Yahiya 7
7
Ga danganakan si Isa yaꞌ pitsayaꞌ niiya
1Paddus meꞌ looy siꞌ, ndooy sa ni kakawum-kawman Jalil bay palanan si Isa. Yaꞌ na ya bay pilay pa Yahudiya sabap siga pa-mmean Yahudi ndooy doman na jaꞌ mapatoy iya.
2Na song hallom, meka na jama bahuklud pilay pa Yahudiya sabap tapit na paballangan siga Yahudi inawnan Paballangan Bawung-Bawung.#(7.2) Arat siga Yahudi subay sila pilay pa Jerusalem ndooy ni Yahudiya taun-taun mmeꞌ ni paballangan tuu. Ndooy siꞌ, buwat sila siga bawung-bawung man da pahantiꞌ. Ilooy ilay para pangintoman ni bay jaman kabboꞌ-bboan da parampong-parampong mpatpūꞌ taun ni lahat lau-lau yaꞌ maglumaꞌ. Halloman paballangan looy wawuꞌ ngallaw. Ndaun Kitab Tawrat, Libitikus 23.33-34. 3Dari kuwan siga danganakan si Isa, buwatan da nohoꞌ iya mmeꞌ, yuk da, “Daa doꞌ ko ba hangat ni lahat tuu na jaꞌ. Gam na ko pa Yahudiya supaya takita na du pabuwatan nu meꞌ siga mulit nu kasohean ndooy. 4Bong ko bana-bana pandoy mōꞌ pabuwatan kahaylan-haylan, pakitahan nu na mimon manusiyaꞌ. Yaꞌ sina pōꞌ kabantugan nu bong tapuk nu kapandoyan nu.” 5Na sila ilay siꞌ bay mitsala meꞌ looy man da bay madiyoꞌ iya batan yaꞌ sila pitsayaꞌ niiya san sila danganakan na.
6Dari yuk si Isa ninsila, “Yaꞌ gi bitu taabut waktu bay ginantaꞌ man ku magpakita ndooy. Gam kaam ina, sumunsayaꞌ jaꞌ kam pilay sumilan-sumilan 7sabap yaꞌ kam kinalammisan. Boꞌ aku tu, kinalammisan meꞌ mimon ma mandang hāl junyaꞌ sabap mungka ku kalaatan da. 8Bong anu, kaam na jaꞌ pilay ngaluruk. Boꞌ aku tu, niyaꞌ na doꞌ sabap yaꞌ gi taabut waktu man ku pilay.” 9Dari lay na jaꞌ si Isa tamban ni Jalil. 10Sugaꞌ pus ga danganakan na bay palakka, lay du ya bay patuhut dangan-dangan na pa paballangan looy mari yaꞌ tasayu jama.
11Na ni paballangan looy siꞌ, kuwan siga pa-mmean Yahudi ndooy, miha si Isa na pin sampay tilaw da, “Yaꞌ siꞌ kam bay ngita si Isa ntuu?”
12Na kuwan siga baanan jama ndooy baw siꞌ tu, meka na maghigung-higungan si Isa. Yuk kasohean, “Jama mahap silay ya.” Sugaꞌ kasohean baw siꞌ tu halling, “Daa kam ba hidjab. Magsian jama jaꞌ bilay ya.”
13Na ndooy siꞌ, yaꞌ luu bay nawakka nanggehan si Isa njawom jama batan tawu na baw sila ni siga pa-mmean Yahudi.
14Na gantaꞌ ga tongaꞌ jaꞌ siꞌ paballangan looy, yana ni ka-mpat ngallaw na, lay du si Isa pa langga mehe, boꞌ na nōꞌ ndooy. 15Kuwan kasohean pa-mmean Yahudi siꞌ tu, tud bay inu-inu ni bitsala na sampay kapanilaw na ga, yuk da, “Pooy doꞌ ina la meꞌ lalla naa alistu nōꞌ niyaꞌ san bay pingkaꞌ baguru?”
16Pag takale meꞌ si Isa halling da, yuk na, “Tōꞌ ku bitu lakka man Tuhan ma bay mapitu aku, saꞌ ga man dī ku. 17Soysoy ina doman mean kahandak Tuhan, malaingkan tasilang na jaꞌ bong tōꞌ ku tud lakka man Tuhan atawa lakka man dī ku sadjaꞌ. 18Bong ina luu jama nōꞌ makoy akka ma lakka man dī na sadjaꞌ, ilooy du puhung na, sanglit ni dī na. Boꞌ aku tu saꞌ meꞌ naa. Bila ku nōꞌ na, ilooy ya puhung ku sanglit ni jataꞌ ilooy ma bay mapitu aku. Kamura-murahan tabista bi du bonto ku maka intong jaꞌ niyat ku. 19Boꞌ kaam ina sarī. Mangaku baw kam mulit Nabi Musa ma bay ngandean saraꞌ ni kabboꞌ-bboan tabi, boꞌ ko, yaꞌ du kam luu san disu ngikut saraꞌ na. Bong siꞌ ilay bana-bana meꞌ bi ngikut, ongoy baw taggahaꞌ ngulihal gi kam meꞌ bi mapatoy aku?”
