Lucas 11
11
Tayta Diosta manakunantsipaq Jesús yachatsishqan
Mateo 6.9-15; 7.7-11
1Juk kutichömi Tayta Diosta Jesús manakuykarqan. Manakuyta usharkuptinmi juk discïpulun Jesústa kayno nirqan: <<Tayta, discïpulunkunata Juan#11.1 Juanpaq parlarqa Bautizaq Juanpaqmi nirqan. yachatsishqanno noqakunatapis Tayta Diosta manakärinäpaq yachaykatsilämay>>.
2Tsawraqa Jesús kayno nirqan: <<Tayta Diosta kayno manakärinki:
<<[Jana patsacho kaykaq] Papä,
qampa jutiki respitashqa kaykulätsun.
Kay patsacho mandaq kanaykipaq aywaykalämuy.
[Jana patsacho cäsukushushqaykino kay patsachöpis cäsukuykuläshunki.]
3Waran waran mikupäkunäpaq mikuyta kamaripaykalämay.
4Chikimaqnïkunata perdonashqäno noqakunatapis perdonaykalämay.
Jutsa rurayman ama kacharpalämaytsu.
[Tsaypa trukanqa mana alikunapita tsapaykalämay]>>.
5Mastapis Jesús kayno nirqan: <<Juk runashi pulan paqas aywarqan reqinakushqanpa wayinman kayno nir: <Kimsa tantaykita manakuläshayki, tayta. 6Juk reqinakushqämi wayïman chayamushqa patsatsinäpaq. Manami imaläpis kantsu qaranäpaq>. 7Tsayno manakuptinshi kayno nirqan: <¡Ama fastidiamaytsu! Punküpis trancashqanami kaykan. Wamräkunapis y noqapis punukuykänami. Mananami sharkamümannatsu tantata kamaripänäpaq>.
8<<Noqa kaynömi nï: Reqinakushqan qayakuptin sharkamuyta mana munaykarpis yaparir yaparir manakuptinqa kamaripanqapaqmi. 9Tsaymi qamkunata kayno nï: Manakuptikiqa Tayta Dios kamaripäshunkimi. Ashirqa tarinkimi. Punkuta takakuptikiqa kichapäshunkimi. 10Manakuq kaqqa chaskinmi. Ashiq kaqqa tarinmi.#Deut. 4.29; 2Crón. 15.2-4; Jer. 29.13. Punkuta takakuq kaqtaqa kichapanmi.
11<<Mayqaykitapis wamrayki [tantata manakushuptiki ¿rumita aptaparkunkimantsuraq?] Pescäduta manakushuptiki ¿culebrata qarankimantsuraq? 12Runtuta manakushuptiki ¿alacranta qarankimantsuraq? 13Qamkuna mayjina fiyu kaykarpis wamraykikunata ali kaqlata qaraykaptikiqa ¿manatsuraq jana patsacho kaykaq Taytaykipis manakuq kaqman Espíritu Santuta kachamunqa?>>
Jesúspa contran parlapäkushqan
Mateo 12.22-30; Marcos 3.20-27
14Juk kutimi shimin mana pashtaq runapita supayta Jesús qarqurqan. Supay yarquptinnami tsay runa parlayta qalaykurqan. Tsayta rikaykurmi runakuna kushikärirqan. 15Wakin runakunami kayno nipäkurqan: <<Kay runaqa supaykunapa mandaqnin Beelzebúpa munayninwanmi supaykunata qarquykan>>.
16Wakin runakunanami manakaqman churayta munar Jesústa kayno nipäkurqan: <<Tayta Dios rasunpa kachamushushqaykita musyapäkunäpaq ima milagrutapis ruray>>.
17Paykunapa yarpayninkunata musyarmi Jesús kayno nirqan: <<Juk nacioncho runakuna kikinpura chikinakurqa ¿manatsuraq wanutsinakur ushakanqa? Tsaynöpis juk wayicho taqkuna chikinakurqa ¿manatsuraq wakpa kaypa aywakur ushakanqa? 18Tsaynöpis Satanás mandaykashqancho kikinpura chikinakurqa pay mandaykashqanpis ushakanqami. Tsayno nï Beelzebúpa munayninwan supaykunata qarqushqäta nipäkuptikimi.
19<<Beelzebúpa munayninwan supaykunata qarquptïqa ¿pipa munayninwantaq discïpuluykikunaqa supaykunata qarqapäkun? Diospa munayninwan supaykunata qarqushqanta tantiyaykarqa ¿imanirtaq mana tantiyapäkunkitsu noqapis Tayta Diospa munayninwan qarqushqäta? 20Diospa munayninwan supaykunata qarquptïmi Tayta Dios mandaykashqan qamkunaman chayamushqanta musyapäkunki.
