ཡོ་ཧ་ནཱན་ལེའུ་ 1

དཀོན་མཆོག་མིའི་ལུས་ལུ་བྱོན་པའི་སྐོར།

1འགོ་ཐོག་རང་ གསུང་བཞུགས་ཡོདཔ་ཨིན་མས་ གསུང་འདི་དཀོན་མཆོག་དང་གཅིག་ཁར་ཡོདཔ་ཨིན་མས་ གསུང་འདི་དཀོན་མཆོག་ཁོ་རང་ཨིན་མས། 2སྔོན་མ་གསུང་དཀོན་མཆོག་དང་གཅིག་ཁར་ཡོདཔ་ཨིན་མས། 3འབྱུང་བ་ཚུ་ག་ར་གསུང་གི་ཐོག་ལས་སྦེ་མཛད་ནུག་ ཁོ་མེད་པར་འབྱུང་བ་ཚུ་གཅིག་ཡང་མ་འབྱུང་པས། 4ཁོ་གི་ནང་ལུ་ཚེ་ཡོདཔ་ཨིན་མས་ ཚེ་འདི་མི་ག་ར་གི་དོན་ལུ་འོད་ཟེར་ཨིན་མས། 5འོད་ཟེར་དེ་གནག་དུང་ནང་ཤར་ཏེ་ཡོདཔ་ཨིན་མས་ གནག་དུང་གིས་འོད་ཟེར་དེ་ལུ་བཀབ་སྟེ་སྦ་མ་ཚུགས་པས།

6-7མི་ག་ར་གིས་འོད་ཟེར་དེ་ལུ་དད་པ་བསྐྱེད་བཅུག་ནིའི་དོན་ལུ་ དཀོན་མཆོག་གིས་ ཡོ་ཧ་ནཱན་ཟེར་སླབ་མིའི་མི་གཅིག་ལས་རྒྱུད་དེ་#༡:༦-༧། ཨ་ནི་དེབ་འདི་ནང་ ཁྲུས་གསོལ་བྱིན་མི་ ཡོ་ཧ་ནཱན་གྱི་སྐོར་ལས་བྲིས་ཏེ་ཡོད་ ཨིན་རུང་ཨ་ནི་དེབ་བྲིས་མི་འདི་ལུ་ ཡོ་ཧ་ནཱན་ཟེར་ཡང་སླབ་ཨིན་མས་ དེ་འབདཝ་ད་ ཁོང་གཉིས་སོ་སོ་ཨིན་ཟེར་ཞུ་ནི་ཨིན། འོད་ཟེར་གྱི་སྐོར་ལས་འཛོམ་དཔང་བཤད་པ་བཏང་གནང་ནུག 8འོད་ཟེར་དེ་ ཡོ་ཧ་ནཱན་ཁོ་རང་མེན་པས་ དེ་འབདཝ་ད་ ཁོ་འོད་ཟེར་གྱི་འཛོམ་དཔང་འབད་བ་འོངས་ནུག 9མི་ག་ར་ལུ་སྐྱ་སི་སི་བཟོ་མི་འོད་ཟེར་ངོ་མ་དེ་ འཛམ་བུ་གླིང་ནང་འབྱོན་ནི་སྦེ་ཡོདཔ་ཨིན་མས།

10འོད་ཟེར་ཨིན་མི་ཁོ་ འཛམ་བུ་གླིང་ནང་བཞུགས་ཏེ་ ཁོ་ལས་རྒྱུད་དེ་འབྱུང་བ་ཚུ་ག་ར་མཛད་དེ་ཡོད་རུང་ འཛམ་བུ་གླིང་གི་མི་དེ་ཚུ་གིས་ཁོ་ངོ་མ་ཤེས་པས། 11ཁོ་རང་གི་མི་དེ་ཚུ་སྡོད་སར་བྱོན་རུང་ ཁོ་གི་མི་དེ་ཚུ་གིས་ཁོ་ལུ་བྱོན་ཟེར་ཞུ་མ་བཏུབ་པས། 12དེ་འབདཝ་ད་ ཁོ་ལུ་ཞུ་སྟེ་ ཁོ་གི་མཚན་ནང་དད་པ་བསྐྱེད་མི་ཆ་ཁྱབ་ལུ་ ཁོ་གིས་དཀོན་མཆོག་གི་སྲས་སྲསམོ་ལུ་འགྱུར་ནིའི་འོས་འབབ་གནང་ནུག 13ཁོང་སྲས་དང་སྲསམོ་སྦེ་མཛད་གནང་མི་འདི་ ཕམ་བརྒྱུད་ལས་ ཡངན་ལུས་ཀྱི་འདོད་པ་ལས་ ཡངན་རྨགཔ་གི་འདོད་པ་ལས་མེན་པས་ དེ་འབདཝ་ད་ དཀོན་མཆོག་གི་ཐུགས་དགོངས་བཞིན་དུ་བྱུང་ནུག

