Yohana 3
3
ɄYɨɨsʉ itsova nʉ Nikodemu
1Lɨno aalekwo ʉFalisayo ʉmwɨmɨkiwa mpamato va mu kɨpʉga kya vavaha va kɨvʉmbʉkʉ kyoni kya Vayahudi, ɨlitaawa lya mwene aale vɨ Nikodemu. 2Ɨkɨgono kɨpamato pakɨlo, akalʉta kwa Yɨɨsʉ akambʉʉla akata, “Gwe Mmanyisi, tʉlʉmanyile ʉkʉta ʉve ʉlɨ mmanyisi, ʉsuungʼilwe nʉ Ngʉlʉve, ʉlwakʉva nakʉli ʉmuunu ʉviweesa ʉkʉvomba isimanyilo isi isyʉ vuvonia, ɨngave ʉNgʉlʉve nalɨ paninie nʉ mwene.” 3Ʉmwene ʉYɨɨsʉ akamwanda akata, “Jɨlweli ndikʉvavʉʉla ʉkʉta, nakʉli ʉmuunu ʉvaveetsaga ʉviweesa ʉkʉlʉmanya ʉLʉdeeva lwa Ngʉlʉve#3:3 ɄLʉdeeva lwa Ngʉlʉve Ɨmba ɨlimenyu Lʉdeeva lwa Ngʉlʉve kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ɨngave naholilwi ʉlwa vɨɨlɨ.”#3:3 Ɨngave naholilwi ʉlwa vɨɨlɨ Amamenyu aga kwʉ kʉta, ʉNgʉlʉve vɨ mwene ʉvɨ ikʉvapelela avaanu vave vaana va mwene jyʉmwene. Ʉvʉlʉvʉlʉ ʉvʉnge wa mamenyu aga wiita ʉkʉholwa ʉkʉhʉma kʉkyanya (Yohana 1:13). 4ɄNikodemu akambʉʉtsa ʉYɨɨsʉ akata, “Ndeeti, ʉmuunu ʉnʼgogolo iweesa ndeeti ʉkʉholwa ʉlwa vɨɨlɨ? Ndeeti, iweesa ʉkʉtsikwingila ikange mu litumbu lwa vanyina pakʉta aholwe ʉlwa vɨɨlɨ?” 5ɄYɨɨsʉ akamwanda akata, “Jɨlweli ndikʉkʉvʉʉla ʉkʉta, nakʉli ʉmuunu ʉvaveetsaga ʉviweesa ʉkwingila mu Lʉdeeva lwa Ngʉlʉve ɨngave naholilwi kʉ nzɨla jya magasi na kʉ maka ga Mepo ʉMbalatse. 6Avahotsi vihola avaana va veene kɨmmana, lɨno ʉMepo ʉMbalatse vɨ mwene ʉvɨ ikʉvahola vʉpya avaanu pakʉta vave nʉ wʉʉmi wa sikutsooni. 7Ʉleke ʉkʉdega aga ʉgwʉ ndɨkʉvʉʉlile ʉkʉta, wɨgane wa Ngʉlʉve muholwe ʉlwa vɨɨlɨ. 8Ʉnkuluguuto gukuluguuta gulotsa ʉkwʉ gunogwa. Vuweesa ʉkʉpʉlɨka ʉkʉkuluguuta kwa gwene, napeene nʉkalʉmanye ʉkwonu ʉkwʉ gwihʉma pange ʉkwʉ gulotsa. Itsi wʉ tsilɨwo nakʉ kʉ muunu ʉvaveetsaga ʉvɨ aholilwe nʉ Mepo ʉMbalatse.”
9ɄNikodemu akambʉʉtsa ʉYɨɨsʉ akata, “Lɨno, isiinu isi sivombekaga ndeeti?” 10ɄYɨɨsʉ akamwanda akata, “Ʉve ʉlɨ mmanyisi mwɨmɨkiwa va vaanu va kɨlʉnga kya Isilahɨli, ndeeti nʉgamanyili gooni aga? 11Jɨlweli ndikʉkʉvʉʉla ʉkʉta, ʉwe tʉgamanyile galya ʉgwʉ twitsova, ikange tukwolela galya ʉgwʉ tʉgaweene, lɨno ʉnyie namukwɨdɨka ago. 12Ndɨngave ndɨvavʉʉlile itsa mu kɨlʉnga ɨkɨ, ʉnyie namunnyɨdiiki, pwʉ muweesa ndeeti ʉkʉnnyɨdɨka, ɨngave ndikʉvavʉʉla itsa kʉkyanya? 13Nakʉli ʉmuunu ʉvaveetsaga ʉvɨ agelile ʉkʉbɨha kʉkyanya nʉ kʉkilivuka. Apeene ʉne ndɨ Mwana va Muunu neene ndiikile ʉkʉhʉma kʉkyanya.
