Máfìù 15
15
Pɛ́ wa zɔ̃̀ɔ̃̀ mɔ́ o lɛ̀ɛ
(Máà 7.1-13)
1Lɛ̀ e kɛ kília, Fálásíì‐mìà wà Wálà kii‐dɔ‐mìà dò o gó Zùlúsàlɛ̀, o nu Zízɛ̀ píé, wáà wɛ̃́ĩ́‐lɔ̀ɔ kɛ̀ kélɛ̀, 2“Mɛ́ e kɛ lɛ́ ɓà tòà‐píé‐mìàa òó wɔ̃́ kɛ kɔa mìà nì zì wɔ̃́ kɛ‐kɔ̀ lɛ́ wa zɔ̃̀ɔ̃̀ mɔ́ kɔa lɛ̀ɛ ká ɓɛ? Òó o kɔ̀ pɛ́lɛ́ e pɛ́lɛ́‐zì ká kɛ ó tĩã́ pɛ ɓèlè.”
3Zízɛ̀ a là nìɛ̀ weeá kélɛ̀, “Mɛ́ e kɛ lɛ́ ka bɛ̃̀ɛ̃ kàá gbaa wɔ̃́ kɛ zi lɛ́ Wálà a gèe ká wɔ̃́ kɛáa ká, lɛ́ kà wɔ̃́ kɛ̀ ka mìà nì zì wɔ̃́ kɛ‐kɔ̀ ká ɓɛ? 4Ƃii Wálà a gèe kélɛ̀, ‘Ì ɓɛ̀lɛyà nɔ i dàa wà i lèe o lɛ̀ɛ.’ Ɛ́ɛ̃́ zeĩ́, ‘Mi lɛ́ è wɔ̃́ yɔɔ gèe e dàa wà e lèe o gbĩ mɔ̀ɔ, lɛ à mɔ̀ ó zɛ.’ 5Kɛɛ káà gèe, mi lɛ́ɛ̀ bɛ̀i à mɔ̀ á gèe e dàa wà e lèe o lɛ̀ɛ weeá kélɛ̀, ‘Pɛ́ máá gbũũ̀á ka mɔ̀ɔ, maà nɔ Wálà lɛ̀ɛ.’ Yé aà à gèe kília, ye wá à mɔ̀ kɛ é ɓɛ̀lɛyà nɔ e dàa lɛ̀ɛ. 6À mɔ́ɔ̀ wɔ̃̀ mɔ̀ɔ, wɔ̃́ kɛ̀ ka mìà nì zì wɔ̃́ kɛ‐kɔ̀ kpáá yía, kaà à kɛ wɔ̃́ lɛ́ Wálà a gèea, aà kɛ fɛ́í‐fɛ̀ì gbaa. 7Mia lɛ́ kà ka dìè wɛlɛ li e ké ɓɛ. Lɛ̀ Ààzáyà e kɛ dɔpìà Wálà lé làa, e wɔ̃́ gèe ɓɛ̀lɛɛ zɛ̀ é gbɛ̃̀á ka mɔ̀. Wɔ̃́ a gèea, gɛ̃̀ e ké.
8‘Míá o kéa, óò ma Wálà m tɔ́ ɓɔ o wéè ká.
Kɛɛ o zò lɛ m ká gbèkèni kpó‐kpó ɓo.
9Óò gbìnì m lɛ̀ɛ ɓɔ̀ɔ.
Ƃii óò o dìè zì wɔ̃́ gèe‐kɔ̀ si é kɛ Wálà zì pɛ‐zɔ̃̀ɔ̃̀‐kɔ̀ ká, wáà zɔ̃̀ɔ̃̀ mia lɛ̀ɛ.’ ”
Pɛ́ è mi mɛ́ lilì kũa
(Máà 7.14-23)
10Zízɛ̀ e mia kùa súo kɛ ó nu à píé, áà gèè o lɛ̀ɛ, “Kà ka tóó dɔ m mɔ̀, ká wɔ̃́ yí ma. 11Ye wá pɛ́ è lo mi léa ká kɛ é mi mɛ́ lilì kũ, kɛɛ pɛ ké yee è go à léa, lɛ́ è à mɛ́ lilì kũa.”
