ወንጌል ዘሉቃስ 23

ምዕራፍ 23

ዘከመ ቆመ እግዚእ ኢየሱስ ቅድመ ጲላጦስ ወሄሮድስ

1 # ማቴ. 27፥1፤ ማር. 15፥1፤ ዮሐ. 18፥19፤ 19፥1። ወተንሥኡ ኵሎሙ በምልኦሙ ወወሰድዎ ኀበ ጲላጦስ። 2#20፥25፤ ማቴ. 22፥21። ወአኀዙ ያስተዋድይዎ ወይቤሉ ረከብናሁ ለዝንቱ እንዘ ያዐልዎሙ ለሕዝብነ ወይከልኦሙ ኢየሀቡ ጸባሕተ ለቄሳር ወይሬሲ ርእሶ ክርስቶስሃ ንጉሠ እስራኤል። 3ወሐተቶ ጲላጦስ ወተስእሎ ወይቤሎ አንተኑ ንጉሦሙ ለአይሁድ ወአውሥአ እግዚእ ኢየሱስ ወይቤሎ አንተ ትብል ከመ አነ ውእቱ። 4ወይቤሎሙ ጲላጦስ ለሊቃነ ካህናት ወለሕዝብ አልቦ ዘረከብኩ አበሳ ላዕለ ዝንቱ ብእሲ። 5ወዐውየዉ ወይቤሉ የሀውኮሙ ለሕዝብ ወይሜህር በኵሉ ይሁዳ እኂዞ እምገሊላ እስከ ዝየ። 6ወሰሚዖ ጲላጦስ እንዘ ይብሉ ገሊላ ተስእለ ገሊላውያነ ለእመ ገሊላዊ ብእሲሁ። 7#3፥1። ወአእሚሮ ከመ እምኵናነ ሄሮድስ ውእቱ ፈነዎ ኀበ ሄሮድስ እስመ ሀሎ ውእቱ በኢየሩሳሌም በውእቱ መዋዕል። 8#9፥9። ወሶበ ርእዮ ሄሮድስ ለእግዚእ ኢየሱስ ተፈሥሐ ፈድፋደ እስመ ይፈቅድ ይርአዮ እምጕንዱይ መዋዕል እስመ ይሰምዕ ነገሮ ወይሴፎ ይርአይ ተአምረ በኀቤሁ ዘይገብር። 9ወሐተቶ በብዙኅ ነገር ወአልቦ ዘተሰጥዎ አሐተ ቃለ። 10ወይቀውሙ ሊቃነ ካህናት ወጸሐፍት ወብዙኀ ያስተዋድይዎ። 11ወአስተኣከዮ ሄሮድስ ወተሣለቁ ላዕሌሁ ወዓልያኒሁ ወአልበስዎ ልብሰ ቀይሐ ወፈነዎ ኀበ ጲላጦስ። 12#ግብረ ሐዋ. 4፥27። ወይእተ አሚረ ተኳነኑ ሄሮድስ ወጲላጦስ እስመ ጋእዝ ቦሙ እምቅድም። 13ወጸውዖሙ ጲላጦስ ለሊቃነ ካህናት ወለመኳንንተ ሕዝብ። 14ወይቤሎሙ አምጻእክምዎ ኀቤየ ለዝንቱ ብእሲ ከመ ዐላዌ ሕዝብ ወናሁ አነ ሐተትክዎ በቅድሜክሙ ወአልቦ ዘረከብኩ ሎቱ ጌጋየ ለዝንቱ ብእሲ እምዘአንትሙ አስተዋደይክምዎ። 15ወኀበ ሄሮድስኒ ፈነውኩክሙ ወውእቱኒ ፈነዎ ኀቤነ ወናሁ አልቦ ዘገብረ በዘይመውት። 16#ዮሐ. 19፥1። አቅሥፎኬ ወእኅድጎ።

