Lʉʉka 13
13
Mʉlataghe inyɨvi mʉleke kutipulua
1Ʉnsiki ʉghuo, avaanhu vamonga vano vakampʉlɨkɨsyagha ʉYesu, vakamʼbʉʉla kuuti, ʉPilato alyavabudile aVagalilaya vamonga, ye vihʉmia ɨlɨtekelo lyave kwa Ngʉlʉve. 2ɄYesu akavamʉla akati, “Asi, pano musaagha ʉmue, mwiti aVagalilaya avuo valyavombilue ʉluo, ʉlwakʉva valyale vahosi kukila aVagalilaya avange vooni? 3Jeeje! Mʉngaleke kulaata inyɨvi siinu, na jʉmue mweni mutipulua! 4Voope avange kɨjigho na lekelakwoni kʉ Siloamu, vano ʉlʉvʉmba ʉlʉtali lʉlyavaghwɨliile, vakafua, mwiti aveene valyale vahosi kukila avange vooni, vano vakikalagha mʉ Yelusalemu? 5Jeeje! Mʉngaleke kulaata inyɨvi siinu, na jʉmue mweni mutipulua!”
Ʉlʉpavɨlo vwɨmɨla kukoma ifipeke
6Apuo ʉYesu, pe akavavʉʉla avaanhu avuo ɨkɨhwanɨkɨsio ɨkɨngɨ akati, “Kwealyale ʉmuunhu jʉmonga, jʉno alyavyalile ʉmpiki ʉntini, mʉ mʉghʉnda ghwake ʉghwa sabibu. Pambele akalʉta kudonola itini, neke naakakyagha nambe kɨmonga. 7Pepano akamʼbʉʉla ʉmʼbombi ghwake ʉghwa mʉghʉnda akati, ‘Lolagha, mʉ maaka ghatatu nisile kudonola ifipeke mʉ mpiki ʉghʉ, neke nanɨkyaghile kɨmonga! Lɨno, dumula, ʉlwakʉva ghunangania ʉmʉghʉnda vʉvʉle!’
8“Neke ʉmʼbomba mbombo jʉla, akamwamʉla akati, ‘Ghwe mʼbaha ghwango, ghʉleke ʉmwaka ʉghʉ, nipilile na kuvɨɨka ɨbʉʉle, 9ghʉngakome ifipeke kʉ mwaka, luuva lʉnofu! Neke ghʉngaleke kukoma, apuo ʉdumulaghe.’ ”
ɄYesu ɨkʉnsosia ʉmʉkɨjʉʉva pa kɨghono ɨkya Sabati
10Ɨkɨghono kɨmonga ɨkya Sabati, ʉYesu alyale ivʉlanɨsia avaanhu, mʉ sinagogi jɨmonga. 11Mʉ sinagogi mula, mwealyale ʉmʉkɨjʉʉva jʉmonga, jʉno alyale nɨ lɨpepo lɨno lɨlyamʼbɨkile kuuva mʼbotevote, amaaka kɨjigho na lekelakwoni. Ʉmʉkɨjʉʉva jʉla alyagondile ʉnsana, neke akakunwagha kugholoka.
12ɄYesu ye amwaghile, akankemeela iise pa mwene. Pe akamʼbʉʉla akati, “Mama, ʉsokile ɨnhamu jaako, lɨno ʉlɨ mwavʉke!” 13ɄYesu akavɨɨka amavoko ghaake pa mʉkɨjʉʉva jʉla, pala pala ʉmama jʉla akɨɨma agholwike ʉnsana ghwake, akatengʉla kʉkʉmʉghinia ʉNgʉlʉve.
14Pepano ʉmʼbaha ghwa sinagogi akakalala, ʉlwakʉva ʉYesu ansosisie ʉmuunhu jʉla mʉ kɨghono ɨkya Sabati. Ʉmʼbaha jʉla akavavʉʉla avaanhu akati, “Ʉmʉlʉngʉ ghwoni ghʉlɨ ni fighono ntanda ifya kʉvomba ɨmbombo. Mʉnoghiile kukwisa na kusosivua mʉ fighono ifio, jeeje pa kɨghono ɨkya Sabati!”
15ɄMʉtwa akamwamʉla akati, “Mwe vakedʉsi ʉmue! Ʉmue namudindulila mʉ lʉvagha ingʼombe nasi dogovi siinu, na kʉkʉsitwala kunywelesia pa kɨghono ɨkya Sabati? 16Neke ndaani ʉmʉkɨjʉʉva ʉjʉ, ʉghwa kɨkolo kya Abulahamu, jʉno amaaka kɨjigho na lekelakwoni alɨ mʉ vʉkamɨngʼhanɨlua vwa Setano, naanoghiile kukwavʉka mʉ kɨghono ɨkya Sabati?”
17ɄYesu ye ajovile isio, avalʉgʉ vaake vooni, vakavona soni. Neke avange vooni valyahovwike fiijo, vwɨmɨla imbombo inofu isa kʉdegha, sino ʉYesu akava ivomba.
Ɨkɨhwanɨkɨsio ɨkya mbeju ɨndebe fiijo, nɨ kɨhwanɨkɨsio ɨkya kɨlʉle
(Mataayi 13:31-33; Malɨka 4:30-32)
18Pepano ʉYesu akaposia, “ɄVʉtwa vwa Ngʉlʉve vʉhwaniine nɨ kɨki? Nɨhwananie nɨ kɨki? 19Vʉhwaniine nɨ mbeju ɨndebe fiijo,#13:19 Mbeju ɨndebe fiijo: Mʉ Kɨyunaani lɨlembilue, ɨmbeju ja haladali. Kʉ Vayahudi ɨmbeju ɨjio jaale je mbeju ɨndebe kukila sooni. jɨno ʉmuunhu alyavyalile mʉ mʉghʉnda ghwake. Ɨmbeju jɨkamela, ghʉkava mpiki, nasi njuni sikatenga ifivwasu mʉ nhaafi saake.”