20Pag tampung siga jama ndooy, “Sineytan bina ko! Soy doꞌ itu doman mapatoy kau?”
21Yuk si Isa ninsila, “Doꞌ kam bi. Bay llaw looy, pus ku bay ngulian lalla looy, tud bay haylan sikamimon. 22-23Boꞌ kaam, saꞌ ba, sukat ku bay buwat meꞌ looy ni Llaw Pahali, ilooy na man bi lasu? Mingkan san pun kaam, buwat du ni Llaw Pahali. Batan tuktuk taabut llaw tinaat meꞌ saraꞌ Nabi Musa man ngislam anak bi, mastiꞌ ngislam du kam minsan magsabtan ka Llaw Pahali. (Ni sabana na, arat meꞌ ngislam bay tinaat ni kabboꞌ-bboan tabi yaꞌ gi bay taabut jaman Nabi Musa.)#(7.22-23) Ni agama bangsa Yahudi, sagannap anak-anak lalla talpaksaꞌ inislam pag taabut wawuꞌ ngallaw umu da. Ndaun Kitab Tawrat, Panagnaan ni Awwal Jaman 17.9-14 ka Libitikus 12.3. Na bong kaam dari ngislam sasang Llaw Pahali bong pin yaꞌ jaꞌ talangga saraꞌ Nabi Musa, ongoy baw subay na pin kam lasu sukat ku ngulian jama ni Llaw Pahali? 24Daa kam os-os manding jama pa kalaatan, arapun mamiki doꞌ kam paayad mari tuwaꞌ bandingan bi.”
Magsulang pamiki jama bong soy si Isa
25Pag-anu, yuk kasohean jama Jerusalem ndooy, “Saꞌ gi kina inaa lalla ma pinagpiha meꞌ pa-mmean tabi pinapatoy? 26Ndaun bi doꞌ ba. Alay na baw ya mitsala njawom jama, boꞌ yaꞌ san luu halling siga pa-mmean tabi. Batiꞌ ta la, pitsayaꞌ na sila si Isa yana Almasi. 27Sugaꞌ pooy meꞌ na sikatuwaꞌ? Almasi baw bilay konoꞌ la, pag takka na, yaꞌ kinatoonan bong pōꞌ man ninggai. Boꞌ lalla naa, basta katoonan tabi baw bong lakka man ninggai ya.”
28Na si Isa siꞌ tu, masi gi lundooy nōꞌ ni langga mehe. Pag takale na bitsala da, mangkin lay gi haddowan na halling na, yuk na, “Katoonan bi hati ku sampay lakka man ninggai ku, hāꞌ? Sugaꞌ baan ta kam, aku bilay bay pitu, saꞌ man garaꞌ ku dī ku. Arapun luu bay mapitu aku ma yaꞌ san katoonan bi, yana ilooy ma bonto gi man bonto. 29Boꞌ aku itu, katoonan ku ya sabap lakka man iya ku. Iya bay mapitu aku.”
30Pus si Isa halling meꞌ looy, magdaruhun na dawom siga pa-mmean ndooy nungkuban iya, sugaꞌ yaꞌ luu tapabuwat da sabap yaꞌ gi bay ngabut waktu bay ginantaꞌ niiya. 31Sugaꞌ meka ndooy pitsayaꞌ niiya sampay yuk da, “Lalla looy baw bilay, pooy meꞌ na saꞌ Almasi? Yaꞌ bilay luu jama kapōꞌ siga pabuwatan kahaylan-haylan labi gi man niiya!”
32Pag lay tasayu meꞌ siga Parisi ga jama ndooy maghigung-higungan si Isa meꞌ looy, bbuwatan da ka ga imam langkaw ndooy lay nohoꞌ siga tukang jaga langga nungkuban si Isa.
33Pag-anu, yuk si Isa ni baanan jama ndooy, “Aku tu, yaꞌ na ku humallom ntuu mman bi. Song pabeleng na situ ku pa mman ilooy ma bay mapitu aku. 34Taabut waktu looy ilay mintu, piha bi du sina ku, sugaꞌ yaꞌ na ku tatammu bi. Boꞌ na, yaꞌ kam kapilay pa lahat ma tiluꞌ ku.”
