Ɖúù 22
22
Wa sɔ́ Jízɛ̀
(Máfíò 26:1-5; Máà 14:1-2, 10-11; Jɔ̃́ɔ́ 11:45-53)
1Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ tiɔ̀ ɖǎ ma dyi xwɛ̃́ìn. Ɔ mɔ̀ hwɔ ɓɛ́ wa ɖáìn Zĩ̀ìn-Kɔ̃in-hwɔ̀ɔ̀ kɛ. 2Ɓó tia ɓaɖaa, sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nì ma Jízɛ̀ ɖáɓá-hwìè dyi mɔ́uń, sepóɛɖé wa fɛ̃̀ìn ma nyɔ ɓěɔ̀ ní.
Júdà mɔ́ ɓɛ́ ɔ ké Jízɛ̀ peɖe
(Máfíò 26:14-16; Máà 14:10-11)
3Ké Sétɔ̃̀ dyá ma ɖé Júdà ɓɛ́ wa ɖáìn Ɛ́sìkáɖìɔ̀ kɛɛ mú. Ɔ mɔ̀ ma ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖò. 4Júdà mu, ké ɔ kè sáa-zà-nyɔ̀ kpa ɖɛ ɓěɔ̀ ɔ kè Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ wùɖù ma ɓó kà ɔ ké ma Jízɛ̀ wa xwáɖáún zàìn nyuɛɛ jè. 5Wa kpá ma múàǔn, ké wa wɔ̃́ ɓɛ́ wa ké ma ɔ wíɖí nyí. 6Ɔ jèɛɛ, Júdà wɔ̃́ ma ké ɔ mɔ́ ma hwìè kɔ̃̀ xwíníín ɓɛ́ ɔ ké ma Jízɛ̀ wa xwáɖáún zàìn, ɓɛ́ nyɔ ɓěɔ̀ ké se ma ɔ jè dyuòɛɛ dyi.
Jízɛ̀ kè ɔ ɖeín-nà-nyɔ̀ ɓěɔ̀ naɓaà Zĩ̀ìn-Kɔ̃in-hwɔ̀ɔ̀ jè
(Máfíò 26:17-25; Máà 14:12-21; Jɔ̃́ɔ́ 13:21-30)
7Ti ɓɛ́ Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ wé kɔ̃̀ ɓaɖa ɓɛ́ wa ɖáɓáà ɓáɖáá-dyù ɓě ɓá Zĩ̀ìn-Kɔ̃in-hwɔ̀ɔ̀ jè dyíɛ kɛɛ nyini ma ɓóɛɛ, 8Jízɛ̀ ɖoɓo ma Píɖɛ̀ kè Jɔ̃́ɔ́, ké ɔ ɖá, “Ɓě mu, ɓɛ́ ɓě ké ɖii-ɖɛ̀ɔ̀ naɓaà, ɓɛ́ ɓěà ké Zĩ̀ìn-Kɔ̃in-hwɔ̀ɔ̀ ɖi.”
9Ké wa diè ma ɔ dyi, ké wa ɖá, “Dɛ̌ m̀ mɔ́ ɓɛ́ à ké hwɔɔ̀ naɓaà kɛ́?”
10Ké ɔ cɛ̃ɛ ma wa gbo, ké ɔ ɖá, “Ɓě tò ɖùǔ. Ɓě dyi hwɔɖɔɔ̀ dyáuń nìǐn, ɓě kè gàa ɓéɖé mɛ-dyàà nì ní mú ɖò mu gmɔ̌ìn. Ɓě kèɔ̀ kè mɛ mu ɖé gbǒ kɔ̃̀ mú ɔ muà dyáùn wɛ̃. 11Ké ɓě mɛ cɛ̃ɛ gbǒɔ̀ kɔ̃̀-nyɔ̀ gbo, ɓɛ́ ɓě ké níiń, ‘Nyɔ-ɖɛ-tɛ̀mɛ̀ìn-nyɔ̀ɔ̀ ɖá dɛ̌ ɔ ɖéè-ɓì-dyùɔ̀ ɖé? Dɛ̌ ɔ kè ɔ ɖeín-nà-nyɔ̀ ɓěɔ̀ muà Zĩ̀ìn-Kɔ̃in-hwɔ̀ɔ̀ ɖiìn nyɛ́?’ 12Ké ɔ mu ɓě ɓí-dyù vɛ̀nɛ̀ ɖò nì ɖé dyií-gbòɔ̀ dyaa da zàìn. Ɖɛ séín hwɛ̀ ɖé ɖe. Ɓě mɛ naɓaàìn ɖé hwɔɔ̀.”
