Lúcas 24
24
Ñanderuete omoingove jevy Hesúpe
1Pe semána ára peteĩháme, domíngope, ko’ẽtĩme umi kuñakarai oho Hesu oñeñotỹ haguépe ha ogueraha hikuái imba’e ryakuã porã ombosako’iva’ekue.
2Ha og̃uahẽvo pe tyvýpe, Hesu retekue oñeñotỹ haguépe, oñemboykéra’e pe itaguasu pe tyvýgui ha ityvy inandi.
3Ha oike hikuái pe itakuaguasúpe ha ndojohúi Ñandejára Hesu retekue.
4Ha ñemondyipópe opyta hikuái, upevove oñemboja hendápe mokõi kuimba’e ijao mimbipáva.
5Ha kyhyjepópe itĩndy hikuái yvýre, upérõ umi mokõi kuimba’e oporandu ichupekuéra: Mba’érehe piko peheka pe oikovéva omanóva apytépe.
6Hesu ndaiporivéima ko’ápe, oikove jevýma. Penemandu’ákena pe Ha’e he’iva’ekue rehe peẽme oiko ramoguare gueteri pende apytépe Galiléa departaméntope,
7ha’e he’ími: Pe yvyarigua Ra’y ho’ava’erã kuimba’e ñaña pópe, ha omosãingóta hikuái ichupe kurusúre, ha mbohapy ára rire Ha’e oikove jevýta.
8Ha ha’ekuéra imandu’a iñe’ẽnguéra rehe.
9Ha ojevývo hikuái Hesu oñeñotỹ haguégui, omombe’upa hikuái ojehuva’ekue umi 11 Hesu remimbo’ekuérape ha ambuekuérape avei.
10María Magdaléna, Juána, ha María, Jacóbo sy, ha ambueve oĩva’ekue hendivekuéra, omombe’upava’ekue ko’ã mba’e Hesu remimbo’ekuérape.
11Hesu remimbo’ekuérape katu ko’ã mba’e ojogua itarováva ñe’ẽme, ha ndogueroviái hikuái ichupekuéra.
12Pédro katu opu’ã ha oñani Hesu tyvy peve, ha ojayvy rire ohecha pe savana añoite opytáva yvýpe, upérõ ojevy oikohápe, ha ohecharamoite ohóvo pe ojehuva’ekue.
Mokõi Hesu remimbo’e oho Emaúspe
13Ha mokõi ambue Hesu remimbo’e oguata ohóvo Jerusaléngui pe tava’i Emaus peve, opytáva 2 légua (12 kilómetro rupi) Jerusaléngui.
14Ha’ekuéra oguata jave oñemongeta ohóvo umi mba’e ojehuva’ekue rehe.
15Ha oñemongeta jave ohóvo oñondive, Hesu voi oñemboja hendapekuéra ha oho hendivekuéra.
16Ojejokónte katu hesakuéra ani hag̃ua oikuaa ichupe.
17Upérõ Hesu oporandu ichupekuéra: Mba’e piko peñemongeta pehóvo pende rapére. Ha opyta hikuái ha ñembyasypópe oma’ẽ hese.
18Ha peteĩ hérava Cleófas, he’i Hesúpe: Nde añónte piko reiko Jerusalénpe ha nerehendúi gueteri umi mba’e ojehuva’ekue ko’ã ára ko’ãvape.
19Upérõ Hesu oporandu ichupekuéra: Mba’e piko. He’i hikuái ichupe: Umi mba’e ojehuva’ekue Hesu Nazaretguáre. Ha’e ningo peteĩ proféta, imilagrokuéra ha iñe’ẽnguéra rupi ohechauka Ñanderuete pu’aka opaite kuimba’e ha kuñakuéra renondépe,
20ha nde nerehendúi piko mba’éichapa pa’i ruvichakuéra ha ñane mburuvichakuéra ombojovake ichupe omosãingo hag̃ua ichupe kurusúre.
21Ore roha’ãrõ’akue Ha’e osalvataha Israélpe, ha ohasáma ko’ág̃a mbohapy ára Ha’e ojejuka hague.
22Oĩ katu kuñakaraikuéra ore apytépe oremondýiva, umía ohókuri ko ko’ẽ jave ityvýpe,
23ha ndojohuvéima hetekue, ha ojevývo he’i oréve ojehechauka hague ichupekuéra angelkuéra he’iva’ekue ichupekuéra Hesu oikove jevymaha.
24Upérõ ore apytégui oho umi kuimba’e ityvýpe ha ojohupa umi kuñakarai he’i hagueichaite oréve, ichupe katu ndohechái.
25Hesu katu he’i ichupekuéra: Peẽ pendetavy ha penembegueiterei peguerovia hag̃ua umi proféta he’iva’ekue.
26Pe Crísto ningo ohasa asy raẽva’erã voínte kuri opaite ko’ã mba’e ha uperire ae oike hag̃ua heko ojajaipápe.
