Ɖúù 20
20
Wa diè ɖɛi ɓá Jízɛ̀ɛ̀ kpéɔ̀ jè dyí
(Máfíò 21:23-27; Máà 11:27-33)
1Ti ɖòɛ̀ ɓaɖaa, ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ mú, ké ɔ nì ma nyɔ ɓěɔ̀ ɖɛ tɛ̀mɛ̀ǐn, ké ɔ nì ma bɔ̃̌ nɔ̀mɔ̀ dyíinɔ̀ cɛ̃iń nyɛɛ, sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè Júù-nyɔ̀ vɛ̀nɛ̀ ɓěɔ̀ dyi ma, 2ké wa diè ma ɔ dyi, ké wa ɖá, “Kpéɔ̀ nyɛ́ m̀ ɓéɖé ɓɛ́ m̀ dyià ɖɛ ɓě nìà kɛ nyuɛń nì kɛ́? Nyɛ́ mɔ̀ nyɔ nyí m̀ kpé ɓɛ́ m̀ ké wa nyuɛ́? Cɛ̃ɛ à gbo.”
3Ké Jízɛ̀ zà ma ɖé wuɖu, ké ɔ ɖá, “Mɔ́ún mu ɓě ɖɛ ɖò dyi dièìn ɖekè. Ɓě cɛ̃ɛ ḿ gbo. 4Dɛ̌ Jɔ̃́ɔ́ zà ma ɔ nyɔ-níɔ-po-kpèɔ̀ kɛ́? Ɔ sɔ̀ìn ɖé Gèɖèpɔ́ɔ̀ gboò, mɔɔ ɔ sɔ̀ìn ɖé nyɔǔn-dyù gboò?”
5Ké wa cɛ̃ìn cɛ̃̀ìn ma gbo, ké wa ɖá, “À dyiɛ cɛ̃, ké à dyi níiń, ‘Ɔ sɔ̀ìn ɖé Gèɖèpɔ́ɔ̀ gbo’ ní, nìí, ɔ muɛ cɛ̃ìn, ɓɛ́ ɔ ké níiń, ‘Ɖɛ́ kɔ̃̀ jè ɓě se ma kà ɔ wuɖuɔ̀ jǎà poɛ́?’ 6Mɔɔ à dyiɛ cɛ̃, ké à dyi níiń, ‘Ɔ sɔ̀ìn ɖé nyɔǔn gbo’ ní, nìí, nyɔ séín ɓěɔ̀ mu à sɔ́ɔ́-kpò dyi taɓaìn, sepóɛɖé wa dyuòɛ̀ dyí jɛ́ɛ́ kà ɓɛ́ Jɔ̃́ɔ́ mɔ̀ ma kpáá-ɖɛ̀-cɛ̃-nyɔ̀ kɛ.” 7Ɔ jèɛɛ, wa zà ma ɖé wuɖu, ké wa ɖá, “À se dɛ̀ ɔ sɔ̀ìn nyɛɛ dyuò.”
8Ké Jízɛ̀ mɔ̀ùn cɛ̃ɛ ma wa gbo, ké ɔ ɖá, “Ɔ dyi ná nìǐn, nìí, ḿ se dɛ̀ ḿ zà kpé ɓɛ́ ḿ dyià ɖɛ ɓěɛ̀ nyuɛɛ ɓě gbo cɛ̃ɛ́ mu.”