14ད་གསུང་འདི་ཤ་དང་ཁྲག་ལུ་འགྱུར་ཞིནམ་ལས་ སྙིང་རྗེ་དང་བདེན་པ་གིས་གང་སྟེ་ ང་བཅས་དང་གཅིག་ཁར་འཛམ་བུ་གླིང་ནང་བཞུགས་ནུག་ ང་བཅས་ཀྱིས་གཟི་བརྗིད་འདི་མཇལཝ་ད་ འདི་ཡབ་ལས་ ཨིན་མིའི་སྲས་གཅིགཔ་གི་གཟི་བརྗིད་སྦེ་མཇལ་ཡི། 15ཡོ་ཧ་ནཱན་གྱིས་ སྐད་ཤུགས་སྦེ་བརྐྱབས་ཏེ་ ཁོ་གི་སྐོར་ལས་འཛོམ་དཔང་དེ་སྦེ་བཤད་ནུག་ ངེ་གི་ཤུལ་ལས་འབྱོན་ནི་འབད་མི་འདི་ ང་ལས་ཡང་གོ་ས་མཐོ་ ག་ཅི་སྨོ་ཟེར་བ་ཅིན་ ང་མ་སྐྱེས་བའི་ཧེ་མ་ལས་ ཁོ་བཞུགས་ཏེ་ཡོད་ཟེར་ ང་གིས་སླབ་མི་འདི་ཁོ་ཨིན། 16ཁོ་གི་ཕུན་སུམ་ཚོགས་པ་ལས་སྦེ་ ང་བཅས་ག་ར་གིས་ཐུགས་རྗེ་གི་གུ་ལུ་ཐུགས་རྗེ་ཐོབ་ཅི། 17ག་ཅི་སྨོ་ཟེར་བ་ཅིན་ བཀའ་ཁྲིམས་འདི་ མོ་སཱེས་ཀྱི་ཐོག་ལས་སྦེ་གནང་ནུག་ དེ་འབདཝ་ད་ ཐུགས་རྗེ་དང་བདེན་པ་འདི་ ཡེ་ཤུ་ཁིརཱིས་ལས་སྦེ་འབྱུང་འོངས་ནུག 18མི་ག་གིས་ཡང་དཀོན་མཆོག་ནམ་ཡང་མ་མཇལ་བས་ དེ་འབདཝ་ད་ ཡབ་དཀོན་མཆོག་གི་སྐུ་མདུན་ལུ་ བཞུགས་ཡོད་མི་སྲས་གཅིགཔ་དེ་ ཁོ་རང་དཀོན་མཆོག་ཨིནམ་ལས་ ཡབ་ཀྱི་སྐོར་ལས་ང་བཅས་ལུ་སྟོན་གནང་ནུག།

