KISAH 19
19
Paulus tri tut nihyet ei minu ndig Efesus
1Mpe dima lene Apolos ningat rin ei minu ndig Korintus ba, Paulus ya bidem hanjop dima buug krau Efesus buum tungwatu ibou poi di ingon jo kep Yesus. 2Noni hig pus yok “Allah Ninnei srek kwei ei jingonti tirigi jingon jo kep Yesus e?”
Yo dima ibuhup “Bigyo. Nimiap tut Allah Ninnei ninghapti bi sren.”
3Paulus hig ser yok “Jiba nitur ei minyeiti ninyeng mindei ribiyai nitur je ei minyeiti i?”
Yo dima ibuhup “Niyai nitur nyei ei minyeiti bit leu nok gi Yohanes tri tut he.” 4#Mat. 3:11; Mrk. 1:4, 7-8; Luk. 3:4, 16; Yoh. 1:26-27 Lene Paulus pai biyok “Nitur tungwatu ei minyeiti di Yohanes tri tut dima mem yo di ittin ser sisar bikiek ndam Allah. Noro mpe dima lene Yohanes tri tut bipia suar mben Israel ingon jo kep No di ya abia kep noni ba, No dima ne Yesus ri.”
5Tirigi yo dima imiap Paulus nipaisi lene igyai nitur yok ei minyeiti tug hon Yesus ninyenga. 6Ba, mpe dino Paulus kes ninda ei yok dip lene Allah Ninnei sindem tut yok leu api imbrap ngkiai nya ighyet bitri tut Allah nihyet cem. 7Yo dima imangti ibou simnaibrimigcan.
8Paulus ug cem kep mben Yahudi ei ide ig mbusyamei lene ba niji nghai bitri tut nihyet biyok mem bed ningai. Noni ba nihyet bidahat yok leu binhyepo ingon huk niti tut Allah ninyeng tak kepti. 9Noro yo dima ibou poi ingon jo kep bi lewo ingon tindak. Ipai bipia Paulus ningginau yokti tut Allah ningon kanti di teu tungwatu biyai niyaijo nijep biyok tug hon Yesus dima kinei. Gima rino Paulus kes yok ei bibuwak yo di ingon jo kep nya kwei ei ig di bon ninsi nindig bibor gom di Tiranus pikor tungwatu nya eisi. Ba, Paulus kin tungwatu nya iba ighyet bidahat yam ei sirima bikwop njap-njap. 10Noni yai midyai dima kikau mem ari bingwam can apino Allah nihyet tibim ei mben Yahudi kin ngkiai nya di ibong ei hanjop Asia yahagom itingou nsi.
Ninnei rom gom bui Skewa nipmot bat nya
11Allah bibon mindur di dor tunggwei nya tug hon Paulus. 12Leu ba, gino tungwatu ipwoi sinsun nghas kin handuk di Paulus bimangkrei biyuug sut bak yo di inggwen lene gini bindei bikei hanyen ba, ninnei rom nya yehei leu ingonti cem. 13Mben Yahudi ibou poi di inda kan igya bidem minu dima bijji ninnei rom leu tungwatu ingonti. Yoni ibingon mem gima iba Tuhan Yesus ninyeng cem bicuk ninnei rom nya leu yo di inggwen nya ingonti. Nihyet di tibim ei yuhui him pai “Dijji na tug hon ninyeng Yesus di Paulus tri tut.” 14Andigpoi Skewa di nok imam nindig yai nipmot bat nya ibou muhwindacan di ibingon mem gima ijji ninnei rom leu yo di inggwen nya ingonti.
15Noro ninnei rom dima buhup “Dikan tut Yesus ba, Paulus cem dikan tut lo, jeni ne tou i?”
16Lene no di ninnei rom ya ningonti ba nisindemti di mindur bicut igkep yok bibui yok kinei-kinai ba, yahagom inang leu ig bei tut gi ibok mang bibor kin ingat ngu cem lewo no dima bindei rik ide sinsun di ijuk bingwig leu yok. 17Mben Yahudi kin ngkiai nya yahagom di ibong ei minu ndig Efesus imiap yo dima inghapti lene idigit tut. Mun di pek kep dima bindei ba, tungwatu nya inggei sut tuhan Yesus nindig bibor. 18Yo di ingon jo kep nya imang bibor ikwei pai jit bimbot kep tut nung nya di ikui yok nipou su dima brei bou tungwatu igyai him. 19Ba, yo di ibindei mbut nung ningginausi nya imang bibor imbus ide srat nya keyam bindig kep hum bou tungwatu yahagom igyai him. Ba, srat dima nimangti hagom sok yam nibok dem mitiei nitig#19:19: Nipas kep mitiei nitig: ei nijam dima ne iba mitiei nitig gom bigo no di yai midyai mem njap gom (angig ayai kep Mat. 20:2). sribu ningot muhwi. 20Tuhan ninyeng kieng kep minu ndig dima tug hon nisinati di kei ngat kei dima biyai ningat mang bibor bikum eisi bu.
Mben Efesus ighyet ngwig kep yam
21Gima ngwig leu lene Paulus kos tut#19:21: Nipas kep Paulus kos tut cem kei lene nipas kep Allah Ninnei bie tut Paulus ba, noni kos tut cem kei. bipia mbut ug ei hanjop Makedonia kin Akhaya mbigom kin bu leu api ngkwei hanyen ug ei minu ndig Yerusalem. Noni yongon kep “Niabiati singkwei hanyen ei minu ndig Yerusalem leu lene suug ngat minu ndig Roma cem.” 22Gima rino noni pinak nisut bat cin di igya kui noni di Timotius kin Erastus ug ei hanjop Makedonia leu lene noni bong ei hanjop Asia mem ari poi bu.