Nɔ́ɔ́ ɓá nyɔ ɓě ɓɛ́ wa sè ma géɖéè-gbǎ ɖò gboɛɛ jè dyíɛ
(Máfíò 21:33-46; Máà 12:1-12)
9Ké Jízɛ̀ po ma nyɔ ɓěɔ̀ nɔ́ɔ́ nìà kɛ gbo, ké ɔ ɖá, “Gàa ɖò ɓá ma géɖéè, ké ɔ mɔ̀ ma géɖéè-gbǎ. Ké ɔ sè ma geɖeɔ̀ nyɔǔn ɓě gbo, ɓɛ́ wa kéɛ dyí gmɔ̀. Ké ɔ sɔ̀ dyí, ké ɔ mu ma ɓóɖó vɛ̃in ɖò kɔ̃, ké ɔ hwèɖèìn ma ɖé. 10Ti ɓɛ́ géɖéèɔ̀ kpã́-tì nyini ma ɓóɛɛ, ɔ ɖoɓo ma ɔ gbo-nì-nyɔ̀ ɓěɔ̀ ɖò ɖé nyɔ ɓě nì ma kà géɖéè-gbǎɔ̀ dyí gmɔ̀ǔn wɛ̃ɛ gbo, ɓɛ́ wa ké ɔ géɖéèɔ̀ ɖò gbo ɖoɓo. Kɛɛ géɖéè-gbǎɔ̀ dyí-gmɔ̀-nyɔ̀ ɓěɔ̀ ɓaɖa ma ɔ, ké wa fɔ̀nɔ̀ìn ma ɔ xwa, ké wa ɖoɓo ma ɔ ɖe. 11Ké gàaɔ̀ ɖoɓo ma ɖé gbo-nì-nyɔ̀ ɖò ɖe. Wa ɓaɖa ɔ mɔ̀ùn ɖekè, ké wa nyìnììn ma ɔ bũ̌in dɛ̃-kà, ké wa fɔ̀nɔ̀ìn ma ɔ xwa, ké wa ɖoɓo ma ɔ ɖe. 12Ké ɔ ɖoɓo ma ɖé gbo-nì-nyɔ̀ɔ̀ tã nììn. Wa puà ɔ mɔ̀ùn ɖekè, ké wa kúmú ma ɔ. 13Púɛɛ, nyɔ kɔ̃̀à géɖéè-gbǎɔ̀ kɛɛ ɖá, ‘Ɖɛ́ ḿ mɛ nyuɛ́? Ní mu ní hwòɖǒ-kɔ̃-dè-dyùɔ̀ ɖé tòùn. Ti ɖòɛ̀ ɓaɖaín, wa mu ɔ kpéín dyéìn.’ 14Kɛɛ ti ɓɛ́ géɖéè-gbǎɔ̀ dyí-gmɔ̀-nyɔ̀ ɓěɔ̀ dyé ma ɔ dyúɔ̀ kɛɛ, wa cɛ̃ìn cɛ̃̀ìn ma gbo, ké wa ɖá, ‘Nyɔ nìà kɛ mɔ̀ nyɔ mu ɔ ɓǎà kɔ̃̀ɔ̀-ɖɛ̀ ɓěɔ̀ dúí sèìn. Ɓěà ɖáɓá ɔ, ɓɛ́ ɓěà ké kɔ̃̀ɔ̀-ɖɛ̀ ɓě ɓɛ́ ɔ kéà dúí sèɛɛ dyí ɖú.’ 15Ɔ jèɛɛ, wa zà ma ɔ ɖé géɖéè-gbǎɔ̀ mú, ké wa ɖáɓá ma ɔ.
“Ɖɛ́ nyɔ kɔ̃̀à géɖéè-gbǎɔ̀ kɛɛ mu wa bũ̌ nyuùn wɛ̃́? 16Ɔ mu dyiìn, ɓɛ́ ɔ ké nyɔ ɓě gmɔ̀à géɖéè-gbǎɔ̀ dyíɛɛ ɖáɓá, ɓɛ́ ɔ ké géɖéè-gbǎɔ̀ nyɔ kà kò ɖò nyí, ɓɛ́ wa kéɛ dyí gmɔ̀.”
Ti nyɔ ɓěɔ̀ wɔ̃́ ma ɖɛ ɓě nìà kɛɛ, wa ɖá, “Ɔ se ná nìɛ̀ ɓɛ́ìn fɔɔ.”
17Kɛɛ Jízɛ̀ gmɔ̀ ma nyɔ ɓěɔ̀ dya, ké ɔ diè ma wa dyi, ké ɔ ɖá, “Nìí, ɖɛ́ mɔ̀ Gèɖèpɔ́ɔ̀-wùɖùɔ̀ nyɔ nìà kɛ xwíníín nyɛ́? Ɔ mɔ̀,
‘Sɔ́ɔ́-kpò ɓɛ́ poo-ɖɛ̀ po-nyɔ̀ ɓěɔ̀ ɓɔ́ ma kɛɛ ɖǎ gbǒɔ̀ gãún-sɔ̀ɔ̌ mú zɛ̃̀ìn.’
18Nyɔ séín ɓɛ́ wa mu sɔ́ɔ́-kpò nìà kɛ kɔ̃in ɓùɖùìn nyɛɛ, wa mu dyi jɛɖɛìn. Kɛɛ ɔ jǔ ké sɔ́ɔ́-kpòɔ̀ dyi nyɔ ɖò kɔ̃ kpáín, nìí, ɔ mu ɔ dǔùn.”
