توریت شریف: پَیدایش 7
7
1فِر رب حضرت نُوح کی آخیا، ”تُوں اپݨے سارے خاندانے سمیت کشتی وِچ بہی جا، کِیئانکہ تُوں ہی مِکی اِس زماݨے نیاں لوکاں وِچ اِک راستباز نظر آیا ایں۔ 2ساریاں حلال جانوراں وِچوں ست ست نر تے اُنہاں نیاں مادیاں، تے جیہڑے حلال نی، اُنہاں وِچوں دو دو نر تے مادیاں، کشتی وِچ کہنی آ۔ 3تے پرندیاں وِچوں وی ست ست نر تے مادیاں آݨ، تانکہ زِیمی اپر اُنہاں نی نسل باقی رہے۔ 4ستاں دیہاڑیاں تُوں بعد میں چالیاں دیہاڑیاں تے چالیاں راتاں تک بارِش برساساں، تے ہر جاندار کی میں زِیمی تُوں مُکاساں جیہڑے میں پیدا کِتے اݨ۔“
5فِر حضرت نُوح او سارے کم کِیتے جنہاں نا حکم رب اُنہاں کی دِتا سی۔
6حضرت نُوح اُس ویلے چِھ سو سالاں نے سݨ جدُوں سیلاب آیا سی۔ 7او تے اُنہاں نی زناݨی، تے اُنہاں نے پتر، تے پتراں نیاں زناݨیاں پاݨی کولوں بچݨے واسطے کشتی وِچ بہی گئے۔ 8حلال تے حرام جانوراں نے جوڑے، پرندیاں تے رینگݨے آلیاں جانوراں نے جوڑے وی، 9مطلب نر تے مادہ، حضرت نُوح کول اچھی کے کشتی وِچ بہی گئے، جِس طرح اللّٰہ تعالیٰ حضرت نُوح کی حکم دِتا سی۔ 10ستاں دیہاڑیاں تُوں بعد اِس طرح ہویا کہ سیلاب نا پاݨی زِیمی پر آئی گیا۔
11اے سب کج اُس ویلے ہویا جدُوں حضرت نُوح 600 سالاں نے سݨ۔ دُوئے مہیݨے نے 17 ویں دیہاڑے زِیمی نیاں گہرائیاں وِچوں سارے چشمے پھٹی پئے، تے آسمانے پر وی پاݨی نے در کھُلی گئے۔ 12تے چالی دیہاڑے تے چالی راتاں زِیمی پر بدل برھنا رہیا۔
13اُسے دیہاڑے حضرت نُوح تے اُنہاں نی زناݨی، تے اُنہاں نے پتر سام، حام تے یافؑث، تے اُنہاں نیاں پتراں نیاں زناݨیاں کشتی وِچ بہی گئے۔ 14ہر قسم نے جنگلی جانور، ہر قسم نے مال ڈنگر، ہر قسم نے زِیمی پر رینگݨے آلے جانور، تے ہر قِسم نے پرندے سارے اُنہاں نال سݨ۔ 15ساریاں جانداراں وِچوں دو دو حضرت نُوح کول اچھی کے کشتی وِچ بہی گئے۔ 16اے سب کُج اِس طرح ہویا جِس طرح اللّٰہ تعالیٰ حضرت نُوح کی حُکم دِتا سی. فِر رب کشتی نا بُوہا بند کری شوڑیا۔
17چالیاں دیہاڑیاں تک سیلاب نا پاݨی زیادہ ہوݨا رہیا. پاݨی کشتی کی زِیمی تُوں اِتنا اُپر چائی کِہندا کہ کشتی تَرݨ لغی پئی۔ 18پاݨی چڑھنا ہی رہیا، تے بہُوں زیادہ ہوئی گیا. تے کشتی پاݨی اپر تَرنی ہی رہی۔ 19زِیمی پر بہُوں ہی زیادہ پاݨی سی، تے دُنیا پر جیہڑے سارے اُچے اُچے پہاڑ سݨ ڈُبی گئے۔ 20پاݨی اُنہاں کولوں 20 فُٹ اُچا ہوئی گیا تے سارے پہاڑ ڈُبی گئے۔ 21سارے جنگلی جانور، پرندے، مال ڈنگر، رینگݨے آلے جانور تے اِنسان غرق ہوئی گئے. 22خُشکی نے سارے جاندار مری گئے۔ 23اللّٰہ تعالیٰ ہر جاندار شے جیہڑی زِیمی پر سی ختم کری شوڑی۔ انساں حیوان سارے غرق ہوئے گئے۔ صرف حضرت نُوح ، اُنہاں نا خاندان، تے کشتی وِچ اُنہاں نال جانور بچی گئے۔
24پاݨی زِیمی پر ڈیڈھ سو دیہاڑیاں، یعنی پنج مہینیاں تک ٹِکا رہیا۔
S'ha seleccionat:
توریت شریف: پَیدایش 7: phr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Text (c) 2021 Noor-e-Kashmir
Audio (p) 2021 Noor-e-Kashmir