23Ei nijam dima ne timiei minu ndig Efesus nya isibui ighyet ei yamti drek dip ningginausi tut Yesus. 24Lewo Demetrius di timiei minu ndig dima ne niba perak bibon mun cig ri. Noni bibon ig midut kwar nisop Artemis nimien bou ninda him. No dini kin yo di impu noni yahagom itri ig midut di ibon bou inda him bibipek mitiei nindig bibor. 25Gima rino noni nduk tukan di impu noni kin yo di impu tukan perak nindigsi nya yahagom kwei lene pingok ingonti bipai “Andigpoi jen, jikan tut bipia ig midut di ibon bou inda him nya ne ibipek mitiei nindig bibor. 26Nogindia jingat bou jiyai him bijimiap ei jitingou nsi cem tut no di Paulus bitut ningginau tungwatuti. Noni tri tut bipia kwar di ikuk yo bak di tungwatu ibon bou inda him dima ne nitrowai he. Ba, noni pingok timiei minu ndig Efesus dini he ingonti bi noro pingok timiei hanjop Asia nisurti-nipekti ingonti cem ba, imang bibor itti kin noni. 27Niyai munti dima buhun bibor! Mbigom tungwatu nya misrep tut ide midyai dini. Gima he bi noro yoni miba igyai ngat ide kwar sop Artemis de ig bicut ninyeng di jei. Artemis ne kwar sop di timiei hanjop Asia kin tungwatu dihyeisi dini hagom cem ikuk yok bak ri!”
28Tirigi tungwatu pima yok imiap nihyet lene yahagom ingon sibui nindig bibor ba, ighyet sra tut bipai “Artemis di nibousi ei minu ndig Efesus ninyeng jei o!” 29Timiei minu ndig dima yahagom imiap ighyet di kui yam dima leu api nimpung di ingon sibui pima ibicom yam ba, ikat Gayus kin Aristarkhus di mben Makedonia di ibit-bit nyen Paulus bidem minu bikri yahacem ug ei mpia ttou nsi gom di tungwatu inen bilen mang bibor eisi. 30Paulus cem pi bibit yok ug ei mpia ttou nsi dima bitri tut nihyet bak yo di ighyet ngwig kep yam dima noro yo di ingon jo kep nya icuon ser noni. 31Nibou pemerinta di inyeng jei ei hanjop dima ibou poi di ijem isut bit Paulus cem isok ighyet kwei bak noni ser nhyema noni bit yo cin pima bitri tut nihyet bak tungwatu ei mpia ttou nsi dima au. 32Lene yo di ingwig ei bilen dip dima yahagom ighyet sra nggai bijo ninno. Bihi imbrua nok gini lene bihi imbrua nok gima lewo yo di imang ndig dima ikan tut mun di bindei dino idem yam ei bi. 33Ibou poi ikan bigya Aleksander ribindei di ighyet kui yam dima lewo mben Yahudi ibidip huk noni buug ya ei yahagom yoho bei. Gima rino noni kimut ninda kep yok leu binhyepo isindui sut ba, noni mbrap gau nonti ei yahagom yoho bei. 34Noro tirigi ingat lo, noni ne mben Yahudi rin lene iba ighyet di jei bibor bimbrua sur yam kikau mem jam nitindur can bipai “Artemis di nibousi ei minu ndig Efesus ninyeng jei o!”
35Imbrua nok gima kikau bibou nibou kintror pemerinta gom kiju biya ba, kimut ninda kep tungwatu nya ug api ighyet ntus. Noni pai biyok “Je di timiei minu ndig Efesus e, tungwatu yahagom ikan tut bipia je di mben Efesus jinyohou kwar sop Artemis de ig kin tig di kwes-kwau di cut kwei leu mpia-bbed him. 36Bit bon tungwatu nya isrep tut jiyai kepti dima kan bi. Gima rino ma joom jingon leu binhyepo jiba jingon ko-ko wai au. 37Jikat yo cin dini kwei lo, jo nibreisi bipia ipos mun nyeng hi leu jide ig kwar nya ba, ighyet wer mpiahi tut ide kwar sop cem bi. 38Gino Demetrius kin nide limwa nya ingon buhun tut tungwagom drek dip niyai munti lene nna ba yuug ya ei nikei noho bei bisimbot kep tut ingon buhunti dima bit noni. Lewo nikei nya imbus tungwatu nya ide munhyet mem njap dino kintror kau leu yok. 39Lo, gino jilua sok tut munhyet hiter bu lene ma jibet jingon bibou timiei minu ndig dini yahagom idem yam ei bit leu nok nibou Roma nicuk yokti ug e. 40Leu ma mun di pek kep mem nye njap di ammani mibindei ba, nibou minu ndig Roma nya mipai kep nye drek dip ighyet di kui yamti dini. Bit bon ipai mun mem ibisu tindei ighyet di kui yamti mikui-kausi dini kan bi.” 41Pai nok lene nibou kintror pemerinta dima cuk tungwatu ningot ndig pima yok leu binhyepo intek gimahap.
S'ha seleccionat:
KISAH 19: HAD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió