San Lucas 18
18
Ejemplu gue nuila bidabi unnaba elha uxtisi lo xueda
1Jesús utixxiꞌattebanie ca biꞌini rudheti ca tisa guee ttu ejemplu nu uleꞌenna cabi satía innecabi len Tata Do Iyyabaaha, bittu edíl recabi. 2Nianna, re cabi:
—Lheꞌe ttu yiesi, udo ttu xueda bittu ria leni Tata Do Iyyabaaha, lä rapaguaban respeto ca benni lhe. 3La lheꞌe yiesiha guaba udo ttu nuila bidabi utta ttu elha utilha gueni, nianna riana lo xuedaha rána nua: “Benchi elha uxtisi quia lania nu ritilha lania na.” 4Isáru guadána, bittu uca le xuedaha unna elha uxtisi gue nuila bidabiha. Ttiaca lenla uquinna: “Masquiba lä ria lasia Tata Do Iyyabaaha, niguaba lä rapa respeto ca benni lhe 5de bittuba rudú si nuila bidabi-ni rutsitsinna neti nna unbalha elha uxtisi gueni, qui lä oditúna pasensi quia de satti belhaba ritana.”
6Jesús re:
—Gualudo nagale gue nu rá xueda bittu runi nu daa loni unna. 7Anáguaba Tata Do Iyyabaaha, ¿si bittuba unie elha uxtisi gue ca benni chi becuee anca guee rinne rulisacane rela resába? ¿Si isá lhaba aca atti ecabie guele? 8Neti ria dequi sattitte unie elha uxtisi guele. Ttiaca atti esíaya, neti Benni unbiyuu daa iyyabaaha nna ¿si gua seꞌe ca benni ria lecani neti ni yies lo yu-ni lania?
Ejemplu gue ttu fariseo lenna ttu güequixa
9Utixxiꞌaguaba Jesús attu ejemplu, belise ca nu racaquinna ancacana nu runi nu anca tsee, nianna riguꞌu niꞌacani adí ca benni. Le nna re cana:
10—Chupa ca unbiyuu güiacana atta do yotuha guannecana len Tata Do Iyyabaaha. Ttuna ancana fariseo, attuna nna ancana güequixa ridí belhi deyya Roma. 11Nu fariseo nna du ranina rinnena rulisana Tata Do Iyyabaaha rána Ben-na: “Xquixarulu, cumu bittu anca attiba adí benni, lacana ancacana ubana lhe nu bittu du ta leni lhe nu risá nu bittu anca latselani lhe. Anáguaba rutea xquixaru len cuinalu de bittu anca attiba güequixa du-na. 12Neti riguꞌu ubina lheꞌa chupa libe lheꞌe ttu xmanu, ruteguaba tsii gue de lo ttu gayua len lu gue iyába nu ridía gue sina runia lhe.” 13Ttiaca güequixaha nna idittu liba duna, niba lä reaxinna ilidha loni ugüiana iyyabaaha, sunruba rugüe lastooni de re lenina, nianna rána: “¡Tata Do Iyyabaa quia, guatúachi lelu neti, cumu anca nu te tulha gueni lolu!” 14Neti ria, güequixaha nna atti güequina deyyana lheꞌe yoꞌo gueniha nna chiba uxí Tata Do Iyyabaaha elha xen lasi gue ca tulha gue nua, ttiaca fariseo nna bittu uxíe elha xen lasi gueni. Cumu ca nu run ttaba ribequi xen lecani, eyadi gala lecani. Nu bittu run ttaba cuequi xen leniha nna tsopi leni.
Jesús rinnabe elha nabani gue ca unto
(Mt. 19:13-15; Mr. 10:13-16)
15Anáguaba richeguaba ca benni ca unto guecaniha raseꞌecana lo Jesús qui uxxúa nee iquicani innábe elha nabani guecani lo Tata Do Iyyabaaha. Ttiaca atti biláni ca biꞌini rudheti ca tisa ruleꞌe nna, bedhaca disattebacabi ca benni che ca untoha. 16Laniala nna uxi Jesús ca biꞌiniha, nianna re cabi:
—Gualgüelha ca unto-na itacana len neti, bittu usunale, cumu ca benni anca attiba ca unní liba ancacana benni rinnabia Tata Do Iyyabaaha. 17Neti nna gualíbatia rpea le, nu bittuba dhielhana innabia Tata Do Iyyabaaha-na attiba ttu unto, tsa läga aca isela nua ca benni rinnabia Tata Do Iyyabaaha.
Ttu unbiyuu te gueni unne lenna Jesús
(Mt. 19:16-30; Mr. 10:17-31)
18Ttu nu lo gue ca benni Israel unnaba tisana Jesús ráne:
—Maestro, lu ancalu ttu benni tsee. ¿Bi unia qui gatta elha nabani quia ttu tsaba?
