KALAQAMA 3
3
MANNU HAJAJAMA GIWI
1Hamashshu Maganu kalaqino moyichi baalunkunni roore xagaraamoho; hamashshu manchote, «Halaalintanni Maganu Edeni Gennetete noo haqqe baalante laalo ittinannikki gede hoolino'neni?» yee xa'mise.
2Manchono hamashshoho, «Edeni Gennetete noo haqqe laalo ita dandiineemmo; 3ikkollana Maganu, ‹Edeni Gennetete giddo noo haqqicho laalo ittinoonte; kissinoonte; gibbine kissiniro kayinni reyitinanni› yiinonke» yite dawartusi.
4Hamashshu qole manchote, «Reyo nafa direyitinanni; 5Maganu hatto yiinohu, hattenne haqqicho laalo ittinanni barra ille'ne fa'nitannotanna isi gede danchanna busha baddine affinannire ikkitinannita afinohuraati» yiise.
6Manchono haqqichote laalo itate halchishshannota, illete biiffinotanna egenno uyitannota ikkitinota affe haadhe ittu; ayiddaanniserano uyitusi; isino iti. 7Hakkawoyintenni lamunku elle fa'niteenna mullootu noota huwattu; kunnira, balasete haqqicho daro xaadisse gobbe qodhite teedansa diphitu.
8Hatte hawarro Kaaliiqi Maganu Edeni Gennetete giddo ha'ramanna hirbasi macciishshite, Addaaminna galtesi Kaaliiqi Maganu albinni wirri yite Gannatete haqqe mereero maaxantu. 9Ikkollana, Kaaliiqi Maganu Addaami woshshe, «Hiikko nootto?» yee xa'misi.
10Addaami, «Edeni Gennetete giddo ate hirba macciishshoommo; mullichu noommo daafira, waajje maaxamoommo» yii.
11Kaaliiqi, «Mullichu noottota ayi kulihe? Itattokki gede hajajummoheta haqqichote laalo itittoni?» yiisi.
12Addaami, «Tini ledo'ya heedhara oottoe mancho, haqqichote aaninni laalo haadhe uyiteennae itoommo» yii.
13Kaaliiqi Maganu mancho, «Konne mayira assitta?» yee xa'mise. Iseno, «Hamashshu so'risiiseennae itoomma» yitu. 14Kaaliiqi Maganu hamashsho, «Konne assootto coyira saadatenna dubbu moyichi baalunkuwiinni baxxite rumamoottoha ikki; godowikkinni goshooshantanni ha'ratto; hee'ratto diri baalunkunni bushsha itatto; 15atenna manchote mereero, sirchikkinna sirchise mereero diinoomu hee'ranno gede asseemmo; isi umokki cancananno; atino gindesi qasatto» yii.
16Manchono, «Godowatta yannara, qarrakki lowo geeshsha batiseemmo; qarrunni ilatta; kuni ikke hee'reennanni, ayiddaannakki yora diaguratta; isino gashshannoheha ikkanno» yiise.
17Addaamirano, «Galtekki qaale macciishshite, ‹Ittooti› yoommohe haqqicho laalo itoottohura, atenni kainohunni baatto rumantinota ikkito; heeshshokki diri baalunkunni daafurte loosse itatto. 18Baatto utanna kokko'le fushshitannohe; atino baatto fushshitanno laalo itatto. 19Dayotto baatto higatto geeshsha sagale hunkiikkinni itatto; ati bushshahona, galagalte bushsha higatto» yiisi.
20Addaami galtesira, Heewani#3:20 Heewani yaa Ibiraawootu afiinni heeshshonite yaate. yee su'ma fushshise; togo yiinohu lubbo afi'rinohura baalaho ama ikkitinohuraati. 21Kaaliiqi Maganu Addaamiranna Heewanira gogu uddano seekke uddisiisinsa.
ADDAAMINNA HEEWANI GENNETETENNI SHORRANTU GARA
22Kaaliiqi Maganu, «Kuneeti mannu bushanna dancha bade afate ninke giddonni mittu gedeeha ikkino; xaano heeshshote haqqicho laalo adhe ite, hegerera heeshshonniha ikke hee'ra dihasiissannosi» yii. 23Kunnira, Kaaliiqi Maganu manna Edeni Gennetete darginni fushshi; kalaqamino baatto loose shaqqishanno gede assisi. 24Manna shorrihu gedensaanni, Edeni Gennetete soojjaati ragaanni kirubeeli yinanni sokkaasinenna raga baala falaqqi yitanni giirate gede wala yitanno bise heeshshote haqqichowa massitanno doogo agartanno gede wori.
S'ha seleccionat:
KALAQAMA 3: QulMax
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© The Bible Society of Ethiopia; Sidama Holy Bible BSE-UBS 262 P 2014