ཁྲུས་གསོལ་བྱིན་མི་ ཡོ་ཧ་ནཱན་གྱི་སྐོར།

19རྒྱལ་ས་ ཡེ་རུ་ཤ་ལེམ་ལས་ ཡ་ཧུ་ད་པའི་འགོ་དཔོན་ཚུ་གིས་ བླམ་དང་ ལེ་ཝི་ཚུ་ ཡོ་ཧ་ནཱན་སྡོད་ས་ལུ་བཏང་སྟེ་ ཁྱོད་དཀོན་མཆོག་གིས་བཙག་འཐུ་མཛད་མི་ཁིརཱིས་ཨིན་ན་ཟེར་འདྲིཝ་ད། 20ཡོ་ཧ་ནཱན་གྱིས་བློ་ཧིང་སངས་ས་སྦེ་ ང་ཁིརཱིས་མེན་ཟེར་ཁོང་ལུ་ལན་བརྐྱབས་ནུག 21དེ་ལས་ཁོང་གིས་ཁོ་ལུ་ དེ་སྦེ་ཨིན་པ་ཅིན་ ཁྱོད་ལུང་སྟོན་པ་ ཨེ་ལི་ཡ་ཨིན་ན་ཟེར་འདྲིཝ་ད་ ཁོ་གིས་ང་ཁོ་མེན་ཟེར་སླབ་ནུག་ ད་རུང་ཁྱོད་ ང་བཅས་ག་ར་གིས་རེ་བ་བསྐྱེད་སྡོད་མི་ལུང་སྟོན་པ་ཨིན་ན་ཟེར་འདྲིཝ་ད་ ང་ཁོ་ཡང་མེན་ཟེར་སླབ་ནུག#༡:༢༡། གསུང་རབ་རྙིང་པའི་ནང་ལུ་ ལུང་སྟོན་པ་ ཨེ་ལི་ཡ་ད་རུང་གསོན་པོ་སྦེ་ལོག་འོང་ནི་ཟེར་ལུང་བསྟན་གཅིག་ཡོད་ (མ་ལ་ཀི་ ༤:༥,༦) དེ་སྦེ་འབད་ནི་འདི་གིས་ ཡ་ཧུ་ད་པ་ཚུ་གིས་ཁོ་དང་ཡེ་ཤུ་ལུ་རེ་བ་བསྐྱེད་དེ་སྒུག་སྡོདཔ་ཨིན་མས། 22དེ་ལས་ཁོང་གིས་ཁོ་ལུ་ ཁྱོད་ག་སྨོ་ ཁྱོད་ཀྱིས་ཁྱོད་རང་ལུ་ག་ཨིན་ཟེར་སླབ་ནི་སྨོ་ ང་བཅས་ལུ་ལན་གཅིག་སླབ་གནང་ ང་བཅས་ལུ་བཏང་མི་ཚུ་ལུ་ལན་གསལ་འབད་དགོ་ཟེར་སླབ་ནུག 23ཡོ་ཧ་ནཱན་གྱིས་ ལུང་སྟོན་པ་ ཨའི་ཟ་ཡ་གིས་སླབ་དོཝ་བཟུམ་སྦེ།

གཙོ་བོ་གི་འབྱོན་ལམ་ ཕྲང་ཏང་ཏ་བཟོ་ཟེར་ རི་སྟོང་ནང་ལས་སྐད་གཅིག་རྐྱབ་དོ་ཟེར་མི་#༡:༢༣། ཨའི་ཟ་ཡ་ ༤༠:༣།

སྐད་དེ་ ང་ཨིན་ཟེར་སླབ་ནུག

24ད་ ཡོ་ཧ་ནཱན་ལུ་ཁ་འཐེན་འབག་མི་ལ་ལུ་ཅིག་ ཕ་རུ་ཤི་པ་ཚུ་ཨིན་མས། 25དེ་ལས་ཁོང་གིས་ཁོ་ལུ་ ཁྱོད་དཀོན་མཆོག་གིས་བཙག་འཐུ་མཛད་མི་ཁིརཱིས་ ཡངན་ལུང་སྟོན་པ་ ཨེ་ལི་ཡ་ ཡངན་ང་བཅས་ཀྱིས་རེ་བ་བསྐྱེད་སྡོད་མི་ལུང་སྟོན་པ་མེན་པ་ཅིན་ ག་ཅི་འབད་ཁྲུས་གསོལ་བྱིནམ་སྨོ་ཟེར་སླབ་ད། 26ཡོ་ཧ་ནཱན་གྱིས་ཁོང་ལུ་ ང་གིས་ཆུའི་ཁྲུས་གསོལ་བྱིནམ་ཨིན་ དེ་འབདཝ་ད་ ཁྱེད་མི་དམངས་ཀྱི་སྦུག་ལུ་ མི་གཅིག་བཞུགས་ཏེ་ཡོད་ འདི་ལུ་ཁྱེད་ཀྱིས་ངོ་མི་ཤེས། 27ངེ་གི་ཤུལ་ལས་བྱོན་མི་འདི་ཁོ་ཨིན་ ཁོ་གི་ཞབས་ལྷམ་གྱི་སྒྲོག་འཁྱོལ་ནི་གི་འོས་འབབ་ ང་ལུ་མེད་ཟེར་སླབ་ནུག 28འདི་ཚུ་ག་ར་ ཡཱོར་དཱན་ཆུའི་ཕ་ཁར་ བེ་ཐ་ནི་ཡ་ཟེར་སླབ་མི་གཡུས་ཚན་འདི་ནང་ ཡོ་ཧ་ནཱན་གྱིས་ཁྲུས་གསོལ་བྱིན་སྡོད་སའི་ས་གནས་ནང་ལུ་བྱུང་ནུག།

ཡེ་ཤུ་འདི་དཀོན་མཆོག་གི་ལུག་གི་ཕྱུག་ཀུ་ཨིན་པའི་སྐོར།

29འདི་གི་ནངས་པ་ ཡོ་ཧ་ནཱན་གྱིས་ཡེ་ཤུ་ཁོ་སྡོད་སར་འབྱོནམ་མཇལ་ཏེ་ དེ་སྦེ་སླབ་ནུག་ བལྟ་ཞིག་ འཛམ་བུ་གླིང་གི་སྡིག་པ་བསྣམས་པ་འབྱོན་མི་ དཀོན་མཆོག་གི་ལུག་གི་ཕྱུག་ཀུ་བྱོན་དོ། 30ང་གིས་ཧེ་མ་ཁྱེད་ལུ་ ངེའི་ཤུལ་ལས་གཅིག་འབྱོན་དོ་ཟེར་མི་འདི་ ཁོ་གི་སྐོར་ལས་ཨིན་ ཁོ་ང་ལས་ཡང་གོ་ས་མཐོ་ ག་ཅི་སྨོ་ཟེར་བ་ཅིན་ ང་མ་སྐྱེས་བའི་ཧེ་མ་ལས་ཁོ་བཞུགས་ཡོདཔ་མས་ཟེར་སླབ་ནུག 31ང་རང་གིས་ད་ལྟོ་ཚུན་ཚོད་ཁོ་ངོ་མ་ཤེས་ དེ་འབདཝ་ད་ ཨཱིས་ར་ཨཱེལ་པ་ཚུ་ལུ་ ཁོ་ངོ་སྟོན་ནི་གི་དོན་ལུ་ ང་ཆུའི་ཁྲུས་གསོལ་བྱིན་ཡི་རང་འོང་ཡི། 32དེ་ལས་ ཡོ་ཧ་ནཱན་གྱིས་འཛོམ་དཔང་དེ་སྦེ་བཤད་ནུག་ ཁོ་གི་གུ་ཐུགས་ཉིད་དེ་ ཡར་ནམ་མཁའ་ལས་མར་ བྱ་ཐི་ལི་རྒྱལམོ་བཟུམ་སྦེ་མར་ཆགས་ཏེ་ བཞུགས་ས་ང་གིས་མཇལ་ཡི། 33དེའི་སྐབས་ང་གིས་ཡང་ཁོ་ངོ་མ་ཤེས་ ཨིན་རུང་རང་ ང་ལུ་ཆུའི་ཁྲུས་གསོལ་བྱིན་པ་བཏང་མི་དེ་གིས་ ཁྱོད་ཀྱིས་ཞིང་ཁམས་ལས་མར་ཐུགས་ཉིད་འབབ་སྟེ་ ག་གི་གུ་ལུ་ཆགས་ས་མཐོང་འོང་ག་ ཨ་ནི་དེ་ དམ་པའི་ཐུགས་ཉིད་ཀྱི་ཁྲུས་གསོལ་གནང་མི་ཨིན་ཟེར་ ང་ལུ་གསུངས་ཡི། 34དེ་ལས་ང་རང་གིས་ཡང་མཇལ་ཏེ་ དཀོན་མཆོག་གི་སྲས་འདི་ཁོ་རང་ཨིན་ཟེར་ ང་གིས་འཛོམ་དཔང་བཤདཔ་ཨིན་ཟེར་སླབ་ནུག།