27Ha upéi oñepyrũ omyesakã porã hag̃ua ichupekuéra Moises guive opaite profetakuéra peve, ohechauka porãvo opaite mba’e ojehaiva’ekue Crísto rehe Ñanderuete kuatiañe’ẽme.
28Ha og̃uahẽvo upe táva ohohápe, Hesu ojapo ku ohovéta ramoguáicha mombyryve.
29Ha’ekuéra katu ojoko ichupe, ha he’i: Epytána orendive, ka’aru pytũtama ningo, ko ára opátama. Upémaramo Hesu opyta hendivekuéra.
30Ha Ha’e oguapy ramo hendivekuéra mesápe, Hesu ojapyhy pe pan, ha oagradece rire omboja’o pe pan ha ome’ẽ ichupekuéra.
31Upevovete hesakuéra ojepe’a, ha oikuaáma ha’eha Hesu, upérõ Ha’e ojei hesakuéra renondégui.
32Ha he’i hikuái ojupe: Nañandepy’apýi piko Ha’e oñe’ẽ aja ñandéve tapére, ha omyesakã porã aja ñandéve Ñanderuete kuatiañe’ẽme he’íva.
33Ha upevove opu’ã ha ojevy hikuái Jerusalénpe ha ojohu umi 11 Hesu remimbo’e oñembyaty ha ambuekuéra oĩ avei hendivekuéra, ha ko’ãva he’i ichupekuéra:
34Añetehápe Hesu oikove jevýma, ha ojehechaukáma Simon Pédrope.
35Upérõ ko’ã mokõi omombe’u avei ichupekuéra umi mba’e ojehuva’ekue tapére, ha mba’éichapa oikuaa hikuái ichupe omboja’o jave pe pan.
36Ha’ekuéra oñe’ẽ aja gueteri ko’ã mba’e, Hesu voi oñemoĩ ijapytépe ha he’i ichupekuéra: Tapendepy’aguapy.
37Ha’ekuéra katu oñemondyiete ha kyhyjepópe oimo’ã ohechaha peteĩ póra.
38Hesu katu he’i ichupekuéra: Mba’érehe piko peñemondýi ha mba’épa pejepy’amongeta pende py’apýpe.
39Pema’ẽ che po ha che py rehe, Chete voi ningo. Pepoko ha pema’ẽ cherehe, peteĩ póra ndaho’ói ni naikanguéi, Che katu areko mokõivéva.
40He’ipávo péva, ohechauka ichupekuéra ipo ha ipykuéra.
41Ndogueroviapái gueteri, ovy’a ha ipy’andýigui hikuái Hesu he’i ichupekuéra: Ndapeguerekói piko michĩmi tembi’u ha’u hag̃ua.
42Ha ome’ẽ hikuái ichupe pira mbichypyre pehẽnguemi.
43Ha ojapyhy ipokuéragui ha ho’upa henondepekuéra.
44Ha Hesu he’i ichupekuéra: Ko’ãva ningo umi ñe’ẽ Che ha’eva’ekue peẽme, aime ramo gueteri penendive, oikopava’erã hekópe opaite umi mba’e ojehaiva’ekue guive cherehe Ñanderuete kuatiañe’ẽme, taha’e Moises rembiapoukapykuérape, profetakuérape térã Salmokuérape.
45Upérõ Hesu oikuaauka hemimbo’ekuérape mba’épa he’ise umi ñe’ẽ oñe’ẽva hese Ñanderuete kuatiañe’ẽme,
46ha he’i ichupekuéra: Ojehai voi ningo Ñanderuete kuatiañe’ẽme: Pe Crísto ohasa asyva’erãha ha oikove jevytaha pe ára mbohapyhápe omanomava’ekue apytégui.
47Ha oñemyasãiva’erãha ko’ã mba’e opaite yvyariguakuéra retãme oñepyrũvo Jerusalénpe: Opavave oñembyasy hag̃ua ojapo vai haguére ha Hesu Crísto rembiapo porã (sacrifício) rupínte oĩha perdon.
48Ha peẽ voi peikóta techahare ramo tetãnguérape g̃uarã.
49Ha upevarã Che voi pomondo ha che Ruete promesakuéra penemoirũmbáta. Pepyta katu Jerusalénpe oñeme’ẽ meve peẽme pe pu’aka yvagaguigua.
50Ha Hesu ogueraha ichupekuéra Betánia peve ha ohupi ipo ha ohovasa ichupekuéra.
51Ha Hesu ohovasa aja ichupekuéra, Ha’e ojei ijapytégui, ha ojehupi yvágape.
52Ha hemimbo’ekuéra omomba’eguasu rire ichupe py’arorýpe, ojevy Jerusalénpe,
53ha meme árape oĩ hikuái Ñanderuete rogaguasúpe omomba’eguasu hag̃ua Ñanderuetépe.
S'ha seleccionat:
Lúcas 24: ÑÑP2015
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.