12Lɛ̀ e kɛ kília, là tòà‐píé‐mìà o nu à píé, wa gèe à lɛ̀ɛ, “Ƃáà yí dɔ kélɛ̀ wɔ̃́ ɓa gèea, e Fálásíì‐mìàa zò dà zízàá?”
13Zízɛ̀ a gèe kélɛ̀, “Taa‐pɛ̀ píní séĩ́ lɛ́ m Dàa lɛ́ e lɛ̀ía lɛ̀ɛ́ gbaa à taa, óò lo à wòlò. 14Kà gó o lɛ̀ɛ. O mia líé‐sí‐mìà nyìɛ káàa zɛ̀ ká. Yé mi nyìɛ káàa zɛ̀ aà líé sí e ɓɛ́ɛ nyìɛ‐káá‐mì káa, o pèèlɛɛ óò lo dùò gùlù yí.”
15Pílɛ̀ a gèe à lɛ̀ɛ, “Ì pĩ̀ã̀a yí ɓo ko lɛ̀ɛ.”
16Zízɛ̀ a gèe o lɛ̀ɛ, “Ɛ́ɛ̃́ ka bɛ̃̀ɛ̃, ka tĩã́ wɔ̃́ yí naapìà ká ma? 17Kàá yí dɔ kélɛ̀ pɛ lɛ́ è lo mi léa, lɛ́ɛ̀ lo mi gé, tó áà gò mi mɔ̀ yé mi ɓaà gó zi píéa ká? 18Kɛɛ pɛ lɛ́ è go mi léa, lɛ́ɛ̀ go mi zò píé. Pɛ à yé e kília, lɛ́ è mi mɛ́ lilì kũa. 19Ƃii à zò láà kɛ̀, tó áà e yɛ́lɛ́ tàà yɔɔ, áà mi zɛ̀, áà wàà e ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ì, e bɛ̀i, áà sɔ̃̀ɔ̃ yɔɔ kɛ̀, ɛ̃́ɛ̃́ áà kã̀ã ɓò, tó áà nɛ̀ kpɔ̀ mi mɔ̀, áà wàà‐kílí kɛ̀. 20Pɛ nì e kéa lɛ́ è mi mɛ́ lilì kũa. Kɛɛ pɛ ɓèlè i kɔ̀ lɛ́ ìí gbaa pɛ́lɛ́ e pɛ́lɛ́‐zì káa ká, lɛ̀ɛ́ mi mɛ́ lilì kṹ.”
Lee lɛ́ e e zò dɔ Zízɛ̀ mɔ̀ɔ
(Máà 7.24-30)
21Zízɛ̀ e gó gbaa yí, e ló sɛ́lɛ́ lɛ́ e kɛ Táyà wà Sádã̀ o mɛ̀ĩ́ píéa yí. 22Lee lɛ́ e kɛ Kénà‐le ká, lɛ́ e kɛ sɛ́lɛ́ e kília yía, e nu Zízɛ̀ píé, áà gèè à lɛ̀ɛ, “M dàa‐mì Dèɓé Gbe, ì m yéĩ̀ kṹ. Pɛ yɔɔ lɛ m lú píé, tó à fólóṹ lɛ̀ɛ́ ɓo à ká.”
23Kɛɛ Zízɛ̀ lɛ̀ɛ́ gbaa wɔ̃́ nɔ́ɔ fé dò gèe à lɛ̀ɛ. Là tòà‐píé‐mìà o nu à píé, wáà kpé kã̀ à lɛ̀ɛ weeá, “Ì à vɔ, é gó lɛ̀ɛ mɔ̀. Ƃii lɛ tópìà ko píé, áà lò wéé sùua ɓòá sía mɔ́ɔ̀ wɔ̃̀ mɔ̀.”