Dyi-diè-ɖɛ̀ ɓá tácì pɛ́ɛ̀ jè dyíɛ
(Máfíò 22:15-22; Máà 12:13-17)
19Ɓó tia ɓaɖaa, Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè sáa-zà-nyɔ̀ kpa ɖɛ ɓěɔ̀ mɔ́ ɓɛ́ wa ké ma Jízɛ̀ kpɔ̃, sepóɛɖé wa dyuòɛ̀ dyí kà nɔ́ɔ́ ɔ poà kɛɛ ɓá wa dyíɛ. Kɛɛ wa fɛ̃̀ìn ma nyɔ ɓěɔ̀ ní. 20Ɔ jèɛɛ, wa nì ma ti wa ké ma ɔ kpɔ̃ɛɛ dyi mɔ́uń. Wa nyí ma gàa ɖíɛ́ ɓě wíɖí, ɓɛ́ wa ké dyéɖéi nyu, ɓɛ́ ɔ kéɛ nyɔǔn dyí tɛ̀mɛ̀ìn kà wa mɔ̀ ma jǎà-nyɔ̀ ɓěɛ. Ké wa ɖoɓo ma wa, ɓɛ́ wa ké ma Jízɛ̀ ɔ mìɔùn nììn wuɖu ɓěɔ̀ mú kpɔ̃̀ìn, ɓɛ́ wa ké ma ɔ gɔ̌mànàɔ̀ xwáɖáún zàìn, ɓɛ́ ɔ ké ɔ xwaún nì. 21Nyɔ ɓě nìà kɛ cɛ̃ɛ ma Jízɛ̀ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à dyuòɛ̀ kà ɖɛ m̀ cɛ̃ɛ ɔ kè ɖɛ m̀ tɛ̀mɛ̀ìn nyɔǔn wɛ̃ɛ sɛ́ɖɛ́ìn dyíɛ. M̀ se nyɔ ɖò kpéín dyé mìɔ, ɓɛ́ ɔ ké nyɔ tɔ̀ɔ̀ ɖò mɔ̀ùn dyí zi, kɛɛ m̀ tɛ̀mɛ̀ìn nyɔǔn hwìè ɓě ɓɛ́ Gèɖèpɔ́ɔ̀ mɔ́ nyɔǔn ké kpaa ɖé jǎà mú. 22Ɔ nɔ̀mɔ̀ dyíin ɓɛ́ à ké Síízɛ̀ mɔ̀à Wóɖóùn-kã̀ǎɔ̀ kɛɛ tácì dyéɖéín pɛ́ɛ̀ìn, mɔɔ ɔ se dyíin nɔ̀mɔ̀ɔ̀?”
23Kɛɛ Jízɛ̀ dyé ma waà gbá-gbáɔ̀, ké ɔ cɛ̃ɛ ma wa gbo, ké ɔ ɖá, 24“Tɛ̀mɛ̀ìn ḿ wíɖí-pĩ̀à ɖò dyí. Nyɛ́ kɔ̃̀ dú-ɓò nìà wíɖí-pĩ̀àɛ̀ kɔ̃ kɛ́? Ké nyɛ́ ɖɛ ɓě céèà ɓó ɔ kɔ̃ɛɛ ɓá dyíɛ́?”
Ké wa ɖá, “Ɔ mɔ̀ Síízɛ̀e.”
25Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɓě nyí ɖɛ Síízɛ̀ kɔ̃̀ kɛɛ Síízɛ̀, ké ɓě nyí ɖɛ Gèɖèpɔ́ɔ̀ kɔ̃̀ kɛɛ Gèɖèpɔ́ɔ̀.”
26Ké wa se ma ɔ kpɔ̃ɔ ɓɛ́ìn ɖé ɖɛ ɓěɔ̀ ɖò mú ɖé nyɔ ɓěɔ̀ dyúa. Wa nì ma gìɖìǐ, sepóɛɖé wa giniìn ma dyi ɓó kà ɔ nyu ma ɖé wuɖu zàà kɛɛ jè.
