एहुना 11
11
लाजरराः गुजुः
1लाजर ञावीग मी होड़ होड़ दोहोना। हाँय एहूदिया छतरराः बेतनिया गाँवरीग होड़ दोहोना। अरू मी दिन हाँय बेमारीरेय परावनेना। हाँयरिकिनाः मेमेसकिन मरियम अरू मारता दोहोना। 2(नाँयग मरियम मड़ंगरे परबूराः काटरे नपाय महका हना सुनुम तीलाःतिडिगखन अनँयग ऊबतेय जोडतेरा।) 3दो हाँयग लाजररिकिनाः मेमेसकिनतेन ईसू एचेरेकिन सरवनतेरा, “ने परबू, आम दुलारगेयता हाँय, बेमारीरे इदानिया।”
4नाःआ सरवन अयूमतेडखन ईसू कतातेरा, “नाःआ बेमारीते हाँय ओरोय गोएगनेना। नान दो भगवानराः मान मरजइत लगा होयाकिया। नाःआते भगवारीग बेटातराः मान मरजइत होयाःता।” 5ईसू मारता, मरियम अरू हँकिनरीग वगात लाजरे अलार-दुलारकुःआ। 6ईसू अयूमतेराय लाजर बेमारीरे इदानिया, माःआन। हनते हों, हाँय दोहोना हना ततेररे बार दिन अरूय दोहोयान।
7हना तयोमरे हाँय चेलाकूतेने कतावाड, “दोबू, अबू अरू एहूदिया छतररेबू सेन।”
8दो चेलाकूतेन ईसू एचेरेकू कतातेड, “ने गुरुजी, तोनोंग दिन मड़ंगरे हंडाकुःआ एहूदाकू आम दिरिते तेके गोएगमे लगाकू कुरनिसतेरा। दो आम हंडा अरू सेन लगाम कतायतना जा?”
9दो ईसू कतातेरा, “दिनरे बारह घंटा होयाःता। दिनरेय सेनता हाँयग होड़, बेरराः मरसलतेय ञेलता। हनालगा हाँय मेरेय तोहोडगुःता। 10मनदो तोनोंगीग रइतरेय सेनतान दो मरसल मेर दोहोनता हना अतेय तोहोड जुवाःता।”
11हनते ईसू हँकू एचेरेय कतातेड, “अबूरीग सउंगता लाजर अपीगतनाय। मनदो ईंग हाँय बेरेडगेय लगायिंग सेनता।”
12दो हाँयरिकुःआ चेलाकू कता कुदातेरा, “ने परबू, अपीगतनाय दो हाँय नपाय जुवाःताय।”
13लाजर गोएगयनाय माःआन ईसू कताया, मनदो चेलाकू हाँय अपीगतनाय माःआनकू ओंगोलतेरा। 14हनते ईसू हँकू एचेरेय कनाताबाःगोतेड, “लाजर गोएगयनाय। 15ईंग हंडा मड़ंगरे मेरिंग दोहोगान। हनालगा अपे बदीरे ईंग बहाल इदानिंगा। अरू नुँहू अपेराः बिसवास बड़ियाड़ जुवाः लगा हंडा मीटोंग दावपे पवाःता। दो अबू हाँय एचेरेबू सेन।”
16हनते दिदिमूस#11:16 उनानी भासीरे दिदिमूसराः मतलोब जवा हवे अरू इबरानी भासीरे तोमाराः मतलोब हों हनानाः हवे। माःआनकू कतावायता, हाँयग तोमा एटाः चेलाकू एचेरेय कतातेड, “दो अबू हों हाँय सुदा गुजुः लगाबू सेन।”
जीव एमेयीग ईसू हवे
17ईसू बेतनिया गाँवरे सुदरुः वरी लाजर मड़गटरे तीलतो चइर दिन होयायान। 18बेतनिया गाँव एरुसलेम सहर अते मी कोस तोनोरे दोहोना। 19दो मारता अरू मरियम कता बहालकिन लगा मुरुक एहूदाकूरिकुःआ मूक होड़कू हंडाकू वेजेडा। 20ईसू दरवाया माःआन मारता अयूमतेड दो हाँय सुदा जुमाः लगाय सेनेडा। मनदो मरियम ओड़ाःरेय दोहोना।
21दो मारता ईसू एचेरेय कतातेरा, “ने परबू, आम नंडाम दोहोकुः दो ईंग वगायिंग ओरोय गोएगकुःआ। 22मनदो ईंग सुदीयतना, नुँहू हों आम भगवान एचेरे कहिसाःम असेय दो हनाँय एमेवामता।”
23दो ईसू हाँय एचेरेय कतातेरा, “वगाम अरूय जियाव रिमुःता।”
24मारता कतातेड, “ईंग सुसुदीतना टुटीग दिनरे हाँय अरूय जियाव रिमुःता।”
25दो ईसू हाँय एचेरेय कतातेरा, “गोएगतो होड़कू, अरू जियाव रेमकूयीग अरू जीव एमेयीग इनिंग हवे। ईंग एचेरेय बिसवासगेता हाँयग होड़, गोएग जुवाः होंय जियाव जुवाःता। 26अरू जीयत इदानिया अरू ईंग एचेरेय बिसवासगेता हाँयग होड़ कहियो ओरोय गोएगनेना। नाःआ कता आम बिसवासगेतना जा?”
