Lucas 20
20
Jesústa sacerdötikuna tapuyanqan
Mateo 21.23-27; Marcos 11.27-33
1Jukpunnam Dios Yayapa alli willakuyninta templupa patiunchö Jesús yachaykätsiptin mandakuq sacerdötikuna, ley yachatsikuqkuna y mayor runakuna chäyarqan. 2Tapurmi niyarqan: <<Qamqa ¿pipa poderninwantan rantikuqkunata qarqushkanki? ¿Pitan tsaynö qarqunaykipaq nishushkanki?>>
3Jesúsnam nirqan: <<Qamkunatapis mä tapuyäshayki. Mä niyämay: 4¿Pitan Juanta kachamushqa bautizananpaq? ¿Dios Yayaku o runakunallaku?>>
5Tsaynö tapuptinmi kikinkunapura ninakuyarqan: << <Dios Yayam kachamushqa> nishqaqa: <¿Imanirtan creyiyashkankitsu?> nimäshunmi. 6<Runakunam kachayämushqa> nishqaqa runakunam saqmar wañutsimäshun. Juan profëta kanqantam llapan yarpäyan>>.
7Tsaymi Jesústa niyarqan: <<Manam musyayätsu pï kachamunqantapis>>.
8Jesúsnam nirqan: <<Noqapis manam willayaqtsu pipa poderninwan rantikuqkunata qarqunqäta>>.
Chakra arrendaq runakunaman iwalatsiypa Jesús yachatsikunqan
Mateo 21.33-46; Marcos 12.1-12
9Tsaypitanam iwalatsiypa yachatsikur Jesús nirqan: <<Juk runash chakranman üvata plantatsinaq. Tsaypitanash tsay chakranta arrendakuskir juklä markapa aywakunaq.
10<<Cosëcha qallaykuptinnash juk serviqninta kachanaq üva chakra arriendunpita cobrakamunanpaq. Tsay servikuq chaykuptinshi alläpa maqaskir jinallanta qarquskiyänaq. 11Tsayshi chakrayuq runa jukaq serviqninta yapay kachanaq. Paytapis qayaparnin maqaskirshi jinallanta qarquskiyänaq. 12Tsaypitanash jukaq serviqnintana kachanaq. Paytapis alli maqakachaskirshi yawarllatana qarquskiyänaq>>.
13<<Tsaynash chakrayuq yarpachakur ninaq: <Kananqa ¿imatatan rurashaq? Mejorqa kuyay tsurïta kachashaq. Paytaqa maypischi respitayanqa>.
14<<Tsayshi tsurin aywaykaqta rikaskir chakra arrendaqkuna yachatsinakuyänaq: <Taqaymi kay chakrawan quëdanqa. Noqantsik chakranwan quëdanapaq wañuskatsishun>. 15Chaykuptinnash willanakuyanqannölla üva chakrapita jukläman apaykur wañuskatsiyänaq>>.
Tsaynö willakuskirnam Jesús nirqan: <<Tsay üva chakrayuq ¡imatatan tsay runakunata ruranqa! 16¿Manatsuraq llapanta wañutsinqa? Tsaypitam chakrantapis juktana arrendakunqa>>.
Tsayta wiyaykurnam runakuna niyarqan: <<¡Dios Yaya tsayta ama permïtiykullätsuntsu!>>
17Jesúsnam rikaykurninkuna nirqan: <<Dios Yayapa palabran ninqanta tantiyakuyay:
<< <Waji shäritsiqkuna <<kay rumi manam allitsu>> nir jitariyanqanmi maestru rumiman tikrashqa>.#20.17 Tsay rumimanmi Jesucristo iwalatsikurqan. Tsaynömi tantiyatsirqan chikiyaptinpis Dios Yaya llapanpita mas poderyuq kananpaq churanqanta.#Sal. 118.22.
18Pipis tsay rumiman ishkirqa ushakanqam.
Tsaynöllam pipa jananmanpis tsay rumi shikwarqa ushakätsinqa>>.
19Tsaynö yachatsiptinmi mandakuq sacerdötikuna y ley yachatsikuqkuna paykunapa contrankuna parlaykanqanta tantiyaskir#20.19 Tsay iwalatsikuyqa kaynömi: Chakrayuqqa Dios Yayam. Chakrayuq mandanqan serviqninkunanam Dios Yayapa profëtankuna. Chakrayuqpa tsurinnam Jesucristo. Chakra arrendaq mana alli runakunanam Jesucristupa contrankuna. prësu achkutsiyta munayarqan. Peru runakunapita mantsakurmi achkutsiyarqantsu.
Impuestuta pägayänanpaq Jesústa tapuyanqan
Mateo 22.15-22; Marcos 12.13-17
20Tsaymi gobernadorman prësu apatsiyänan rayku Jesúsman musyapakuqkunata mandayarqan yachayllapa llutanta parlatsiyänanpaq. 21Jesúsman chaykurnam niyarqan: <<Rabí, musyayämi yachatsikunqayki y parlanqaykipis rasun kaqlla kanqanta. Manam runakuna aläbayäshunaykipaqtsu yachatsikunki, sinöqa Dios Yaya munanqannöllam. 22Romachö mandakuq Césarpaq ¿impuestuta pägashwanku o manaku?>>#20.22 Israel runakunam yarpäyarqan Romapaq impuestuta pägar Dios Yayapa contran kayanqanta. Tsaymi: <<Impuestuta pägashun>> niptinqa Diospa contran Jesús parlanqanta niyanman karqan. <<Ama pägashuntsu>> niptinqa Roma autoridäkunam rabyayanman karqan.