21<<Armanta kamarikushqa kalpayuq runa wayinta täpaykaptinqa manami imantapis suwa apanqatsu.#11.21 Armanta kamarikushqa kalpayuq runatami Satanásman tinkutsin. Wayintanami munaynincho tsararashqan runakunaman tinkutsin. 22Tsayno täpaykaptinpis paypita mas kalpayuq runa shamurmi itsanqa armanman yärakuykaptinpis vinciykur qechunqa. Nirkurmi imaykankunatapis apakur rakipänakunqa.#11.22 Mas kalpayuq runaqa Jesucristumi kaykan.
23<<Pipis favornï mana karqa chikiykämanmi. Noqata mana shuntäshimaq kaqqa qarquykanmi.#11.23 Tsayno parlar Jesucristo kaynömi nirqan: Runakuna Dios mandaykashqancho kawananpaq mana shuntäshimaq kaqqa runakunata tsapatami churapaykan.
Runaman supay kutishqan
Mateo 12.43-45
24<<Runapita supay yarqurmi chunyaq jirkakunapa purin maychöpis tänanpaq ashir. Mana tariykurmi kayno nin: <Yarqamushqä wayïman kutikushaq>. 25Kutishpanmi tariykun pitsapakushqa y churapakushqa jäkuraykaqta. 26Tsawraqa supay mayinkunaman aywar paypita mas fiyu qanchis supaykunata pushakurkur tsay tashqanman kutin. Tsaymi nawpata kashqanpitapis mas peorraq tsay runa rikakun>>.
Diosta cäsukuqkuna kushishqa kawananpaq Jesús nishqan
27Jesús tsayno parlaykaptinraqmi runakunapa chawpinpita juk warmi kayno nimurqan: <<¡Ima kushishqaraq wachashuqniki y chuchushuqniki warmi kaykan!>>
28Tsayno niptin Jesús nirqan: <<Tayta Diospa palabranta mayar cäsukuqkunami paypita mas kushishqa karkaykan>>.
Milagrutaraq Jesús rurananta munapäkushqan
Mateo 12.38-42; Marcos 8.12
29Tsaytsika runakuna juntakaptinmi Jesús kayno nirqan: <<Kanan witsan runakunaqa mana cäsukuqmi karkaykan. Milagruta ruranäta munaptinpis manami ima milagrutapis rurashaqtsu. Tsaypa trukanqa profëta Jonásta salvar milagruta rurashqannömi Tayta Dios juk milagruta ruranqa. 30Imanömi Nínive runakuna Jonásta chaskikärinanpaq Tayta Dios milagruta rurarqan, tsaynömi kanan witsan runakuna Runapa Tsurinta chaskikärinanpaqpis milagruta ruranqa.
31<<Salomón yachatsishqanta mayananpaqmi mandaq reinapis sur kaq lädu karu nacionpita shamurqan.#1Rey. 10.1-10; 2Crón. 9.1-12. Kananqa Salomónpita mas yachaq kaqmi wilapaykäshunki.#11.31 Salomónpita mas yachaq kaqpaq parlarqa kikinpaqmi Jesucristo parlarqan. Tsaymi juiciu final junaq tsay reina sharkarkamur kanan witsan runakunata careanqa.
32<<Jonás wilakushqanta chaskikurmi Nínive runakuna jutsa ruraykunata kacharirqan.#Jon. 3.5. Kananqa Jonáspita mas munayniyuq kaqmi wilapaykäshunki.#11.30-32 Runapa Tsurinpaq parlar y Jonáspita mas munayniyuq kaqpaq parlarqa kikinpaqmi Jesucristo parlarqan. Tsaymi juiciu final junaq Nínive runakuna sharkarkamur kanan witsan runakunata careapäkunqa>>.
Ali yarpayniyuq kaqkuna Jesústa chaskikushqan
Mateo 5.15; 6.22-23
33<<Manami pipis atskita ratarkatsir pakantsu ni manka rurinman churantsu, sinöqa wayiman yaykuqkuna rikapäkunanpaq alayrinninmanmi churan.#11.33 Atskita alayrinninman churashqanta parlarqa runakuna tantiyananpaq yachatsishqantami Jesucristo parlarqan. 34Nawikikunaqa shonquykipaq atskinömi kaykan. Tsaymi nawiki ali kaptinqa shonquykipis atskicho kaykan. Nawiki mana ali kaptinmi itsanqa tsakaycho kaykanki.#11.34 Tsayno parlarqa Jesucristo kaynömi nirqan: Ali yarpayniyuq karqa atskichöno kaykar Tayta Dios kachamashqanta tantiyankipaqmi. Mana ali yarpayniyuq karmi itsanqa mana tantiyar pasaypa tsakäpakushqano kaykanki.
