Luka 20
20
Vakuvuzilizya amaha ga Yesu
1-8: Mat. 21,23-27. Mal. 11,27-33.
1Ilelo pʼumusanya woka lwʼuwene akuvasambilizyʼavantu mwa tempeli, lwʼakuvalanganizyʼinongwʼinyinza, pe vahapalamila kukwakwe navashiputʼavapiti navamanyakalata navasongo, 2vahamuvuzya vahati: Utuvuzye, zyʼukuvomba ukuvombelʼamaha vuli? Unanʼakupiyʼamaha ganaga? 3Uwenʼahavamula ahati: Nane mbavuzizye limʼizwi, nane lye mumbuzyaje. 4Ulwozyo lwa Yohani lwafumile kumwanya amwe kuvantu? 5Pʼavene vahavalʼukuvuzanya vuvo veka, vahati: Inga tukuti lwafumile kumwanya, pʼaliti: Pe mwali nishonu lelo ukumwitiha? 6Havili inga tukuti kuvantu, pe vontʼavantu valitutinza namavwe. She vonti zivahozile ukuti uYohani ali mukuvwi. 7Pe vahamula vahati: Tutalumanyile kwe lufumile. 8Pe wopʼuYesu ahavavuzya ahati: Pe fwane lelo nane ntakuvavuzya mumaha vuli nkuvombela zinizi.
Ishiholanyo sha mugunda wa mampensya
9-19: Mat. 21,33-46. Mal. 12,1-12.
9Pʼahandʼukuvavuzyʼavantu ishiholanyo shinishi: Wokʼu-muntu ahavwalʼumugunda wa mampensya wʼahavaleshelʼavalimi, pʼahavala kunsʼiyinji, kwʼahadila nkani. 10Ilelo mumwaha wa mampensya pʼahatumʼumunyamata uwa kuvalʼukumusendela zimʼinsanga zya mampensya kuvalimi. Avenʼavalimi vahamuhoma, vahamuvinga lwe vatamupiye nazimo. 11Pʼahavuyizya nohavilʼuwene ahatumʼuwamwavʼumunyamata. Wope nawununo avene vahamuhoma, vahamuliga, vahamuvinga lwe vatamupiye nazimo. 12Ahavuyizya nohavilʼuwene ahatumʼuwa vutatu. Wope nawununo avene vahamuhoma, vahamuṿwalazya, vahamutaga kunzi. 13Pʼumuhatamugunda wa mampensya ahati: Ntuvuli lelo? Nkumutumʼumwana wane unkundwa kukwane. Uwene ingavanga vangamunyila. 14Avenʼavavomṿi lwe vamuwenyi uwene, pe vahayangana vahati: We muhatavupwanʼuno, situmugoje, pe tukuva swe vahatavupwano sweneswe. 15Pe vahamutajila kunzi kumugunda wa mampensya, vahamugoga. Alituvuli navo lelo umuhatamugunda wa mampensya? 16Alivalʼukuvagogʼava-vomṿi vanava. Uwenʼumugunda wa mampensya alipwanizya pupʼavanji. Lwe viṿuye linili, pe vahati: Zye ndali weya! 17Uwenʼahavenya ahati: Likuti vuli linilo lye lisimṿilwe:
Ivwe lye valisufizye avazenganyumba,
lye havili liyipezilʼukuva lya pashipembe?
18Vonti venga vakugwa pivwe linili, vakuṿinyunkana, havilʼuno wenga likumugwila linili likumusyusyutanya. 19Avenʼavashiputʼavapiti navamanyakalata vahati tumuleme panapa, havili vahatetema kuvantu, she vamanyilʼishiholanyo shinishi ahavavuzya vuvo.
Ukuvuzilizya izya musonko
20-26: Mat. 22,15-22. Mal. 12,13-17.
