Génesis 33
33
Wawqin Esaúwan Jacob tinkuyanqan
1Chusku pachak (400) runakunawan Esaú shamuykaqta rikaskirmi tsurinkunata Jacob rakirqan Leawan wakin kaq aywayänanpaq y wakinna Raquelwan, wakinna Bilhawan y wakin kaqna Zilpawan. 2Puntata aywayänanpaqmi serviqnin kaq ishkan warminkunata wawankunatawan mandarqan. Paykunapa qepanta aywakuyänanpaqmi Leatapis wawantinta mandarqan. Tsaypa mas qepanta aywayänanpaqmi Raquelta wawan Josétawan mandarqan. 3Jacobmi puntankunata aywar wawqinwan tinkunqanyaq qanchis kuti qonqurikuykurqan. 4Tsaynö aywaykaptinmi wawqin Esaúqa cörrilla aywaykurnin abrazarkur mutsaykurqan. Tsaymi ishkan abrazanakurkur waqayarqan.
5Warmikunatawan wamrakunata rikaykurmi Esaú tapurqan: <<Paykuna ¿pitan kayan?>>
Jacobnam nirqan: <<Dios Yaya qaramanqan wamräkunam kayan>>.
6Tsaypitanam Jacobpa serviqnin kaq ishkan warminkunana wawankunawan witiyarqan. Paykunapis Esaúta respitarmi urkunkunapis patsaman töpanqanyaq qonqurikuyarqan. 7Tsaynöllam Leapis chaykur wawankunawan Esaúpa puntanman qonqurikuyarqan. Tsaypitanam Raquelpis chaykur wawan Joséwan Esaúpa puntanman qonqurikuyarqan.
8Tsaynam Esaú nirqan: <<Wawqi, ¿imanirtan manäda manäda rakiskir wätaykikunata qatiykätsimunki?>>
Jacobnam nirqan: <<Taytay, qampaqmi wallkallatapis qatitsimushkä>>.
9Esaúnam nirqan: <<Wawqi, noqapapis atskam wätäkuna. Qaramänaykipaq kaq kikikipaq katsun>>.
10Tsaynam Jacob nirqan: <<Taytay, qaranaqpaq qatitsimunqä wätakunata chaskiykallämay. Chaskimaptikim musyashaq alli shonquykiwan chaskimanqaykita. Rasunpa chaskimanqaykipitam Dios Yayata rikaqnöraq kushikü. 11Qampaq qatimunqä wätakunata chaskiykallämay. Dios Yaya yanapamaptinmi imaykayuq kä>>.
Jacob tsaynö yapay yapay rugaptinmi qaranqan wätakunata Esaú chaskirqan.
12Chaskirnam Esaú nirqan: <<Aywakushunna. Noqam puntaykikunata aywashaq>>.
13Jacobnam nirqan: <<Rikanqaykinöpis wamräkunam pishillaraq y wätäkunapis wawayuqmi kayan. Juk junaqlla chayta munar qatiptïqa pishiparchi üshäkuna y cabräkunapis wañuyanman. 14Taytay, mejorqa puntakullay. Wätäkunawan wamräkuna puëdiyanqallanmanmi allipita shamur täkunqayki Seirman chäyämushaq>>.
15Tsaynam Esaúpis nirqan: <<Tsaynö kaptinqa wakin kaq pushamunqäkunata dëjapushayki yanapayäshunaykipaq>>.
Peru Jacobnam nirqan: <<Taytay, ama afanakullaytsu. Alli chaskimanqaykillawannam kushishqa kaykä>>.
16Tsaymi Esaú tsay junaqlla Seirman kutikurqan. 17Jacobnam Sucotman aywarqan. Tsaychö täkuyänanpaq wajita ruraskirmi wätankunapaqpis ramädakunata rurarqan. Tsaymi tsay sitiupa shutin churarqan Sucot#33.17 Sucot ninanqa ramäda ninanmi. shutin kananpaq.
18Tsaynöpam Padan-arampita kutimur Canaánman yamaylla chäyarqan. Siquem marka wak tsimpanman chaykurmi patsakuyarqan. 19Tsay patsakuyanqan sitiutam Jacob rantirqan pachak (100) qellaywan Hamor runapa tsurinkunapita. Hamorpa jukaq tsurinpam shutin karqan Siquem.#Jos. 24.32; Juan 4.5. 20Tsaychömi altarta Jacob perqarkur shutin churarqan El-Elohe-Israel#33.20 El-Elohe-Israel ninanqa Dios Yayam Israelpa Diosnin ninanmi. shutin kananpaq.
S'ha seleccionat:
Génesis 33: qxn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.