यूहन्ना 9
9
जन्मटीहिक आन्धर मनैया चोखैलक
1एक दिन येशू नेङ्ग्टी जाइबेर एकठो जन्मटीहिक आन्धर मनैयह देख्ल। 2उहाँक चेलाहुँक्र उहाँह पुछ्ल, “गुरुजी, के पाप करल त यी मनैया आन्धर जन्मल्? याकर डाई-बाबा, कि यी अपन्हे?”
3येशू जवाफ देल, “ना त यी पाप करल, ना त याकर डाई-बाबा पाप कर्ल, तर परमेश्वरक काम याकरम देखपरऽ कैक यी मनैया आन्धर जन्मल् हो। 4महीह पठुइयक काम हम्र दिन पलरहल समयम करपर्ठा। रात हुइल् कलसे, कुई फे काम कर नैस्याकट्। 5मै संसारम रहट्सम संसारक ज्योति हुइटुँ।”#मत्ती ५:१४; यूह ८:१२
6अत्रा बात कैक उहाँ भूइँयम थुक्ल, थूकले माटी सन्ल, ओ सानल माटी आन्धर मनैयक आँखिम लगादेल। 7तब उहाँ ओहीह कल, “जाओ, सिलोआमक पोखरीम जाक धोओ।” (सिलोआमक अर्थ “पठागैल्” हो।) ऊ जाक धुइल्, ओ देख्नाहा होक घर आइल।
8वाकर छरछिमेकीहुँक्र ओ ओहीह भीख मागट् देखुइयन अप्न-अप्न कल, “बैठ्क भीख मगुइया यिह नैहो का?”
9कुई-कुई कल, “यी उह हो।”
और जन कल, “नाही, यी ओक्रअस देखपर्ठा।”
तर ऊ अपन्हे कहल, “मै उह हुइटुँ।”
10हुँक्र ओहीह पुछ्ल, “टुँ कसिक देख्नाहा हुइलो तो?”
11ऊ जवाफ देहल, “येशू कना एकठो मनैया माटी सान्क म्वार आँखिम लगादेल ओ महीह कल, ‘सिलोआमक पोखरीम जाक धोओ।’ तब मै जाक धुइटीकि देख्नाहा होगैनु।”
12हुँक्र ओहीह कल, “उ मनैया कहाँ बाट तो?”
ऊ कहल, “महीह थाहाँ नैहो।”
फरिसीहुँक्र सोधपुछ कर्लक
13तबदोस्र हुँक्र पैल्ह आन्धर रहल मनैयह फरिसीन्हकठे लैगिल। 14येशू माटी सान्क ओहीह देख्नाहा बनैलक दिन जुन बिसैना दिन रह। 15फरिसीहुँक्र ओहीह पुछ्ल, “टैँ कसिक देख्नाहा हुइल्या?”
ऊ हुँकन कहल, “उहाँ माटी सान्क म्वार आँखिम लगादेल, तब मै जाक धुइटीकि देख्नाहा होगैनु।”
16फरिसीमध्ये कुई-कुई कल, “उ मनैया परमेश्वरसे आइल नैहो, काकरकि ऊ बिसैना दिन नैमानँट्।”
तर और जन कल, “पापी मनैया कसिक असिन शक्तिशाली काम कर सेकी?” असिक हुँकन्हक बीचम फूट हुइलन।
17फरिसीहुँक्र ओहीह फेदोस्र पुछ्ल, “उ मनैया टोहीह देख्नाहा बनादेहल। आब वाकर बारेम टैँ का कह चाहट्या?”
ऊ कहल, “उहाँ त अगमवक्ता हुइट।”
18यहूदी अगुवाहुँक्र ऊ जाट्टीसे आन्धर रह ओ देख्नाहा हुइल् कैक नैपत्यैल। उहओर्से हुँक्र वाकर डाई-बाबह बलैल, 19ओ पुछ्ल, “का यी टुन्हक्के छावा हो? का यी जन्मटीहिक आन्धर रह? यदि रह कलसे, यी कसिक देख्नाहा हुइल् तो?”
