Lucas 23
23
Pilatuman Jesústa apayanqan
Mateo 27.1-2, 11-14; Marcos 15.1-5; Juan 18.28-38
1Tsaypitanam Pilatuman llapan autoridäkuna Jesústa apayarqan. 2Tsaychönam Pilatuta niyarqan: <<Kay runatam tariyarqü nacionnintsikpa contran shäriyänanpä runakunata willaykaqta. Manam munantsu impuestuta mandaq Césarpä pägayänantapis. Tsaynöllam nin Cristo kar rey kanqanta>>.
3Tsaymi Jesústa Pilato tapur nirqan: <<¿Rasunpaku Israel runakunapa mandaqnin rey kanki?>>
Jesúsnam nirqan: <<Rasun kaqtam nirquyki>>.
4Tsaynam mandaq sacerdötikunata y tsaychö qorikashqa kaykaq runakunata Pilato nirqan: <<Kay runapa ima jutsantapis manam tarïtsu>>.
5Tsaynö niptinnam masrä niyarqan: <<¡Kay runaqa autoridäkunapa contran shäriyänanpämi runakunata yachaykätsin! Galileapita qallaykurmi kananqa kay Judeachöna yachaykätsin>>.
Herodesman Jesústa apayanqan
6Tsayta wiyaykurnam Pilato tapurqan: <<¿Kay runaqa Galileapitaku?>>
7<<Awmi>> niyaptinmi Galileachö mandaq Herodes juzgananpä Jesústa apatsirqan. Tsay junaqkunam Herodespis Jerusalénchö kaykarqan.
8Jesúspä parlayanqanta wiyashqa karmi y milagru ruranqanta rikayta munarmi Herodesqa unaypitana reqiyta munarqan. Tsaymi Jesústa chäratsiyaptin pasaypa kushikurqan. 9Herodes kutin kutin tapuptinpis Jesúsqa manam imatapis parlakurqantsu. 10Tsaychömi mandaq sacerdötikuna y ley yachatsikuqkuna Jesúspa contran imaykata niyarqan. 11Tsaynam reypa cäpanta aqshurkatsir soldädunkunawan Herodes asiparnin Jesústa manakaqman churayarqan. Tsaypitanam Pilatuman kutitsirqan. 12Tsay junaqmi Herodeswan Pilato chikinakuyanqanpita amïguta rurayarqan.
Jesústa wanutsiyänanpä Pilato mandanqan
Mateo 27.15-26; Marcos 15.6-15; Juan 18.39—19.16
13Tsaypitanam mandaq sacerdötikunata, autoridäkunata y llapan runakunata qayaskatsir 14Pilato nirqan: <<Kay runatam apayämurquyki: <Autoridäkunapa contran shäriyänanpämi runakunata yachatsin> nir. Peru puntaykikunachö tapur manam ima jutsantapis acusayanqaykinöqa tarirqütsu. 15Herodespis ima jutsantapis mana tarirmi kayman kutitsimushqa. Kay runa wanutsishqa kananpä manam ni ima mana allitapis rurashqatsu. 16Tsaymi asutaykatsillar dëjaykushä>>.
17[Cada watam Pascuachö Pilatuqa juk prësuta qarquq.]#Mat. 27.15; Mar. 15.6. 18Jesústa qarquyta munaptinmi llapan runakuna juk shimilla qayarar niyarqan: <<¡Tsay runaqa wanutsun! ¡Barrabásta qarquy!>>
19Barrabásqa carcelchömi wichqaraykarqan gobiernupa contran Jerusalénchö shärinqanpita y runata wanutsinqanpita.
20Tsaymi runakunata Pilato yapay nirqan Jesústa qarqunanpä. 21Peru paykunaqa masrämi qayarar niyarqan: <<¡Crucificay! ¡Crucificay!>>
22Pilatunam yapay nirqan: <<¿Ima mana allitatä rurashqa? Wanunanpäqa manam ima jutsantapis tarïtsu. Tsaymi asutaykatsillar qarqushä>>.
23Peru crucificayänanta munarmi masrä qayaräyarqan. [Mandaq sacerdötikuna y] runakuna tsaynö qayaräyaptinmi Pilato awnirqan. 24Tsaymi runakuna mañakuyanqannö Jesústa wanutsiyänanpä dëjarqan. 25Gobiernupa contran shärishqa kaykaptinpis y runata wanutsishqa kaykaptinpis runakuna munayanqannöllam Barrabásta qarqurqan. Jesústanam wanutsiyänanpä entregarqan.
Jesústa crucificayanqan
Mateo 27.32-44; Marcos 15.21-32; Juan 19.17-27
26Jesústa crucificayänanpä apaykäyaptinmi Simón jutiyuq runa chakrapita kutiykämurqan. Payqa Cirene nacionpitam karqan. Paytam mandayarqan Jesús apaykanqan cruzta umrurkur Jesúspa qepanpa apananpä.
27Atskaq runakunam Jesúspa qepanta aywayarqan. Paykunawanmi atskaq warmikunapis llakikurnin waqar aywayarqan. 28Jesúsnam warmikunaman tumaykur nirqan: <<Jerusalén warmikuna, ama noqapäqa waqayaytsu, sinöqa kikikikunapä y wamraykikunapä waqayay. 29Pasaypa ñakay junaqkunam chämunqa. Tsay witsanmi runakuna niyanqa: <¡Ima kushishqarä kaykäyan qolluq warmikuna y llulluta mana chuchuq warmikuna!> 30Tsay witsanmi runakuna pasaypa ñakar jirkakunata niyanqa: <¡Juklla ushakäyänäpä janäkunaman juchumuy!> Tsaynöllam qaqakunatapis niyanqa: <¡Juklla ñitiskayämay!>#Ose. 10.8. 31Kawaykaq jachata kaynö ruraykarqa tsakishqa qerutaqa ¡imatarä rurayanqa!>>#23.31 Tsaynö parlarqa Jesús nirqan: Jutsaynaq kaykaptïpis kaynö ñakaykätsimarqa ¡imanönarä qamkunata y wakin Israel runakunatapis ñakatsiyäshunki!