24Zízɛ̀ a gèe kélɛ̀, “M vɔɔ̀ lɛ ɓáá gíniìa zɛ̀ lɛ́ o Éézɛ̀lɛ̀‐mìà káa, o doó o píé.”
25Lɛ̀ e kɛ kília, lééa e nu, e gbini à gã̀ dĩ́ mɔ̀, áà gèè, “M dàa‐mì, gbũ m mɔ̀.”
26Zízɛ̀ a là nìɛ̀ weeá kélɛ̀, “Ye wá sɛ̀ kɛ ó nɔ́ɔ̀ɓé wà léɓèlè sí, kɛ ó yà gbã́ lɛ̀ɛ.”
27Lééa a gèe kélɛ̀, “Lɛ kíli, m dàa‐mì. Kɛɛ é kɛ bɛ̃̀ɛ̃ gbã́ vɔ̀ káa, óò ɓu yé è kàà píé, lɛ́ è go o dàa‐mìà wà téɓò làa ɓèlè.”
28Lɛ̀ e kɛ kília, Zízɛ̀ a là nìɛ̀ weeá kélɛ̀, “I lee lɛ́ zò‐dɔ̀à‐mɔ̀ mɛ́ gágà zɛ̀ lɛ i yía ká. Pɛ lɛ́ ɓà nààa, è kɛ ɓe i lɛ̀ɛ.” Lɛ̀ e kɛ kília, lééa lú e la gbaa lúó nɔ́ e kília ká.
Zízɛ̀ e mia búnùzɛ̀ la
29Zízɛ̀ e gó gbaa yí, e ló Gálàlíì Yíí‐pṹã́a sɔ́nɔ́. E tɔ̃̀ũ̀ dò kṹ, e yà à wĩĩ́. 30Mia gbààlà gbùò zɛ̀ o nu à píé. O nuù e kɛá mia kpɔ́lɔ̀ɔ zɛ̀, e bɛ̀i, mia nyìɛ káàa zɛ̀, ɛ̃́ɛ̃́ zùa‐mìà, ɛ̃́ɛ̃́ zeĩ́, mia lɛ́ o lé lɛ̀ɛ́ wééa, ɛ̃́ɛ̃́ yáá‐mìà doò do ká, o o wɔɔ píé Zízɛ̀ gã̀ dĩ́ mɔ̀. E o séĩ́ o la. 31Lɛ̀ e kɛ kília, míáa lé paà e kɛá wɔ̃́ lɛ́ wa gɛ̃̀ɛ mɔ́ɔ̀ wɔ̃̀ mɔ̀. Ƃii mia lɛ́ o lé lɛ̀ɛ́ wééa, o kɛ wéépìà, tó zùa‐mìà lɛ̀ séĩ́ áà bɛ̀ì e kíe ká. Ɛ́ɛ̃́ mia kpɔ́lɔ̀ɔ zɛ̀ nì wáà tàà. Ɛ́ɛ̃́ zeĩ́, mia nyìɛ káàa zɛ̀ o kɛ lɛ̀ gɛ̃̀pìà. Lɛ̀ e kɛ kília, o Éézɛ̀lɛ̀‐mìà wà Wálà tɔ́ kɛ gbùò.
Zízɛ̀ e ɓèlè‐pɛ̀ nɔ mia wáá yììsɛ lɛ̀ɛ
(Máà 8.1-10)
32Zízɛ̀ e là tòà‐píé‐mìà súo kɛ e píé, áà gèè, “Míá o kéa o yéĩ́ lɛ́ɛ̀ m kɛ̀, ɓii waà ɓo m píé zèe yààka, ɛ̃́ɛ̃́ pɛ gbɛɛ wá gbaa o kɛ̀lɛ̀ ó ɓèlè. M̀ḿ naa kɛ ḿ o vɔ o pà lɔ̀ɔ ká, yékɛ̀ o vũ̀nɛ̀ĩ̀ é ɓo o yí zi là.”
