Ɖúù 17
17
Nàmàǔn
(Máfíò 18:6-7, 21-22; Máà 9:42)
1Sɔ̀ìn ɓóɛ gboɛɛ, Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɖɛ ɓě nyu ké nyɔǔn-dyù dyi nàmàǔn mú kpáa, wa ɓéɖé wa ké kpá. Kɛɛ nyɔ mɔ̀ nyɔ nyu ké wa kpáà kɛɛ, gboò-wùɖù nì ɔ kɔ̃. 2Ɔ muɔ́ dyíin nɔ̀mɔ̀ùn ɓó nyɔɔ̀ bìì, ɓɛ́ wa kéɔ́ ɔ sɔ́ɔ́-kpò vɛ̀nɛ̀ ɖò ɖɔ ɓá, ɓɛ́ wa kéɔ́ ɔ dyóóɔ̀ kɔ̃ po, ké ɔ zi ɓɛ́ ɔ kéɛ nyu ɓɛ́ dyú ɓě nìà kɛ ɖò ké nàmàǔn nyuɛɛ dyí. 3Ɓě mɛ màìn ɓě mìɔùn mú.
“Nì ɖíí Kɛ́ɖɛ́ì ɖeín-sí-nyɔ̀ ɖò dyi nàmàǔn nyuín, m̀ mɛ po ɔ náún. Ɔ jǔ ké ɔ dyi wìǐn kpá ní, nìí, m̀ mɛ zĩ̀ìn ɔ nàmàǔnɔ̀ kɔ̃in. 4Ɔ jǔ ké ɔ dyi m̀ nàmàǔn-bũ̌-nyùìn-kpà mɛ̀nɛ̌ìn-sɔ̃́ nyu ɓó wé dyúáɖò xwíníín, ké ɔ dyi m̀ gbo dyi ti séín, ké ɔ dyiɛ cɛ̃ kà ɔ kpá wìǐn nyɛɛ ní, nìí, m̀ mɛ zĩ̀ìn ɔ nàmàǔnɔ̀ kɔ̃in.”
Hwìɖǐǐ-taɓa-taɓa
5Ké àpɔ́sò ɓěɔ̀ cɛ̃ɛ ma Bounɓoɔ̀ gbo, ké wa ɖá, “Nyuɛ ɓɛ́ à hwìɖǐǐ-taɓa-taɓaɔ̀ ké kɔ̃ kpá.”
6Ké Bounɓoɔ̀ ɖá, “Ɔ jǔ ké ɓě dyiɔ́ hwìɖǐǐ-taɓa-taɓa ɓɛ́ ɔ kè dyɛ̀ɛ̀-dyùà ɓɛ́ìn nyɛɛ ɓéɖé ní, nìí, ɓě ɓɛ́ìn síkímɔ̀-cù nìà kɛ gbo cɛ̃ɛ, ɓɛ́ ɓě ké níiń, ‘Sɔ̀ hwuɖu, ɓɛ́ m̀ ké m̀ mìɔùn dyóóɔ̀ kɔ̃ ɓá,’ ké ɔ mu ɓěɛ̀ wuɖuɔ̀ nyuùn.