13Ké wa mu ma, ké wa dyé ma ɖɛ ɓěɔ̀ ɖé kà Jízɛ̀ nyuɛ ma kà wa gbo cɛ̃ɛ kɛ. Ké wa dyéìn ma hwɔɔ̀ ɖii-ɖɛ̀ɔ̀ ti.
Gèɖèpɔ́ɔ̀-bɛ̀ɖɛ̀ɛ̀ɔ̀ ɖi-ɖi
(Máfíò 26:26-30; Máà 14:22-26; 1 Kɔ̀ɖéíntĩ̀ɔ̀ 11:23-25)
14Ti ɓɛ́ ɖɛ-ɖi-tìɔ̀ nyini ma ɓóɛɛ, Jízɛ̀ kè àpɔ́sò ɓěɔ̀ dèɖě ma téɓèɖè ɖò gbɔ dya. 15Ké ɔ cɛ̃ɛ ma wa gbo, ké ɔ ɖá, “Ḿ mɔ́ ɓɛ́ ḿ kè ɓě ké Zĩ̀ìn-Kɔ̃in-hwɔ̀ nìà kɛ ɖi xwéé, hwɛ̀ ɓɛ́ ḿ ké ní gǎ-dyé-dyéɔ̀ wɔ̃ mu. 16Sepóɛɖé ḿ cɛ̃ɛ ɓě gbo, ḿ seɛ ɖiɛ́ mu ɖe fɔɔ, ɔ sèìn ɖɛ mɔ̀ ɔ xwíníín nyɛɛ kpá jǎà ɖé Gèɖèpɔ́ɔ̀ kã́á-ɓòɖòɔ̀ mú hwɛ̀.”
17Ké Jízɛ̀ ɖú ma kópòɔ̀ dyí, ké ɔ po ma Gèɖèpɔ́ɔ̀ zùo, ké ɔ ɖá, “Ɓě ɖú ɖɛ nìà kɛ dyí, ɓɛ́ ɓě ké ɖɛ nì ɔ múɛɛ ɓě mìɔùn múin geìn. 18Sepóɛɖé ḿ cɛ̃ɛ ɓě gbo, sɔ̀ìn dà ké dyúa muɛɛ, ḿ se géɖéè-ɓòɔ̀ ní ɖò náa mu ɖe fɔɔ, ɔ sèìn ké Gèɖèpɔ́ɔ̀ kã́á-ɓòɖòɔ̀ dyi dyɛ hwɛ̀.”
19Ké ɔ zà ma bɛɖɛɛ̀ɔ̀ ɖò ɓó, ké ɔ po ma Gèɖèpɔ́ɔ̀ zùo, ké ɔ jaɖaìn ma kpói. Ké ɔ nyíɛ ma wa, ké ɔ ɖá, “Ɖɛ nìà kɛ mɔ̀ ní kpóɖó-dyùà [ɓɛ́ ḿ tò ɓě bììɛ. Ɓě mɛ nyu ɖɛ nìà kɛ, ɓɛ́ ɔ ké ní jè ɓě hwìɖǐi dyà.” 20Kà dyúáɖòɔ̀ kǎà, ti wa ɖǎ ma ɖɛ ɖiɛ hwɔɔ, ɔ ɖú ma kópòɔ̀ dyí, ké ɔ ɖá, “Wã́ìn-kòpò ɓɛ́ ḿ púè kà ɓě bììɛɛ mɔ̀ dèè-wùɖù ɖìè ɓɛ́ ní nyɔmɔɔ̀ nyuɛ ké ɔ ɖǎà ɖɛ kpa kɛ.]
