Matew 27
27
Pê Juta amji cura
Matew 27.3-10
3Pê Juta Carijot xwỳ ata te Jeju curê xwỳn catêjê mã hahkre. Mã cute ihkên mã me mẽn. Mã cute nee me curê xwỳn pê amji pytàr nare na hahkre pej, me ajkaam amji mã:
— An! Wa ite to ihcupan crire nare! Ne ite ijõ Pahhiti kên mã mẽn. Ne quê ha ihtỳj xãmte mehcura! Wa ha tẽ ne intête mehcahpêrta — hajỹr. Ne cute ihpore hy te trĩnta atajê pyr, ne ma hacpỹ mã Pahpãm to amji kam me hapac xà jũrkwa wỳr, cute Pahpãm mã mehcajrẽn catêjê jõ pahhi me, prohti kam wỳr to tẽ. 4Ne curi to cator ne me cumã:
— Pom ite me amã ihpore hy te trĩnta na ijõ Pahhi kên nare ata jõr ita. Nãmhã he, mĩ! Hacpỹa mã me apy! Imã ihkĩn nare. Wa ite to ihcupan. Ampo na? He nee hũmre ita kên nare, ne impejti cakrô, wa ite me amã hõr xà ita kôt ca ha xãmte mehcura — hajỹr. Mã me cumã:
— Wa nee ita na me ato amji japackre prãm nare, atea ca amji mã ita ton — hane. Ne nee me cumã hacpỹ mã me ihpore pyr prãm nare.
5Mã Juta te Pahpãm to me amji kam hapac xà jũrkwa kam ihpore hy ata to me cumã hũcapêr, ne ma tẽ. Ne jũ ita ri cute amji jõkre kwỳr ne ihtyc.
6Mã cute mehpore ata to cuprõn ne me ajpẽn mã:
— Ihpore ita te ri jũm tyc xà ata japrôr, na ri cupê me caprô jõ pore. Na ri Mojxe xwỳ te me pajapackre xà kam, Pahpãm jũrkwa kam pahte me ihpore ita to me pajàhhuc xà na ihkaj na — hajỹr. 7Cwỳrjapê ri cute ihpore ata na me ajpẽn par, ne cute me to carẽc te pot ton catê ata pê, hõ pjê ata japrôr, mehcahkrit jarêt xà caxuw. Ne cute mehcahkrit jarêt xà na me ton. 8Cwỳrjapê ri ita kam cormã cute me pjê ata mã haprỳ to: “Me caprô jõ pjê” hane. 9-10Ne pê ramã rỳ pêa mã Jeremij xwỳ pê Pahpãm jarkwa to ihcakôc catêjê nõ ata Pahpãm jarkwa na hõ kàhhôc kam, ita na ihhôc to hane he:
“Mã Juta catêjê te me hõ pahhi kên mã me mẽn jahpan xà na,
mehpore hy te trĩnta jõr na me ajpẽn par,
ata ri hacpỹa ne cute me ipyr,
ne me to pjê te pot ton catê pê hõ pjê japrôr” hane.
Mã ahnaa cute hajỹr.
Pê Pirat mã hĩxi cupê Jeju cawpa
Matew 27.19
19Ne cormã Pirat pahhi krĩ xà kam jỹ ne apu Jeju cukij, me ajkaam mã hĩxi te harkwa kujahêc ne cumã:
— Ca ha nee hũmre pejti te jũ caxuw ampo kên ton nare ata to kên nare. Ampo na? He caxwa ri ite hũtir kêanre — hajỹr.
Pê pĩ na me Jeju xôr na harkwa
Matew 27.24-31
24Mã Pirat te nee me cupê Jeju mã hikran nare na amji jahkre pej. Mã ame hàhkrihkrit catia kam, me hàhtôti atajê ihtỳj me pahhi jũhhyr prãm. Mã pahhi ata te nee Jeju curan na me cumã hũjahkre nare na amji jarẽn xà caxuw, cô na hàhwỳr, ne kam hũhkra cuhhõn, mehcunea kam mare mã. Ne hũhkra cuhhõn kwỳa kam cute me cumã:
— Wa nee ite hũmre ita curan na me amẽn nare, ne me atea ri mehcuran xà — hajỹr. 25Ne mehcunea te caràr to:
— Me imã, ite mehcuran jahpan xà na, ihtỳj me ikam me ikên pỳm, ne hanea ne me itàmxwỳ kam ihpỳm na to prãm — hajỹr.