Ɖɛ gbo-nì-nyɔ̀ ɓéɖé ɓɛ́ ɔ ké nyuɛ
7“Ɔ jǔ ké ɓě dyiɔ́ gbo-nì-nyɔ̀ ɖò ɓéɖé, ké ɔ dyiɔ́ má mɔɔ́ poɛń sɔ̀, mɔɔ ké ɔ dyiɔ́ má ɓáɖáá dyí gmɔ̀ǔn sɔ̀, ké ɔ dyiɔ́ dyi ní, ɓě cɛ̃ɛ ɔ gbo, ké ɓě ɖá, ‘Dyi wàɖà, ɓɛ́ m̀ ké dyi kò, ɓɛ́ m̀ ké ɖɛ ɖiì?’ 8Gbào, ɓě ní cɛ̃ɛ náa, kɛɛ ɓě cɛ̃ɛ, ké ɓě ɖá, ‘Dyéìn ní ɖii-ɖɛ̀ɔ̀ ti. Jìnììn m̀ mìɔùn, ɓɛ́ m̀ ké ḿ fòìn, ɓɛ́ ḿ ké ɖɛ ɖi, ɓɛ́ ḿ ké náa hwɔ hwɛ̀. Ɔ ɖǎ ná nìǐn, nìí, mɔ̀ùn mɛ ɖi ɖɛ, ɓɛ́ m̀ ké ná.’ 9Gbo-nì-ɓǎɔ̀ po ɔ gbo-nì-nyɔ̀ɔ̀ zùo ɓó ɖɛ ɔ cɛ̃ ɔ gbo ɓɛ́ ɔ ké nyuɛɛ nyu jèè? 10Kǎà ɓě mɔ̀ùn nì ɖekè. Ɔ jǔ ké ɓě dyi ɖɛ séín ɓě ɓɛ́ wa ɖá ɓě mɛ nyuɛɛ nyuɛ hwɔ ní, nìí, ɓě mɛ ɖá, ‘À mɔ̀ gbo-nì-nyɔ̀ se ɖɛ kpa ɓě. À ɖǎ ɖɛ ɓɛ́ à ɓéɖé ɓɛ́ à kéɔ́ nyuɛɛ nyu ɖòùn pū.’ ”
Jízɛ̀ kánáìn caà-nyɔ̀ ɓaɖa-bùè ɓě dyi
11Ti ɓɛ́ Jízɛ̀ nì ma Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń nyɛɛ, ɔ zĩ̀ìn ma ɖé Sɛ̀mɛ́ɖìà-ɓòɖòɔ̀ kè Gáɖàɖíì-ɓòɖòɔ̀ pṹa. 12Ɔ nì ma hwɔɖɔ-dyù ɖò dyáuń, ké ɔ kè caà-nyɔ̀ ɓaɖa-bùè ɓě gmɔ̌ìn ma. Wa nyànà ma ɖé nya dyi vɛ̃in, 13ké wa páná ma mú, ké wa ɖá, “Jízɛ̀, nyɔ-wuɖuí-kɔ̃̀-nyɔ̀, dyé à wìǐn.”
14Ti ɓɛ́ Jízɛ̀ dyé ma wa kɛɛ, ɔ cɛ̃ɛ ma wa gbo, ké ɔ ɖá, “Ɓě mu, ɓɛ́ ɓě ké ɓě mìɔùn sáa-zà-nyɔ̀ ɓěɔ̀ dyí tɛ̀mɛ̀ìn.”
Ti wa nì ma muɛń nyɛɛ, púɛɛ, wa káná ma dyi cá. 15Ti ɓɛ́ waà nyɔ dyúáɖò dyéɛ ma kà ɔ ɖǎ ma dyi kánáa, ɔ kɔ́ìn ma ɖe, ké ɔ kpa ma Gèɖèpɔ́ɔ̀ ɓàìn ɖé wuɖu zoo mú. 16Ɔ mu, ké ɔ ɓùɖùìn ma ɓó Jízɛ̀ ɓo zɔ̃̌, ké ɔ po ma ɔ zùo. Ɔ mɔ̀ ma Sɛ̀mɛ́ɖìà-nyɔ̀. 17Ké Jízɛ̀ ɖá, “Má, ɓě nyɔ-kpò ɓaɖa-bùè mɔ̀ nyɔ kánáɔ́ kà dyiɛ̀e? Dɛ̌ nyɔ-kpò mɛ̀nɛ̌ìn-hĩinyɛ tɔ̀ɔ̀ nìɛ́? 18Wa mɔ̀ùn seɔ́ ɖe kɔ́ìn ɓɛ́ìn, ɓɛ́ wa kéɔ́ Gèɖèpɔ́ɔ̀ ɓàìn-ɓàìn nyí ɖekèè? Dyéɛ, nyɔ seà ɓóɖóɛ̀ dyú ɖò kɛɛ ɖòùn mɔ̀ nyɔ dyià kɛ̀.” 19Ké Jízɛ̀ cɛ̃ɛ ma ɔ gbo, ké ɔ ɖá, “Sɔ̀ dyí, ɓɛ́ m̀ ké m̀ ɖɛ mu. Nì hwìɖǐǐ-taɓa-taɓaɔ̀ ɖǎ m̀ dyi kánáìn.”