21“Kɛɛ gmɔ̀ nɔ̄. Nyɔ ɓɛ́ ɔ peɖeà ḿ wɛ̃ɛ, ɔ nì dà ɓó ḿ gbo téɓèɖèɛ̀ gbɔ. 22Mɔ̄ Nyɔǔn-dyùɛ̀ Dyú-gààɔ̀ mu hwìè ɓɛ́ Gèɖèpɔ́ɔ̀ ɖǎ ḿ bìì gãa kpaùn. Kɛɛ gàa ɓɛ́ ɔ zàà ḿ xwáɖáún ɖé ní mú-nyɛ́-nyɔ̀ ɓěɔ̀ gboɛɛ, ééɓàa, gboò-wùɖù nì ɔ kɔ̃.”
23Púɛɛ, wa ɖú ma wa mǔè ɓě dyi diè kpàǐ ɓó wa nyɔ ké ma kà ɖɛɔ̀ nyuɛɛ jè.
Wa zà nyɔ mɔ̀ nyɔ vɛ̀nɛ̀ kɛɛ jè dòǐn
24Sɔ̀ìn ɓóɛ gboɛɛ, ɖeín-nà-nyɔ̀ ɓěɔ̀ ɖú ma dòǐn zà kpàǐ ɓó wa nyɔ wa ké ma nyɔ vɛ̀nɛ̀ ɖáìn nyɛɛ jè. 25Ké Jízɛ̀ cɛ̃ɛ ma wa gbo, ké ɔ ɖá, “Ɓóɖó-dù kà kò ɖò ɓěɛ̀ kã́á ɓěɔ̀ kɔ̃̀ wa wuɖuí ɖé ɖɛ séín mú, ké nyɔ ɓě ɓɛ́ wa kɔ̃̀à wuɖuíɛɛ ɖáìn wa waà gbo-kpá-nyɔ̀. 26Ɔ se ɓéɖé ɓɛ́ ɔ ké ná nì ɖé ɓě hwìè. Kɛɛ nyɔ vɛ̀nɛ̀ ɓɛ́ ɔ nì ɖé ɓě hwìɛ̀ kɛɛ mɛ nì kà dyú-gbɔ́ɔ́ nìà kɛ, ké nyɔ-nàìn-nyɔ̀ɔ̀ mɛ nì kà gbo-nì-nyɔ̀ nìà kɛ. 27Nyɛ́ ɓúá dyíɛ́? Nyɔ kòà dyi ɓɛ́ ɔ ké ɖɛ ɖiɛ, mɔɔ gbo-nì-nyɔ̀ dyàà ɖii-ɖɛ̀ɔ̀ kɛɛ̀? Má, ɔ mɔ̀ nyɔ kòà téɓèɖèɔ̀ gbɔ dyiɛe? Kɛɛ mɔ́ún nì ɓě hwìɛ̀ kà gbo-nì-nyɔ̀ nìà kɛ.
28“Ɓě nì ma ɓó ḿ gbo ɖé ní ti kàmàǔn-kàmàǔn séín ɓěɔ̀ mú. 29Ɔ jèɛɛ, kà ɓɛ́ ḿ ɓǎ nyíà ḿ kpé ɓɛ́ ḿ kéà nyɔǔn wuɖuí kɔ̃̀ɛɛ, ní mu ɓě bìì ɖɛ dyúáɖòɔ̀ nyuùn ɖekè. 30Ɓě mu ɖɛ ɖiìn, ké ɓě mu náùn ɖé ní téɓèɖèɔ̀ gbɔ, ɖé ní kã́á-ɓòɖòɔ̀ kɔ̃. Ké ɓě mu zèè ɓě kɔ̃ dya dèɖěìn, ɓɛ́ ɓě ké Éézùɖùɛ̀-dyù ɓěɔ̀ xwéɖé-dù ɓaɖa-bùè sè sɔ̃́ɔ̀ zaa wɔ̃ po.”
