योहान 4
4
यीशु एने सामरी बायकु
1जेवी फरिसी होमल्या काय यीशु योहानाह रेन होवटा चेला बाणावीह एने ताह बपतीस्मा दिथे। 2पुण यीशु सोता बपतीस्मा नाह देतालो; पुण तान चेला बपतीस्मा देताला। 3जेवी यीशु होमल्यो काय फरिसी ओहली वातु केरने बाजरेनाह, तेवी यीशु यहुदियाह सोड़ीन पुशो गेलील माय जात रिनो। 4एने यीशुह सामरीया लागतो गेलील माय जाणे जोरवरी एतो।
5यीशु सामरीयान सुखार नावान एक हेयरा माय आवो, जो ता खेतान आहने हे जाह याकुब तान बेटाख युसूफाह आपेल ईतो। 6ताहरी याकुबान वावड़ी एती, एने यीशु चाली चालीन लेवाय जायेल ईतो, केरीन ती वावड़ी हेऱ्यो बोह गीयो। ज्यी वात हिराणेन टेम माय एवी।
7तुलेचबूखे ता एक सामरी बायकु पाणी बोरने आवी, एने यीशु तीह केयो, “माहु पाणी पिणेन केरता आप।” 8काहाकाय यीशुन चेला ते हेयराम रूटो वेचातो लेणेन केरता जाय रियेल एता।
9ती सामरी बायकु यीशुह केयी, “तु यहुदि हे एने मी सामरी जातीन हे, तीबी तु मार फाय पाणी काहा मांगेह?” काहाकाय यहुदि माणहे सामरी माणहा हेऱ्या काल्लोस वेवारो नाह मेलताला।#4:9 काहाकाय यहुदि माणहे सामरी जातीन माणहे वापरेल ठामलान वापेर नाह केरताला; एने यहुदि एने सामरी माय काय मेल जोल नाह।
10यीशु तीह जापाप आप्यो, “केदी तु बोगवानान दानाह जाणती, एने ज्यो बी जाणती काय ज्यो कुण हे जो माहु पाणी पिवाड़ केणार, ते तु ता फाय मांगती एने तो तुवाह जीवायीन पाणी आपतो।”
11ती बायकु यीशुह केयी, “एय मालीक, तुवा फाय पाणी काड़नेन केरता ते बादल्यो नाह सोतो, एने वावड़ी उंडी हे। ते उवतो तो जीवायीन पाणी तुवा फाय कारीन आवो? 12आमरो आबोख याकुब ज्यी वावड़ी आमुह आपेल हे; तो सोता एने तान सोरा। एने तान जेनवारे ज्योस पाणी पिताला, एने ताह रेन तु मुठो हे काय?”
13यीशु तीह जापाप आप्यो, “जो कुण बी ज्यो पाणी पिय तो पोशो तीहल्योच रेय, 14पुण मी जो जीवाणान पाणी आपुह तो पाणी जो कुण बी पिय, ताह केदी तीह नाय लागी। तो पाणी तान जीवाय माय एक वोयतो जिर बोण जाय जो जेलेमक्यो जीवाय ने केरता वोयते रेय।”
15ती बायकु यीशुह केयी, “एय मालीक, माहु तीह नाय लागी एने दाड़ीन दिह पाणी बोरने न्या आवणे नाय पोड़ी केरीन तो पाणी माहु आप दे।”
16यीशु तीह केयो, “तु जाईन तार एदम्याह न्या हादिन लाव।”
17ती यीशुह केयी, “मारो एदमी ना सोतो।”
यीशु तीह जापाप आप्यो, “तु खेरीच किथे, तारो एदमी नाह सुतो। 18काहाकाय तु पाच एदमी किरेल हे, एने जा फाय तु एवी रीथे तो बी तारो एदमी नाय मीले। ज्यो तु खेरीच कियेल हे।”
19ती बायकु यीशुह केयी, “एय मालीक, माहु लागेह काय तु जाणाव केरनार हे। 20आमरा डायडाया सामरी ज्यास बोयड़ा पोर बोगवानान बोक्ती किरेल एता, पुण तु यहुदि किथे काय जो ज्यी बोक्ती केरने जुवे तो जागो यरूशलेम माय हे।”
21यीशु तीह केयो, “एय बाय, मारी वाती पोर बुरहो केर, ओहली टेम आवीह काय तुमू हेरगावाला आबाख ने बोक्ती नाह ज्या बोयड़ा पोर नाह यरूशलेम माय किरहो। 22तुमरा सामरी माणहे जाह नाह जाणते तान बोक्ती केरतेह; पुण आमु यहुदि जाणतेह काय कुणीन बोक्ती केरनु हे, काहाकाय सुटकारो यहुदि माय रेन हे। 23पुण तो टेम आवीह, पुण एवी बी हे, जा माय खेरला बोक्ती केरनारे हेरगावाला आबाख ने बोक्ती जीव एने खेराय माय केरती, काहाकाय हेरगावालो आबोख तान केरता ओहलाच बोक्ती केरनाराह हुदेह। 24बोगवान जीव हे, एने जोरवरी हे काय तान बोक्ती केरनारे जीव एने खेराय माय बोक्ती केरी।”
25ती बायकु यीशुह केयी, “माहु मालुम हे मसी जाह ख्रिस्त केतेह तो आवण्यो हे, जेवी तो आवी, तेवी तो आमुह आखी वातु केय देय।”
26यीशु तीह जापाप आप्यो, “जो तुवा हिऱ्यो वातु केरने बाजरिनोह, तो मीच हे।”
27तुलेचबूखे यीशुन चेला आव लागा, एने बोंगलाणे बाज गीया काय यीशु ती बायकु हिऱ्यो वातु केरने बाजरिनोह। तीबी ता कुणूस तीह नाह फुशा, “तुवाह काय जुवेह?” एने नाह यीशुह फुशा, “काय तु काहा जी हिऱ्यो वातु किरेह?”
