Luuka 21
21
Isyavʉpe sya nʼdala ʉnswɨle
(Maliko 12:41-44)
1ɄYɨɨsʉ wʉ apitsiige mu tembile, akalola avamosu vongosu wʉ vilaha isyavʉpe sya veene mu kɨkongʼolo kya kʉlahɨla. 2Ikange akambona nʉ nʼdala ʉnswɨle mpamato ʉnʼgatsu ilaha mulya ʉtʉhela tʉvɨlɨ.#21:2 Ʉtʉhela tʉvɨlɨ Itsi tsyale ndalama ndebe siitso ʉkʉlʉtɨɨlɨla indalama tsyoni tsa misɨkɨ ɨgyo. 3Pwʉ, ʉYɨɨsʉ akata, “Jɨlweli ndikʉvavʉʉla, ʉnʼdala ʉjʉ ʉnswɨle ikange ʉnʼgatsu, alahile syongosu, avalʉtɨɨlye avange vooni, 4manya avange vooni valahile mu kɨkongʼolo isiinu isyʉ nyongeletsa pa vʉmosu wa veene. Lɨno, ʉnswɨle ʉjʉ mu vʉgatsu wa mwene, alahile syoni isyʉ sikaale sya kʉntanga mu wʉʉmi wa mwene!”
ɄYɨɨsʉ itsova ʉkʉmamulwa kwa tembile
(Mataayo 24:1-2; Maliko 13:1-2)
5Vaninie mu vakongi va Yɨɨsʉ, pɨlɨvatsova ikulongwi tsa tembile ʉmwʉ jɨdingʼuliilwe na maganga amanonu, paninie ni siinu sya lʉtogo isyʉ avaanu vaalahile kwa Ngʉlʉve. Pwʉ ʉYɨɨsʉ akata, 6“Ago gooni ʉgwʉ mukʉgavona lɨno, siliitsa isigono nalɨlasigale nalɨ liganga ɨlyʉ lɨlaava pakyanya pa lɨnge, ʉlwakʉva gooni galamamulwa!”
Ʉvʉkʉvɨlwa ʉvʉlahʉmɨla mu sigono sya kʉ vʉsililo
(Mataayo 24:3-14; Maliko 13:1-13)
7Avaanu valya vakambʉʉtsa vakata, “Mmanyisi, ago ʉgwʉ ʉtsovile galahʉmɨla ndali? Ikange kɨmanyilo kɨki ɨkɨlatʉvonia ʉkʉta gahegelye ʉkʉvombeka?” 8Akavavʉʉla akata, “Mutaamage miiho, aleke ʉmuunu ʉvaveetsaga ʉkʉvasyova! Lola, valiitsaga avaanu vongosu nʉ kwɨvɨɨka neene, valateetsaga, ‘Ʉne neene Kɨlɨsiti!’ Ikange, valateetsaga, ‘Ʉnsɨkɨ gʉlɨ piipi!’ Avaanu avo, mwɨlekelwe ʉkʉvakonga! 9Ʉnyie mulapʉlɨkaga ikulongwi tsa magoha ni vuguuvugu tsa magoha. Mwitse mwɨlekelwe ʉkʉdwada ʉlwakʉva ago wɨgane wa Ngʉlʉve giitse gahʉmɨle taasi, wʉ ʉvʉsililo wa kɨlʉnga vʉpitsiige vʉkaanale ʉkwitsa.”
10ɄYɨɨsʉ akagendelela ʉkʉtsova akata, “Avaanu va kɨvʉmbʉkʉ kɨpamato valalwitsaga na vaanu va kɨvʉmbʉkʉ ɨkɨnge, nʉ lʉdeeva lʉlalwitsaga nʉ lʉdeeva ʉlʉnge. 11Kʉnʉ na kʉnʉ kʉlaavepwo isilindima isivaha, ɨnzala, nʉ vʉtamu ʉvukwambʉkɨla. Ikange, kʉkyanya kʉlaavepwo isiinu sya kʉdwatsa ni sidego isivaha.
12“Ago gooni wʉ gakaanale ʉkʉhʉmɨla, avaanu valaviibata ʉnyie nʉ kʉvapelela ʉvʉkʉvɨlwa. Valavahɨlɨka kuhɨgwa mu masinagogi, nʉ kʉvakʉnga mu kɨkʉngwa. Ikange mulahɨlɨkwa pa vakʉlʉdeeva na pa vatwa pakʉta muhɨgwe, ʉlwakʉva ʉnyie mulɨ vakongi vango. 13Kwanyie ʉnyie ʉgwa gʉlaava gwʉ nsɨkɨ gwa kʉvavonia aveene ʉlwɨdɨko lwinyo. 14Lɨno, mu numbula tsiinyo mwitse mulekage ʉkwɨsaavʉla amamenyu ʉgwʉ mulatsovaga pa kwɨpoka wʉ muhɨgwa, 15manya ʉne ndɨlavapa ʉlʉhala na mamenyu ʉgwʉ mulatsovaga, ʉkʉsika avalʉgʉ viinyo vilemwa ʉkʉbɨɨgana nago, ndakʉve kʉgasiga.
16“Ikange, naveene avahotsi viinyo, avalʉkololwinyo, avaanu va mu nyumba tsiinyo na vamanyaani viinyo valavahendamaga. Ikange avange pagati paanyie valabudwa. 17Avaanu vooni, valavasʉʉlaga ʉlwakʉva mukʉngʼonga ʉne. 18Napeene, nalʉlajage nalʉ lʉjwɨlɨ lʉpamato mu mitwe giinyo!#21:18 Nalʉlajage nalʉ lʉjwɨlɨ lʉpamato mu mitwe giinyo Ɨkɨ kɨtsovo ɨkyʉ ʉYɨɨsʉ aatsovile kʉ vakongi va mwene ʉkʉta, ʉvʉkʉvɨlwa ʉwʉ avakongi valaagana nawo navʉlananganie napadebe ʉvʉtaamo wa veene nʉ Ngʉlʉve. 19Nʉʉnyie mungave mukɨjʉmɨɨlɨtsa, apo mulʉʉpɨlɨla ʉwʉʉmi va sikutsooni.
ɄYɨɨsʉ itsova ʉkʉmamuka ʉvʉtsenge wa Yelusalemu
(Mataayo 24:15-21; Maliko 13:14-19)
20“Ʉnsɨkɨ wʉ mwivona ʉvʉtsenge wa Yelusalemu vʉniengetilwe na vatengaligoha, mulʉmanye ʉkʉta ʉnsɨkɨ gwa kʉmamulwa ʉvʉtsenge ʉwa gʉlɨ piipi. 21Pwʉ avaanu vooni ʉwʉ vitaama mu kɨlʉnga ɨkya Yuuda, viitse vakɨmbɨlɨlage kʉ sidugala. Ʉwʉ valɨ mu vʉtsenge wa Yelusalemu, vahʉme vanyile, nʉ wʉ valɨ mu silɨmɨla, valeke ʉkʉkilivuka mu vʉtsenge. 22Lola, isigono isyo silaava sya vʉkʉvɨlwa, pakʉta amamenyu gooni ʉgwʉ gaavɨgilwe mu Vʉvɨge ʉVʉvalatse gavombeke. 23Vasue vʉvʉle avadala ʉwʉ valaava nʉ vʉtsito nʉ wʉ valoosaaga#21:23 Vasue vʉvʉle avadala ʉwʉ valaava nʉ vʉtsito nʉ wʉ valoosaaga kwʉ kʉta jɨlaava kʉtalamu kʉ veene ʉkʉnyila ʉvʉkʉvɨlwa ʉvʉlʉti ʉvʉliitsa pakʉta vɨɨpoke. Lola, avange valoosaaga avaana na vange valaava nʉ vʉtsito. mu sigono isyo, manya kʉlaava nʉ vʉpala ʉvʉlɨ pongosu mu kɨlʉnga, nʉ lʉviipo lwa Ngʉlʉve lʉlaviitsila avaanu va kɨvʉmbʉkʉ ɨkɨ. 24Avaanu avange, valabudwagwa ni panga, avange valahɨlɨkwa kwiva vavanda mu silʉnga isinge. Avaanu avatava Vayahudi, valiitsaga kulongotsa ʉvʉtsenge wa Yelusalemu, ʉkʉsika isigono sya veene sya kʉlongotsa silaava sisila.