33Là tòà‐píé‐mìà wa gèe à lɛ̀ɛ, “Mɛ́ɛ lɛ́ kò lo léɓèlè sɔ̀lɔ̀ ɓoò yi yɛ̀í e kéa là, kɛ kó lɔ̀ɔ ɓo à ká mia gbààlà gbùò zɛ̀ o kéa gé?”
34Zízɛ̀ a gèe o lɛ̀ɛ, “Belè‐kpo wɛ̀ɛɛ̀ lɛ́ e ka kɛ̀lɛ̀?”
Wa gèe kélɛ̀, “O sálápèèlɛ, wà kpã̀ã́ ɓéĩ́ kélé kélé lɛ́ nɔ́ e ko kɛ̀lɛ̀ɛ.”
35Zízɛ̀ a gèe mia gbũa lɛ̀ɛ ó yà tã́ã̀ sɛ́lɛ́ bà. 36E belè‐kpo sálápèèlɛɛ wà kpã̀ã́a o sí gbaa, e Wálà zúo ɓo, e o kpú yɛ́ kélé kélé, áà nɔ̀ là tòà‐píé‐mìàa lɛ̀ɛ. Là tòà‐píé‐mìàa o à nɔ míáa lɛ̀ɛ. 37Mia séĩ́‐séĩ́ wa ɓèlè, o gí e dɔ. Lɛ̀ e kɛ gbaa kília, o à kpuú‐kpuú e tóa wɔ́ɔ́. E támé‐kɔ̃̀ɛ̃̀ sálápèèlɛ pa. 38Gɔ̃à lɛ́ o pɛ́ɛ ɓèlèa, yé òó loà wà nɔ́ɔ̀ɓé o dà o bàa, o lóníìa zɛ̀ e kɛ wáá yììsɛ.
39Lɛ̀ e kɛ kília, Zízɛ̀ e míáa vɔ gbaa o pà. E yà gbaa gɔɔ yí, e ló gbaa sɛ́lɛ́ lɛ́ ò si Mágádɛ̀ɛ yí.
S'ha seleccionat:
Máfìù 15: MNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mann New Testament © Bible Society in Liberia, 1978.
Máfìù 15
15
Pɛ́ wa zɔ̃̀ɔ̃̀ mɔ́ o lɛ̀ɛ
(Máà 7.1-13)
1Lɛ̀ e kɛ kília, Fálásíì‐mìà wà Wálà kii‐dɔ‐mìà dò o gó Zùlúsàlɛ̀, o nu Zízɛ̀ píé, wáà wɛ̃́ĩ́‐lɔ̀ɔ kɛ̀ kélɛ̀, 2“Mɛ́ e kɛ lɛ́ ɓà tòà‐píé‐mìàa òó wɔ̃́ kɛ kɔa mìà nì zì wɔ̃́ kɛ‐kɔ̀ lɛ́ wa zɔ̃̀ɔ̃̀ mɔ́ kɔa lɛ̀ɛ ká ɓɛ? Òó o kɔ̀ pɛ́lɛ́ e pɛ́lɛ́‐zì ká kɛ ó tĩã́ pɛ ɓèlè.”