Jízɛ̀ cɛ̃ɛ kà Píɖɛ̀ mu ɔ jè mú doìn nyɛ
(Máfíò 26:31-35; Máà 14:27-31; Jɔ̃́ɔ́ 13:36-38)
31Ké Jízɛ̀ cɛ̃ɛ ma Píɖɛ̀ gbo, ké ɔ ɖá, “Sã́ɓò, Sã́ɓò, tò ɖùǔ. Sétɔ̃̀ ɖǎa zɔ̀, ɓɛ́ ɔ ké ɓě mú vũ kà nyɔ vũà mɔɔ́ múɛ. 32Kɛɛ ḿ ɖǎ ɓaà ɓó m̀ bìì, ɓɛ́ nì hwìɖǐǐ-taɓa-taɓaɔ̀ ké se ɓíɖíi dyi kpá gàná cá. Ɔ jǔ ké m̀ dyi ḿ gbo gmɔ̀ìn ɖe ní, nìí, m̀ mɛ kùìn nì ɖíí ɓěɔ̀ mɔ̀ùn dyi.”
33Ké Píɖɛ̀ cɛ̃ɛ ma ɔ gbo, ké ɔ ɖá, “Bounɓo, ḿ dyé ti ɓɛ́ ḿ kè mɔ̀ ké kpɔɖɔ ɖeín kpá, ɓɛ́ à ké mɛ́ ɖekè.”
34Púɛɛ, Jízɛ̀ cɛ̃ɛ ma ɔ gbo, ké ɔ ɖá, “Píɖɛ̀, ḿ cɛ̃ɛ m̀ gbo, hwɛ̀ ɓɛ́ sòò ké wuɖu po ɓó zɛ̃̌ɛ̀ ní, nì mu ní jè mú-doìn-kpà tã nyuùn.”
Wíɖí-mú-po-ɖɛ̀ kè ɓɔ̀ɔ̌ ɔ kè gàsíà
35Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ti ɓɛ́ ḿ tò ma ɓě, ké ɓě se ma wíɖí-mú-po-ɖɛ̀ kè ɓɔ̀ɔ̌ ɔ kè bǎ ɖò kpaa, ɓě se ma ɖɛ ɓě mɔ́ ma kɛɛ dyéɛ hwɔɔ̀?”
Ké wa ɖá, “Gbàe. À dyéɛ ma séín.”
36Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Kɛɛ kàǔn wɛ̃ɛ, nyɔ mɔ̀ nyɔ ɓɛ́ ɔ ɓéɖé wíɖí-mú-po-ɖɛ̀ mɔɔ ɓɔ̀ɔ̌ kɛɛ, ɔ mɛ ɖúɛ dyí. Ké nyɔ mɔ̀ nyɔ ɓɛ́ ɔ se gàsíà ɖò ɓéɖé kɛɛ, ɔ mɛ peɖe ɔ ɖɔɔ̀, ɓɛ́ ɔ ké ɖò dɔ̃. 37Sepóɛɖé Gèɖèpɔ́ɔ̀-cèè-ɖɛ̀ɔ̀ cɛ̃ɛ, ké ɔ ɖá, ‘Wa zɛ̀ɖɛ̀ìn ma ɔ kè gma-ɖuà-nyɔ̀ ɓěɔ̀.’ Ḿ cɛ̃ɛ ɓě gbo, ɖɛ nìà kɛ ɓéɖé ɓɛ́ ɔ ké jǎà kpá, sepóɛɖé ɖɛ ɓě ɓɛ́ wa céè ma ɓá ḿ dyíɛɛ nìǎ jǎà kpáuń.”
38Ké ɖeín-nà-nyɔ̀ ɓěɔ̀ ɖá, “Gmɔ̀ nɔ̄, Bounɓo, kà gàsíà sɔ̃́ nìɛ.”
Ké ɔ cɛ̃ɛ ma wa gbo, ké ɔ ɖá, “Kǎà ɔ mɛ nìǎ.”