Ʉkwitsa kwa Mwana va Muunu
(Mataayo 24:29-31; Maliko 13:24-27)
25“Silavoneka isidego mu litsʉva, mu mwetsi na mu nondwe. Na mu kɨlʉnga ʉmʉ inyanza tsilaava na majɨga mavaha aganya lwʉjɨɨlo. Ɨlyo lɨlapela avaanu va sivʉmbʉkʉ syoni, kʉjage kʉleke nʉ kʉva nʉ lʉdwado. 26Ago gooni, galaava gikwitsa mu kɨlʉnga, avaanu valajeetanika kʉ lʉdwado. Valasaagaga ʉkʉta lukʉvavonaga ʉlʉvʉngʉ ʉlʉlʉti, ʉlwakʉva, ʉNgʉlʉve alajʉtsaania amaka ga kʉkyanya.
27“Pwʉ ʉMwana va Muunu alavoneka ikwitsa mu mavɨngo na maka nʉ wɨɨmɨkiwa ʉvʉlʉti. 28Ago gooni, galaava gitengʉla ʉkʉvombeka, ʉnyie mwitse muveetsage nʉ lʉhʉʉvɨlo nʉ lʉhekelo, ʉlwakʉva ago givonia ʉkʉta ʉNgʉlʉve ahegelye kukʉvapoka!”
Ɨkɨhwananitso kya mʼbɨkɨ gwa makʉjʉ
(Mataayo 24:32-35; Maliko 13:28-31)
29Pwʉ ʉYɨɨsʉ akavavʉʉla avakongi va mwene ɨkɨhwananitso akata, “Loli ʉmʼbɨkɨ gwa makʉjʉ nɨ mibɨkɨ ɨgɨnge gyoni. 30Ʉnsɨkɨ wʉ mwivona ɨmibɨkɨ gɨtengwe ʉkʉlemba, mukʉlʉmanya ʉkʉta ɨkɨsuku kɨhegelye.
31“Najyʉnyie vʉvʉle vʉle, mulaava mukʉtsivona itso tsivombeka, mwitse mulʉmanyilage ngʼaani ʉkʉta ʉLʉdeeva lwa Ngʉlʉve lʉhegelye. 32Tsa jɨlweli ndikʉvavʉʉla ndiita, ɨkɨvʉmbʉkʉ ɨkɨ nakɨkalʉtɨngʼanie wʉ aga gooni nagavombiiki. 33Ʉvʉtandaatse nɨ kɨlʉnga silajaga, apeene amamenyu gango nagalajage lʉsiku.
Ʉkwɨsaavʉla wʉ nakɨsiiki ɨkɨgono kya vʉsililo
34“Mutaamage miiho, pakʉta inumbula tsiinyo tsileke ʉkʉdʉlaniwa nʉ vʉnogwe ʉvʉviivi, nʉ vʉgaatsi, nʉ vʉgatatsiwa wa kɨlʉnga ɨkɨ, pakʉta ɨkɨgono ɨkyo ɨkya kʉ vʉsililo kɨgela kikʉviitsila ʉnyie wʉ namwɨsaawili. 35Lola, ɨkɨgono ɨkyo kɨlavangalagania avaanu vooni mu kɨlʉnga kyoni. 36Lɨno, mutaamage miiho ʉnsɨkɨ gwoni. Munʼdoovage ʉNgʉlʉve avapeetsage amaka mulese gooni ʉgwʉ jʉgihʉmɨla, pakʉta munogele ʉkwɨma pavʉlongolo pa Mwana va Muunu.”
37Mu sigono isyo, pamuunyi, ʉYɨɨsʉ aamanyiisaaga avaanu mu lʉvɨgo lwa tembile. Pakɨlo, aalʉtaga kwigona kʉ kɨdugala ɨkya Mizeituni. 38Ɨkɨgono nɨ kɨgono, avaanu vooni vaalaavaga kʉ tembile, pakʉta vampʉlɨhɨtse.
S'ha seleccionat:
Luuka 21: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.