3Zízɛ̀ a là nìɛ̀ weeá kélɛ̀, “Mɛ́ e kɛ lɛ́ ka bɛ̃̀ɛ̃ kàá gbaa wɔ̃́ kɛ zi lɛ́ Wálà a gèe ká wɔ̃́ kɛáa ká, lɛ́ kà wɔ̃́ kɛ̀ ka mìà nì zì wɔ̃́ kɛ‐kɔ̀ ká ɓɛ? 4Ƃii Wálà a gèe kélɛ̀, ‘Ì ɓɛ̀lɛyà nɔ i dàa wà i lèe o lɛ̀ɛ.’ Ɛ́ɛ̃́ zeĩ́, ‘Mi lɛ́ è wɔ̃́ yɔɔ gèe e dàa wà e lèe o gbĩ mɔ̀ɔ, lɛ à mɔ̀ ó zɛ.’ 5Kɛɛ káà gèe, mi lɛ́ɛ̀ bɛ̀i à mɔ̀ á gèe e dàa wà e lèe o lɛ̀ɛ weeá kélɛ̀, ‘Pɛ́ máá gbũũ̀á ka mɔ̀ɔ, maà nɔ Wálà lɛ̀ɛ.’ Yé aà à gèe kília, ye wá à mɔ̀ kɛ é ɓɛ̀lɛyà nɔ e dàa lɛ̀ɛ. 6À mɔ́ɔ̀ wɔ̃̀ mɔ̀ɔ, wɔ̃́ kɛ̀ ka mìà nì zì wɔ̃́ kɛ‐kɔ̀ kpáá yía, kaà à kɛ wɔ̃́ lɛ́ Wálà a gèea, aà kɛ fɛ́í‐fɛ̀ì gbaa. 7Mia lɛ́ kà ka dìè wɛlɛ li e ké ɓɛ. Lɛ̀ Ààzáyà e kɛ dɔpìà Wálà lé làa, e wɔ̃́ gèe ɓɛ̀lɛɛ zɛ̀ é gbɛ̃̀á ka mɔ̀. Wɔ̃́ a gèea, gɛ̃̀ e ké.
8‘Míá o kéa, óò ma Wálà m tɔ́ ɓɔ o wéè ká.
Kɛɛ o zò lɛ m ká gbèkèni kpó‐kpó ɓo.
9Óò gbìnì m lɛ̀ɛ ɓɔ̀ɔ.
Ƃii óò o dìè zì wɔ̃́ gèe‐kɔ̀ si é kɛ Wálà zì pɛ‐zɔ̃̀ɔ̃̀‐kɔ̀ ká, wáà zɔ̃̀ɔ̃̀ mia lɛ̀ɛ.’ ”
Pɛ́ è mi mɛ́ lilì kũa
(Máà 7.14-23)
10Zízɛ̀ e mia kùa súo kɛ ó nu à píé, áà gèè o lɛ̀ɛ, “Kà ka tóó dɔ m mɔ̀, ká wɔ̃́ yí ma. 11Ye wá pɛ́ è lo mi léa ká kɛ é mi mɛ́ lilì kũ, kɛɛ pɛ ké yee è go à léa, lɛ́ è à mɛ́ lilì kũa.”
12Lɛ̀ e kɛ kília, là tòà‐píé‐mìà o nu à píé, wa gèe à lɛ̀ɛ, “Ƃáà yí dɔ kélɛ̀ wɔ̃́ ɓa gèea, e Fálásíì‐mìàa zò dà zízàá?”
13Zízɛ̀ a gèe kélɛ̀, “Taa‐pɛ̀ píní séĩ́ lɛ́ m Dàa lɛ́ e lɛ̀ía lɛ̀ɛ́ gbaa à taa, óò lo à wòlò. 14Kà gó o lɛ̀ɛ. O mia líé‐sí‐mìà nyìɛ káàa zɛ̀ ká. Yé mi nyìɛ káàa zɛ̀ aà líé sí e ɓɛ́ɛ nyìɛ‐káá‐mì káa, o pèèlɛɛ óò lo dùò gùlù yí.”
15Pílɛ̀ a gèe à lɛ̀ɛ, “Ì pĩ̀ã̀a yí ɓo ko lɛ̀ɛ.”
16Zízɛ̀ a gèe o lɛ̀ɛ, “Ɛ́ɛ̃́ ka bɛ̃̀ɛ̃, ka tĩã́ wɔ̃́ yí naapìà ká ma? 17Kàá yí dɔ kélɛ̀ pɛ lɛ́ è lo mi léa, lɛ́ɛ̀ lo mi gé, tó áà gò mi mɔ̀ yé mi ɓaà gó zi píéa ká? 18Kɛɛ pɛ lɛ́ è go mi léa, lɛ́ɛ̀ go mi zò píé. Pɛ à yé e kília, lɛ́ è mi mɛ́ lilì kũa. 19Ƃii à zò láà kɛ̀, tó áà e yɛ́lɛ́ tàà yɔɔ, áà mi zɛ̀, áà wàà e ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ì, e bɛ̀i, áà sɔ̃̀ɔ̃ yɔɔ kɛ̀, ɛ̃́ɛ̃́ áà kã̀ã ɓò, tó áà nɛ̀ kpɔ̀ mi mɔ̀, áà wàà‐kílí kɛ̀. 20Pɛ nì e kéa lɛ́ è mi mɛ́ lilì kũa. Kɛɛ pɛ ɓèlè i kɔ̀ lɛ́ ìí gbaa pɛ́lɛ́ e pɛ́lɛ́‐zì káa ká, lɛ̀ɛ́ mi mɛ́ lilì kṹ.”