Gèɖèpɔ́ɔ̀ kã́á-ɓòɖòɔ̀ dyi-dyi
(Máfíò 24:23-28, 37-41)
20Wé ɖòɛ̀ ɓaɖaa, Fáɖòsíì-nyɔ̀ ɓěɔ̀ ɖíɛ́ ɓě diè ma Jízɛ̀ dyi ɓá ti ɓɛ́ Gèɖèpɔ́ɔ̀ kã́á-ɓòɖòɔ̀ mu ma dyiìn nyɛɛ jè dyí. Ké ɔ zà ma ɖé wuɖu, ké ɔ ɖá, “Gèɖèpɔ́ɔ̀ kã́á-ɓòɖòɔ̀ ní dyi, ké nyɔǔn ní dyéɛ. 21Nyɔ ɖò seɛ cɛ̃ɛ́ mu, ɓɛ́ ɔ ké níiń, ‘Gmɔ̀ nɔ̄, kà ɔ nìɛ,’ mɔɔ ‘Gmɔ̀ ɖéa, ɔ nì ɖéɛ̀.’ Sepóɛɖé Gèɖèpɔ́ɔ̀ kã́á-ɓòɖòɔ̀ nì ɖé ɓě mú.”
22Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ti ɖò nì dyiɛń, ké ɓě mu mɔ́ùn ɓɛ́ ɓě ké mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ wé ɓěɔ̀ ɖò dyé. Kɛɛ ɓě seɛ dyéɛ mu. 23Wa muɛ ɓě gbo cɛ̃ìn, ɓɛ́ wa ké níiń, ‘Gmɔ̀ ɖéa’ mɔɔ ‘Gmɔ̀ nɔ̄.’ Ɓě ní kpa ɔ jè dyi mɔ́ɔ. 24Sepóɛɖé kà wɛ́ɖɛ́-wɛ́ɖɛ́ poà, ké ce fã̀ìn kà dyɔɔ̀ gànáɔ̀ dyíin sɔ̀ìn wáká ɖò gbo, ké ɖé ɔ wáká tɔ̀ɔ̀ gbo muɛɛ, kà dyúáɖòɔ̀ kǎà mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu dyiìn ɓó ní wéɔ̀ ɓaɖa. 25Kɛɛ kĩ́ín-kĩ́ín nyɛɛ, ḿ ɓéɖé ḿ ké gǎ dyé mìɔ, ké nyɔ ɓě nìà kàǔn wɛ̃ɛ ɓéɖé ɓɛ́ wa ké ḿ ɓɔ́. 26Kà ɔ nì ma kà ɖé Nóà nììn tiín nyɛɛ, kǎà ɔ mu nììn ɖé mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ nììn wé ɓěɔ̀ ɓaɖa. 27Hwɛ̀ ɓɛ́ ní-tòɔ̀ ké ma dyiɛɛ, nyɔǔn ɓě nì ma ɖɛ ɖiɛń, ké wa nì ma náuń, ké gàa kè màa nì ma dyi kpɔ̃ǐn, ké ɔ dyɛ̀ìn ma wé jɛ́ɛ́ kɔ̃̀ xwíníín ɓɛ́ Nóà dyá ma kà méèɔ̀ múɛɛ hwɛ̀. Ké ní-tòɔ̀ dyi ma, ké ɔ ɖáɓá ma nyɔǔn séín nyɛ̀nɛ̀ɛ̀. 28Ɔ mu nììn kà ɔ nì ma kà Ɖáà nììn tiín nyɛ. Nyɔǔn ɓě nì ma ɖɛ ɖiɛń, ké wa nì ma náuń. Wa nì ma ɖɛ dɔ̃uń, ké wa nì ma ɖɛ peɖeɛń, ké wa nì ma ɖɛ ɓáuń, ké wa nì ma gbǒ ɓě poɛń. 29Kɛɛ wé kɔ̃̀ xwíníín ɓɛ́ Ɖáà sɔ̀ ma Sáɖɔ̀ùn-hwɔ̀ɖɔ̀ɔ̀ múɛɛ, sɔ́fà-sɔ̀ɔ̌ ɓɛ́ ɔ nì ma kà nyɛ-kɛ̀nɛ̀ nìà kɛɛ sɔ̀ ma ɖé dyɔún kà ní ɖaɓaà kɛ, ké ɔ ɖáɓá ma wa nyɛ̀nɛ̀ɛ̀. 30Kǎà ɔ mu nììn ɓó wé kɔ̃̀ ɓaɖa ɓɛ́ mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu xwáɖáún wóɖóùn wɛ̃.
