Lucas 18
18
Mana ajayar Dios Yayata mañakunapaq Jesús yachatsikunqan
1Imaypis mana ajayar Dios Yayaman mañakuyänanpaqmi discïpulunkunata Jesús imaykawan iwalatsiypa yachatsir 2nirqan: <<Juk markachöshi Dios Yayapita mana mantsakuq ni runa majinkunatapis mana respitaq juez kanaq. 3Tsay markachöshi juk viüdapis täkunaq. Payshi tsay juezman waran waran aywar ninaq: <Taytay, demandamaqnïtawan justiciata ruraykallämay>. 4Tsaynö kutinyaptinpis juezqa manash cäsunaqtsu. Peru tsaypitanash yarpachakuskir shonqullanchö ninaq: <Diospita mana mantsakurpis ni runakunata mana respitarpis 5kay viüdata atiendiykushaq. Mana atiendiptïqa umäta nanatsirmi imay hörapis kutinyämunqa> >>.
6Tsaypitanam Señor Jesús nirqan: <<Mana alli juez imata ninqantapis shumaq tantiyayay. 7¿Manatsuraq Dios Yayapis cäsunqa akranqan runakuna paqasta junaqta mañakuyaptin? Payqa mañakuyanqanta manam shuyarätsinqatsu. 8Noqam niyaq: Mañakuq kaqtaqa Dios Yaya mana shuyarätsirmi justiciata ruran. Peru Runapa Tsurin kay patsaman kutimur ¿runakunapa creyikuyninkunata tarinqaraqtsuraq?>>
Fariseuman y impuestu cobraqman Jesús iwalatsinqan
9Runa majinkunata despreciaqkunapaqmi Jesús iwalatsikuypa yachatsikur nirqan: 10<<Ishkaq runash Diosta mañakuq templuman aywayänaq. Jukaqshi fariseo kanaq y jukaqnash impuestu cobraq kanaq. 11Tsay fariseush ichiykurnin Dios Yayata mañakur ninaq: <Dios Yaya, noqaqa wakin runakunanö mana kanqätam agradëcikuq. Paykunaqa suwakuq, jutsasapa y adulteriu jutsa ruraqmi kayan. Noqaqa manam taqay impuestu cobraqnötsu kä. 12Noqaqa ishkay kutim cada semänachö ayunä. Tsaynöllam llapan gänanqäpita imaypis templuman diezmüta apä>.
13<<Peru impuestu cobraq runanash sïqa karullachö ichiykur umantapis ciëluman manana pallarinaqtsu. Tsaypa rantinqa alläpa llakikurshi makintapis tsoqpakurkurraq ninaq: <Dios Yayallä, llakipaykallämay. Noqalläqa jutsasapam kallä>.
14<<Noqam niyaq: Impuestu cobraq runam jutsanpita perdonashqa wajinman kutikurqan. Peru tsay fariseutaqa Dios Yaya manam perdonarqantsu. Allish tukuqkunam penqakushqa kayanqa. Peru qollmi shonqu kaqkunam sïqa mas reqishqa kayanqa>>.
Wamrakunapaq Jesús mañakunqan
Mateo 19.13-15; Marcos 10.13-16
15Tsaypitanam wamrakunata Jesúsman apayarqan umankunata yatar Dios Yayata mañakunanpaq. Tsayta rikarmi discïpulunkuna amatsayarqan. 16Jesúsnam wamrakunata qayaskir discïpulunkunata nirqan: <<Wamrakunata apayämunanta ama amatsayaytsu. Wamranö kaqkunapaqmi Dios Yayapa mandakuyninqa. 17Rasun kaqtam niyaq: Pipis Dios Yayapa mandakuyninta wamranö mana chaskirqa manam paypa mandakuyninman yaykunqatsu>>.
Rïcu runa ajataraq salvakänanpaq kanqan
Mateo 19.16-30; Marcos 10.17-31
18Juk mandakuq runam Jesústa nirqan: <<Rabí, alli runam kanki. ¿Imatatan ruräman mana ushakaq kawayta tarinäpaq?>>
19Jesúsnam nirqan: <<¿Imanirtan <alli runa> nimanki? Dios Yayallam alliqa. 20Musyankim mandamientukuna ninqanta: <Ama majayuq kaykar jukwan purikunkitsu.#Éxo. 20.14; Deut. 5.18. Ama runa majikita wañutsinkitsu.#Éxo. 20.13; Deut. 5.17. Ama suwakunkitsu.#Éxo. 20.15; Deut. 5.19. Ama manakaqkunata pitapis tumpankitsu.#Éxo. 20.16; Deut. 5.20. Mamaykita y taytaykita respitanki#Éxo. 20.12; Deut. 5.16.> >>.