23Llutanta parlatsiyänan rayku tapuyanqanta musyarmi Jesús nirqan: 24<<Mä impuestu pägana qellayta rikätsiyämay. Kay qellaychö ¿pipa reträtuntan kaykan? Tsaynölla ¿pipa shutintan qellqashqa kaykan?>>
Paykunanam niyarqan: <<Mandakuq Césarpam>>.
25Jesúsnam nirqan: <<Césarpa kaqtaqa Césarta entregayay. Dios Yayapa kaqtaqa Dios Yayata entregayay>>.#20.25 Dios Yayapa kaqmi kawaynintsik kaykan.
26Runakunapa puntanchö Jesústa ni imanö pantatsiyta mana puëdirmi tsay runakuna mantsakashqa upällalla kayarqan.
Wañushqakuna kawayämunanpaq kanqanta Jesústa tapuyanqan
Mateo 22.23-33; Marcos 12.18-27
27Tsaypitanam wakin saduceukuna Jesústa tapuq aywayarqan. Paykunaqa manam creyiyantsu wañuqkuna kawayämunanpaq kanqanta.#Hech. 23.8. 28Tsaymi Jesústa tapuyarqan: <<Rabí, Moisés qellqanqanchömi nin: <Warmiyuq runa tsurinnaq wañuptin wawqinmi llumtsuynin viüdawan churakanqa. Tsaynöpam wamrankuna kaptin tsay wañuq wawqinpa tsurinkunanö kayanqa>.#Deut. 25.5. 29Kanan niyäshayki. Juk markachöshi qanchis wawqikuna kayänaq. Mayor kaqshi warmiwan churakänaq. Peru manaraq tsurin kaptinshi wañuskinaq. 30Tsayshi qepan kaq wawqinna tsay viüdawan churakänaq. [Paypis tsurin manaraq kaptinshi wañuskinaq.] 31Tsaypita mas qepan kaqnash tsay viüdawan churakänaq. Tsaynöllash llapan wawqikuna tsay viüdallawan churakäyänaq. Tsurinkuna manaraq kaptinshi llapanpis wañuskiyänaq. 32Tsaypitanash tsay viüdapis wañuskinaq. 33Wañushqakuna kawayämunqan junaqqa ¿mayqanpa warminraq kanqa, qanchis wawqiwan churakashqa kaykaptinqa?>>
34Jesúsnam nirqan: <<Kay vïdallachömi ollqupis warmipis casarayan. 35Peru wak vïdaman chäyänanpaq akrashqakuna kawaskamurqa mananam casarayanqanatsu. 36Tsaychöqa angelkunanölla karmi manana wañuyanqanatsu. Kawatsimushqa kaptinmi Dios Yayapa wamrankunana kayanqa.
37<<Wañushqakuna kawayämunanpaqmi Moiséspis qellqanqanchö musyatsimantsik. Paytam shiraka lunyaykaqchö yuripuskir Dios Yaya nirqan: <Noqaqa Abrahampa, Isaacpa y Jacobpa Diosninmi kä>.#Éxo. 3.6. 38Dios Yayaqa manam wañushqakunapa Diosnintsu, sinöqa kawaqkunapa Diosninmi. Paypaqqa wañushqakunapis kawaykäyanmi>>.
39Tsaynö niptinmi ley yachatsikuqkunapita wakin kaqkuna niyarqan: <<Rabí, ¡alläpa allitam nishkanki!>>
40Tsaypitaqa mananam ni imatapis tapuyta valorayarqannatsu.
Davidpitapis Cristo mas poderyuq kanqan
Mateo 22.41-46; Marcos 12.35-37
41Tsaypitanam Jesús nirqan: <<¿Imanirtan runakuna niyan Davidpa Tsurin Cristo kanqanta? 42Kikin Davidmi Salmo libruchö qellqarqan:
<< <Mandamaqnïtam Dios Yaya nirqan:
<<Derëcha kaq lädüman jamakamuy 43llapan chikishuqnikikunata podernikiman churamunqäyaq>> >.#Sal. 110.1.
44Kikin Davidpis mandaqnin kanqanta nikaptinqa ¿imanöpatan Cristuqa Davidpa Tsurin kanman?>>#20.44 Cristuqa manam David casta kanqantatsu nëgarqan, sinöqa Davidpita mas poderösu kanqantam nirqan.
Ley yachatsikuqkunawan fariseukuna mana alli ruraq kayanqanta Jesús ninqan
Mateo 23.1-12; Marcos 12.38-40; Lucas 11.37-54
45Llapan runakuna wiyaykäyaptinmi discïpulunkunata Jesús nirqan: 46<<Cuidädu ley yachatsikuqkunanö kayankiman. Paykunaqa allish tukurmi chaki puntanyaq shumaq llatapashqa puriyan. Pläzakunachöpis saludar respitayänantam munayan. Sinagögakunachöpis punta puntachöraqmi jamakuyan. Mikuyänanpaq qayatsiyaptinpis mësamanraqmi jamayan. 47Viüdakunapa imantapis qechuyan. Tsaynöllam santu tukurnin unayyaq Dios Yayata mañakuyan. Tsaynö kayanqanpitam Dios Yaya mana llakipaypa masraq castiganqa>>.
S'ha seleccionat:
Lucas 20: qxn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.