Lucas 19
19
Jesús mëët Zaqueo
1Ku Jesús nyajjxy Jericó. 2Jäm y'ijjty kyukkajjpë tu'uk kumeenyjyaa'y mati' txëëw Zaqueo, Roma yëkmeenymyujkpëttëjjk nyiwintsën. 3Jä'äts y'ijjty Jesús tja'ijxëwyamp, kä'äts jä' t'ijxpaaty jä'ku nimay y'ijjty jaa'y Jesús tyayo'ymyükyë jäts kon y'ijjty Zaqueo tyänë. 4Jakëjxts pyujt'tuwëjjky, nits kepykyejxypy pyejjty jä' tuu'aajy maj y'ijjty Jesús nyaxwa'any, jäts t'ijxpaatt, 5Ku Jesús jäjp nyajjxy nits y'ijxjë'ëjky jäts nyëë'mxë:
—Zaqueo, winak atëtspekyë, jä'ku ixyam ëjts nmaaktanwa'any mtëjkëntüjpy.
6Nits Zaqueo atëtspekyë wyinajjky, jäts oy jotkujjk tpawaay tyëjkëntüjpy. 7Ku najj jaa'y t'ijxtë nits tpakkajpx'axajjtë Jesús, jakëjx ku y'ijjty tëj myaaktäny pökytyumpëjaa'y tyëjkëntüjpy. 8Nits Zaqueo tyenkyuk'ajjty jäts tnëëjmjaay Jesús:
—Wintsën, ixyam ëjts nnikkäjpxy, tukkë'yë pëntijjäty ëjts nmëët kujkwä'kxy ëjts nmo'ot ayoopëttëjjk, pën tëts ëjts jaa'y nmeetsy majktaxk nikkompät ëjts jä' nyëkwimpijjtjäänyë't.
9Nits Jesús y'atsooy:
—Tëj ixyam jya'aty nitsoojkë'n yaj tëjkjoojty, jä'ku ya'at yaa'ytyëjjk Abraham yë' nyaskä'äxë. 10Yë'ëts jä' tëj tniminy Yës Teety y'uu'nk nits t'ijxta'at jäts tyëknitso'okt pënjäty tëj tyakkoynyë.
Meeny y'ijxpäjjt
11Jäts y'ijjty jaa'y t'amatoo'anaxtë ku Jesús najj wyaany, nits myatyaajkxëtë tu'uk ijxpäjjt, jä'ku Jerusalén myu'awinkonnë jä' y'ijt'të, najjts y'ijjty jaa'y wyinmaytyë nits jätyë jä' tsyoo'nta'akwa'any Yës Teety kyuttujjkë'n.
12Nits Jesús nyëë'mxëtë: Jää'ëëy tu'uk kumeenyjyaa'y, jäts tu'kyaajjë tsyoo'jny nits nyijkxy jatu'k'it, maj jäm y'ijjty kuttujjk yyëkkë'mo'owa'any, jäts jatu'kyaajjë wyimpitt. 13Kuts y'ijjty tsyoonwa'any, nits nimajjk tyumpë twaatsooy, jäts meeny tmooy tu'uk jatu'uk nits tnëëjmjaay: Yëkmayëtë ya'at meeny kunë'm ëjts nwimpitt. 14Mëjkts jä' y'ijjty myukukkajjp myutsip'ätyë, nits ix'oojk yyëktappakkejjxy ni'ey jaa'y jäts tnëëjmëtë't niwintsëntëjjk. Kä'ä ëëts ntsöky jäts yë' yyëkkuttukt.
15Oyë'mts y'ijjty jaa'y jyakatsökyë, jä'äm ojts tyäny yëkkuttujkpë, kuts wyimpijjty kyajjpjotm nits twaatsookëjjxy pënjäty y'ijjty tëj meeny tmo'oy jäts tnijawë't nii'xyë'n meeny'uu'nk tëj y'ijjty tyëkmayëtë. 16Kuts muttu'uk jya'ajty nits wyaany: Wintsën, tëj ëjts mmeeny nyëkmayë jamajjnk nikkompät. 17Nits yëkkuttujkpë y'atsooy: Oynyäxy tëj mtüny; ku tëj yëkxon x'ijxy'ity mati' ëjts mijts tëj wäänë nmo'oy, ixyam ëjts mijts nkë'mo'oy majjk kajjp jäts xniwintsënë't. 18Kuts mumäjtsk jya'ajty nits wyaany: Wintsën, tëj ëjts mmeeny nyëkmayë jamuwoxk nikkompät. 19Ninyajj tnëëjmjaay: Mijts mniwintsënë'p muwoxk kajjp. 20Kuts jatu'uk jya'jty nits wyaany: Wintsën, ixyaj mmeeny, wit wintsümy ëjts yë' tëj nkoojnjë'ëky; 21ntsë'ëjk'ëëy ëjts mijts, jä'ku kupety mijts mjaa'yë, mpejkypy mijts meeny mati' tëj xkanittüny, jäts mmokwämp mijts maj tëj mkani'ipy mkayu'uy. 22Nits yëkkuttujkpë nyëë'mxë: Mijts ka'oytyumpë, kë'm m'aaw m'ayuujk xkumato'ot, mjanijaa'w'eepy nits kupety ëjts njaa'yë, npejkypy ëjts meeny mati' ëjts nkanittümpy jäts mokwämp ëjts maj tëj nkani'ipy nkayu'uy. 23¿Tikëjxts ojts xkakkexy maj jäm meeny y'anüü'kxy yo'oy, kuts ëjts nwimpitt jäts meeny'uu'nk mëët jyeexyë xkë'yajknë? 24Nits tnëëjmjaay pënjäty jäjp y'ijjty: Pëjjkëtë yë' meeny, mo'otë mati' jyä' tëj tyëkmayë jamajjnk nikkompät. 25Nits jä' jaa'y y'atsootë: Wintsën, ¡Jamtsyë' tmëët'eenyë maymyeeny, 26Jäts yëkkuttujkpë wyaany: Ixyam ëjts nnikkäjpxy, pën tmëët jakyëkmo'opts jä'; pënts tkamëët, yëkpëjjkë'p jä' pën nii'xyë'n tjamëëtë. 27Jäts ëjts nmutsip'eepyëttëjjk pënjäty y'ijjty tkatsojktë'p nits ëjts nyëkkuttukt, yëkmintë jäts xyëk'oo'këxtë't ëjts nwinkujjky.