20वाकर डाई-बाबा हुँकन कल, “हाँ, यी हमारऽ छावा हो, ओ जन्मटीहिक आन्धर रह। 21तर आब यी कसिक देख्नाहा हुइल् याकर आँख के चोखादेलस, यी बातभर हमन थाहाँ नैहो। याकर उमेर पुगरलस, अप्नहुँक्र यैहेह पुछी, यी अपन्हे कहसेकी।” 22यहूदीन्हक डरले करबेर हुँक्र ओसिक जवाफ देल। काकरकि यदि कुई येशूह ख्रीष्ट कैक स्वीकार करी कलसे, ओहीह सभाघरमसे निक्रादेहपर्ठा कैक यहूदीहुँक्र आघहेँ सहमत होरलह। 23उहओर्से वाकर डाई-बाबा “याकर उमेर पुगरलस, अप्नहुँक्र यैहेह पुछी” कैक कल।
24यहूदी अगुवाहुँक्र पैल्ह आन्धर रहल मनैयह फेदोस्र बलाक कल, “परमेश्वरक सामुन्नेम सत्य बोल। हमन थाहाँ बा, ऊ मनैया पक्क फे पापी हो।”
25ऊ कहल, “उहाँ पापी हुइट कि नाहीँ, उ त महीह थाहाँ नैहो! तर एकठो बात महीह थाहाँ बा, कि मै आन्धर रनहुँ, आब देख्नाहा होरनु।”
26तब हुँक्र ओहीह कल, “ऊ ट्वार का करादेहल? ऊ टोहीह कसिक देख्नाहा बनाइल?”
27ऊ कहल, “मै अप्नहुँकन टम्हन्ने कैसेक्नु, तर अप्नहुँक्र नैसुन्ली। घरीघरी उह बात काजे पुछटी? अप्नहुँकन्हक फे उहाँक चेला हुइना विचार बा कि का?”
28हुँक्र ओहीह उसकर्टी कल, “टैँ पो वाकर चेला हुइट्या, तर हम्र त मोशक चेला हुइटी। 29मोशसे त परमेश्वर बोल्लह, उ बात हमन थाहाँ बा। तर ऊ कहाँक मनैया हो, उ हमन थाहाँ नैहो।”
30उ मनैया हुँकन कहल, “यी कसिन अचम्मक बात! उहाँ कहाँसे अइल कना बात अप्नहुँकन थाहाँ नैहो। तर उहाँ महीह देख्नाहा बनैल। 31परमेश्वर पापी मनैयक बात नैसुन्ट कना हम्र सबजहन थाहाँ बा, तर उहाँक आदर कर्ना ओ उहाँक इच्छा अनुसार चल्ना मनैयक बात केल सुन्ठ। 32संसारक सुरुसे आम्हीसम जन्मटीहिक आन्धर मनैया देख्नाहा बनागैल् कैक कबु फे नैसुन्गैल्रह। 33यदि उ मनैया परमेश्वरसे नैअइलरट कलसे, उहाँ कुछु फे कर नैसेक्नेरलह।”
34हुँक्र ओहीह कल, “टैँ त बिलकुल पापम जन्मल् रलह्या, का आब टैँ हमन सिखाइ ख्वाजट्या?” तब हुँक्र ओहीह सभाघरमसे बाहर निक्रादेल।
आत्मिक आन्धर मनै
35यहूदी अगुवाहुँक्र ओहीह बाहर निक्रादेल कना बात येशू सुन्ल। तब उहाँ ओहीह भेँटाक कल, “का टुँ मनैयक छावकम विश्वास कर्ठो?”
36ऊ कहल, “हजुर, उहाँ के हुइट? मै उहाँकम विश्वास करम।”
37येशू ओहीह कल, “टुँ ओहीह देखरख्लो, टुँहीनसे बोलुइया उह हो।”
38तब ऊ कहल, “प्रभु, मै विश्वास कर्ठुं,” ओ ऊ उहाँह दण्डवत् करल।
39येशू कल, “मै न्याय करक लाग यी संसारम अइनहुँ, ताकि निदेख्ना मनै देख्नाहा हुइहीँ ओ ‘मै देख्ठुँ’ कैक विचार करुइयन आन्धर हुइहीँ।”
40यी बात सुन्क उहाँक लग्घ रहल फरिसीमध्ये कुई-कुई उहाँह कल, “का हम्र फे आन्धर हुइटी तो?”
41येशू हुँकन कल, “यदि टुह्र आन्धर रटो कलसे, टुह्र दोषी नैहुइनेरलहो, तर टुह्र त ‘हम्र देख्ठी’ कठो, उहओर्से टुन्हक दोष पलरठा।”
S'ha seleccionat:
यूहन्ना 9: thl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2020, Wycliffe Bible Translators, Inc. All rights reserved.