27दो हाँय कतातेड, “हाव परबू, ईंग बिसवासगेतना, चउंदीसरे वेग लगाय दोहोना हाँयग भगवानरीग बेटात, मसी अनम हवे।”
ईसू इयामा
28नाःआ कतावाडखन मारता कुदा सेनेडा अरू हाँयरीग मेसेत मरियम एकला राःतिडिगखने कताया, “गुरुजी वेगकिया अरू आमे राःतना।” 29नाःआ अयूमतेड दो हाँय ओहेन रेमनेनखन ईसू एचेरेय सेनेडा। 30ईसू हना बेला वरी गाँवरे मेरेय बोलोगान। हाँय मारता सुदाय जुमावनेना हनंडाय दोहोना। 31मरियम सुदा ओड़ाःरेकू दोहोना अरू हाँयकू कता बहाला, हँकुःआ एहूदाकू मरियम ओहेन रेमनेनखने उडुंगयान हनाकू ञेलतेरा। दो हँकू ओंगोलतेरा, नाँय मड़गटरे फिकीर लगाय सलाःतना। अरू हाँय तयोम तयोम हँकुःआ होड़कू होंकू सेनेडा।
32ईसू दोहोना हंडा सोदोरनेनखन मरियम ईसूय ञेलतेरा अरू हाँय काट कुटीरे तबेरनेनखने कताया, “ने परबू, आम नंडाम दोहोकुः दो वगायिंग ओरोय गोएगकुःआ।”
33दो ईसू मरियम अरू हाँय सुदाकू वेजेडा हँकुःआ एहूदाकू इयामतोय ञेलतेडकुःआ, दो हाँय जीव मुरुक हुडिंगयान अरू कुंभुलावयानखने 34होंबोरकुःआ, “हाँय करेपे तीलकिरिया?”
दो हँकू कतातेड, “ने परबू, दोमे ञेञेल।”
35दो ईसू इयामा।
36हनते एहूदाकू कताया, “ञेलेयपे, नाँय हाँय तुमिने दुलारगेया।”
37मनदो हँकू अते अदोम होड़कू कताया, “नाँय मुरुक अंधा होड़कूराः मेडे नपायतेरा, अरू लाजर गुजुः अते मेरेय बनसाव अवेगडीग जा?”
ईसू लाजरे जीयावतेरा
38ईसूराः जीव अरू कुंभलावनेनखन हाँय मड़गटरेय सेनेडा। हना मड़गट मीटोंग लात दोहोना अरू मीटोंग दिरितेकू कोलोंग रेडतेरा।
39दो ईसू कतातेड, “दिरि चलाःगेपे।”
गोएगतो होड़रीग मेसेत मारता ईसू एचेरेय कताया, “ने परबू, नाँय गोएगकियान अते तिसिंग चइर दिन होयायना अरू सोःओ सिड़िगतनाय।”
40दो ईसू कतातेड, “आम बिसवासगे दो भगवान तुमिन मरंग इदानिया, हनाम ञेलता, माःआन आम एचेरे मेरिंग कतागाड जा?”