31“Nyɔ mɔ̀ nyɔ nì ɖé ɔ gbǒɔ̀ dúún ɓó wéa ɓaɖaa, ɔ ní ɖá ɔ ké ɖé ɔ gbǒɔ̀ xwíníín mu, ɓɛ́ ɔ ké ɖé ɔ ɖɛ ɓě nìà ɖé kɛɛ ɖò zà. Kà dyúáɖòɔ̀ kǎà nyɔ mɔ̀ nyɔ nì ɖé ɔ ɓíɖí-geɖeín nyɛɛ, ɔ ní ɖá ɓɛ́ ɔ ké ɔ ɓíɖí-taún ɖe kɔ́ìn. 32Ɖáà gmààɔ̀ jè mɛ nì ɓě hwìɖǐi. 33Nyɔ mɔ̀ nyɔ ɓɛ́ ɔ vɔ̃ ɓɛ́ ɔ ké ɔ fɛ̀ɛ̀ɔ̀ póìn nyɛɛ, ɔ fɛ̀ɛ̀ɔ̀ mu ɔ xwa sɔ̀ùn. Ké nyɔ mɔ̀ nyɔ ɓɛ́ ɔ fɛ̀ɛ̀ɔ̀ mu ɔ xwa sɔ̀ùn wɛ̃ɛ, ɔ muɛ póìn. 34Ḿ cɛ̃ɛ ɓě gbo, ɓó máaún nìà ɓó kɛɛ ɓaɖaa, nyɔ sɔ̃́ mu kɔ̃-pɛ̃́-ɖɛ̀ dyúáɖò kɔ̃ nììn. Dyúáɖò mu ɓó sɔ̀ùn, ké dyúáɖò mu ɓó sèìn. 35Màa sɔ̃́ mu dà dyúáɖò ɖɛ ɖuɛń nììn. Dyúáɖò mu ɓó sɔ̀ùn, ké dyúáɖò mu ɓó sèìn. [ 36Gàa sɔ̃́ mu ɖé geɖeín nììn. Dyúáɖò mu ɓó sɔ̀ùn, ké dyúáɖò mu ɓó sèìn.”]
37Hwɛ̀ ké ɔ ɖeín-nà-nyɔ̀ ɓěɔ̀ diè ma ɔ dyi, ké wa ɖá, “Ɔ mɔ̀ dɛ̌ kɛ́, Bounɓo?”
Ké Jízɛ̀ cɛ̃ɛ ma wa gbo, ké ɔ ɖá, “Dɛ̀ kã̀ìn séín ɓɛ́ xwɛ́ nì kɛɛ, ɖéɛ̀ hwĩ́ín-hwã ɓěɔ̀ poìn dyí. Kà dyúáɖòɔ̀ kǎà dyí-tɛ̀mɛ̀ìn-ɖɛ̀ ɓěɛ̀ cɛ̃ ɓóɖó-kpàà mánáín hwɛ̀ jè.”
S'ha seleccionat:
Ɖúù 17: ƁB02
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bassa Bible © Bible Society Liberia, 2002.