20Pe vahamutega, vahamutumila avaṿulizi ve vakuyilolesya kuva vagolosu, ukuti vamwambambʼizwi mwilomu lyakwe, ukuti vavalʼukumutwala muvumwene namumaha ga musungansi. 21Ve vahamuvuzilizya vahati: Musambilizi, twazile we mugolosʼiwe nashengʼukuyanga nashengʼukuvasambilizyʼavantu, pe numʼumuntu utakumusevela muvwinza kuminsʼiwe ndali, ukuvasambilizya vontʼavantu ilya nalyoli idala lya Mulungu. 22Amwe kwinzʼukusonkolʼumusonko kwa Kesali, amwe ndali? 23Uwene nyene ahavamanyʼishifumbo shavo ahavavuzya ahati: 24Simundanjʼidinali. Amwe ishiholanyʼishi sha nanu nuvusimbe vwe vasimṿile pupo? Vahati: Vwa Kesali. 25Pʼuwene ahavavuzya ahati: E, fwane lelo simumupanjʼuKesali iṿwa pavuKesali vwakwe, wope nuMulungu mumupanje iṿwa pavuLungu vwakwe. 26Pe vahapotwa ukumwambamba izya mwilomu, she vakwiṿwʼavantu. Vahasukumila ukwamulʼuwene, vahapuma mwa.
Ukuvuzilizya izya kuzyuha
27-40: Mat. 22,23-33; 46. Mal. 12,18-27; 34.
27Pe vahapalamila kukwakwe vamo avaSadusayi ve vakuhana vakuti ukuzyuha kutalipo nalumo. Vope vahamuvuzilizya vahati: 28Musambilizi, uMose alajizizye mwa kalata wakwe atili: Ingʼumunine wa muntu wʼasenzitʼumwantanda, ingʼakufwa nakupapʼumwana, pe pakuti umunine amusendʼumushi, amupapilʼavana umunine. 29Vali panapa avanamuntu vasano navavili. Pʼumukulu wavo ahasendʼumwantanda, ahapitililʼukufwa nakupapʼavana, 30Nuwa vuvili vovulo. 31Nuwa vutatu ahamusenda. Vovulo lelo vonti ve vasano navavili, vahafwa nakupapʼavana. 32Pisinda pe wope numwantanda ahafwa. 33Inga lumo lelo lwe vazyusile vontʼavantu, pʼumwantanda aliva mushi wa nanu? She vonti vamusenzite ve vasano navavili. 34PʼuwenʼuYesu ahavavuzya ahati: Avenʼavana va munsi yinino ve vakusenda nukusendwa. 35Avene nyene ve vahondeye nukuvalʼukufiha kunsʼila nukuzyuha kuvafwe, ve vatalisendaga, ve vatalisendwaga. 36She vatalivuyizyʼukufwa, she vali fwe ve vahavizya, vana va Mulungu, ve vana va kuzyuha. 37Izyene nyene izya kuzyuhʼavafwe, zyʼuMose aziyanzilʼapazelu mwʼakutuvuzyʼizya palwangwa, mwʼakumuyanjilʼuMwene ukuva Mulungu wa Abulahamu, wʼuMulungu wa Yisikaka, wʼuMulungu wa Yakobu. 38UwenʼuMulungu ate Mulungu wa vafwe lelo, ndali, we wa valanzi; she vonti vakumulandilila. 39Pe vamʼavamanyakalata vahamwitishila vahati: Musambilizi, wayanzilʼahinza. 40Pe vahanda nukunyila ukumuvuzilizya zimʼizinji.
Amwe uChilisiti Mwana-Davidi?
41-44: Mat. 22,41-45. Mal. 12,35-37.
41Pʼahavavuzya ahati: Lye vatinji vayanje vuli lye vakuti: uChilisiti mwana-Davidi? 42ShʼuwenʼuDavidi mwa kalata wa nyimbo akuti:
UMwene ayanzile kwa Mwene wane atili:
Tendamaga kumuhono wanʼumulilo,
43uhafishe pupo pʼavalugu vaho
ndivapelagʼukuva hatengo
aha kuviha pupʼiṿinama ṿwahʼiwe.
44Ilelo uwenʼuDavidi akumuyangʼukuva wʼuMwene wakwe, avanje mwana wakwe vuli?
Insoshe pazya vamanyakalata
45-47: Mat. 23,1-14. Mal. 12,38-40.
45Pʼahavavuzyʼavasundikwa vakwe lwe vakwiṿwa vontʼavantu, ahati: 46Mwandajʼavamanyakalata ve vakwanzʼinkanzʼintali lwe vakujendanga, ve vakukundʼukulamukwa pamasolo, niṿitengo ṿwa vupiti mumasinagogi, niṿwimishilwa lwe vakutendamʼukulya; 47ve vakulyʼinyumba zya vazishe, pe havili vakupitilizyʼukuputʼimputʼintali izya kuhopahopa. Ve valilusyʼukusundwa.
S'ha seleccionat:
Luka 20: NYi1965
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Nyiha New Testament © British and Foreign Bible Society, 1965.