ዘከመ አሕየዎ ጲላጦስ ለበርባን ወኰነኖ ለእግዚእ ኢየሱስ

17ወቦ ልማድ በበዐል ያሕዩ ሎሙ አሐደ እምነ ሙቁሓን። 18#ግብረ ሐዋ. 3፥12-16። ወዐውየዉ ኵሎሙ ኅቡረ በምልኦሙ ወይቤሉ አእትቶ ወስቅሎ#ቦ ዘኢይጽሕፍ «ወስቅሎ» ለዝ ወአሕዩ ለነ በርባንሃ። 19ወውእቱሰ በርባን ዘገብረ ሀከከ በውስተ ሀገር ወበቀቲለ ነፍስ ተሞቅሐ። 20ወፈቂዶ ጲላጦስ ያሕይዎ ለእግዚእ ኢየሱስ#ቦ ዘኢይጽሕፍ «ወፈቂዶ ጲላጦስ ያሕይዎ ለእግዚእ ኢየሱስ» ካዕበ ይቤሎሙ ትፈቅዱኑ አሕይዎ ለክሙ ለኢየሱስ። 21ወዐውየዉ ወይቤሉ ስቅሎ ስቅሎ። 22ወይቤሎሙ ጲላጦስ በሣልስ ምንተ እኩየ ገብረ ናሁ አልቦ ዘረከብኩ ላዕሌሁ በዘይመውት እቅሥፎኬ እንከሰ ወአሕይዎ። 23ወዐውየዉ በዐቢይ ቃል ወሰአሉ ወይቤሉ ይስቅልዎ ወኀየለ ቃሎሙ ወቃለ ሊቃነ ካህናት። 24ወኰነኖ ጲላጦስ ከመ ይኩኖሙ ስእለቶሙ፤ 25ወአሕየወ ሎሙ ዘሰአልዎ ዘበቀቲለ ነፍስ ወበገቢረ ሁከት ተሞቅሐ ወኢየሱስሃ መጠዎሙ ለፈቃዶሙ።

ዘከመ አጾርዎ ለስምዖን መስቀሎ ለእግዚእ ኢየሱስ

26 # ማር. 15፥21፤ ዮሐ. 19፥17-27። ወሶበ ወሰድዎ አኀዝዎ ለስምዖን ቀሬናዊ እትወቶ እምሐቅል ወአጾርዎ መስቀሎ ይትልዎ ለእግዚእ ኢየሱስ። 27ወተለውዎ ብዙኃን ሕዝብ ወአንስትኒ ይበክያሁ ወያስቈቅዋሁ። 28ወተመይጦን እግዚእ ኢየሱስ ወይቤሎን አዋልደ ኢየሩሳሌም ኢትብክያኒ ኪያየሰ አላ ብክያ ላዕለ ርእስክን ወላዕለ ውሉድክን። 29#ማቴ. 24፥19። እስመ ይመጽእ መዋዕል አመ ይብሉ ብፁዓት መካናት ወከርሥኒ እንተ ኢወለደት ወአጥባትኒ እለ ኢሐፀና። 30#10፥8፤ ራእ. 6፥16። ይእተ አሚረ ይብልዎሙ ለአድባር ደቁ ላዕሌነ ወለአውግርኒ ድፍኑነ። 31በዝ ዕፅ ርጡብ እመ ከመዝ ዘገብሩ እፎኑመ ይከውን በይቡስ።

ዘከመ ተሰቅለ ማእከለ ክልኤ ፈያት

32 # ዮሐ. 19፥18። ወወሰዱ ካልኣነ ክልኤተ ፈያተ ይስቅሉ ምስሌሁ። 33ወበጺሖሙ ብሔረ ዘስሙ ቀራንዮ በህየ ሰቀልዎ ወእልክተኒ ክልኤተ ፈያተ አሐደ በየማኑ ወአሐደ በፀጋሙ ሰቀሉ። 34#ኢሳ. 53፥12። ወይቤ እግዚእ ኢየሱስ አባ ስረይ ሎሙ እስመ በዘኢየእምሩ ይገብሩ ወተዓፀዉ ዲበ አልባሲሁ ወተካፈሉ። 35#መዝ. 21፥7። ወይቀውሙ ሕዝብ ወይሬእዩ ወመላእክትኒ ይዘንጕጕዎ ወይብልዎ ዘባዕደ ያድኅን ርእሶ ለያድኅን እመሰ ክርስቶስ ውእቱ ወኅሩዩ ለእግዚአብሔር። 36#መዝ. 68፥21። ወይሣለቁ ላዕሌሁ ሐራ ወይቀርቡ ወአምጽኡ ሎቱ ብሒአ ይስተይ። 37ወይቤልዎ እመሰ ንጉሦሙ አንተ ለአይሁድ አድኅን ርእሰከ። 38ወጸሐፉ መጽሐፈ ላዕሌሁ ወጽሕፈቱ በሮማይስጥ ወበጽርእ ወበዕብራይስጥ ዘይብል ዝንቱ ውእቱ ንጉሦሙ ለአይሁድ።

