YOHANI 12
12
Yesu adzozwa mafuta ku Betania
(Mt. 26.6-13; Mk. 14.3-9)
1Pidasala nsiku zitanthatu kuti nsiku ya Phwando ya Paska ikwane, Yesu adenda ku Betania kumsuwo kwa Lazaro, akhadalamusa iye kuimfa ule. 2Iwo adasasanyira Yesu phwando, Marita mbakhala nyakuafiliviri; Lazaro akhali mbodzi wa anthu akhadya pabodzi na Yesu ale. 3Tenepo Maria adakwata mtete wakudzala na mafuta#12.3 mtete wakudzala na mafuta: Wenewu ukhali mafuta wakukwana makilogramu theka. a naridi chadi-chadi akudula pyakwanga na akununkhira mbadzoza nawo manyalo a Yesu, mbaapukuta na tsisi yache. Kununkhira kwa mafuta ale kudakalangira m'nyumba monsene mule.#Lk. 7.37, 38. 4Nyakufunza mbodzi wa Yesu, dzinache Yudasi Iskarioti, nyakufuna dzapereka Yesu kuna anyamalwache ule, adalonga mbati, 5“Ayi mafutawa mbadaguliswa, mbatidaphata nawo kobiri ninga zakupagalwi anyakuphata basa madzana matatu pansiku ibodzi#12.5 kobiri…pansiku ibodzi: penu kobiri zasiliva madzana matatu. kuphedzera nazo anthu akutcherenga tayu?” 6Iye adalonga penepi, nee kuti iye akhatsalakana anthu akutcherenga tayu, mbwenye na thangwi yakuti akhali mbava. Iye akhali nyakukoya kobiri, tenepo iye akhakwata kobiri za kuthumba mbaziphatisa basache.
7Mbwenye Yesu adalonga mbati, “Mlekeni pyache! Pansiku yakuikhwa kwanga m'masiye iye anakumbuka pyachita iyepi. 8Anthu akutcherenga munakhala nawo ndzidzi onsene, mbwenye ine nkhabe dzakhala namwe ndzidzi onsene tayu.”#Deut. 15.11.
Anyansembe akulu averana pyakupha Lazaro
9Ayuda azinji adapiva kuti Yesu akhali ku Betania, natenepo iwo adenda kweneko, nee kuti adendera Yesu yekha tayu, mbwenye pontho kaona Lazaro, akhadalamuswa kuimfa na Yesu ule. 10Natenepo anyansembe akulu adasasanya njira zakupherambo Lazaro. 11Na thangwi ya pidachitika kuna Lazaro, Ayuda azinji akhaakhonda mbakhulupira Yesu.
Yesu apita na chilemedzo mu Yerusalemu
(Mt. 21.1-11; Mk. 11.1-11; Lk. 19.28-40)
12Mangwana mwache mwinji ukulu ukhadadza ku Phwando ya Paska ule, udava kuti Yesu akhadza ku Yerusalemu. 13Tenepo iwo adakwata matsamvu a michindu mbaenda kagumanikana naye, uku akukhuwa mbati, “Mulungu mbalemedzwe! Mulungu mbatsanzayise nyakudza na dzina ya Mbuya! Mulungu mbatsanzayise Mfumu wa Israele!”#Mas. 118.25, 26.
14Yesu adagumana bulu mbampakira sasawa ninga mudalongera Malemba kuti,
15“Leka chita mantha, iwe mzinda wa Zioni!
Yang'ana, mfumu wako akudza pamsana pa mwanabulu.”#Zek. 9.9.
16Ndzidzi wenewu anyakufunzache hadapivese tayu; mbwenye pikhadalamuswa Yesu kuimfa na kutambira demelero, iwo adakumbuka kuti Malemba akhalonga pya iyeyu, pontho kuti iwo akhadamchitira penepi.
17Anthu akhali pabodzi na Yesu pandzidzi udalamusa iye Lazaro kuimfa pakumchemera kumasiye ale, akhathimiza kulonga pinthu pikhadachitika pile. 18Ndi thangwi yache mwinji ule udakagumanikana naye, thangwi iwo adava kuti Yesu akhadachita chidzindikiro chenechi. 19Afarisi ale adalonga kuna unango na mwanzache mbati, “Mwaonatu, penepa nkhabepo chathu tayu! Yang'anani anthu a padziko yonsene yapansi akumtewera.”
Agriki anango afuna kuona Yesu
20Agriki anango akhali nawo pakati pa anthu akhadenda kapembedza ku Yerusalemu ndzidzi wa Phwandoyo ale. 21Iwo adenda kuna Filipi, ule kwawo kukhali kuluwani ya Betesaida m'nthemba ya Galilea mbakalonga mbati, “Mbuya, ife tinafunambo tione Yesu.”
22Filipi adenda kapanga Andrea, tenepo uwiriawo adenda kuna Yesu kampanga. 23Yesu adatawira mbati, “Chinchino ora yakwana yakuti Mwana Munthu atambire demelero ikulu. 24Ndikukupangani pyakuonadi kuti mbewu ya mapira imbakhala ibodzi yonthoyo basi ngakhala inakhonda kugwa pansi m'mataka mbifa. Mbwenye iyo ingafa imbabala mapira anango azinji ene. 25Munthu anafuna moyo wacheyo anati autaye; munthu anazonda moyo wache pansi pano anati aukoye kuti akhale na moyo okhonda mala.#Mt. 10.39; 16.25; Mk. 8.35; Lk. 9.24; 17.33. 26Munthu anafuna kunditumikirayo athema kunditewera, towera nyabasanga akhale na ine pabodzi konsene kwene kuna ine. Babanga analemedza onsene ambanditumikira ale.
