Lucas 21
21
Tub byud mzaa gon, kwaan rese demi kwaan nzhap me
(Mr. 12:41-44)
1Jesús mwii lo re rik, xaa kago demi leen alkansi naz roo yidoo cheen re xaa Israel. 2Noka ngune xaa lo tub byud, me prob doo. Me ne mlo chop rel leen alkansi. 3Zee Jesús nzhé:
—Wlipa na nii na lo gu, lee ngwnaa prob ne mzaa mas grora gon ke re stub naz xaa mzaaya. 4Nel rese xaa mlo gro doo demi leen alkansi, per nebse mlo xaa re kwaan mlake lo xaa. Per lee ngwnaa prob ne mlo rese demi kwaan nkano me kwaan nak kwaan zi me kwaan gaw me.
Lee yidoo lux
(Mt. 24:1-28; Mr. 13:1-23)
5Lak myet kawdizh cheen yidoo kwaan gro cheen re xaa Israel. Nu mbezh xaa lee re ke cheen yidoo ne chul doo nzhak nu zyen doo gon ngwaya. Per lee Jesús nzhé:
6—Kwaan kawii gu lo nal, zhin tub mbizh rese ke kwaan chul doo kwaan nyun lo gu, nalaketra tich sa ke ke.
7Zee mnabdizh re xaa lo Jesús:
—Maestr, ¿cho gor zelo re kwaane gak? ¿Cho kwaan luu zee mer gak re kwaane?
8Jesús mkeb lo xaa nu nzhé xaa:
—List gok gu zee nik tub xaa nakadet gu. Nel zyen doo xaa yiid nu né xaa: “Na nak Crist, Xaa Mxaal Dios Nabeyy”. Noka né xaa: “Mzhin gaxla mbizh gak re kwaane”. Nareket gu tich re xaa sbaa nii. 9Gorna gon gu lee dil nzho rete pa, nazhebt gu. Rese kwaane nzhaal gak yilotlaka; per nalet re kwaane nak kwaan lux yizhyo.
10Noka nzhé Jesús lo re xaa:
—Lee re yezh dil kwaan stub yezh nu lee pa nabeyy tub rey dil kwaan pa nabeyy stub rey. 11Nu gun re xog naro doo lo yizhyo, nu la win, nu la reta yalyizh reta pa. Nu luu nseyn gro doo naz leen yiba, kwaanzee cheb doo re myet. 12Yilotlaka ded re kwaane, lee re myet zen re gu nu ted xaa gu bid, nu yilaa xaa gu pa nkasa be nseed be xtizh Dios nu noka yilaa xaa gu lo re xaa nak zhiin nu lo re rey zee chep xaa gu lozhyib. Sbaa le xaa gu nel nzaa gu kwent cheen na. 13Kwaane gak zee nzho mod zaa gu kwent cheen na lo re myet. 14Nu nalet gu xgab cho kwaan keb gu gorzee lo re kwaan gaazh xaa tich gu. 15Nel na za yalnzhak lo gu zee wen keb gu lo xaa gorzee; zee lee re xaa nayii ne re gu nyent mod saaw roo gu, nu nixa nyent mod keb lo gu nik tub kwaan. 16Leeka xuz gu, leeka re wech gu, nu re xaa li gu, nu re xaa nyenn gu, yilaa xaa gu lo xaa nak zhiin, nu sbaa axta nzho mod gut xaa lak gu. 17Nu rese myet zhaal xyan ne gu, nel nzaa gu kwent cheen na. 18Per nik tub yich yek gu naluxt. 19Per loka xaa ye ded re kwaane, xaa ba le gan yalnaban kwaan tira.
20’Gorna ne gu lee re soldad dub welt nzhi yezh Jerusalén zee ne gu leeya lux. 21Re xaa nzho yizhyo Judea nzhaal rexonn xaa nya xaa naz yi, lee re xaa nzho yezh nzhaal rexonn nya leeka naz yi, nu lee re xaa nzhi naz wen nanzhaaltra bare xaa yezh. 22Bid doo ted Dios re xaa mbizh zee, zee gak rese kwaan kwentaxa nkeeya lo Xkyech Dios. 23Nagan gak re kwaane lo re ngwnaa me nakxiin mbizh zee. Nu nagan gaka lo re ngwnaa me nkano madoo, nu nagan doo gaka lo re myet nzhi lo yizhyo ne, nel lee yalnayii cheen Dios la tich re myet yizhyo ne. 24Lee lak myet yet kwaan spad, nu zlak myet wee xaa lo yizhyo cheen xaa. Nu nabeyy re xaa nanakt xaa Israel yezh Jerusalén, axta gorna yilo yixoob re mbizh kwaan nzhaal nabeyy re xaa yizhyo Israel.
Xomod bare Jesús
(Mt. 24:29-35, 42-44; Mr. 13:24-37)
25’Nu luu nseyn gro doo naz yiba lo mbizh, lo mbee, lo re mbal. Nu lee re myet xaa nzho re yezh yizhyo ne, tira guuzh lo yalnacheb gorna ne xaa lee nistoo nakap doo nkee brink. 26Nu tira guuzh re myet lo yalnacheb cheen re kwaan gak lo yizhyo ne, nel lee re kwaan nzho naz leen yiba xiz. 27Gorzee wii re gu, lee na Xaa Mzhin Ngok Myet, nyal leen xkaw kwaan gro doo yalnabeyy cheen na nu kwaan xni chul cheen na. 28Gorna ne gu lee re kwaane zelo gak, zoli gu nu blep gu yek gu naz yiba nel merla zhin na za na yalnaban kwaan tira lo gu.
29Jesús mzaa tub kwent nabix ne lo re myet, nu nzhé xaa:
—Wii gu lo yag ig nu wii gu lo stub naz yag. 30Gorna lee re ram cheena merla koo lag, zee ne gu lee mbee kwaan la neey mzhin gaxla. 31Leeka snee, gorna ne gu lee re kwaane kayak, nela gu lee yalnabeyy cheen Dios nzezhin gaxla. 32Wlipa na nii na lo gu, lee re myet xaa nzhi nal nayeta xaa gorna lee re kwaane zeeraka gak. 33Lee yizhyo nu yiba lux per lee xtizh na nadedt.
34’Bkanap gu gu napa lee re kwaan yizhyo ne kale gan lo gu, zee tubka nalet gu xgab cho kwaan gaw gu nu cho kwaan go gu zee listlaka zo gu mbizh kwaan bare na, 35nel zhin mbizh nakap ne lo rese myet dubse yizhyo. 36Tubka bkanap gu gu, nu tubka wdizhno gu Dios zee nzho mod le gu gan lo re kwaan nakap doo kwaan ded, nu zee nzho mod zo gu lo na, Xaa Mzhin Ngok Myet.
37Rese mbizh nseed Jesús rese myet lach roo yidoo, per rese yaal ngwa xaa yi kwaan le Olib, nu mlaz xaa baa. 38Garziil doo rese myet nya lach roo yidoo zee gon xaa kwaan yé Jesús.
S'ha seleccionat:
Lucas 21: zpo
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.