ዘከመ አምነ ፈያታዊ ዘየማን

39ወአሐዱ ፈያታዊ እምእለ ተሰቅሉ ምስሌሁ ፀረፈ ወይቤሎ እመሰ አንተ ክርስቶስ አድኅን ርእሰከ ወኪያነሂ። 40ወአውሥአ ካልኡ ወገሠጾ ወይቤሎ ኢትፈርሆኑ ለእግዚአብሔር አምላክከ አንተ እንዘ ውስተ ዝንቱ ኵነኔ ሀለውከ።#ቦ ዘይቤ «አንተ ወአነ እንዘ ውስተ ዝንቱ ኵነኔ ሀለውነ» 41ወለነሰ ዘበርቱዕ ረከበነ ዘይደልወነ ወበከመ ምግባሪነ ተፈደይነ ወዝንቱሰ አልቦ እኩይ ዘገብረ ወኢምንትኒ። 42#ነህ. 13፥31፤ ማቴ. 16፥28። ወይቤሎ ለእግዚእ ኢየሱስ ተዘከረኒ እግዚኦ አመ ትመጽእ በመንግሥትከ። 43ወአውሥአ እግዚእ ኢየሱስ ወይቤሎ አማን እብለከ እመን ፈድፋደ#ቦ ዘኢይጽሕፍ «እመን ፈድፋደ» ከመ ዮም ትሄሉ ምስሌየ ውስተ ገነት።

በእንተ ሞቱ ለእግዚእ ኢየሱስ

44ወቀቲሮ ጊዜ ስሱ ሰዓት ሞተ ፀሐይ ወጸልመ ኵሉ ዓለም እስከ ጊዜ ተሱዓት ሰዓት። 45#ዘፀ. 26፥31-33። ወጸልመ ፀሐይ ወተሰጠ መንጦላዕተ ምኵራብ እማእከሉ እምላዕሉ እስከ ታሕቱ።#ቦ ዘኢይጽሕፍ «እምላእሉ እስከ ታሕቱ» 46#መዝ. 30፥5። ወሶቤሃ ጸርሐ እግዚእ ኢየሱስ በዐቢይ ቃል ወይቤ አባ ውስተ እዴከ አመሐፅን ነፍስየ ወዘንተ ብሂሎ መጠወ ነፍሶ። 47ወርእዮ መስፍነ ምእት ዘኮነ አእኰቶ ለእግዚአብሔር ወይቤ አማን ጻድቅ ውእቱ ዝብእሲ። 48ወኵሎሙ ሕዝብ እለ ኮኑ ጉቡኣነ ሶበ ርእዩ ዘኮነ ጐድኡ እንግድዓቲሆሙ ወተሠውጡ ወአተዉ አብያቲሆሙ። 49#8፥2-3። ወይቀውሙ ኵሎሙ እለ የአምርዎ እምርኁቅ ወአንስትኒ እለ ተለዋሁ እምገሊላ ርእያ ዘንተ።

በእንተ ተቀብሮቱ ለእግዚእ ኢየሱስ

50ወመጽአ ብእሲ ዘስሙ ዮሴፍ ባዕል#ቦ ዘይቤ «ሥዩም» ብእሲ ኄር ወጻድቅ ወጠቢብ። 51#2፥25-38። ወውእቱሰ ኢሀሎ ውስተ ምክሮሙ ወምግባሮሙ ለአይሁድ ወሀገሩ አርማትያስ ዘእምሀገረ ይሁዳ ወኮነ ይሴፈዋ ውእቱኒ ለመንግሥተ እግዚአብሔር። 52ወሖረ ኀበ ጲላጦስ ወሰአለ ሥጋሁ ለእግዚእ ኢየሱስ። 53#ዮሐ. 19፥31-42። ወአውረደ ሥጋሁ ወገነዞ በሰንዱናት ወቀበሮ ውስተ መቃብር ዘአውቀረ ዘአልቦ ዘተቀብረ ውስቴቱ ወአንኰርኰረ እብነ ዐቢየ ወአንበረ ውስተ አፈ መቃብር ወኀለፈ።#ቦ ዘኢይጽሕፍ «ወአንኰርኰረ እብነ ዓቢየ ወአንበረ ውስተ አፈ መቃብር ወኀለፈ» 54ወዐርብ ውእቱ ዕለት አሜሁ ለጸቢሐ ሰንበት። 55#ዘፀ. 20፥10፤ ዘዳ. 5፥14። ወተለዋሁ ክልኤቲ አንስት እለ መጽኣ እምገሊላ ወርእያ መቃብሮ ወዘከመ ተወድየ ሥጋሁ። ወአተዋ ወአስተዳለዋ አፈዋተ ወኀደጋ በሰንበት ሐዊረ እስመ ከማሁ ሕጎሙ።

S'ha seleccionat:

ወንጌል ዘሉቃስ 23: ሐኪግ

Subratllat

Comparteix

Copia