Jesús kyajjptëkkë Jerusalén
28Ku najj myatyakkëjjxy, nits jyaktuu'yo'jy jäts jya'att Jerusalén. 29Kuts tëj y'ijjty winkon jya'anëtë maj kajjp txëëwë Betfagé mëët Betania, Olivos kojpkwiiny, nits tpakkejjxy nimäjtsk y'ixpëjkpëttëjjk. 30Jäts tnëëjmjaay:
—Nëjkxtë xim awinm maj yë' kajjp'uu'nk myëjjke'exy, kuts mja'at'të't jämts xpaat'të't yi'it tu'uk wurrë kyuwëënyë, mati' kä'änë'm pën ttappety. Mmukkäjjëtë nits xyëkmi'ntë't. 31Kuts pën myëktëwëtë't tikëjx xmukkäjjëtë, nëëjmëtë jäts Wintsën yë' tyëktunwamp. 32Nits ixpëjkpëttëjjk nyëjkxtë, najj jä' tukkë'yë tpatkëjxtë naa'xkë'n Jesús y'ijjty tëj nyee'mxyëtë. 33Yam jä' y'ijjty wurrë tmukkäjjëtë nits kuwurrë pyaajtëtë jäts nyëë'mxëtë:
—¿Tikëjx yë' xmukkäjjëtë? 34Nits jä' ixpëjkpëttëjjk y'atsootë:
—Wintsën yë' tyëktunwamp.
35Nits tsyamaan ttajëpä'ntë wurrë, najjts tta'anëjkx'eetyë Jesús nits toktappäjt'të. 36Mats y'ijjty Jesús yyëkmunäxy jäts jaa'y tsyamaan tyä'ptuu'eetyë jäts ttayo'ypyätt. 37Kuts y'ijjty jyuptaajkjë'ëkwanëtë Olivos kojpkëjxm, nitukkë'yë pyattuu'yo'ypyëttëjjk yaxkäk'axajjtë oy jotkujjk najjts Yës Teety tmëjj'ijxtë tmëjjkäjxtë jä'ku tëj y'ijjty t'ijxtë tukkë'yë mëjj may'ajjt mati' Jesús tyümpy. 38Najj y'ijjty wya'antë:
—¡Mëjj'ijxy mëjjkexy jä' yëkkuttujkpë pën Yës Teety pakkäjjxë'p kuttänääpyë! ¡Jäm jotkujjk'ajjt tsapjotm nits mëjjkexy Yës Teety jäm y'ity!
39Nits nitu'ukën fariseostëjjk mati' jäm y'ijjty jaa'y'akujkm tnëëjmjäätyë Jesús:
—Wintsën, nnëëjmë mpattuu'yo'ypyëttëjjk nits kä'ä najj wya'antë't.
40Jäts Jesús t'atsooy:
—Ixyam ëjts nnikkäjpxy ku yë' y'amo'ntë't, tsaaj kajpxkä'äktë'p.
41Jawäänë Jesús y'ijjty kyaja'aty Jerusalén ku t'ijxpaajty jä' kajjp, nits Jesús tniyax'axajjy. 42Jäts wyaany: ¡Ku mijts jyeexyë ixyam x'ijxë pën mmo'ojë'p joktujjk'ajjt! Kä'äts jä' x'ijxpaaty jä'ku yu'utsy jä' m'ijjtxyë. 43Mniminë'p jä' ka'oyxyëëw, maj mmutsip'eepyëttëjjk myëkni'attujkpättë't, 44jäts myëkkutakkoyë't. Nitukkë'yë mjaa'y y'oo'këxt, tukkë'yë mne'ey jyijtkëxt, jä'ku kä'ä tëj x'ijxkäpy jä' xëëw ku Yës Teety tëj mjaniminyë jäts jyeexyë myëknitso'okyë.
Jesús tyëkwa'atsy tsaptëjjk
45Ku najj nyajjxy, nits Jesús tyëjjk'ëëy tsaptijkypy jäts jaa'y t'ojjpitsëmkëjjxy pënjäty jäjp y'ijjty too'ktë'p juytyë'p 46Nits tnëëjmjaay:
—Najj jaypyety myiny: Nuu'kxtaktaajk ëjts yë' ntëjjk tyu'nt, jäts miits mää'tstajjk xyëktunëtë.
47Jawom jawom y'ijjty Jesús yëk'ixpeky tsaptijkypy, jäts teety nyiwintsëntëjjk, pawaa'n yëk'ixpëjkpëttëjjk mëët kajjp niwintsëntëjjk y'ijjty tniwinmayëtë ntsoj y'ijxë Jesús tyëk'ooktë't 48kä'äts jä' y'ijjty twinmaypyaattë ntsoj ttu'ntë't, jä'ku nitukkë'yë y'ijjty jaa'y tu'ukyë t'amatowtë ntsoj Jesús yëk'ixpeky.
S'ha seleccionat:
Lucas 19: LUKMya
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Evangelio de Lucas en Mixe de Yalalag, Oaxaca, México © Sociedad Bíblica de México, A.C.