35Dari siꞌ, sitilaw-tilaw na ga siga pa-mmean Yahudi, yuk da, “Paninggai doꞌ ilay tiluꞌ lalla looy yaꞌ san konoꞌ ya tatammu tabi? Marean ta pilay ya pa lahat sarī man kasohean pagkahi tabi Yahudi maglahat, boꞌ na noan bangsa Greek ndooy. 36Oy lay la hantak bitsala na? Halling na siꞌ piha tabi du ya konoꞌ bbos-bbos, sugaꞌ yaꞌ na ya tatammu tabi. Boꞌ yaꞌ san konoꞌ kitabi kapilay pa lahat ma tiluꞌ na.”
Boheꞌ ma kabuwan kaallum bahau
37Taabut jaꞌ siꞌ llaw mulliya ni paballangan looy, yana llaw katapusan na, lay na baw nangge si Isa, boꞌ na mitsala pahaddo, yuk na, “Soysoy kam tohoꞌ kallong bi, pitu jaꞌ kam pa mman ku boꞌ bi painum ku. 38Soysoy pitsayaꞌ niyaku, malaingkan meꞌ halling sambat njawom kitab, luu pōꞌ man jawom atay na boheꞌ llum meꞌ karuha sōng paliyud.”#(7.38) Yana meꞌ sōng kaboo kaayaran ni siga lahat nnoy-nnoy jaꞌ man na ngaliyud, meꞌ naa du karuha jama ma pitsayaꞌ ni si Isa. Batan pagka pinagmundaan na sila meꞌ Rū Sutsiꞌ, malaingkan kaboo sila kaallum bahau saltaꞌ na kasalamatan pa mman manusiyaꞌ nnoy-nnoy jaꞌ mman da. 39Na boheꞌ llum ilay ma bay inawnan meꞌ si Isa, yana Rū Sutsiꞌ ma song pinaasok ni soysoy pitsayaꞌ niiya. Sugaꞌ hallang-hallangan looy, yaꞌ gi bay pinaasok Rū Sutsiꞌ pa jawom atay jama sabap yaꞌ gi si Isa bay pabeleng pa sulgaꞌ.
40Pag lay jaꞌ siꞌ takale bay bitsala na meꞌ ga jama ndooy, yuk kasohean, “Basta ituu na bitu nabi looy ma bay tinunaꞌ meꞌ Nabi Musa.” 41Kuwan kasohean baw halling, “Iya na bitu Almasi.”
Sugaꞌ tilaw kasohean baw, “Hati, lakka man Jalil kilay Almasi? 42Saꞌ ba, yuk njawom kitab, Almasi konoꞌ panubuꞌ Sultan Daud maka lahil du ya ni Betlehem, kawum man Sultan Daud bay pinamaddihan?” 43Dari magsulemaꞌ na jaꞌ pamiki da pasal si Isa. 44Kasohean doman na nungkuban iya, sugaꞌ yaꞌ baw luu bay nawakka ngusik iya.
Siga pa-mmean Yahudi yaꞌ kuhi pitsayaꞌ ni si Isa
45Na kuwan ga tukang jaga looy siꞌ ma bay sinohoꞌ nungkuban si Isa, luu na bay pabeleng. Tilaw ga Parisi siꞌ tu ka siga imam langkaw ndooy, “Ongoy yaꞌ bay taboo bi lalla looy?”
46Tampung ga tukang jaga looy, “Yaꞌ baw ba la kami bay lumingkaꞌ kale bitsala meꞌ bitsala lalla looy.”
47Pag halling ga Parisi looy, “Hati, sampay kina kaam, lay na du bay tadupang na? 48Ongoy doꞌ ina, lay kam kina ngita siga pa-mmean bi atawa pun meꞌ kami siga Parisi san lasa disu pitsayaꞌ niiya? 49Ilooy du ilay pitsayaꞌ niiya baanan ga jama ma awam pasal saraꞌ. Sila ilay ndang busung.”
50Na disu njawom baanan Parisi looy yana si Nikodimus. Iya ilay yana lalla looy sibuwa ma bay patammu ni si Isa mangaruha niiya. Dari yuk na ni siga pagkahi na Parisi, 51“Baꞌ-bāꞌ saraꞌ tabi baw ba, yaꞌ kita dari os-os ngalabuan jama hukuman bong ya yaꞌ doꞌ bay duhuꞌ binuwanan masa ngandaawa. Saꞌ ba, subay doꞌ kinatoonan hāl-hiwal na duhuꞌ?”
52Yuk da baw siꞌ tu, “Uy, batiꞌ ta bitu jama Jalil du ko. Maliksaꞌ teꞌ ko njawom kitab. Yaꞌ silay luu tatammu nu nabi bay tinunaꞌ pōꞌ man Jalil.” 53Paddus meꞌ looy siꞌ, lay na sila moleꞌ sikamimon.
S'ha seleccionat:
Yahiya 7: sjm
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc. All rights reserved.