ཡེ་ཤུ་གི་སློབ་མ་དང་པ་ཚུ་གི་སྐོར།

35ད་རུང་འདི་གི་ནངས་པ་ ཡོ་ཧ་ནཱན་ཁོ་རང་གི་སློབ་མ་གཉིས་དང་གཅིག་ཁར་སྡོདཔ་ད། 36ཡེ་ཤུ་འདི་ལས་ཕར་བྱོན་ས་མཇལ་ཏེ་ ཁོ་གིས་བལྟ་ཞིག་ དཀོན་མཆོག་གི་ལུག་གི་ཕྱུག་ཀུ་ཟེར་ཞུཝ་ད། 37སློབ་མ་གཉིས་ཀྱིས་གོ་སྟེ་ ཁོང་ཡེ་ཤུ་གི་རྟིང་བདའ་ཡར་སོང་ནུག 38ཡེ་ཤུ་སྐུ་རྒྱབ་ལོག་སྟེ་གཟིགསཔ་ད་ ཁོང་གཉིས་རྒྱབ་ལས་འོང་ས་གཟིགས་ཏེ་ ཁྱེད་ག་ཅི་འཚོལ་བ་འོངམ་སྨོ་ཟེར་གསུངསམ་ད་ ཁོང་གིས་ རབ་བི་ལགས་ ནཱ་ག་ཏེ་བཞུགསཔ་སྨོ་ཟེར་ཞུ་ནུག་ རབ་བི་ཟེར་ཞུ་མི་ འདི་གི་དོན་དག་དེ་ སློབ་དཔོན་ལགས་ཟེར་སླབ་ཨིན་མས། 39ང་ག་ཏེ་སྡོདཔ་ཨིན་ན་ བལྟ་བ་ཤོག་ཟེར་གསུངསམ་ད་ ཁོང་གཉིས་ཡེ་ཤུ་དང་གཅིག་ཁར་སོང་སྟེ་ ཕར་ལྷོདཔ་ད་ ཉིན་མའི་ཆུ་ཚོད་བཞི་ལང་སོངམ་ལས་ དེ་ཉིན་མ་ཡེ་ཤུ་དང་གཅིག་ཁར་སྡོད་ནུག

40ཡོ་ཧ་ནཱན་གྱིས་སླབ་མི་འདི་རྣ་བ་གོ་སྟེ་ ཡེ་ཤུ་ལུ་རྟིང་བདའ་མིའི་ མི་གཉིསཔ་འདི་གི་གྲལ་ཁ་ལས་གཅིག་ སི་མཱོན་པེ་ཏྲོ་གི་སྤུན་ ཨཱན་དྲུ་ཨིན་མས། 41ཁོ་གིས་དང་པ་རང་ ཁོ་རང་གི་སྤུན་ སི་མཱོན་འཚོལ་ཐོབ་སྟེ་ཁོ་ལུ་ ང་བཅས་ཀྱིས་ མ་ཤི་ཀ་འཚོལ་ཐོབ་ཅི་ཟེར་སླབ་ནུག (*མ་ཤི་ཀ་འདི་ལུ་ དཀོན་མཆོག་གིས་བཙག་འཐུ་མཛད་མི་ཁིརཱིས་ཟེར་ཞུཝ་ཨིན།) 42ཁོ་གིས་ སི་མཱོན་ ཡེ་ཤུ་གི་སྐུ་མདུན་ལུ་འཁྱིད་འོངམ་ད་ ཡེ་ཤུ་གིས་ཁོ་ལུ་གཟིགས་སྦེ་ ཁྱོད་ ཡོ་ཧ་ནཱན་གྱི་བུ་ སི་མཱོན་ཨིན་མས་ ད་ཁྱོད་ལུ་ ཀེ་ཕཱས་ཟེར་མིང་བཏག་ནི་ཨིན་ཟེར་གསུངས་ནུག་ ཀེ་ཕཱས་ལུ་ པེ་ཏྲོ་ ཟེར་ཡང་སླབ་ཨིན་ ཨ་ནི་མིང་གཉིས་ཆ་རང་གི་དོན་དག་དེ་རྡོ་ཕུ་ཨིན།།