14“Lola, aVaisilahɨli wʉ valɨ mu lʉkɨnga, ʉMoose aahʉʉsiitse ɨkɨhwani kya nzoka jya kyʉma,#3:14 Nzoka jya kyʉma ɄMoose aavombile ndavʉle, pakʉta ʉNgʉlʉve avapoke aVaisilahɨli ʉkʉhʉma mu mbiivi tsa veene (Mbalɨlo 21:4-6). pakʉta ʉNgʉlʉve avapoke avikʉjɨlola. Vʉvʉle vʉle najyʉne ndɨ Mwana va Muunu, wɨgane wa Ngʉlʉve, ndɨhʉʉswe nʉ kʉpagɨkwa, 15pakʉta ndɨmpe ʉwʉʉmi wa sikutsooni ʉmuunu ʉvaveetsaga ʉvɨ ikʉnnyɨdɨka.”
16Lola, ʉNgʉlʉve aavaganile siitso avaanu vooni va mu kɨlʉnga ʉmʉ. Ʉkʉkongana nɨɨlyo, aansuungʼile ʉMwana va mwene ʉlʉdɨɨga, iitse, aswe pa kʉvapoka avatulanongwa va mu kɨlʉnga ʉmʉ, pakʉta ʉmuunu ʉvaveetsaga ʉvɨ ikʉmwɨdɨka aleke ʉkʉjaga, apeene akave ʉwʉʉmi wa sikutsooni. 17ɄNgʉlʉve naansuungʼe ʉMwana va mwene mu kɨlʉnga pakʉta avahɨge avaanu, apeene aansuungʼile pakʉta avapoke.
18ɄNgʉlʉve nikʉmmɨga ʉmuunu ʉvɨ ikʉmwɨdɨka ʉMwana lʉdɨɨga va mwene ʉNgʉlʉve. Lɨno, ʉlya ʉvɨ nikʉmwɨdɨka amalile ʉkʉhɨgwa, ʉlwakʉva nikʉmwɨdɨka ʉjwa. 19Ʉvʉhɨgi wʉ ʉvʉ, ʉlʉmuli lwitsile mu kɨlʉnga ʉmʉ, lɨno avaanu vongosu vinogwa ʉkʉva mu ngʼiisi, navinogwa ʉkʉva mu lʉmuli. Vivomba ewo ʉlwakʉva imbombo tsa veene mbiivi.#3:19 Ʉlʉmuli nɨ ngʼiisi isitsowa apa kwʉ kʉta ʉlʉmuli vɨ Yɨɨsʉ, ɨngʼiisi tsʉ mbombo imbiivi itsʉ vinogwa avaanu ʉkʉvomba. 20Avaanu vooni avivomba galya agatava manonu, vikʉlʉsʉʉla ʉlʉmuli ʉlwa. Ikange navinogwa ʉkʉbɨha mu lʉmuli. Vivomba ewo pakʉta imbiivi tsa veene tsileke ʉkʉvoneka. 21Lɨno avaanu vooni avilonda siitso ʉkʉvomba ʉwajɨlweli vilʉta pa lʉmuli ʉlwa, pakʉta imbombo tsa veene tsive pavʉvalasu, tsimanyikike ʉkʉta ʉNgʉlʉve vɨ ikʉvapa amaka ga kʉvomba itso.
ɄYohana ʉMwotsi ikwoleletsa ikange ikulongwi tsa Yɨɨsʉ
22Ʉnsɨkɨ wʉ gʉlʉtɨngʼiinie, ʉYɨɨsʉ na vakongi va mwene vakalʉta mu kɨlʉnga kya Yuuda. Akatsilɨnda navo ʉkwa, alɨkʉvootsa avaanu. 23Mu nsɨkɨ ʉgwa, namwene ʉYohana aavootsaaga avaanu kʉ Ainoni, pawiipi nʉ vʉtsenge wa Salimu, manya ʉkwa gaalekwo amagasi mongosu. Avaanu vongosu valɨkʉlʉta kʉ mwene pakʉta avootse. 24ɄYohana ʉMwotsi aavombaga ɨmbombo ɨjyo, wʉ ʉHelode akaanale ʉkʉmwibata nʉ kʉnʼdɨndɨla mu kɨkʉngwa.