28तेवी ती बायकु तीन डोसरो ताच सोड़ीन हेयराम जाईन माणहाह केयी, 29“चालो, एक माणहाह दिखो, जो मी किरेल एती तो आखो केय दियेल, तोस मसी ते ना सुतो।” 30तेवी माणहे हेयराम रेन निकलीन यीशु फाय आवणे बाज गीया।
31चेला यीशुह केया, “एय गुरू, रूटो खायले!”
32पुण यीशु चेलाह केयो, “मार फाय खाणेन केरता ओहलो खाणो हे जाह तुमू नाह जाणते।”
33तेवी चेला एका दिहराह केया, “काय एगदो ज्यानकेरता काह खाणेन लावो एय?”
34यीशु चेलाह केयो, “मारो खाणो ज्यो हे काय जो माहु मुकलेल हे, ताह पुटे तिहे चालु एने तान काम जो माहु हुपेल हे तो पुरो केरू। 35काय तुमू नाह जाणते, ‘काटणेन केरता उंजु चार मोयना बाकी हेते?’ मी तुमूह केथु; तुमरी नेजेर टाकीन खेताह दिखो, ता काटणेन केरता पाक जायेल हेते। 36काटणार मोंजरी सापड़ावणे एने जेलेमक्यो जीवाय ने केरता पाक टुलो किरेह; काहाकाय पेरनार एने काटणार दुयू मिलीन मोंज केरी। 37काहाकाय न्याहरीह ज्यी केवायीन वात खेरीच बुहेह, ‘पेरनार दिहरो हे, एने काटणार दिहरो।’ 38मी तुमूह ता खेताम पाक काटणेन केरता मोकेलथु जा माय तुमू मेहनेत नाह किरेल सोता; पुण दिहरा मेहनेत केऱ्या एने तुमू तान मेहनेत ने पाक माय जोड़ाय गीया।”
39ता हेयरान जुलूम होवटा सामरी माणहे ती बायकुन केणा पोर रेन यीशु पोर बुरहो केऱ्या, काहाकाय ती ज्यी गोवाय दियेल एती, “तो आखो जो मी किरेल एती माहु केय दियेल ईतो।” 40केरीन सामरी माणहे यीशु फाय आवीन केया, आमु फाय रे, तेवी यीशु ता दुय दिह वोर रिनो।
41यीशुन वचन होमलीन उंजु बी जुलूम होवटा माणहे बुरहो केऱ्या। 42एने ता माणहे ती बायकुह केया, “एवी तु किथे केरीस ने आमु बुरहो नाह केरते, काहाकाय आमु सोता होमली लियेल हेते, एने जाणतेह काय ज्योस खेरीच दुनियाह सुटकारो आपणार हे।”
यीशु आदिकारीन सोराह हुदारने
43यीशु दुय दिह ता रिनो, उवतो ता रेन गेलील माय गीयो, 44#मत्ती 13:57; मरकुस 6:4; लुका 4:24काहाकाय यीशु सोता गोवाय दियेल ईतो, “जाणकाराह तान देसाम मान पान नाह जुड़ने।” 45#योहान 2:23जेवी यीशु गेलील माय आवो, तेवी गेलील वाला माणहे तान स्वागत केऱ्या, काहाकाय यरूशलेम माय तिवारान टेम माय जोला चोमेत्कार यीशु किरेल ईतो आखाह ता दिखेल एता, काहाकाय ता माणहे बी तिवाराम जायेल एता।
46 #
योहान 2:1-11
तेवी यीशु गेलील ने काना गावा माय पुशो आवो, जाहरी तो पाण्यान अंगुरान रूह बाणायेल ईतो। एने ताहरी राजान एक रोमन आदिकारी ईतो, तान बिटोख कफरनहूम हेयरा माय दुखाऱ्यो ईतो। 47तेवी यीशुह यहुदिया माय रेन गेलील माय आव रिनोह ज्यो होमलीन तो यीशु फाय जाईन रावण्या केरीन केयो, कफरनहूम चाल मारा सोराह हुदार दे, काहाकाय तान सोरो मोरने केरतालो। 48यीशु ताह केयो, “जाह वोर तुमू निसाणी एने चोमेत्कारान कामाह नाय दिखहो ताह वोर केदी बुरहो नाय किरहो।”
49राजान आदिकारी यीशुह केयो, “एय मालीक, मार सोराह मोरनेन पेल चाल।”
50यीशु ताह केयो, “जा; तारो बिटोख जीवतालोच हे!”
तो माणुह यीशुन वाती पोर बुरहो केरीन जात रिनो। 51तो जाणे बाजरियेल ईतो तेवी तान पावरे वाटे आव मिलना एने ताह केया, “तारो बिटोख वोच जायेल हे!”
52तो ताह फुशो, “कुलबुखे हाजो एवालो?” पावरे ताह केया, “काल हिराण एक वाजता तान हेरी उतेर जायेल।” 53तेवी तान आबोख सोमजी गीयो काय ज्यो तुलबूखे एनो जुलबुखे यीशु ताह कियेल ईतो, “तारो बिटोख जीवतालो हे।” तो एने तान आखो गेराणो यीशु पोर बुरहो केऱ्या।
54ज्यो दिहरो चोमेत्कार एतो, जो यीशु यहुदिया ईलाका माय रेन गेलील गावाम आवीन देखाड़ेल ईतो।
S'ha seleccionat:
योहान 4: NTNii2020
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020