19Jesús becabie re:
—¿Biaca neti rálu benni tsee? Cumu tsa läganu te ancana benni tsee, sunruba Tata Do Iyyabaaha anque benni tsee. 20Lu nna chiba yulu nu rá lo ca ley bocaꞌana Tata Do Iyyabaaha len Moisés: “Bittu utsá roꞌolu nu bittu anca latselalu#18:20 Éxodo 20:14, bittu uttilu benni lhe#18:20 Éxodo 10:13 bittu lhanalu lhe#18:20 Éxodo 20:15 bittu un lelu cuentaba unlu xiyya gue benni subi lhe#18:20 Éxodo 20:16 gapalu respeto tata nan guelu lhe.”#18:20 Éxodo 20:12
21Unbiyuuha nna rána:
—Iyába unní, atti ancalia güexxaha uduloa runia.
22Bienbani Jesús nu rá nua nna ráttebe:
—Reasa attu nu unlu: Bettoꞌo iyá bixa te guelu. Belhiha nna betena len ca nu bittu te gueni. Anía liba nna gatta elha tsee guelu iyyabaaha. Lania nna utátte betteno neti.
23Ttiaca atti bienin unbiyuuha nu rá Jesús, attulade udú siꞌina, cumu de texxatta gueni. 24Bilábani Jesús udú siꞌi nua nna ráttebe:
—¡Cattipa tsitsi anca eꞌeyu ca benni te guequinna acacana benni rinnabia Tata Do Iyyabaaha! 25Gaxa guaterla ttu camello lheꞌe belea do xan ttu tsioxa atti ttu benni te gueni eꞌeyuna acana benni rinnabia Tata Do Iyyabaaha.
26Ca nu bienquinna nu rá Benniha nna rácana:
—Gansi anía anca, ¿núla guadána lhána qui bittu tsia nittina ganna?
27Jesús becabie re:
—Nu bittu dhaa ca benni seꞌe yies lo yu-ni uncana, Tata Do Iyyabaaha guadábe unie nua.
28Pedro nna unnebi rábi:
—Riꞌitu nna iyába nu te guetu bocaꞌanatu, atti dattebatu len cuinalu.
29Jesús becabie re:
—Neti gualíbatia rpeale, nuxaba benni gansi lo niꞌa gue de ancana benni rinnabia Tata Do Iyyabaaha chi bedhá iquini yoꞌo gueni lhe nuila gueni lhe betsini lhe tata gueni lhe nan gueni lhe xiꞌinni lhe 30unnuha nna xxenrula nu dhína ni yies lo yu-ni, tiempu chi dabaha nna dhína elha nabani gatta ttu tsaba gueni.
Ni aca tsunna libe rixxiꞌa Jesús, lee nna uttibacane
(Mt. 20:17-19; Mr. 10:32-34)
31Jesús uchee attu atta subi ca biꞌini tsiꞌinu (12) rudheti ca tisa ruleꞌe, nianna re ca biꞌiniha:
—Gualuyurga, niba diari lheꞌe yiesi Jerusalén atta aca iyába nu daa lo ca sitsi beni ca benni uca profeta atta rixxiꞌa gue nu satea, neti Benni unbiyuu daa iyyabaaha. 32Ca benni nna utecana neti las ná ca benni dittu, uxíscana quia lhe udhaca disacana neti lhe uttuttu xencani loa lhe. 33Dequide ugüecana neti nna utticana neti, ttiaca dequide tsunna ubisa nna eyacatia eríaya atta yuꞌu ca nu yatti-na.
34Ca biꞌini tsiꞌinuha nna tsa bittu guadú lecabi, niguaba lä yucabi bi gue nua rinne Benniha, cumu de anca ca tisaha nu bittu dica sadú lecabi.
Jesús beonie ttu benni xua loni lheꞌe yiesi Jericó
(Mt. 20:29-34; Mr. 10:46-52)
35Atti chi bisína Jesús gaxxaba roꞌo yiesi Jericó, nía do ttu benni xua loni roꞌo nedaha rinnabana belhi. 36Atti bienin nu xua loniha ritexxatta benni, nianna unnaba tisattebana rána:
—¿Bilunni raca nii?
37Ca benni nna rácan na, Jesús gue Nazaretba Ben-na die ritee ni. 38Laniala uresiꞌana rána:
—¡Jesús, Benni datía David, guatúachi lelu neti!
39Ca benni neruha nna bedhaca disacana nu xua loniha qui eyaca sina, ttiaca adíla idisa uresiꞌa nua rána:
—¡Benni datía David, guatúachi lelu neti!
40Laniala nna uleda Jesús, nianna benttebe mandadu saxxícana nua. Atti chi duna lo Benniha nna unnaba tisattebe na re na:
41—¿Bi raca lelu unia guelu?
Nu xua loniha nna becabina rána:
—Benni bananie neti, raca lasia ilátia.
42Jesús becabie re na:
—¡Biláni nnanna! Cumu de güia lelu güeyacabalu nuarca beacalu.
43Snaba lania bilen nu xua loniha, lana nna diattebana denona Jesús ribequi xenna Tata Do Iyyabaaha. Iyába ca benni begüia nu ucaha lhe anáguaba ribequi xencana Tata Do Iyyabaaha.
S'ha seleccionat:
San Lucas 18: zaq
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc. All rights reserved.