Jízɛ̀ ɓaà ɖé Ɔ́ɖè-tòɖòɔ̀ dya
(Máfíò 26:36-46; Máà 14:32-42)
39Ké Jízɛ̀ sɔ̀ ma dyí, ké ɔ mu ma ɖé Ɔ́ɖè-tòɖòɔ̀ dya kà ɔ ní ɓɔ́à nyuɛ kɛ. Ké ɔ ɖeín-nà-nyɔ̀ ɓěɔ̀ mu ma ɖekè. 40Ti ɓɛ́ ɔ nyini ma ɓó dàɔ̀ kɛɛ, ɔ cɛ̃ɛ ma wa gbo, ké ɔ ɖá, “Ɓě mɛ ɓaà, ɓɛ́ mú-dɔ̃̌-dɔ̃̌ ní kɔ̃̀ ɖà ɓě kɔ̃ dyi.”
41Ké Jízɛ̀ sɔ̀ ma ɓó wa gbo dyí. Dɛ̀ ɔ sɔ̀ ma kà kɛ, ké dɛ̀ ɔ mu ma kà kɛ muɛɛ, ɓó mɔ̀ ma sɔ̃-ɖɛ̀-kpò-kpá-naín pū. Ɔ taɓa ma kɔ́-dù hwuɖu, ké ɔ ɓaà ma, ké ɔ ɖá, 42“Ḿ Ɓǎ, ɔ jǔ ké nì hwòɖǒɔ̀ dyi wɔ̃́ ní, nìí, m̀ mɛ zà dà gǎ-kòpò nìà kɛ ɓó ḿ bũ̌. Kɛɛ wɛ̃́ɛ́ kɛɛ, m̀ mɛ nyu ɖɛ nì hwòɖǒɔ̀ mɔ́ kɛ. Mɔ̀ǔn ɖá ɓɛ́ m̀ ké ní hwòɖǒɛ̀-mɔ́ɔ́-ɖɛ̀ nyu.” [ 43Ké ínjà ɖò ɓɛ́ ɔ sɔ̀ ma ɖé dyɔún wɛ̃ɛ wóɖóìn ma ɔ dyí, ké ɔ po ma ɔ kpéí. 44Ɔ nì ma gǎ dyéɛń mìɔ, ké ɔ ɓaà ma mìɔ cá. Zu ɓɛ́ ɔ wóɖó ma ɔ kɛɛ nì kà nyɔmɔɔ-ɓò téà ɓíɖíiɛ.]
45Ti ɓɛ́ Jízɛ̀ hwɔ ma ɓaà kɛɛ, ɔ sɔ̀ ma dyí, ké ɔ mu ma ɖeín-nà-nyɔ̀ ɓěɔ̀ gbo ɖe. Wìì nyuɛ ké wa nì ma mɔ́uń, ké ɔ dyɛ̀ìn ma wa nyíɔún dyi. 46Ké ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě nìà mɔ́uń wɛ̃́? Ɓě sɔ̀ dyí, ɓɛ́ ɓě ké ɓaà, ɓɛ́ mú-dɔ̃̌-dɔ̃̌ ní kɔ̃̀ ɖà ɓě kɔ̃ dyi.”
Wa kpɔ̃ Jízɛ̀
(Máfíò 26:47-56; Máà 14:43-50; Jɔ̃́ɔ́ 18:3-11)
47Ti ɓɛ́ Jízɛ̀ nì ma wùɖùɛ̌n keɛɛ, nyɔ kúɖúú ɓě wóɖó ma xwáɖáún. Gàa ɖò kɔ̃̀ nyɛ́nɛ́ mɔ̀ ma Júdà, ɓɛ́ ɔ mɔ̀ ma kà ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖò kɛɛ nì ma wa nàǐn. Ɔ xwɛ̃́ìn ma Jízɛ̀ bũ̌in, ɓɛ́ ɔ ké ma ɔ wɔ̃ nyá. 48Kɛɛ Jízɛ̀ cɛ̃ɛ ma ɔ gbo, ké ɔ ɖá, “Júdà, nì mu mɔ̄ Nyɔǔn-dyùɛ̀ Dyú-gààɔ̀ nyɔ ɓěɔ̀ xwáɖáún zàìn dyììn ɖé nyɔɛ̀ wɔ̃-nyá-nyá múù?”