41हनते हँकू हना दिरिकू चलाः एंडागोतेड। हनते ईसू संगीलतेडखन भगवान एचेरेय अरजीतेरा, “ने अपांग, आम ईंगराः कताम अयूमगोतेडा। हनालगा ईंग आमिंग जागतना। 42अरू ईंग सुदीयतना, आम सगर बेला ईंगराः कताम अयुमेता। मनदो नंडा इदानकुःआ हँकुःआ होड़कू आम ईंगमे वारकेरा हनाकू बिसवासगे लगा नाःआ इयायिंग कतायतना।”
43नाःआ इया कतातेडखन मुरुक सटीते ईसू कतातेरा, “ने लाजर, उडुंग वेगमे।” 44अरू गोएगतोय दोहोना हाँयग होड़ कफन सोनहेते तिःईत कटात जमा मोड़हाव रेडतोय उडुंग वेगयान अरू हाँयराः सुरइत मीटोंग सेतराते तोल रेडतो दोहोना।
दो हँकुःआ होड़कू एचेरे ईसू कतातेड, “नाँय लड़ाकिडिगखन सेने ओवायपे।”
ईसू ञेड गोजेय लगा बुइद
(मती 26:1-5; मरकूस 14:1,2; लूका 22:1,2)
45हना तयोमरे मरियम सुदाकू वेजेडा हँकुःआ एहूदाकू अते मुरुक होड़कू ईसू एचेतेरा हना बुता ञेलतेडखन हाँय एचेरेकू बिसवासतेरा। 46मनदो हँकू अते अदोम होड़कू फरीसी होड़कू एचेरे सेनेडखन ईसू एचेतेरा हना हँकू एचेरेकू कता उदुःगोतेड। 47हनते मरंग पुजउरीकू अरू फरीसी होड़कू अँकूराः मरंग पंचाइत राःतेडखनकू कताया, “अबू नाँय करा इयाबू करजेय? नाँयग होड़ दो मुरुक बयाव जुवाः इयाःआ बुताकूने एचेयतना। 48अबू नाँय ननन इयाबू इकाहाय दो मुरुक होड़कू नाँय एचेरेकू बिसवासगोडता। अरू रूमी देसरिकुःआ सइना होड़कू वेगकियानखन अबू जइतरिकुःआ होड़कू अरू भगवानराः ओड़ाःकू लाय एंडागोडता।”
49दो हँकू अते मी होड़ दोहोना कइपा। हाँय हना मेलायीग मूक पुजउरी होड़े दोहोना अरू हाँय हँकू एचेरेय कतातेड, “अपे कहिसाः मेरपे सुदीयतना। 50मीटोंग जइतरिकुःआ जमा होड़कू गुजुः अते हँकू बदलारे मी होड़ गुजुः दो अबू लगा नपाय हवे माःआन मेरपे सुदीयतना जा?”
51नाःआ कता हाँय अनँयग ओंगोलते मेरेय कतागाड, मनदो हाँय हना मेलारीग मूक पुजउरी होड़े दोहोना अरू दरवाःआ हना कताय कता उदुःकेरा, ईसू जमा एहूदाकू लगाय गुजुःता, माःआन। 52एहूदाकू एकला लगा कोवान मनदो सितिर बितिरयनाकू हँकुःआ भगवानरिकुःआ जमा होड़कू एचे जुमावकेडखन मिनीगोडकू लगा होंय गुजुःता। 53दो हना अते हँकुःआ एहूदाकूरिकुःआ मूक होड़कू ईसू ञेड गोजेय लगा बुइदकू तुलाःआ।
54हनालगा ईसू हना बेला वरी एहूदाकू अते ओनोक दनंगरेय सेना। अरू हाँय टयंगाब ततेरराः लेसानरे दोहोना हना इपरइम सहररेय सेनेडा। हंडा हाँय आँयग चेलाकू सुदाय दोहोना।
55पसहा परोब लेनेसान सुदुरुःआ अरू मुरुक होड़कू अँननकू अँकू सुदगुः लगा परोब अते मड़ंग गाँव डीहकून अते एरुसलेम सहरकू सेनेडा। 56हँकुःआ होड़कू ईसूकू ञामा अरू भगवानराः ओड़ाःरे चड़ाँनेनखन अँननकू अँकू कता होड़ेंगा, “अपे चेले माःआनपे ओंगलेयतना? हाँय परोबरे ओरोय वेजेडा जा?” 57मनदो मरंग पुजउरीकू अरू फरीसी होड़कू ईसूकू साब लगा नाःआ इयाकू हुकुम अटूतेरा, ईसू करे इदानिया हना तोनोंगीग होड़ सुदीय दो, हाँय अले एचेरेय उदुःगे, माःआन।
S'ha seleccionat:
एहुना 11: kfp
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.