21Tsay runanam nirqan: <<Tsaykunataqa wamra kanqäpitanam llapanta cumplishkä>>.
22Jesúsnam nirqan: <<Jukraqmi cumplinaykipaq faltan. Llapan imaykaykikunata rantikuskir tsay qellayta waktsakunata qaray. Tsaynö ruraptikiqa ciëluchömi riquëzayki kanqa. Tsaypita qatimay>>.
23Tsaynö niptinmi alläpa rïcu kar tsay runa llakikurqan. 24Llakishqa kaykaqta rikaykurmi Jesús nirqan: <<¡Alläpa ajam rïcu runakuna Dios Yayapa mandakuyninman yaykuyänanpaq! 25Rïcu runa Dios Yayapa mandakuyninman yaykunqanpitaqa mas fäcilmi camëllupis awjapa uchkunpa päsanman>>.
26Tsayta wiyaqkunanam Jesústa tapuyarqan: <<Tsaynö kaptinqa ¿piraq salvakanman?>>
27Jesúsnam nirqan: <<Runakunapaq aja karpis Dios Yayapaqqa manam ajatsu>>.
28Pedrunam nirqan: <<Taytay, noqakunaqa llapan imaykäkunatapis jaqiskirmi qamta qatiräyaq>>.
29Jesúsnam nirqan: <<Rasun kaqtam niyaq: Pipis wajinta, mamanta, taytanta, wawqinkunata, paninkunata, warminta o tsurinkunata Dios Yayapa mandakuynin rayku jaqirqa 30kay vïdachö mas atskatam chaskinqa. Tsaynöllam wak vïdachöpis mana ushakaq kawayta tarinqa>>.
Wañutsiyänanpaq kanqanta Jesús yapay willakunqan
Mateo 20.17-19; Marcos 10.32-34
31Chunka ishkay discïpulunkunata qayaskirmi Jesús nirqan: <<Jerusalénman chänapaq ichikllanam faltan. Tsaychömi profëtakuna qellqayanqannölla Runapa Tsurinta llapanpis päsanqa. 32Mana Israel autoridäkunamanmi entregayanqa. Paykunam burlakurnin ashayanqa y toqapuyanqa. 33Tsaypitam alläpa astar wañutsiyanqa. Peru kimsa junaqtam kawamunqa>>.
34Tsaynö niptin discïpulunkuna manam ni imata tantiyayarqantsu ni musyayarqantsu imapaq parlanqantapis.
Jericó markachö qaprata Jesús kutikätsinqan
Mateo 20.29-34; Marcos 10.46-52
35Jericó markaman Jesús yaykuykaptinnam juk qapra runa limushnata mañakur nänichö jamaraykarqan. 36Atskaq runakuna päsaqta tantiyaskirmi tsay qapra runa tapukur nirqan: <<¡Imatan päsaykällan!>>
37Runakunam niyarqan: <<Nazaret runa Jesúsmi päsaykan>>.
38Tsaymi qayaykachar nirqan: <<¡Davidpa Tsurin#18.38 Dios Yaya kachamunqan Cristutam runakuna niyarqan Davidpa Tsurin kanqanta. Tsaynö niyarqan rey Davidpita miraq imayyaqpis mandakunanpaq Dios Yaya prometishqa kaptinmi. Tsaypaq masta musyanaykipaq liyinki 2Sam. 7.10-16; Sal. 89.1-4, 19-37; 132.11-12. Jesús, llakipaykallämay!>>
39Tsaynö niptinmi puntata aywaqkuna upälla kananpaq piñapäyarqan. Piñapäyaptinpis masmi qayaykachar nirqan: <<¡Davidpa Tsurin, llakipaykallämay!>>
40Jesúsnam ichiykur tsay qaprata qayatsirqan. Puntanman chaykatsiyaptinnam tapur nirqan: 41<<¿Imachö yanapanaqtatan munanki?>>
Qapranam nirqan: <<¡Taytay, ñawï kutikänantam munallä!>>
42Jesúsnam nirqan: <<¡Rikayna! Confiakamunqaykipitam ñawiki rikanqa>>.
43Tsaynö niptinmi jina höra ñawin kichakaskiptin Dios Yayata alabarnin Jesúspa qepanta aywarqan. Tsayta rikaykurmi llapan runakunapis Dios Yayata alabayarqan.
S'ha seleccionat:
Lucas 18: qxn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.