35<<Atskicho kashqaykita yarparpis cuidädu tsakaycho kaykankiman. 36Ichiklapis shonquykicho tsakay ama katsuntsu. Shonquykicho atskila kaptinqa lapan rurashqaykikunapis runakuna rikakunanpaqmi kanqa. Atski atsikyaqnömi qamkunapis ali kawankipaq>>.
Fariseukunata y ley yachatsiqkunata Jesús olqüpashqan
Mateo 23.1-36; Marcos 12.38-40; Lucas 20.45-47
37Jesús parlayta usharkuptinnami juk fariseo runa pusharqan wayincho mikupäkunanpaq. Chayaykurmi mësaman Jesús jamakurqan. 38Fariseukunapa costumbrin kashqanno mikunanpaq makinta Jesús mana awikuqta rikarmi pushaq fariseo yarpachakurqan.
39Tsawraqa Jesús kayno nirqan: <<Fariseukuna, qamkunaqa janalanpa maylashqa pucilluno y plätunömi karkaykanki. Tsay plätukuna rurincho qanra kashqannömi qamkunapis shonquykicho suwakunaykipaq y mana alita ruranaykipaq yarparkaykanki. 40¡Mana tantiyakuq runakuna! ¿Manaku musyanki Tayta Dios cuerpuykita kamar shonquykitapis kamashqanta? 41Waktsakunata kuyapar imalawanpis yanapay. Tsayno yanapaptikiqa shonquykipis limpiumi kanqa.
42<<¡Wawalaw, fariseukuna! Qamkunaqa mentapita, rüdapita y wakin jachapitapis diezmuta rakiykarpis manami runa mayikita kuyapankitsu ni Tayta Diostapis manami kuyankitsu. Diezmupaq rakir cumplishqaykino runa mayikitapis y Tayta Diostapis kuyapäkunkiman.
43<<¡Wawalaw, fariseukuna! Qamkunaqa sinagögakunacho nawpaqninkunamanraqmi jamakuyta munarkaykanki. Pläzakunachöpis runakuna winchikur ali rikashunaykitami munapäkunki.
44<<¡Wawalaw, [ishkay cära fariseukuna y ley yachatsiqkuna]! Qamkunaqa mana rikakaq sepultüranömi karkaykanki. Mana rikakaq sepultüra jananpa pipis purir rurincho melanaypaq kashqanta mana musyashqannömi runakuna mana musyantsu shonquykicho mana ali yarpaykuna kashqanta>>.
45Tsayta mayar ley yachatsiq runa kayno nirqan: <<Rabí, tsayno nishpaykiqa noqakunatapis wiyatsipaykämankimi>>.
46Niptin Jesús kayno nirqan: <<¡Wawalaw qamkunapis ley yachatsiqkuna! Qamkunaqa apaytapis mana kamäpakushqanyaq qepita aparipaqnömi runakuna atska leykunata cumplinanpaq nirkaykanki. Tsayno kaptinpis cumplinanpaq manami ichiklatapis yanapankitsu.
47<<¡Wawalaw! Qamkunaqa unay ayluykikuna wanutsishqan profëtakuna pamparashqan jananchömi paykunapa nïchunkunata rurarkaykanki. 48Tsayno rurarqa <benëchu wanushqa> niqnömi karkaykanki.
49<<Tsayno kaptinmi Tayta Dios yachaq kashpan kayno nirqan: <Paykunamanmi profëtakunata y apostolkunatapis kachamushaq. Paykunatami wakinta wanutsipäkunqa y wakinkunatanami fiyu runatano qatikachanqa>. 50Kay patsata kamashqanpita patsa profëtakunata wanutsishqanpitami kanan witsan runakunata Tayta Dios juzganqapaq. 51Abelta#Gén. 4.8. wanutsishqanpita hasta Zacaríasta#2Crón. 24.20-21. templu punkucho wanutsishqanyaqmi Diospa profëtankunata wanutsipäkurqan. Noqa kaynömi nï: Tsay wanutsiq runakunatanömi kanan witsan Israel runakunata Tayta Dios juzganqapaq.
52<<¡Wawalaw, ley yachatsiqkuna! Wayiman pipis mana yaykunanpaq llävipa wawanta tsarikuykuqnömi runakunata micharkaykanki Tayta Diospa wilakuyninta mana chaskikunanpaq. Tsaynölami kikikikunapis mana chaskikurkaykankitsu>>.
53Parlayta usharkur Jesús aywakuptinmi ley yachatsiqkuna y fariseukuna pasaypa rabyakärirqan. Tsaymi qatipaykur sasa kaqkunata tapupäkurqan 54lutanta rimaptin tsaylawan acusananpaq.
S'ha seleccionat:
Lucas 11: qvmB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2003, Wycliffe Bible Translators, Inc. All rights reserved.