Génesis 2
2
1Tsaynöpami Tayta Dios kamayta usharqan kay patsata y kay patsacho kaqkunata, jana patsata y jana patsacho kaqkunatapis. 2Lapanta kamarkurnami qanchis kaq junaqcho Tayta Dios jamarqan.#Éxo. 20.11; Heb. 4.4, 10. 3Tsayno jamashqanpitami Tayta Dios tsay junaqta bendisishpan churarqan sagrädu junaq kananpaq.#Éxo. 20.11.
Edén huertacho Adánwan Eva tashqan
4Kaychömi qelqaraykan jana patsata y kay patsata Tayta Dios kamashqan.
Jana patsata y kay patsata tsayraq kamar 5Tayta Dios manaraqmi tamyatsimurqanraqtsu. Tsaymi ima qewapis ni jachapis mana winamurqanraqtsu. Tsaynöpis manami chakrata arunanpaq runa karqanraqtsu. 6Tsay witsanqa pampapita yaku pashtamurmi#2.6 O pukutay sharkurmi. intëru patsata ushmarqan.
7Tsaypitanami alpapita runata Tayta Dios kamarkur kawananpaq senqanpa pükarqan. Tsaynöpami kawaq runa kananpaq kamarqan. 8Tsawraqa Edéncho jatunkaray huertaman churarqan tsaycho tänanpaq. Tsay huertataqa kikin Tayta Diosmi inti jeqamunan läducho kamarqan. 9Tsay huertachömi Tayta Dios winatsirqan tukuy niraq kuyaylapaq yörakunata. Tsay yörakunapa wayuyninmi maypis mikukuypaq karqan. Huerta chawpinchömi juk yöra karqan wayuyninta mikur imayyaqpis runa kawananpaq.#Apoc. 2.7; 22.2, 14. Tsaynöpis juk yöra karqan wayuyninta mikur ali kaqta y mana ali kaqtapis runa musyananpaq.
10Jinan Edén huertapitami juk mayu pashtamurqan tsay huertata ushmananpaq. Huertapita yarqurmi mayu chuskuman rakikarqan. 11Punta kaq mayupa jutin karqan Pisón. Tsay mayumi pasan Havila partipa. Havila partichömi atska qori kaykan. 12Tsaycho kaq qoriqa mas ali kaq qorimi kaykan. Tsaynöpis tsaycho kaykan ali asyaq#2.12 Wakin runakunaqa mushkuq nipäkun. yörapa weqin y kuyaylapaq ónice rumikunapis. 13Jukaq mayupa jutinmi karqan Gihón. Tsay mayumi tumaykämun Cus partipa. 14Jukaq mayupa jutinmi karqan Tigris. Tsay mayuqa Asiriapita inti jeqamunan kaq lädupami pasan. Jukaq mayupa jutinmi karqan Éufrates.
15Kamashqan runatami Edén huertaman Tayta Dios churarqan tsaycho arur ali rikananpaq. 16Nirkurnami runata kayno nirqan: <<Kay huertacho kaykaq yörakunapa wayuyninqa lapanpis mikunaykipaqmi kaykan. 17Itsanqa ama mikunkitsu alita y mana alita musyatsikuq yörapa wayuynintaqa. Tsayta mikurqa wanunkipaqmi>>.#Rom. 6.23.
18Nirkurmi Tayta Dios kayno nirqan: <<Japala kar runa kuyapaypaqmi kaykan. Tsaymi yanapananpaq warmita kamashaq>>.
19Tsaypitanami alpapita kamashqan tukuy niraq uywakunata y päriqkunata Adán#2.19 Hebreo idiömacho Adán ninanqa runa ninanmi. kaqman Tayta Dios aparqan jutinkunata churapänanpaq. Jutinkunata Adán churapashqalanmi lapanpapis kaykan.
20Tsaynöpami jutinkunata Adán churaparqan ashmana kaq y mana ashmana kaq uywakunapata y päriqkunapatapis. Lapan casta uywakuna kaptinpis runapa warminpaqnöqa manami mayqanpis karqantsu. 21Tsaymi Tayta Dios wanuypano Adánta punukarkatsir juk custillanta jorqurqan. Nirkurmi kashqantanöla aliyätsirqan. 22Tsay jorqushqan custillanpita warmita kamarkurmi runa kaqman pusharqan. 23Warmita rikaykurmi Adán pasaypa kushikushpan kayno nirqan: <<¡Kaymi itsanqa tulüpita aytsäpita rurashqa kar kikï niraq kaykan! Olqupita rurashqa karmi warmi kaykan>>.
24Tsaymi runaqa mamanpa y taytanpa makinpita yarqukun warminwan mana rakikaypa tänanpaq. Ishkaq karpis juklaylanömi kanqa.#Mat. 19.5; Mar. 10.7-8; 1Cor. 6.16; Efe. 5.31. 25Ishkan qarapächula kaykarpis manami penqakärirqantsu.
S'ha seleccionat:
Génesis 2: qvmB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2003, Wycliffe Bible Translators, Inc. All rights reserved.