Dyi-diè-ɖɛ̀ ɓá gĩɔ wóɖó jè dyíɛ
(Máfíò 22:23-33; Máà 12:18-27)
27Wé ɖòɛ̀ ɓaɖaa, Sádyùsíì-nyɔ̀ ɖíɛ́ ɓě dyi ma Jízɛ̀ gbo. Wa mɔ̀ nyɔ ɓě cɛ̃à kà ɓɛ́ nyɔ ɓě ɖǎà mɛ́ kɛɛ se gĩɔ wóɖóɛ ɓɛ́ìn ɖeɛ̀. Wa diè ma ɔ dyi, ké wa ɖá, 28“Nyɔ-ɖɛ-tɛ̀mɛ̀ìn-nyɔ̀, Mózèɛ̀ gmaɔ̀ ɖá gàa ɖò dyi mɛ́, ké ɔ gmàà dyi ɓíɖíi sè, ké gàaɔ̀ se dyú ɖò ɓéɖé ní, nìí, gàaɔ̀ ɖíí-gàà mɛ kpɔ̃ ɔ gmààɔ̀ dyi, ɓɛ́ ɔ kèɔ̀ kè ké dyú wóɖóìn ɖé ɔ ɖíí-gàà mɛ́à kɛɛ nyɛ́nɛ́ mú. 29Ɖíí-gàà mɛ̀nɛ̌ìn-sɔ̃́ nì zɔ̃̌ɔ̀ ɓó. Waà ɖíí-gàà vɛ̀nɛ̀ kpɔ̃ ma nyɔ́nɔ́ dyi. Ké ti waà ɖíí-gààɔ̀ mɛ́ ma kɛɛ, ɔ se ma dyú ɖò ɓíɖíi sè. 30Ké nyɔ kɔ ma ɓó waà ɖíí-gàà vɛ̀nɛ̀ɔ̀ gbo dyíɛɛ kpɔ̃ ma màaɔ̀ dyi. Ké ɔ mɔ̀ùn mɛ́ ɖe, ké ɔ kè màaɔ̀ se dyú ɖò ɓéɖé. 31Wa nyɔ vɛ̀nɛ̀ tã nììnɔ̀ nì ma ná ɖekè. Ɖɛ dyúáɖòɔ̀ kpá ma wa mɛ̀nɛ̌ìn-sɔ̃́ɔ̀ gbo. Wa mɛ́ ma, ké wa se ma dyú ɖò ɓíɖíi sè. 32Ti ɓɛ́ wa séín ɖǎ ma mɛ́ɛ, màaɔ̀ mɔ̀ùn mɛ́ ma ɖekè. 33Ɔ jèɛɛ, ti ɓɛ́ Gèɖèpɔ́ɔ̀ muà nyɔ ɓě ɖǎà mɛ́ɛ gĩɔ zàùn wɛ̃ɛ, nyɛ́ kɔ̃̀ gmàà màaɔ̀ mu jǔùn wɛ̃́? Sepóɛɖé màaɔ̀ ɖǎ ma wa ɖò-ɖòɛ̀ gmàà jǔ nyɛ̀nɛ̀ɛ̀.”
34Ké Jízɛ̀ jǔ ma wa gɔ̃̌, ké ɔ ɖá, “Gàa kè màa ɓě nìà kàǔn wɛ̃ɛ kpɔ̃ìn dyi. 35Kɛɛ gàa kè màa ɓě ɓɛ́ wa kpa ɖɛ ɓɛ́ wa ké gĩɔ wóɖó, ɓɛ́ wa ké cĩ́ ɓó ti nìà ɖé dyúa kɛ múɛɛ, wa se dyi kpɔ̃ǐn mu ɓó tia ɓaɖa. 36Wa muá nììn kà ínjà ɓě nìà kɛ, ké wa se mɛ́ɛ mu. Wa mɔ̀ Gèɖèpɔ́ɔ̀ dyú ɓě, sepóɛɖé wa mu gĩɔ wóɖóùn jè. 37Ké Mózè tɛ̀mɛ̀ìn à dyí kà ɓɛ́ nyɔ ɓě ɖǎà mɛ́ɛ mu gĩɔ wóɖóùn wɛ̃. Ɖé Gèɖèpɔ́ɔ̀-cèè-ɖɛ̀ɔ̀ dɛ̀ ɓɛ́ ɔ cɛ̃à ɖɛ ɓá cu-gbɔ̌ɔ̀ jè dyíɛ múɛɛ, Mózè cɛ̃ Bounɓoɔ̀ jè ɖé kà ɔ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀ kɛ. 38Ɔ se gĩɔ-nyɔ̀ ɓěɛ̀ Gèɖèpɔ́ɔ̀. Ɔ mɔ̀ Gèɖèpɔ́ɔ̀ ɓó nyɔ ɓě nì cĩ́ɛń nyɛɛ bìì, sepóɛɖé ɖé ɔ gboɛɛ, nyɔǔn séín nì cĩ́ɛń.”