ཕི་ལིབ་དང་ ན་ཐ་ནཱེལ་གྱི་སྐོར།

43འདི་གི་ནངས་པ་ ཡེ་ཤུ་ལུང་ཕྱོགས་ ག་ལི་ལི་ལུ་བྱོན་ནིའི་ཐུགས་བསམ་བཞེས་ཏེ་འབྱོནམ་ད་ ཕི་ལིབ་ལུ་མཇལ་ཁ་གནང་སྟེ་ ཁོ་ལུ་ངེ་གི་སློབ་མ་སྦེ་ཤོག་ཟེར་གསུངས་ནུག 44ཨཱན་དྲུ་དང་ པེ་ཏྲོ་བཟུམ་སྦེ་ ཕི་ལིབ་ཡང་ཁྲོམ་ བཱེད་སའི་ད་ལས་ཨིན་མས། 45དེ་ལས་ ཕི་ལིབ་ ན་ཐ་ནཱེལ་དང་གཅིག་ཁར་འཕྱད་དེ་ ང་བཅས་ཀྱིས་ མོ་སཱེས་ཀྱི་བཀའ་ཁྲིམས་ནང་དང་ ལུང་སྟོན་པ་ཚུ་གིས་བྲིས་བཞག་མི་ ཡོ་སེབ་ཀྱི་སྲས་ ན་ཟ་རཱེད་ཀྱི་ཡེ་ཤུ་དང་མཇལ་ཡི་ཟེར་སླབ་ད། 46ན་ཐ་ནཱེལ་གྱིས་ ཁོ་ལུ་ ན་ཟ་རཱེད་ལས་ཡང་ལེགས་ཤོམ་གཅིག་འཐོན་ཚུགས་ག་ཟེར་སླབ་ད་ ཕི་ལིབ་ཀྱིས་ཁོ་ལུ་ཁྱོད་རང་འོངས་ཏེ་བལྟ་ཟེར་སླབ་ནུག 47ཡེ་ཤུ་གིས་ ན་ཐ་ནཱེལ་འོང་ས་གཟིགས་ཏེ་ བལྟ་ཞིག་ གཡོ་སྒྱུ་མེད་པའི་ ཨཱིས་ར་ཨཱེལ་པ་ངོ་མ་འདི་ ཁོ་ཨིན་ཟེར་གསུངས་ནུག 48དེ་ལས་ ན་ཐ་ནཱེལ་གྱིས་ ནཱ་གིས་ང་ལུ་ག་དེ་སྦེ་མཁྱེནམ་སྨོ་ཟེར་ཞུཝ་ད་ ཡེ་ཤུ་གིས་ཁོ་ལུ་ ཕི་ལིབ་ཀྱིས་ཁྱོད་ལུ་མ་འབོ་པའི་ཧེ་མ་ ཁྱོད་ཅོང་སེ་ཤིང་གི་འོག་ལུ་སྡོདཔ་ད་ ང་གིས་ཁྱོད་མཐོང་ཅི་ཟེར་གསུངས་ནུག 49ན་ཐ་ནཱེལ་གྱིས་ རབ་བི་ལགས་ ནཱ་དཀོན་མཆོག་གི་སྲས་ ཨཱིས་ར་ཨཱེལ་གྱི་རྒྱལཔོ་ཨིན་མས་ཟེར་ཞུ་ནུག 50ཡེ་ཤུ་གིས་ཁོ་ལུ་ ང་གིས་ཁྱོད་ཅོང་སེ་ཤིང་གི་འོག་ལུ་མཐོང་ཅི་ཟེར་སླབ་ནི་དེ་གིས་ ཁྱོད་དད་པ་བསྐྱེདཔ་ཨིན་ན་ ད་རུང་འདི་ལས་ཡང་ལྷག་པའི་ལཱ་སྦོམ་དེ་ཚུ་ཁྱོད་ཀྱིས་མཐོང་འོང་ཟེར་གསུངས་ཏེ། 51འཕྲོ་མཐུད་དེ་རང་ ཡེ་ཤུ་གིས་ཁོ་ལུ་ དོན་ལས་རང་ང་གིས་ཁྱེད་ལུ་སླབ་ཨིན་ ཞིང་ཁམས་སྒོ་ཕྱེ་སྟེ་དཀོན་མཆོག་གི་ཕོ་ཉ་དེ་ཚུ་ མིའི་བུ་གི་གུ་ལུ་འོངས་ཏེ་ ཡར་འཛེག་མར་འབབ་ས་ ཁྱེད་ཀྱིས་མཐོང་འོང་ཟེར་གསུངས་ནུག།

S'ha seleccionat:

ཡོ་ཧ་ནཱན་ལེའུ་ 1: dzoD

Subratllat

Comparteix

Copia