26Mã Pirat pê pahhi ata te me cumã Parapa mã hikran. Ne cute pryti kà to Jeju cahhyr na me mẽn, ne pea cute krãhtare mã me hõr, mãr quê mehcahhy catia, ne pĩ na me cuxô ne mehcura.
27Mã ma krãhtare atajê me to ihhimpej catê pê Pirat ata jũrkwa wỳr Jeju to me mõ, ne curia cute krãhtare cunea to cuprõn, mã cute mehkrã tu ne to xa. 28Ne cute me cupê ihkà to pôj, ne me ahna pahhi kà tepti japjêhti ata mẽn, ne me cumã to ihkà. 29Ne hômjĩ to me pahhi krãhkà ne ihkrã mã me haxàr. Ne awpôc rũm hũhkra mã pĩ nõ to pahhi jõ kô ne me haxàr. Mã curia me cuna mã to xa. Ne me to hapactu xà kêanre ata kam me to incrà, ne cuna mã mehkõn krã na mehkrĩ ne me cumã:
— Apê Juta catêjê jõ pahhi catia ne apej! — hane. 30Ne kam me harcô rẽ, ne hũhkra kam me cupê pĩ ata to pôj, ne ihkrã kam me to ihcahhy. 31Ne cute me to hapactu xà kêanre ata jirô pê intête me cupê pahhi kà tepti ata caxàr, ne hacpỹa mã ihkàa to me cumã ihkà. Ne ma pĩ na cute menxôr ne mehcuran xà ata wỳr me to mõ.
Jeju tyc xà wỳr awcapàtkô
Matew 27.45-46
45Mã ramã pyt me pahkrã jimoac kam hỹr xàa kam, cute hàhcujro to hicu, ne ampeaj kam awcapàtkô, ne awcapàtkô ita na pyt pipkjêr. 46Ne pyt pec pejti kam Jeju kỳjti pêa mã caràr ne:
— Inxũ Cati, Inxũ Cati! Ampo na mã ahte ate irer to hajỹr? — hane.
Pê krĩ jamãr catêjê Jeju kre jamã
Matew 27.62-66
62Ne ramã Juta catêjê kôt xà jõ amcro ata cator. Ne Pahpãm mã mehcajrẽn catêjê jõ pahhi kwỳ me, Parixêw catêjê me, Pirat pê pahhi me, cute me ajpẽn par. 63Ne me cumã harkwa to:
— Me ijõ pahhiti, wa ite cormã me Jeju xwỳ hêj xi xà ata to me amji japackre, nãmri cute amji jarẽn to: “Quê ha ina amcro incrê, wa ha hacpỹa mã itĩr” hajỹr. 64Ne cu ha pahtỳj me harêt xà ata jamãr to impeaj ne, quê ha xa ahna amcro incrê, cu ha cormã me hamãr jicu. Nãmri cu ha me ita ton nare, quê ihhêaj to ihkôt me ipa catêjê me hĩ to ahkĩ, ne me harẽn to: “Hacpỹa mã ihtĩr!” hane. Quê ha mehhêj xi xà ita, mam ita jirôa pê ihkêanre ne — hajỹr. 65Mã Pirat te me cumã harkwa to:
— Nãmhã ijõ krãhtare catêjê amehcuhhê he. Ca ha me haprô, ne me to mõ, ne cute me harêt xà ata jamãr na me amẽ, quê me hamãr to mempeaj ne — hajỹr. 66Mã ma cute me haprôr, ne me to pra. Ne cute me kẽn kre kam me harêt xà ata jarkwa na, me ihtô xà to me ihtô, jũm te aracri ihcaxun cupate. Ne curia ame ahna me ipa, ne ame hamãr to ame ipa, ne ma mehcuhhê ne me hõmpu, ne me hamã.
S'ha seleccionat:
Matew 27: ram
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2012, Wycliffe Bible Translators, Inc. All rights reserved.