Lee lɛ́ e e zò dɔ Zízɛ̀ mɔ̀ɔ
(Máà 7.24-30)
21Zízɛ̀ e gó gbaa yí, e ló sɛ́lɛ́ lɛ́ e kɛ Táyà wà Sádã̀ o mɛ̀ĩ́ píéa yí. 22Lee lɛ́ e kɛ Kénà‐le ká, lɛ́ e kɛ sɛ́lɛ́ e kília yía, e nu Zízɛ̀ píé, áà gèè à lɛ̀ɛ, “M dàa‐mì Dèɓé Gbe, ì m yéĩ̀ kṹ. Pɛ yɔɔ lɛ m lú píé, tó à fólóṹ lɛ̀ɛ́ ɓo à ká.”
23Kɛɛ Zízɛ̀ lɛ̀ɛ́ gbaa wɔ̃́ nɔ́ɔ fé dò gèe à lɛ̀ɛ. Là tòà‐píé‐mìà o nu à píé, wáà kpé kã̀ à lɛ̀ɛ weeá, “Ì à vɔ, é gó lɛ̀ɛ mɔ̀. Ƃii lɛ tópìà ko píé, áà lò wéé sùua ɓòá sía mɔ́ɔ̀ wɔ̃̀ mɔ̀.”
24Zízɛ̀ a gèe kélɛ̀, “M vɔɔ̀ lɛ ɓáá gíniìa zɛ̀ lɛ́ o Éézɛ̀lɛ̀‐mìà káa, o doó o píé.”
25Lɛ̀ e kɛ kília, lééa e nu, e gbini à gã̀ dĩ́ mɔ̀, áà gèè, “M dàa‐mì, gbũ m mɔ̀.”
26Zízɛ̀ a là nìɛ̀ weeá kélɛ̀, “Ye wá sɛ̀ kɛ ó nɔ́ɔ̀ɓé wà léɓèlè sí, kɛ ó yà gbã́ lɛ̀ɛ.”
27Lééa a gèe kélɛ̀, “Lɛ kíli, m dàa‐mì. Kɛɛ é kɛ bɛ̃̀ɛ̃ gbã́ vɔ̀ káa, óò ɓu yé è kàà píé, lɛ́ è go o dàa‐mìà wà téɓò làa ɓèlè.”
28Lɛ̀ e kɛ kília, Zízɛ̀ a là nìɛ̀ weeá kélɛ̀, “I lee lɛ́ zò‐dɔ̀à‐mɔ̀ mɛ́ gágà zɛ̀ lɛ i yía ká. Pɛ lɛ́ ɓà nààa, è kɛ ɓe i lɛ̀ɛ.” Lɛ̀ e kɛ kília, lééa lú e la gbaa lúó nɔ́ e kília ká.