49Ti ɓɛ́ ɖeín-nà-nyɔ̀ ɓě ɓɛ́ wa nì ma ɓó Jízɛ̀ gboɛɛ dyé ma ɖɛ nì ma kà kpáuń dyiɛń nyɛɛ, wa diè ma ɔ dyi, ké wa ɖá, “Bounɓo, à mɛ vɔ̃̀ìn à gàsíà ɓěɔ̀ɔ̀?” 50Ké wa dyúáɖò cɛ̃ ma sáa-zà-nyɔ̀ vɛ̀nɛ̀ɔ̀ gǐìɔ̀ ɖiaún-ɖùǔɔ̀ dú.
51Kɛɛ Jízɛ̀ ɖá, “Ɓɔ́ɔ náa nyuɛ.” Hwɛ̀ ké ɔ tìnììn ma gàaɔ̀ ɖùǔɔ̀ dyi, ké ɔ kánáìn ma ɔ dyi.
52Púɛɛ, Jízɛ̀ cɛ̃ɛ ma sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ ɔ kè Júù-nyɔ̀ vɛ̀nɛ̀ ɓě ɓɛ́ wa dyi ma kà ɔ kpɔ̃uń wɛ̃ɛ gbo, ké ɔ ɖá, “Ɓě dyà gàsíà kè kpó-kpó-ɓà-cù kà nyɔ dyià nyɔ-ɖɛ-gana-xwa-zàìn-nyɔ̀ ɖò kpɔ̃ùn wɛ̃ɛ̀? 53Ḿ nì ma ɓě hwìɛ̀ ɖé Gèɖèpɔ́ɔ̀ gbǒɔ̀ mú wé séín ɓaɖa, ké ɓě se ma ɖé ḿ kpɔ̃̀ìn. Kɛɛ ɓě kè tíe-kpòɔ̀ kɔ̃̀ ti nìà kɛ kpé kɔ̃ún.”
Píɖɛ̀ doìn Jízɛ̀ jè mú
(Máfíò 26:57-58, 69-75; Máà 14:53-54, 66-72; Jɔ̃́ɔ́ 18:12-18, 25-27)
54Ti ɓɛ́ wa ɖǎ ma Jízɛ̀ kpɔ̃ɛɛ, wa kpa ma ɔ ɖé sáa-zà-nyɔ̀ vɛ̀nɛ̀ɔ̀ ɓíɖí-taún. Píɖɛ̀ sí ma wa kíɖíí, kɛɛ ɔ sè ma ɖe vɛ̃in. 55Wa po ma nyɛ dyí ɖé sáa-zà-nyɔ̀ vɛ̀nɛ̀ɔ̀ kɔ̃̀pã́ùnɔ̀ kɔ̃, ké wa kò ma nyɛɔ̀ wĩín dyi. Píɖɛ̀ nì ma ɓó wa hwìɛ̀. 56Ké gbo-nì-màà ɖò dyé ma ɔ ɓó nyɛɔ̀ wĩín dyi kòɛ̀, ké ɔ gmɔ̀ ma ɔ dya, ké ɔ ɖá, “Gàa nìà kɛ nì ma Jízɛ̀ gbo ɖekè.”
57Kɛɛ Píɖɛ̀ doɛ̀n ma mú, ké ɔ ɖá, “Màa-dyù wè, ḿ se ɔ dyí dyuò.”
58Ɔ ɖǎ ma ɓó nì kpã́ún wɛ̃ɛ, gàa ɖò dyé ma Píɖɛ̀ ɖe, ké ɔ ɖá, “M̀ mɔ̀ wa ɖò ɖekè.”
Kɛɛ Píɖɛ̀ ɖá, “Gàa wè, ɔ se ná nì.”
59Ti ɔ ɓɛ́ìn ma áɓà dyúáɖò zĩ̀ɛ̀n nyɛɛ, gàa ɖò cɛ̃ɛ ma gana-kà, ké ɔ ɖá, “Gàa nìà kɛ nì ma ɔ gbo jǎà, sepóɛɖé ɔ sɔ̀ ɖé Gáɖàɖíì-ɓòɖòɔ̀ kɔ̃.”
60Kɛɛ Píɖɛ̀ ɖá, “Gàa wè, ḿ se ɖɛ m̀ nìà cɛ̃iń nyɛɛ dyí dyuò.”