39Ké Gèɖèpɔ́ɔ̀-cèè-ɖɛ̀ dyuò-nyɔ̀ ɖíɛ́ ɓě ɖá, “Nyɔ-ɖɛ-tɛ̀mɛ̀ìn-nyɔ̀, m̀ ɖǎ ɖé wuɖu zà nɔ̀mɔ̀ dyíin.” 40Sepóɛɖé wa fɛ̃̀ìn ɓɛ́ wa ké ma Jízɛ̀ ɖɛ ɖò dyi diè ɖe.
Dyi-diè-ɖɛ̀ ɓá Kɛ́ɖɛ́ìɔ̀ jè dyíɛ
(Máfíò 22:41-46; Máà 12:35-37)
41Ɓó ti dyúáɖòɔ̀ múɛɛ, Jízɛ̀ diè ma wa dyi, ké ɔ ɖá, “Xwɛ̌ wa dyiɛ cɛ̃ kà ɓɛ́ Kɛ́ɖɛ́ìɔ̀ mɔ̀ Dèɓéɛ̀ dyú kɛ́? 42Sepóɛɖé Dèɓé mìɔùn cɛ̃ɛ ɖé Wɛ́ɖɛ́-cèè-ɖɛ̀ɔ̀ mú, ké ɔ ɖá,
‘Bounɓoɔ̀ cɛ̃ɛ ma ní wuɖuí-kɔ̃̀-nyɔ̀ɔ̀ gbo, ké ɔ ɖá,
“Dèɖě dà ḿ ɖiaún dya,
43ɓɛ́ ḿ ké nì mú-nyɛ́-nyɔ̀ ɓěɔ̀ nì ɓo-kɔ̃-síìn-ɖɛ̀ mú nyu hwɛ̀.” ’
44Dèɓé mɔ̀ùn ɖáìn ma ɔ wuɖuí-kɔ̃̀-nyɔ̀. Nìí, xwɛ̌ Kɛ́ɖɛ́ìɔ̀ ɓɛ́ìn ɔ dyú jǔɛ kɛ́?”
Jízɛ̀ po nyɔ ɓěɔ̀ náún ɓá Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ jè dyí
(Máfíò 23:1-36; Máà 12:38-40)
45Ti ɓɛ́ nyɔ kúɖúú ɓěɔ̀ nì ma Jízɛ̀ wuɖu ɓěɔ̀ ɖùǔ gbo tòɛ̌n nyɛɛ, ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, 46“Ɓě mɛ ma mú ɓó Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ jè. Wa mɔ̀ nyɔ ɓě ɖɛ̀ɓɛ̀à mú ɓɛ́ wa kéà wáɖá-ɖɔ̀ zɛin mú po, ɓɛ́ wa kéà dyi téɛ. Wa ɖɛ̀ɓɛ̀ ɓɛ́ nyɔǔn ké wa nyíɔún zà ɖé kpéín-dyé-dyé mú, ɖé ɖɛ-pèɖèìn-naín ɓěɔ̀. Wa ɖɛ̀ɓɛ̀ ɓɛ́ wa ké dà kpa ɖɛ ɓě nì ɖé waà cɔ́cì-gbò ɓěɔ̀ múɛɛ kò. Wa dyi hwɔ kɔ̃ mu ní, wa ɖɛ̀ɓɛ̀ ɓɛ́ wa ké dà kpa ɖɛɔ̀ kò. 47Wa kpɔ̃ jɔ̌ɔ̀-màà ɓě ɖɛ ɓě xwai. Wa hwèɖèìn ɓaàǔn, kɛɛ wa nyu dyéɖéi. Ɔ jèɛɛ, zaa ɓɛ́ ɔ mu wa kpɔ̃ùn wɛ̃ɛ mu dyí ɓúáùn mìɔ.”
S'ha seleccionat:
Ɖúù 20: ƁB02
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bassa Bible © Bible Society Liberia, 2002.