Zízɛ̀ e mia búnùzɛ̀ la
29Zízɛ̀ e gó gbaa yí, e ló Gálàlíì Yíí‐pṹã́a sɔ́nɔ́. E tɔ̃̀ũ̀ dò kṹ, e yà à wĩĩ́. 30Mia gbààlà gbùò zɛ̀ o nu à píé. O nuù e kɛá mia kpɔ́lɔ̀ɔ zɛ̀, e bɛ̀i, mia nyìɛ káàa zɛ̀, ɛ̃́ɛ̃́ zùa‐mìà, ɛ̃́ɛ̃́ zeĩ́, mia lɛ́ o lé lɛ̀ɛ́ wééa, ɛ̃́ɛ̃́ yáá‐mìà doò do ká, o o wɔɔ píé Zízɛ̀ gã̀ dĩ́ mɔ̀. E o séĩ́ o la. 31Lɛ̀ e kɛ kília, míáa lé paà e kɛá wɔ̃́ lɛ́ wa gɛ̃̀ɛ mɔ́ɔ̀ wɔ̃̀ mɔ̀. Ƃii mia lɛ́ o lé lɛ̀ɛ́ wééa, o kɛ wéépìà, tó zùa‐mìà lɛ̀ séĩ́ áà bɛ̀ì e kíe ká. Ɛ́ɛ̃́ mia kpɔ́lɔ̀ɔ zɛ̀ nì wáà tàà. Ɛ́ɛ̃́ zeĩ́, mia nyìɛ káàa zɛ̀ o kɛ lɛ̀ gɛ̃̀pìà. Lɛ̀ e kɛ kília, o Éézɛ̀lɛ̀‐mìà wà Wálà tɔ́ kɛ gbùò.
Zízɛ̀ e ɓèlè‐pɛ̀ nɔ mia wáá yììsɛ lɛ̀ɛ
(Máà 8.1-10)
32Zízɛ̀ e là tòà‐píé‐mìà súo kɛ e píé, áà gèè, “Míá o kéa o yéĩ́ lɛ́ɛ̀ m kɛ̀, ɓii waà ɓo m píé zèe yààka, ɛ̃́ɛ̃́ pɛ gbɛɛ wá gbaa o kɛ̀lɛ̀ ó ɓèlè. M̀ḿ naa kɛ ḿ o vɔ o pà lɔ̀ɔ ká, yékɛ̀ o vũ̀nɛ̀ĩ̀ é ɓo o yí zi là.”
33Là tòà‐píé‐mìà wa gèe à lɛ̀ɛ, “Mɛ́ɛ lɛ́ kò lo léɓèlè sɔ̀lɔ̀ ɓoò yi yɛ̀í e kéa là, kɛ kó lɔ̀ɔ ɓo à ká mia gbààlà gbùò zɛ̀ o kéa gé?”
34Zízɛ̀ a gèe o lɛ̀ɛ, “Belè‐kpo wɛ̀ɛɛ̀ lɛ́ e ka kɛ̀lɛ̀?”
Wa gèe kélɛ̀, “O sálápèèlɛ, wà kpã̀ã́ ɓéĩ́ kélé kélé lɛ́ nɔ́ e ko kɛ̀lɛ̀ɛ.”
35Zízɛ̀ a gèe mia gbũa lɛ̀ɛ ó yà tã́ã̀ sɛ́lɛ́ bà. 36E belè‐kpo sálápèèlɛɛ wà kpã̀ã́a o sí gbaa, e Wálà zúo ɓo, e o kpú yɛ́ kélé kélé, áà nɔ̀ là tòà‐píé‐mìàa lɛ̀ɛ. Là tòà‐píé‐mìàa o à nɔ míáa lɛ̀ɛ. 37Mia séĩ́‐séĩ́ wa ɓèlè, o gí e dɔ. Lɛ̀ e kɛ gbaa kília, o à kpuú‐kpuú e tóa wɔ́ɔ́. E támé‐kɔ̃̀ɛ̃̀ sálápèèlɛ pa. 38Gɔ̃à lɛ́ o pɛ́ɛ ɓèlèa, yé òó loà wà nɔ́ɔ̀ɓé o dà o bàa, o lóníìa zɛ̀ e kɛ wáá yììsɛ.
39Lɛ̀ e kɛ kília, Zízɛ̀ e míáa vɔ gbaa o pà. E yà gbaa gɔɔ yí, e ló gbaa sɛ́lɛ́ lɛ́ ò si Mágádɛ̀ɛ yí.
S'ha seleccionat:
:
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mann New Testament © Bible Society in Liberia, 1978.