20ɄYesu akaposia kange akati, “Nɨhwananɨsie nɨ kɨki, ʉVʉtwa vwa Ngʉlʉve? 21Vʉhwaniine nɨ kɨlʉle kɨno ʉmʉkɨjʉʉva jʉmonga alyatolile, akakandɨla ɨlɨkandua amateneka ghatatu gha vʉtine. Ye akandile, ɨkɨlʉle kɨla kɨkalʉsia ɨlɨkandua lyoni.”
Avahosi navikwʉpɨlua mʉ Vʉtwa vwa Ngʉlʉve
(Mataayi 7:13-14, 21-23)
22ɄYesu alyale ilʉta kʉ Yelusalemu. Neke mʉ makaaja amavaha na madebe muno akava ikila, akavʉlanɨsyagha avaanhu. 23Ɨkɨghono kɨmonga, ʉmuunhu jʉmonga akamposia akati, “Ghwe Ntwa, avaanhu vano ʉNgʉlʉve ilikʉvapoka viliiva vadebe?”
ɄYesu akamwamʉla akati, 24“Kukwingila mʉ Vʉtwa vwa Ngʉlʉve, lʉlɨ ndavʉle kukwingila pa mʉlyango ʉmfinye. Kyangʼhaani nɨkʉvavʉʉla niiti, vinga vililonda kukwingila, neke vilikunua. Lɨno, ʉmue mʉghimbaghe kukwingila ʉmuo! 25Ʉnsiki ghukwisa, pano ʉnya nyumba ilidinda ʉmʉlyango, neke mulikwɨma panji, mutengʉla kuhodesia na kʉkʉnsʉʉma mutisagha, ‘Ghwe ntwa, tʉdindulile!’ Neke ʉmwene ilikʉvamʉla iiti, ‘Nanɨvamanyile kange nanɨkagwile na kʉno mʉhʉmile!’
26“Na jʉmue mutisagha, ‘Ʉsue twesue twalisagha na kunyua palɨkɨmo nuuve! Kange, ʉve ghwatʉvʉlanɨsyagha mʉ fikaaja fiitu!’ 27Neke ʉmwene iliiti, ‘Nɨvavʉlile kuuti, nanɨvamanyile kange nanɨkagwile kʉno muhʉma! Vʉʉka palyʉne, ʉmue mwe vahosi!’
28“Mulikʉmwagha ʉAbulahamu, ʉIsaka, ʉYakovo na vavɨli vooni valɨ mʉ Vʉtwa vwa Ngʉlʉve. Looli ʉmue muuva mʉtaghilue kʉnji. Ʉkuo kwe mulɨlagha na kugwegwenʉla amiino! 29Kange, avaanhu kuhʉma imbale sooni isa ɨɨsi vilikwisa, vilisagha palɨkɨmo mʉ Vʉtwa vwa Ngʉlʉve.
30“Mʉpʉlɨkɨsyaghe! Avaanhu vano va vʉsililo lɨno, valaava va kwanda; ava kwanda lɨno, valaava va vʉsililo.”
ɄYesu isukunala vwɨmɨla avaanhu ava mʉ Yelusalemu
(Mataayi 23:37-39)
31Ʉnsiki ghʉghuo, aVafalisayi vamonga vakalʉta kwa Yesu, vakamʼbʉʉla vakati, “Vʉʉka apa, ʉlʉtaghe kʉ makaaja aghange, ʉlwakʉva ʉHelode ilonda pikʉkʉbuda.” 32ɄYesu akavamʉla akati, “Mʉlʉtaghe mʉjɨvʉʉle ɨngʼheve jɨla kuuti, ‘Lolagha, ʉmʉsyʉghʉ na pakɨlaavo, nidaga amapepo na kusosia avatamu, neke ɨkɨghono ɨkya vʉtatu, nimala ʉvʉfumbue vwango.#13:32 Ʉvʉfumbue vwango: Ʉmʉlʉvo ghwake ʉghʉnge kwekʉti, nimala ɨmbombo jango. 33Ʉne nilʉta kʉ Yelusalemu ndalʉve ndaani ʉmpaka nɨfike, niiva mʉ lʉghendo ʉmʉsyʉghʉ na pakɨlaavo, neke pakɨlaavo kɨla nifika. Ʉlwakʉva nalʉnoghiile ʉmʼbɨli kufwɨla pavʉnge, looli kʉ Yelusalemu!’
34“Ghwe Yelusalemu, Yelusalemu! Ghubuda avavɨli na vaanhu vano visungʼhua kʉlyʉve, ʉkʉvatova na mavue. Kekinga nɨlondile kʉkʉvakongʼhania avaanhu vaako, ndavʉle ɨngʼhʉkʉ vʉle jikongʼhania ifyanaake mʉ mapɨga ghaake, neke namukʉnda. 35Lolagha, ʉNgʉlʉve ɨkʉjɨleka ɨnyumba jiinu kuuva mahaame! Kyangʼhaani nɨkʉvavʉʉla kuuti, kutengʉlɨla lɨno namʉnganyaaghe kange, kuhanga ʉnsiki pano muliiti, ‘Afunyilue jʉno ikwisa mʉ lɨtavua lya Mʉtwa ʉNgʉlʉve.’#Sabuli 118:26 ”
S'ha seleccionat:
Lʉʉka 13: wbi
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.