32Jesústawan crucificayänanpämi ishkaq jutsasapakunatapis apayarqan. 33Calavëra niyanqan sitiuman chaykatsirnam Jesústa crucificayarqan. Apayanqan jutsasapakunatam juknin kaqta derëcha lädunman y jukaqtana itsuq lädunman crucificayarqan.
34[Jesúsnam nirqan: <<Papällay, kay runakunata perdonaykuy. Manam musyayantsu imata rurayanqantapis>>.]
Soldädukunanam Jesúspa röpanta apakuyänanpä suertiyayarqan.#Sal. 22.18.
35Tsaychö runakuna rikaraykäyaptinmi autoridäkuna Jesústa burlakurnin niyarqan: <<Tayta Dios akranqan Cristo kaykarqa jukta salvanqannölla mä kanan kikinpis salvakutsun>>.
36Tsaynöllam soldädukunapis burlakurnin pochquq vïnuta uputsiyta munar 37niyarqan: <<Israel runakunapa mandaqnin rey kaykarqa mä kikiki salvakuy>>.
38Cruzpa puntanchömi juk letrëru nirqan: <<Kay runam Israel runakunapa mandaqnin rey>>. [Tsayqa qellqashqa karqan griëguchö, latínchö y hebreo idiömakunachömi.#Juan 19.20.]
39Tsaynöllam crucificaraykaq jukaq runapis Jesústa burlakur nirqan: <<Tayta Dios mandamunqan Cristo karqa mä kikiki salvakuskir noqakunatapis salvayämay>>.
40Tsaynö niptinmi juknin kaq ajäpar nirqan: <<Qampis paynö ñakaykarqa ¿manaku Tayta Diosta mantsakunki? 41Noqantsikqa jutsantsikpitam ñakaykantsik. Peru kay runaqa manam ima jutsatapis rurashqatsu>>.
42Tsaypitanam Jesústa nirqan: <<Mandakuynikichö kaykar noqalläta yarpaykallämanki>>.
43Jesúsnam nirqan: <<Rasunpam nï: Kananpitaqa noqawanmi paraísuchö kanki>>.
Jesús wanunqan
Mateo 27.45-56; Marcos 15.33-41; Juan 19.28-30
44Pullan junaqpita hasta las tresyaqmi patsa tsakaskirqan. 45Rupaypis manam atsikyarqantsu. Tsay höram templu rurinchö cortïnapis pullanpa rachiskirqan.#23.45 Templu rurinchö cortïnam Lugar Santïsimuman pipis mana yaykunanpä tsaparaq. Tsaypita masta musyanaykipä liyinki Éxo. 26.31-33; Heb. 9.1-10; 10.19-20. 46Jesúsnam jinchipa nirqan: <<¡Papä! ¡Makikimanmi almäta churaykamü!>>#Sal. 31.5. Tsaynö niskirnam wanuskirqan.
47Tsaykunata rikaykurmi soldädukunapa capitannin Tayta Diosta alabar nirqan: <<¡Rasunpam kay runaqa jutsaynaq kashqa!>>
48Tsaychö kaykaq llapan runakunapis pasaypa llakikurmi pëchunkunata kutarrä kutikuyarqan.#23.48 Tsay witsan runakunaqa imapitapis llakikurmi pëchunkunata kutayaq. 49Jesúswan reqinakuqkunam karullapita pasaypa llakishqa rikaraykäyarqan. Paykunawanmi Galileapita shamuq warmikunapis kaykäyarqan.
Jesústa pampayanqan
Mateo 27.57-61; Marcos 15.42-47; Juan 19.38-42
50Juk runam José jutiyuq karqan. Payqa Israel runakunapa autoridänin y Tayta Dios munanqannö kawaq runam karqan. 51Judeachö Arimatea markapitam karqan. Paypis Tayta Diospa mandakuynintam shuyaraykarqan. Autoridä mayinkuna Jesústa wanutsiyänanpä willanakuyaptinpis payqa manam munarqantsu. 52Paymi Pilatuman aywarnin rugakur nirqan: <<Jesúspa ayanta pampanäpä dëjapaykamay>>.
53Awniptinnam Jesúspa ayanta cruzpita jipiskir lïnu säbanaswan piturqan. Tsaypitanam manarä pitapis pampayanqan qaqachö uchkushqa sepultüraman pamparqan. 54Tsaynö pamparqan jamay junaqpä alistakuyänan junaq ushaykaptinnam. Jamay junaq qallaykunanpänam kaykarqan.#23.54 Israel runakunapäqa cada junaq qallaykuq seis de la tardim.
55Galileapita Jesúswan shamuq warmikunanam Josépa qepanta aywar rikayarqan sepultüra maychö kanqanta y Jesúspa ayanta imanö churayanqanta. 56Tsaypita wayiman kutiykurnam mushkuq jachakunata y perfümikunata alistayarqan Jesúspa ayanman wiñayänanpä. Jamay junaq kaptinmi mandamientu ninqannö jamayarqan.
S'ha seleccionat:
Lucas 23: qxo
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2002, 2008, Wycliffe Bible Translators, Inc. All rights reserved.