Valooma Ikulongwi itsilongola
Ikulongwi itsilongola
Jivoneka ʉkʉta ɨkalata jya Valooma jyavɨgilwe nʉ mpositili ʉPaulo mu mwaka inninie mu myaka ɨgya sitsigo sihaano na gɨnni (54) ʉkʉsika kʉ sitsigo sihaano na nnaana (58) Waholilwe ʉYɨɨsʉ Kɨlɨsiti. Aavɨgile ɨkalata ɨjɨ wʉ alɨ mu vʉtsenge wa Kolinto ʉkwʉ aataamaga ʉnsɨkɨ ʉgwa. Ʉvʉsumbe wa Paulo wa kʉvɨga ɨkalata ɨjɨ waale wa kʉvatanga aVayahudi na vatava Vayahudi vamwɨdɨke nʉ kʉnkonga ʉYɨɨsʉ Kɨlɨsiti (16:26).
Ɨkalata jya Valooma jɨlɨ ni manyiiso itsilɨ peene kʉ Vakɨlɨsiti vooni na va misɨkɨ gyoni. Imanyiiso itso natsilɨ mu sitabu isinge sya katale sya Vʉvɨge ʉVʉvalatse, apeene tsivoneka muumu mwene. Ʉwajɨlweli ʉwa vuvonekela ʉmwʉ ʉPaulo iganulila vʉnonu ikulongwi tsa vʉpoki ʉwʉ tuweesa ʉkʉkava ʉkʉgendela mwa Yɨɨsʉ Kɨlɨsiti. Ɨkɨɨnu ɨkɨnge ɨkivoneka mu kalata ɨjɨ kyʉ kɨlya ɨkyʉ ʉPaulo ibadɨngʼania paninie ɨLivangɨli lya Yɨɨsʉ Kɨlɨsiti ni kulongwi tsa Lwɨdɨngʼano ʉLʉlaala.
Avɨmbi vongosu vikwɨdɨka ʉkʉta ʉvʉsumbe ʉvʉvaha wa mbɨgi va kalata ɨjɨ vʉlɨ mu lʉkɨndɨ ʉlwita, “ƗLivangɨli ɨlyo gwʉ maka ga Ngʉlʉve ga kʉvapoka avaanu vooni avikʉmwɨdɨka ʉYɨɨsʉ, ʉkʉtengʉlɨla kʉ Vayahudi ʉkʉsika kʉ vaanu avatava Vayahudi. Apo ʉne nandivona soni napadebe ʉkʉlɨpʉlɨsa.” (1:16)
S'ha seleccionat:
Valooma Ikulongwi itsilongola: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.