25Ɨkɨgono kɨpamato, avakongi vaninie va Yohana vakatengʉla ʉkʉkaningʼana nʉ Nʼyahudi mpamato, pa kulongwi jya nyiiho tsa veene tsa kwɨvalatsa. 26Pwʉ vakalʉta kwa Yohana, vakambʉʉla vakata, “Gwe Mmanyisi, ʉmuunu ʉvɨ ʉkaale nave kʉ mwambo jɨlya jya lʉgasi lwa Yolodani, ʉvɨ ʉkooleletsaaga ikulongwi tsa mwene, namwene ikwotsa avaanu. Ikange avaanu vongosu vilʉta kʉ mwene ʉkʉlʉtɨɨlɨla kwave!”
27ɄYohana akavaanda akata, “Ʉmuunu nakaweese ʉkʉva nakyo ɨkɨɨnu ɨkɨveetsaga, ɨngave ʉNgʉlʉve nampiili. 28Ʉnyie mulɨ vooleletsi vango, kʉ galya ʉgwʉ ndɨkatsovaga ʉkʉta, ‘Ʉne naneene Mesiya, apeene ʉNgʉlʉve ansuungʼile ʉne pakʉta ndɨlongole pavʉlongolo pa mwene ʉMesiya.’ 29Ʉmmɨnza ʉvɨ itegʉlwa pannogye ʉkʉvʉʉka alʉtage kʉ nʼgoosi ʉvɨ ikʉntegʉla. Ʉne ndɨlɨ ndʉ mmanyaani va ntegʉlanʼdala, ndyɨmile pa lʉkanzi pa mwene ʉntegʉlanʼdala. Ʉne ndihekela wʉ ndipʉlɨka ɨlimenyu lya mwene. Jɨlweli ɨkɨ kyʉ kɨɨnu ɨkɨnnyowiise siitso. 30Lɨno, pwʉ wɨgane wa Ngʉlʉve ʉwɨɨmɨkiwa wa Yɨɨsʉ woongelelage wʉ kʉnʉ ʉwɨɨmɨkiwa waane vukwika paasi.”
Ʉvɨ ahʉmile kʉkyanya vɨ ndʉti
31Ʉlya ʉvɨ ahʉmile kʉkyanya kwa Ngʉlʉve alɨ nʉ vʉtavʉlɨlwa ʉkʉlʉtɨɨlɨla avaanu vooni. Ʉmuunu ʉjyʉnge ʉvaveetsaga, va mu kɨlʉnga ʉmʉ, itsova tsyene ikulongwi tsa mu kɨlʉnga ʉmʉ. Kwʉ kʉta ʉvɨ ahʉmile kʉkyanya alɨ nʉ vʉtavʉlɨlwa ʉkʉlʉtɨɨlɨla avaanu vooni. 32ɄYɨɨsʉ ʉjwa ikwoleletsa ikulongwi tsa galya ʉgwʉ agaweene ikange agapʉliike ʉkʉhʉma kwa Ngʉlʉve. Lɨno, avaanu vadebe vʉvʉle ʉwʉ vikwɨdɨka ʉkʉta galya ʉgwʉ ikwoleletsa ga jɨlweli. 33Ʉmuunu ʉvaveetsaga ʉvɨ ikwɨdɨka ʉwooleletsi wa Yɨɨsʉ, ivonia pavʉvalasu ʉkʉta ʉNgʉlʉve va jɨlweli, 34manya ʉNgʉlʉve ansuungʼile ʉYɨɨsʉ agatsove amamenyu ga mwene ʉNgʉlʉve. ɄNgʉlʉve ampye ʉYɨɨsʉ ʉMepo ʉMbalatse kɨtsila kɨgelelo. 35ɄDaada ʉNgʉlʉve anʼganile ʉMwana va mwene, ikange ampye amaka ga kʉlongotsa isiinu syoni. 36Ʉmuunu ʉvɨ ikʉmwɨdɨka ʉMwana va Ngʉlʉve, alɨ nʉ wʉʉmi wa sikutsooni. Lɨno ʉmuunu ʉvɨ ikʉmʼbeela, nalakave ʉwʉʉmi wa sikutsooni, ʉlwakʉva ʉNgʉlʉve igendelelaga ʉkʉmbiipila ʉmuunu ʉjwa sikutsooni.
S'ha seleccionat:
Yohana 3: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.