa ihʉʉpaga iseke nyongosu. Ʉnyie mungaleke ʉkʉtaama mwane namukaweese ʉkʉvomba ɨkɨveetsaga. 6Ʉmuunu ʉvaveetsaga ʉvɨ nitaama mwane ahwaniine nʉ lʉsamba ʉlutaagwa nʉ kwʉma. Insamba itso tsʉ avaanu viholengʼania nʉ kʉlaha mu mwoto, tsipye tsikoboke. 7Ɨngave mutaama mwane na mamenyu gango gitaama mu nʼgati mwanyie, pwʉ munʼdoovage ʉDaada ɨkɨveetsaga ɨkyʉ munogwa, ʉmwene jiikʉvapa. 8Ʉkʉhʉmana nɨɨlyo, muvoniaga pavʉvalasu ʉwɨɨmɨkiwa wa Daada, wʉ muhʉʉpa iseke nyongosu, nʉ kʉva vakongi vango va jɨlweli. 9Ndʉwʉ ʉDaada anganile ʉne, wʉ jɨlɨwo najyʉne ndɨvaganile ʉnyie. Pwʉ mugendelelage ʉkʉtaama mu lʉgano lwango. 10Ɨngave mukonga ʉgwʉ ndikʉvalagɨla, pwʉ mugendelelaga ʉkʉtaama mu lʉgano lwango, ndʉwʉ najyʉne ndikonga itsʉ ʉDaada andagye nʉ kʉtaama mu lʉgano lwa mwene.
11“Ndɨvavʉʉlile aga pakʉta muve nʉ lʉhekelo ndʉwʉ ndihekela ʉne, ikange muhekelage siitso. 12Ʉlʉlagɨlo lwango lwʉ ʉlʉ, mugananage, ndʉwʉ ʉne ndɨvaganile ʉnyie. 13Ʉmuunu ʉvɨ ikɨhʉmya ʉwʉʉmi wa mwene avaswɨle avamanyaani va mwene, ivonia ʉkʉta alɨ nʉ lʉgano ʉlʉlʉti siitso. 14Ʉnyie mungavombage galya ʉgwʉ ndɨvalagye, mwiva vamanyaani vango. 15Ʉkʉtengʉlɨla lɨno nandikʉvɨɨlanga ʉnyie mulɨ vavanda vango. Nandikʉvɨɨlanga ewo ʉlwakʉva ʉmbanda nalʉmanyili itsʉ inogwa ʉkʉvomba ʉntwa va mwene. Lɨno ʉnyie ndikʉvɨɨlangaga vamanyaani vango, ʉlwakʉva ndɨvavʉʉlile galya gooni ʉgwʉ ʉDaada aambʉʉlile ʉne. 16Nakwʉ kʉta ʉnyie nyienye mwannyalile ʉne, apeene ʉne neene ndyavahalile ʉnyie muve vakongi vango. Ndyavahalile pakʉta mulʉtage kuhʉʉpa iseke#15:16 Mulʉtage kuhʉʉpa iseke Mu mamenyu aga ʉYɨɨsʉ itsova ikulongwi tsa vakongi va mwene ʉwʉ ikʉvasuungʼa kulʉmbɨlɨla ɨLivangɨli pakʉta avaanu vatsileke imbiivi tsa veene, vamwɨdɨkage ʉNgʉlʉve. Ihwanania ɨmbombo ɨjyo nʉ mʼbɨkɨ ʉguhʉʉpa iseke nyongosu. itsiivekwo sikutsooni, na pakʉta gooni ʉgwʉ mukʉnʼdoovaga ʉDaada mu litaawa lyango, ikʉvapeetsaga. 17Pwʉ lɨno ndikʉvalagɨla ʉnyie ndiita mugananage.
Avaanu va mu kɨlʉnga ɨkɨ vikʉvasʉʉla avɨɨdɨki va Yɨɨsʉ
18“Ɨngave avaanu ʉwʉ navikʉmwɨdɨka ʉNgʉlʉve vikʉvasʉʉla ʉnyie, mukʉmbʉkage ʉkʉta vatalile ʉkʉnsʉʉla ʉne. 19Mwale muve vaanu va kɨlʉnga ɨkɨ, pwʉ avo vakaale vikʉvagana ʉnyie ndʉwʉ vikʉvagana avaanu va lʉvasu lwa veene. Lɨno ʉnyie, ʉlwakʉva ndyavahalile ʉkʉhʉma mu kɨlʉnga ɨkɨ, namulɨ va kɨlʉnga ɨkɨ ikange. Ɨkyo kyʉ kikʉvapelela avaanu va kɨlʉnga ɨkɨ vavasʉʉlage ʉnyie. 20Mulekage ʉkʉsaamwa itsʉ ndyavavʉʉlile ʉkʉta, ‘Ʉmbanda niiva muunu mwɨmɨkiwa ʉkʉndʉtɨɨlɨla ʉntwa va mwene.’#Yohana 13:16 Lola, ɨngave vammelye ʉvʉkʉvɨlwa ʉne, najyʉnyie valavapelelaga ʉvʉkʉvɨlwa, ɨngave vikonga imanyiiso tsyango, valakongaga natsi tsyanyie. 21Lɨno valavavombelaga gooni ago ʉlwakʉva ʉnyie mulɨ vakongi vango, ikange ʉlwakʉva navammanyili ʉvɨ ansuungʼile ʉne. 22Ndɨkaale ndɨve nanditsili nʉ kʉtsova navo, pwʉ vakaale viiva vavʉla nongwa. Lɨno, navakaweese ʉkwɨtetela vateetsage vavʉla nongwa. 23Ʉmuunu ʉvaveetsaga ʉvɨ ansʉʉlile ʉne, ansʉʉlile najyʉ Daada. 24Ndɨvombile isidego isyʉ nagelili ʉkʉvomba ʉmuunu ʉjyʉnge. Jɨkaale jɨve navasiweeni, vakaale viiva vavʉla nongwa. Lɨno vasiweene syoni isyʉ ndɨvombile, paninie nɨɨlyo vapitsiige vansʉʉlile ʉne, ikange vansʉʉlile najyʉ Daada. 25Itsi tsyahʉmye ndavʉle pakʉta gavombeke amamenyu galya agaavɨgilwe mu Vʉvɨge ʉVʉvalatse wa veene ʉkʉta, ‘Vansʉʉlile ʉne pavʉvʉle.’#Zabuli 35:19; 69:4
26“Jʉndikʉnsuungʼa kwanyie ʉNtangɨli, ʉMepo ʉMbalatse, vɨ jiikʉvavoniaga avaanu vooni ʉwajɨlweli. Ihʉma kwa Daada, ikange wʉ asiike kwanyie jiikwoleletsaaga ʉwajɨlweli wango. 27Ikange najyʉnyie mukwoleletsaaga ikulongwi tsyango, ʉlwakʉva muvye paninie nʉʉne ʉkʉhʉma pa vʉtengʉlɨlo.”
S'ha seleccionat:
Yohana 15: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.