Yesu alonga pya kufa kwache
27“Chinchino mtimanga ukusanyika pikulu. Apo ndinalonga tani? Ndilonge kuti, ‘Baba lekani tawirisa ndzidzi wa nyatwa kuti udze kuna ine?’ Mbwenye penepi ndiye pidadzera ine, towera ndigwande na ndzidzi wa nyatwawu. 28Baba, dzesani demelero kuna dzinanu!”
Penepo fala idaveka kubulukira kudzulu kuti, “Ndadzesa kale demelero kuna dzinangayi, pontho ndinati ndipichite pontho.”
29Mwinji udaimira penepowo udava falayi, tenepo anango a iwo adalonga kuti ndi chiphaliwali, anangombo adalonga mbati, “Angelo adalonga kuna iye!”
30Mbwenye Yesu adalonga kuna iwo mbati, “Fala idaveka nee thangwi ya ine tayu, mbwenye thangwi ya imwepo. 31Chinchino ndi ndzidzi wakuti anthu a padziko yapansi atongwe mseru; chinchino Satana, mfumu wakuipa wa dziko yapansi pano anaponywa kunja. 32Ndingakwizwa m'dzulu pansi pano, ndinati ndikweyere anthu onsene kudza kuna ine.” 33Iye adalonga tenepo towera adziwise mule mukhafuna iye dzafera.
34Mwinji ule udatawira kuti, “Mwambo wathu umbatipanga kuti Khristu anakhala wakukhala na kukhala. Apo ukulonga tani kuti Mwana Munthu athema kukwizwa m'dzulu? Mwana Munthu analongwayu ngupi?”#Mas. 110.4; Yes. 9.7; Ezk. 37.25; Dan. 7.14.
35Yesu adatawira mbati, “Cheza chinakhala namwe ndzidzi pang'ono. Fambani pandzidzi una imwe na cheza uno, mwenemo mdima mbudzati fika pakati panu, thangwi munthu ambafamba mumdima ule nkhabe dziwa kunaenda iye tayu. 36Ndzidzi una imwe na cheza, khulupirani chezacho, towera mukhale anthu a m'cheza.”
Ayuda akhonda kukhulupira Yesu
Pidamala Yesu kulonga penepi, adabulukapo pyache mbabisala. 37Podi kwene kuti iye akhadachita pidzindikiro pyonsenepi pakati pawo, kwache iwo hadamkhulupire tayu. 38Pidakhaladi tenepo kuti pikwane-kwane pidalongwa na mprofeti Yesaya pile kuti:
“Mbuya, mbani adakhulupira mphangwa zidalonga ife?
Nkhuna ani kudatchululira Mulungu mphamvu zache?”#Yes. 53.1.
39Natenepo iwo hadakwanise kumkhulupira tayu, thangwi mprofeti Yesaya adalonga pontho mbati,
40“Mulungu afunga maso na nzeru zawo zene,
towera maso awo akhonde kuona,
pontho nzeru zawo zikhonde vesa pinthu.
Tenepo Mulungu alonga mbati,
‘Iwo adachimwana kuzungunukira kuna ine
kuti ine ndiawangise.’ ”#Yes. 6.10.
41Mprofeti Yesaya adalonga penepi thangwi adaona demelero ya Yesu mbalonga pya iyeyo. 42Podi kwene kuti pikhali tenepo, akadamu a Chiyuda azinji adakhulupira Yesu; kwache thangwi ya Afarisi iwo hakhapilonga pakwecha tayu, gopesera kukhondeswa kupemphera nawo m'nyumba yakupemphereramo. 43Iwo akhafuna kuti anthu aasimbe pikulu kupiringana Mulungu.
Mafala a Yesu anatonga anthu mseru
44Yesu adalonga mwakugaluza fala mbati, “Munthu anakhulupira ineyo, akhulupira ine ndekha tayu, mbwenye na nyakundituma ene. 45Munthu andionayo, aona pontho nyakundituma. 46Ine ndadza padziko yapansi pano ninga cheza, towera munthu anandikhulupirayo aleke khala mumdima. 47Munthu angava mphangwa zanga mbakhonda kuzivera, ine sinamtonga mseru tayu. Ine sidadze padziko yapansi dzatonga anthu tayu, mbwenye dzaapulumusa. 48Munthu anandikhondayo mbakhonda tambira mphangwa zanga alipo unango anafuna dzamtonga mseru. Mafala alonga inewa ndiye anafuna dzamchitisa kukonwa pansiku yakumalisa! 49Thangwi ine sidalonge na utongi wanga ene tayu, mbwenye Baba, adandituma ule, andipanga pyakuti ndipilonge, pontho ndipipange anthu. 50Tenepo ndikupidziwa kuti matongero ache ambapasa moyo okhonda mala. Natenepo pyonsene pimbalonga inepi mphile pyandipanga Baba kuti ndipilonge.”
S'ha seleccionat:
YOHANI 12: SenaMw
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Bible Society of Malawi