Ti ɓɛ́ wuɖuɔ̀ gã̀ ma ɔ wĩín dyiɛɛ, sòò ɖò zoɖo ma wàɖà cá. 61Ké Bounɓoɔ̀ cɛ́ɛ̀ ma xwa, ké ɔ gmɔ̀ ma Píɖɛ̀ dya. Púɛɛ, ɖɛ ɓɛ́ Bounɓoɔ̀ cɛ̃ ma kà kɛɛ dyi ma Píɖɛ̀ hwìɖǐi. Ɔ cɛ̃ɛ ma, ké ɔ ɖá, “Hwɛ̀ ɓɛ́ sòò ké wuɖu po ɓó zɛ̃̌ɛ̀ ní, nì mu ní jè mú-doìn-kpà tã nyuùn.” 62Ké Píɖɛ̀ sí ma píé, ké ɔ vĩ̌ ma hwòɖǒɛ̀-nɛɛ̀-kà.
Wa ɓaɖa Jízɛ̀ dyɔ́ ké wa ɓaɖa ɔ
(Máfíò 26:67-68; Máà 14:65)
63Ɓó tia ɓaɖaa, gàa ɓě ɓɛ́ wa nì ma Jízɛ̀ dyí gmɔ̀ǔn wɛ̃ɛ ɓaɖa ma ɔ dyɔ́, ké wa ɓaɖa ma ɔ. 64Wa jìnììn ma ɔ ɖɔ dyéɖéín, ké wa diè ma ɔ dyi, ké wa ɖá, “Nyɛ́ taɓaà m̀ kpáá? Ɖá ɔ nyɛ́nɛ́.” 65Ké wa cɛ̃ ma ɔ ɖɛ gbà pàɖǎ kɔ̃ún ɖe.
Jízɛ̀ nì ɓó tɔ̀ɔ̀-ɓìɔ̀ ɓěɔ̀ dyúa
(Máfíò 26:59-66; Máà 14:55-64; Jɔ̃́ɔ́ 18:19-24)
66Ti zɔ̃ zɔ̃ ma kɛɛ, Júù-nyɔ̀ ɓěɔ̀ nyɔ vɛ̀nɛ̀ ɓěɔ̀ kè sáa-zà-nyɔ̀ kpa ɖɛ ɓěɔ̀ ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ poìn ma dyí, ké wa kpa ma Jízɛ̀ waà tɔ̀ɔ̀-ɓìɔ̀ ɓěɔ̀ dyúa, ké wa ɖá, 67“Cɛ̃ɛ à gbo, m̀ mɔ̀ Kɛ́ɖɛ́ìɔ̀ɔ̀?”
Ké Jízɛ̀ cɛ̃ɛ ma wa gbo, ké ɔ ɖá, “Ɔ jǔ ké ḿ dyiɛ ɓě gbo cɛ̃ín, nìí, ɓě se ní wuɖuɔ̀ jǎà poɛ́ mu. 68Ké ḿ dyi ɓě dyi diè ní, ɓě se ɖé wuɖu zàǎ mu. 69Kɛɛ sɔ̀ìn dà ké dyúa muɛɛ, mɔ̄ Nyɔǔn-dyùɛ̀ Dyú-gààɔ̀ mu kpé-ɓéɖé-Gèɖèpɔ́ɔ̀ ɖiaún dya dèɖěìn.”
70Ké wa séín cɛ̃ɛ ma, ké wa ɖá, “Nìí, m̀ mɔ̀ǎ Gèɖèpɔ́ɔ̀ Dyú-gààɔ̀ɔ̀?”
Ké ɔ cɛ̃ɛ ma wa gbo, ké ɔ ɖá, “Ɓě mɔ̀ nyɔ cɛ̃ɛ kà ḿ mɔ̀ ɔ mɔ̀ kɛ.”
71Ké wa ɖá, “Kà à ɖǎà ɔ mìɔùn nììn wuɖu ɓěɔ̀ wɔ̃́ɛɛ, à mɔ́ zàse ɖò ɖeè?”
S'ha seleccionat:
Ɖúù 22: ƁB02
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bassa Bible © Bible Society Liberia, 2002.