Jẹnẹsisi 7
7
Isi Nke Ẹsa
Okẹn Mirin Ahụn Tikpọ Ụwa
1Ya kẹ Osolobuẹ nọ sị Nụa, “Banye imẹ ụgbọ, yụ lẹ ikpụlọ ị, makẹni a hụnọlẹ m nị yụ sụọ e bi obibi rị mma ẹnya m imẹ agbọnị ile. 2Werisọnmẹ mmẹnọ-mmẹnọ imẹ anụ ndị ahụn ile m sị ụnụ e ri: okẹn ẹ ẹsa, onyẹnnyẹ ẹ ẹsa; y'e werisọnmẹzi ẹbụọ-ẹbụọ imẹ anụ ndị ahụn m sị ụnụ a sọ: okẹn ẹ ohu, onyẹnnyẹ ẹ ohu; 3y'e werizi nnụnụ rịsọnmẹ ichẹn-ichẹn mmẹnọ-mmẹnọ: okẹn ẹ ẹsa, onyẹnnyẹ ẹ ẹsa. Mẹ ẹ, kẹni anụ ndịnị lẹ nnụnụ ichẹn-ichẹn ndịnị hụn ụzọ rị ndụn, mụ ụdị wẹ jun elu ụwa. 4Makẹni, akpọhịn ẹsa tannị, m k'e zihẹ mirin k'e zue ọrọgbọ akpọhịn ọgụnnaị, uhinhin lẹ efinaị; m k'e gi ẹ gbupụ ihiẹn ile rị ndụn m ke hụn rị imẹ ụwa.” 5Ya Nụa nọ mẹchanrịn ihiẹn ile Osolobuẹ sị a mẹ.
6Nụa rị ahụa ọgụn-iri kwasị nnụ ogẹn okẹn mirin ahụn gi bịa elu-ụwa. 7Nụa lẹ ụmụ a lẹ nwunyẹ ẹ lẹ inyẹnmẹ ụmụ a nọ banye imẹ ụgbọ ahụn pụ-ichẹn kẹni wẹ wanahịn okẹn mirin ahụn. 8Ụdị anụ ile nọ banyezikwọ: kẹ ndị wẹ e ri kẹ ndị w'a sọ; kẹ nnụnụ kẹ ihiẹn ile a rịhunmẹ alị, 9ẹbụọ-ẹbụọ, okẹn lẹ onyẹnnyẹ okẹn lẹ onyẹnnyẹ nọ sọn Nụa banye imẹ ụgbọ ahụn pụ-ichẹn kẹ Osolobuẹ dọn ku. 10Ogẹn o gi zu akpọhịn ẹsa, okẹn mirin ahụn nọ bidọn elu-ụwa.
11Ahụa ahụn Nụa zu nwa ahụa ọgụn-iri kwasị nnụ, nke akpọhịn mmẹsa daị imẹ ifọn nke ẹbụọ kẹ mirin ile rị imẹ alị gi wapu, elu-igwere e kpupụ. 12Ya mirin nọ zue elu-ụwa ọrọgbọ akpọhịn ọgụnnaị, kẹ uhinhin kẹ efinaị.
13Ụhụọhịn hụzịkwọ kẹ Nụa lẹ ụmụ a ẹtọ wụ Shẹm lẹ Ham lẹ Jafẹtị lẹzi nwunyẹ Nụa lẹ inyẹnmẹ ụmụ a banye ụgbọ ahụn pụ-ichẹn — 14uwẹ lẹ ụdị anụ-ọfịa ile rị ichẹn-ichẹn lẹ ụdị anụ-ụlọ ile lẹ ụdị ihiẹn ile a rịhunmẹ alị lẹ ụdị nnụnụ ile rị ichẹn-ichẹn. 15Ẹrịra kẹ ihiẹn ile e kwọnni dọn sọn Nụa banye imẹ ụgbọ ahụn pụ-ichẹn, wẹ ile ẹbụọ-ẹbụọ. 16Okẹn lẹ onyẹnnyẹ ihiẹn ndị ahụn ile rị ndụn banyechanrịn nọkẹ kẹ Osolobuẹ dọn gwa Nụa, Osolobuẹ nọ gi ẹka a kpọkin Nụa ye imẹ ụgbọ.
Ihiẹn Ile Rị Ndụn A La Wezụka Nụa Wẹ
17Mirin ahụn hụ e jẹn elu ojijẹn-ojijẹn elu-ụwa ọrọgbọ akpọhịn ọgụnnaị; mirin hụ e jun, e jẹnwaye elu, e buli ụgbọ ahụn elu; ụgbọ hụ pụ-ichẹn nọ shiẹnrin elu mirin. 18Mirin ahụn nọ karị ẹka elu-ụwa, e jẹn elu ojijẹn-ojijẹn, ụgbọ ahụn hụ e shiẹnrin elu mirin. 19Mirin ahụn karị ẹka ọda-ọda, jẹn elu ọda-ọda elu ụwa, kpumẹchanrịn ugu ile kachanrịn elu ejẹn okpuru elu-igwere. 20Mirin ahụn a karị ugu ndị ahụn, gi ụbụkụ ẹbụọ kwasị ọgụn#7.20 Ya wụ kubiti mmisẹn. jẹnnahịn wẹ elu. 21Ya ihiẹn ile rị ndụn elu-ụwa nọ nwụnhụn, kẹ nnụnụ kẹ anụ-ụlọ kẹ anụ-ọfịa kẹ ihiẹn ile e dọn ọtụtụ kẹ ịhịan ile; 22ẹghẹẹ, ihiẹn ile e kwọnni nọ nwụnhụnchanrịn. 23O gbuchanrịn ihiẹn rị ndụn rị ụwa: kẹ ịhịan kẹ anụ kẹ ihiẹn ndị a rịhunmẹ alị kẹ nnụnụ ndị e fe elu; o gbupụchanrịn wẹ ile imẹ ụwa. Nụa sụọ họdụ, ịya lẹ ndị ya lẹ wẹ rị imẹ ụgbọ ahụn.
24Mirin ahụn kụrụ elu-ụwa ọrọgbọ akpọhịn iri kwasị ọgụn-ẹsa.
S'ha seleccionat:
Jẹnẹsisi 7: ikkBI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.